1 Chronicles 18

Lao Bible 2012 (ພຣະຄຳພີສັກສິ)

← Chapter 17 Jump to: Chapter 19 →

1ຕໍ່ມາ ກະສັດດາວິດໄດ້ໂຈມຕີພວກຟີລິດສະຕິນອີກ ແລະໄດ້ຮົບຊະນະພວກເຂົາ. ເພິ່ນໄດ້ຢຶດເອົາເມືອງກາດ ແລະໝູ່ບ້ານທີ່ຢູ່ອ້ອມແອ້ມນັ້ນ.

2ເພິ່ນຍັງໄດ້ເອົາຊະນະຊາວໂມອາບ. ພວກເຂົາໄດ້ຕົກຢູ່ໃຕ້ອຳນາດຂອງເພິ່ນ ແລະໄດ້ເສຍສ່ວຍໃຫ້ເພິ່ນ.

3ຕໍ່ມາ ກະສັດດາວິດໄດ້ໂຈມຕີກະສັດຮາດາເດເຊແຫ່ງຊີເຣຍຂອງໂຊບາ ເພາະຮາດາເດເຊພະຍາຍາມຢຶດເອົາເຂດແດນທາງດ້ານເໜືອຂອງແມ່ນໍ້າເອີຟຣັດ.

4ກະສັດດາວິດຢຶດລົດຮົບໄດ້ພັນຄັນ ແລະຈັບທະຫານມ້າໄດ້ເຈັດພັນຄົນ ແລະທະຫານລາບຊາວພັນຄົນ, ແຕ່ເພິ່ນຮັກສາມ້າແລະລົດຮົບໄວ້ພຽງແຕ່ຮ້ອຍຄັນເທົ່ານັ້ນ ແລະສ່ວນມ້າທີ່ເຫຼືອນັ້ນເພິ່ນຕັດເອັນຄະໜ່ອງໝົດ.

5ເມື່ອຊາວຊີເຣຍແຫ່ງດາມັສກັດໄດ້ສົ່ງກອງທັບມາຊ່ວຍກະສັດຮາດາເດເຊແຫ່ງໂຊບາ ກະສັດດາວິດກໍດັກໂຈມຕີ ແລະຂ້າທະຫານຊາວສອງພັນຄົນ.

6ແລ້ວເພິ່ນກໍຕັ້ງຄ້າຍທະຫານຢູ່ໃນເຂດແດນຂອງພວກເຂົາ. ພວກເຂົາໄດ້ຕົກຢູ່ໃຕ້ອຳນາດຂອງເພິ່ນ ແລະໄດ້ເສຍສ່ວຍໃຫ້ເພິ່ນ. ພຣະເຈົ້າຢາເວໄດ້ໃຫ້ກະສັດດາວິດເອົາຊະນະທຸກໆບ່ອນ.

7ກະສັດດາວິດໄດ້ຢຶດເອົາໂລ້ຄຳ ຊຶ່ງຂ້າຣາຊການຂອງກະສັດຮາດາເດເຊໄດ້ຖືໄປນຳນັ້ນ ມາທີ່ນະຄອນເຢຣູຊາເລັມ.

8ເພິ່ນໄດ້ຂົນເອົາທອງສຳຣິດເປັນຈຳນວນຫລວງຫລາຍ ມາຈາກເມືອງຕິບຮາດ ແລະເມືອງກູນ ຊຶ່ງຢູ່ພາຍໃຕ້ການປົກຄອງຂອງກະສັດຮາດາເດເຊ. (ຕໍ່ມາ ກະສັດໂຊໂລໂມນໄດ້ເອົາທອງສຳຣິດເຫຼົ່ານີ້ມາເຮັດຖັງນໍ້າ, ເສົາ ແລະເຄື່ອງໃຊ້ຕ່າງໆສຳລັບພຣະວິຫານ.)

