1 Chronicles 5

Lao Bible 2012 (ພຣະຄຳພີສັກສິ)

← Chapter 4 Jump to: Chapter 6 →

1ບຸກຄົນເຫຼົ່ານີ້ແມ່ນເຊື້ອສາຍຂອງຣູເບັນຜູ້ເປັນລູກຊາຍກົກຂອງຢາໂຄບ. (ຍ້ອນຣູເບັນໄດ້ລັກນອນນຳເມຍນ້ອຍຄົນໜຶ່ງຂອງພໍ່ຕົນ ລາວຈຶ່ງໄດ້ສູນເສຍສິດການເປັນອ້າຍກົກ ແລະສິດນັ້ນໄດ້ຖືກມອບໝາຍໃຫ້ແກ່ໂຢເຊັບ.

2ແຕ່ຢ່າງໃດກໍດີ ແມ່ນເຜົ່າຢູດາທີ່ໄດ້ເຂັ້ມແຂງທີ່ສຸດ ແລະໃຫ້ຜູ້ປົກຄອງຄົນໜຶ່ງສືບມາຈາກເຜົ່ານີ້ແກ່ເຜົ່າທັງໝົດ.)

3ຣູເບັນລູກຊາຍກົກຂອງຢາໂຄບມີລູກຊາຍສີ່ຄົນ ດັ່ງນີ້: ຮານົກ, ປານລູ, ເຮຊະໂຣນ ແລະການໝີ.

4ບຸກຄົນເຫຼົ່ານີ້ແມ່ນເຊື້ອສາຍຂອງໂຢເອນ, ແຕ່ເຊັ່ນໜຶ່ງຫາເຊັ່ນໜຶ່ງ ດັ່ງນີ້: ເຊມາອີຢາ, ໂກກ, ຊີເມອີ,

5ມີກາ, ເຣອາອີຢາ, ບາອານ ແລະເບເອຣາ.

6ຕີກະລາດປີເລເສກະສັດແຫ່ງອັດຊີເຣຍໄດ້ຈັບເບເອຣາ ຜູ້ເປັນຫົວໜ້າເຜົ່າຣູເບັນແລະໄດ້ເອົາລາວໄປເປັນຊະເລີຍ.

7ບັນທຶກສຳມະໂນຄົວຂອງຕະກຸນຕ່າງໆໃນເຜົ່າຣູເບັນ ມີດັ່ງນີ້: ເຢອີເອນ, ເຊກາຣີຢາ,

8ແລະເບລາລູກຊາຍຂອງອາສາ ແລະຫລານຊາຍເຊມາໃນຕະກຸນໂຢເອນ. ຕະກຸນນີ້ໄດ້ອາໄສຢູ່ທີ່ອາໂຣເອແລະທີ່ເຂດແດນ, ແຕ່ຕອນເໜືອໄປເຖິງເນໂບແລະບາອານເມໂອນ.

9ພວກເຂົາມີຝູງສັດຢ່າງຫລວງຫລາຍໃນດິນແດນກີເລອາດ. ດັ່ງນັ້ນ ພວກເຂົາຈຶ່ງເຂົ້າຢຶດເອົາດິນແດນທາງທິດຕາເວັນອອກ ໄກໄປຈົນເຖິງຖິ່ນແຫ້ງແລ້ງກັນດານແລະເລີຍໄປຈຸແມ່ນໍ້າເອີຟຣັດ.

10ໃນສະໄໝຂອງກະສັດໂຊນ ເຜົ່າຣູເບັນໄດ້ໂຈມຕີພວກຮັກກິດ, ສັງຫານພວກເຂົາໃນສະໜາມຮົບ ແລະຢຶດຄອງເອົາດິນແດນຂອງພວກເຂົາໃນພາກຕາເວັນອອກຂອງກີເລອາດ.

11ເຜົ່າກາດໄດ້ອາໄສຢູ່ທາງພາກເໜືອເຜົ່າຣູເບັນໃນດິນແດນຂອງບາຊານ ຈົນໄປເຖິງພາກຕາເວັນອອກສຸດຂອງສາເລກາ.

12ໂຢເອນເປັນຕົ້ນຕະກຸນທີ່ສຳຄັນທີໜຶ່ງ ແລະຊາຟາມເປັນຕະກຸນສຳຄັນທີສອງ. ຢານາຍແລະຊາຟັດໄດ້ເປັນຕົ້ນຕະກຸນອື່ນໆອີກໃນບາຊານ.

13ບັນດາສະມາຊິກອື່ນໆຂອງເຜົ່າລວມເປັນເຈັດຕະກຸນ ມີດັ່ງນີ້: ມີກາເອນ, ເມຊຸນລຳ, ເຊບາ, ໂຢຣາຍ, ຢາການ, ຊີອາ ແລະເອເບ.

14ພວກເຂົາແມ່ນເຊື້ອສາຍຂອງອາບີໄຮ ລູກຊາຍຂອງຮູຣິ. ປູ່ຍ່າຕາຍາຍຂອງພວກເຂົາເມື່ອໄລ່ຄືນຫລັງ ມີດັ່ງນີ້: ອາບີໄຮເປັນລູກຊາຍຂອງຮູຣິ, ຮູຣິເປັນລູກຊາຍຂອງຢາໂຣອາ, ຢາໂຣອາເປັນລູກຊາຍຂອງກີເລອາດ, ກີເລອາດເປັນລູກຊາຍຂອງມີກາເອນ, ມີກາເອນເປັນລູກຊາຍຂອງເຢຊີຊາຍ, ເຢຊີຊາຍເປັນລູກຊາຍຂອງຢາໂດ, ຢາໂດເປັນລູກຊາຍຂອງບູເຊ.

