1 Chronicles 19

Lao Bible 2012 (ພຣະຄຳພີສັກສິ)

← Chapter 18 Jump to: Chapter 20 →

1ຕໍ່ມາ ນາຮາດກະສັດແຫ່ງອຳໂມນໄດ້ຕາຍໄປ ແລະຮານູນລູກຊາຍຂອງເພິ່ນໄດ້ຂຶ້ນເປັນກະສັດແທນ.

2ກະສັດດາວິດຈຶ່ງເວົ້າວ່າ, “ເຮົາຕ້ອງສະແດງຄວາມເປັນມິດອັນສັດຊື່ຕໍ່ຮານູນ ດັ່ງທີ່ນາຮາດພໍ່ຂອງລາວໄດ້ປະຕິບັດຕໍ່ເຮົາ.” ດັ່ງນັ້ນ ເພິ່ນຈຶ່ງສົ່ງຄະນະທູດໄປສະແດງຄວາມເສົ້າໂສກເສຍໃຈ ແລະໄວ້ອາໄລນຳ. ເມື່ອຄະນະທູດໄດ້ມາຮອດນະຄອນອຳໂມນ ແລະຂໍເຂົ້າພົບກະສັດຮານູນ

3ພວກຜູ້ນຳຊາວອຳໂມນຈຶ່ງໄປບອກກະສັດວ່າ, “ທ່ານຄິດວ່າກະສັດດາວິດສົ່ງຄະນະທູດ ມາສະແດງການໄວ້ອາໄລນຳທ່ານໃນເວລານີ້ ເພື່ອເປັນການໃຫ້ກຽດພໍ່ຂອງທ່ານບໍ? ແນ່ນອນບໍ່ແມ່ນດອກ ເພິ່ນສົ່ງພວກເຂົາມາທີ່ນີ້ເພື່ອສອດແນມເບິ່ງເມືອງຂອງພວກເຮົາ ເພື່ອວ່າເພິ່ນຈະສາມາດຮົບຊະນະພວກເຮົາໄດ້.”

4ດັ່ງນັ້ນ ຮານູນຈຶ່ງຈັບຄະນະທູດຂອງກະສັດດາວິດ ແລະຕັດໜວດຂ້າງໜຶ່ງອອກ ທັງຕັດຂາສົ້ງຈົນຈຳກະໂພກ ແລະສົ່ງພວກເຂົາກັບຄືນເມືອ.

5ພວກເຂົາອັບອາຍຫລາຍຈົນບໍ່ກ້າກັບຄືນເມືອ. ເມື່ອກະສັດດາວິດໄດ້ຍິນເຖິງເລື່ອງທີ່ເກີດຂຶ້ນ ເພິ່ນຈຶ່ງສັ່ງຄວາມໄປບອກພວກເຂົາໃຫ້ພັກຢູ່ເມືອງເຢຣິໂກ ແລະບໍ່ໃຫ້ກັບຄືນມາຈົນກວ່າໜວດປົ່ງເສຍກ່ອນ.

6ກະສັດຮານູນ ແລະຊາວອຳໂມນຮູ້ສຶກວ່າ ພວກຕົນໄດ້ສ້າງສັດຕູກັບກະສັດດາວິດແລ້ວ. ດັ່ງນັ້ນ ພວກເຂົາຈຶ່ງຈ່າຍເງິນປະມານສາມສິບສີ່ພັນກິໂລກຼາມ ເພື່ອຈ້າງເອົາລົດຮົບພ້ອມຄົນຂັບຈາກເມໂຊໂປຕາເມຍຕອນເທິງ ແລະຈາກນະຄອນມາອາກາ ແລະໂຊບາແຫ່ງຊີເຣຍ.

7ລົດຮົບສາມສິບສອງພັນຄັນ ທີ່ຖືກຈ້າງມາ ແລະກອງທັບຂອງກະສັດມາອາກາ ໄດ້ຕັ້ງຄ້າຍຢູ່ໃກ້ເມືອງເມເດບາ. ແລ້ວຊາວອຳໂມນກໍໄດ້ອອກມາຈາກເມືອງຕ່າງໆຂອງພວກເຂົາ ເພື່ອຕຽມສູ້ຮົບ.

8ເມື່ອກະສັດດາວິດໄດ້ຍິນສິ່ງທີ່ເກີດຂຶ້ນ ເພິ່ນຈຶ່ງສົ່ງໂຢອາບພ້ອມດ້ວຍກອງທັບທັງໝົດອອກໄປ.

9ພວກອຳໂມນເຄື່ອນທັບມາຕັ້ງທີ່ໝັ້ນຢູ່ທາງເຂົ້າຂອງຣັບບາ ເມືອງເອກຂອງພວກເຂົາ; ແລະບັນດາກະສັດທີ່ມາຊ່ວຍນັ້ນ ກໍຕັ້ງທີ່ໝັ້ນຂອງພວກຕົນຢູ່ນອກຕົວເມືອງ.