9ກະສັດໂຕອີແຫ່ງຮາມັດໄດ້ຍິນວ່າ ກະສັດດາວິດໄດ້ເອົາຊະນະກອງທັບທັງໝົດຂອງກະສັດຮາດາເດເຊແຫ່ງໂຊບາ.

10ສະນັ້ນ ເພິ່ນຈຶ່ງສົ່ງຮາໂດຣາມ ລູກຊາຍຂອງເພິ່ນມາອວຍພອນກະສັດດາວິດ ແລະສະແດງຄວາມດີໃຈນຳທີ່ເພິ່ນໄດ້ເອົາຊະນະກະສັດຮາດາເດເຊ ຜູ້ທີ່ເຈົ້າໂຕອີໄດ້ສູ້ຮົບມາຕັ້ງຫລາຍຄັ້ງແລ້ວ. ເພິ່ນໄດ້ນຳຂອງຂວັນທີ່ເຮັດດ້ວຍຄຳ, ເງິນ ແລະທອງສຳຣິດມາມອບໃຫ້ກະສັດດາວິດ.

11ກະສັດດາວິດໄດ້ຖວາຍສິ່ງເຫຼົ່ານີ້ແກ່ພຣະເຈົ້າຢາເວພ້ອມດ້ວຍເງິນ ແລະຄຳ ທີ່ເພິ່ນຢຶດມາໄດ້ຈາກຊົນຊາດຕ່າງໆ ເປັນຕົ້ນໄດ້ມາແຕ່ເອໂດມ, ໂມອາບ, ອຳໂມນ, ຟີລິດສະຕິນ ແລະອາມາເຫຼັກ.

12ອາບີໄຊ ລູກຊາຍນາງເຊຣູອີຢາໄດ້ເອົາຊະນະຊາວເອໂດມຢູ່ໃນຮ່ອມພູເກືອ ໂດຍໄດ້ຂ້າສັດຕູ ສິບແປດພັນຄົນ.

13ລາວໄດ້ຕັ້ງຄ້າຍທະຫານຢູ່ທົ່ວດິນແດນເອໂດມ ແລະປະຊາຊົນໃນທີ່ນັ້ນໄດ້ຕົກຢູ່ໃຕ້ອຳນາດຂອງກະສັດດາວິດ. ພຣະເຈົ້າຢາເວໄດ້ໃຫ້ກະສັດດາວິດຮົບຊະນະ ໃນທຸກທີ່ທຸກບ່ອນທີ່ເພິ່ນໄດ້ໄປ.

14ກະສັດດາວິດໄດ້ປົກຄອງທົ່ວທັງປະເທດອິດສະຣາເອນ ແລະໃຫ້ປະຊາຊົນຂອງຕົນໄດ້ຮັບຄວາມທ່ຽງທຳ ແລະຄວາມຍຸດຕິທຳສະເໝີມາ.

15ໂຢອາບ ອ້າຍຂອງອາບີໄຊເປັນຜູ້ບັນຊາການທະຫານ; ເຢໂຮຊາຟັດ ລູກຊາຍຂອງອາຮີລຸດເປັນຜູ້ຮັບຜິດຊອບບັນທຶກ;

16ຊາດົກລູກຊາຍຂອງອາຮີຕຸບ ແລະອາຮີເມເຫຼັກລູກຊາຍຂອງອາບີອາທາ ທັງສອງຄົນເປັນປະໂຣຫິດ; ເສຣາອີຢາ ເປັນເລຂາທິການປະຈຳຣາຊສຳນັກ;

17ເບນາອີຢາລູກຊາຍຂອງເຢໂຮຍອາດາເປັນຫົວໜ້າຊາວເກເຣັດແລະຊາວເປເລັດ; ແລະບັນດາລູກຊາຍຂອງກະສັດດາວິດດຳລົງຕຳແໜ່ງສູງເພື່ອຮັບໃຊ້ພໍ່ຂອງຕົນ.

← Chapter 17 Jump to: Chapter 19 →