10ໂຢອາບໄດ້ເຫັນວ່າ ກອງທັບຂອງສັດຕູຈະໂຈມຕີທາງດ້ານໜ້າແລະດ້ານຫລັງ; ສະນັ້ນ ເພິ່ນຈຶ່ງເລືອກເອົາທະຫານອິດສະຣາເອນຜູ້ທີ່ເກັ່ງກ້າທີ່ສຸດ ໄປຕັ້ງທີ່ໝັ້ນຢູ່ປະເຊີນໜ້າກັບທະຫານຊີເຣຍ.

11ສ່ວນທະຫານທີ່ເຫຼືອນັ້ນ ເພິ່ນໄດ້ມອບໃຫ້ຢູ່ໃຕ້ການບັງຄັບບັນຊາຂອງອາບີໄຊນ້ອງຊາຍຂອງຕົນ. ລາວໄດ້ຕັ້ງທີ່ໝັ້ນຢູ່ປະເຊີນໜ້າກັບຊາວອຳໂມນ.

12ໂຢອາບເວົ້າກັບລາວວ່າ, “ຖ້າເຈົ້າເຫັນວ່າພວກຊີເຣຍເອົາຊະນະຂ້ອຍ ໃຫ້ເຈົ້າມາຊ່ວຍຂ້ອຍ. ແຕ່ຖ້າພວກອຳໂມນເອົາຊະນະເຈົ້າ ຂ້ອຍຈະໄປຊ່ວຍເຈົ້າ.

13ຈົ່ງເຂັ້ມແຂງແລະກ້າຫານ ໃຫ້ພວກເຮົາສູ້ຮົບຢ່າງເດັດດ່ຽວເພື່ອປະຊາຊົນຂອງພວກເຮົາ ແລະເພື່ອຫົວເມືອງຕ່າງໆຂອງພຣະເຈົ້າ. ຂໍໃຫ້ພຣະເຈົ້າຢາເວກະທຳການຂອງພຣະອົງດ້ວຍເທີ້ນ.”

14ແລ້ວໂຢອາບກັບທະຫານຂອງຕົນກໍຍົກທັບເຂົ້າໄປໂຈມຕີພວກຊີເຣຍ ແລະພວກເຂົາຕ່າງກໍແຕກພ່າຍໜີໄປ.

15ເມື່ອພວກອຳໂມນເຫັນວ່າພວກຊີເຣຍປົບໜີໄປແລ້ວ ພວກເຂົາກໍແລ່ນປົບໜີຈາກອາບີໄຊ ແລະຖອຍເຂົ້າໄປໃນເມືອງ. ແລ້ວໂຢອາບກໍກັບຄືນມາສູ່ນະຄອນເຢຣູຊາເລັມ.

16ພວກຊີເຣຍເຫັນວ່າ ພວກຕົນໄດ້ພ່າຍແພ້ໃຫ້ແກ່ພວກອິດສະຣາເອນແລ້ວ; ສະນັ້ນ ພວກເຂົາຈຶ່ງນຳເອົາກອງທະຫານມາຈາກເມືອງຕ່າງໆ ທີ່ຢູ່ທາງທິດຕາເວັນອອກຂອງແມ່ນໍ້າເອີຟຣັດ ແລະໃຫ້ຢູ່ໃຕ້ການບັນຊາຂອງໂຊບັກ ຜູ້ບັນຊາການກອງທັບຂອງກະສັດຮາດາເດເຊແຫ່ງໂຊບາ.

17ເມື່ອກະສັດດາວິດໄດ້ຍິນເຊັ່ນນັ້ນ ເພິ່ນຈຶ່ງຮວບຮວມເອົາທະຫານອິດສະຣາເອນທັງໝົດຂ້າມແມ່ນໍ້າຈໍແດນໄປ ແລະໄດ້ຕັ້ງທີ່ໝັ້ນຢູ່ປະເຊີນໜ້າກັບກອງທັບຊີເຣຍ. ການສູ້ຮົບກັນໄດ້ເລີ່ມຂຶ້ນ

18ແລະພວກອິດສະຣາເອນໄດ້ໄລ່ກອງທັບຊີເຣຍໃຫ້ລ່າຖອຍໜີໄປ. ກະສັດດາວິດ ແລະທະຫານຂອງເພິ່ນໄດ້ຂ້າທະຫານຂັບລົດຮົບເຈັດພັນຄົນ ແລະທະຫານລາບສີ່ສິບພັນຄົນ. ພວກເຂົາຍັງໄດ້ຂ້າໂຊບັກຜູ້ບັນຊາການກອງທັບຊີເຣຍດ້ວຍ.

19ເມື່ອພວກທີ່ຂຶ້ນກັບກະສັດຮາດາເດເຊເຫັນວ່າ ພວກຕົນໄດ້ພ່າຍແພ້ໃຫ້ແກ່ຊາດອິດສະຣາເອນແລ້ວ ຕ່າງກໍໄດ້ເຮັດສັນຍາສະຫງົບເສິກກັບກະສັດດາວິດ ແລະຍອມຢູ່ໃຕ້ອຳນາດການປົກຄອງຂອງເພິ່ນ. ພວກຊີເຣຍຈຶ່ງບໍ່ຍອມຊ່ວຍເຫລືອພວກອຳໂມນອີກຕໍ່ໄປຈັກເທື່ອ.

← Chapter 18 Jump to: Chapter 20 →