15ອາຮີ ລູກຊາຍຂອງອັບດີເອນແລະຫລານຊາຍຂອງກູນີ ເປັນຫົວໜ້າຂອງຕະກຸນເຫຼົ່ານັ້ນ.

16ພວກເຂົາໄດ້ອາໄສໃນເຂດແດນບາຊານແລະກີເລອາດ ໃນເມືອງທັງຫລາຍໃນທີ່ນັ້ນແລະຕາມທົ່ງຫຍ້າຂອງຊາໂຣນ.

17ບັນທຶກເຫຼົ່ານີ້ໄດ້ຖືກຮິບໂຮມໄວ້ໃນສະໄໝຂອງກະສັດໂຢທາມແຫ່ງຢູດາຍ ແລະກະສັດເຢໂຣໂບອາມແຫ່ງອິດສະຣາເອນ.

18ໃນເຜົ່າຣູເບັນ, ກາດ ແລະມານາເຊເຄິ່ງເຜົ່າ ມີທະຫານທີ່ຝຶກແອບຢ່າງດີໃນການໃຊ້ໂລ້, ດາບ ແລະທະນູຈຳນວນສີ່ສິບສີ່ພັນເຈັດຮ້ອຍຫົກສິບຄົນ.

19ພວກເຂົາໄດ້ເຮັດເສິກຕໍ່ສູ້ພວກຮັກກິດຂອງເຜົ່າເຢຕູເຣ, ນາຟິດ ແລະໂນດາບ.

20ພວກເຂົາໄວ້ວາງໃຈໃນພຣະເຈົ້າ ແລະພາວັນນາອະທິຖານຂໍພຣະອົງຊ່ວຍເຫລືອ ແລະພຣະເຈົ້າໄດ້ຕອບຄຳພາວັນນາອະທິຖານຂອງພວກເຂົາ; ພຣະອົງໃຫ້ພວກເຂົາເອົາຊະນະພວກຮັກກິດແລະພັນທະມິດ.

21ພວກເຂົາໄດ້ຢຶດມາຈາກພວກສັດຕູ ມີດັ່ງນີ້: ອູດຫ້າສິບພັນໂຕ, ແກະສອງຮ້ອຍຫ້າສິບພັນໂຕ ແລະລໍສອງພັນໂຕ ພ້ອມທັງຊະເລີຍເສິກອີກໜຶ່ງແສນຄົນ.

22ພວກເຂົາໄດ້ຂ້າສັດຕູຢ່າງຫລວງຫລາຍ ເພາະການເຮັດເສິກຄັ້ງນີ້ແມ່ນພຣະເຈົ້າພໍໃຈໃຫ້ເຮັດ ແລະພວກເຂົາໄດ້ເຂົ້າໄປອາໄສຢູ່ໃນດິນແດນນີ້ ຈົນຖືກກວາດໄປເປັນຊະເລີຍໃນຕ່າງຖິ່ນ.

23ປະຊາຊົນມານາເຊເຄິ່ງເຜົ່າຕາເວັນອອກໄດ້ຕັ້ງຖິ່ນຖານຢູ່ທີ່ເຂດແດນຂອງບາຊານ ຈົນໄປເຖິງພາກເໜືອຂອງບາອານເຮີໂມນ, ເສນີ ແລະທີ່ພູເຮີໂມນ; ແລະປະຊາຊົນຂອງພວກເຂົາໄດ້ເພີ່ມຂຶ້ນຢ່າງຫລວງຫລາຍ.

24ບຸກຄົນດັ່ງຕໍ່ໄປນີ້ແມ່ນຫົວໜ້າຂອງຕະກຸນຕ່າງໆມີດັ່ງນີ້: ເອເຟ, ອີຊີ, ເອລີເອນ, ອາຊະຣິເອນ, ເຢເຣມີຢາ, ໂຮດາວີຢາ ແລະຢາດີເອນ. ພວກເຂົາທັງໝົດເປັນທະຫານທີ່ເກັ່ງກ້າແລະເປັນຜູ້ນຳຕະກຸນທີ່ມີຊື່ສຽງດີ.

25ແຕ່ປະຊາຊົນບໍ່ສັດຊື່ຕໍ່ພຣະເຈົ້າຂອງປູ່ຍ່າຕາຍາຍພວກເຂົາ ແລະໄດ້ປະຖິ້ມພຣະອົງໄປຂາບໄຫວ້ບັນດາພະຊົນຊາດອື່ນ ທີ່ພຣະເຈົ້າໄດ້ຂັບໄລ່ໜີອອກໄປຈາກດິນແດນ.

26ດັ່ງນັ້ນ ພຣະເຈົ້າຈຶ່ງບັນດານໃຫ້ກະສັດປູນແຫ່ງອັດຊີເຣຍ (ມີຊື່ອື່ນອີກວ່າ ຕີກະລາດປີເລເສ) ມາຮຸກຮານປະເທດຂອງພວກເຂົາ. ເພິ່ນໄດ້ຈັບເຜົ່າຣູເບັນ, ກາດ, ມານາເຊເຄິ່ງເຜົ່າຕາເວັນອອກໄປເປັນຊະເລີຍ ແລະໃຫ້ພວກເຂົາໄດ້ຕັ້ງຫຼັກແຫຼ່ງຢູ່ໃນຮາລາ, ຮາບໍ ແລະຮາຣາ ແລະຕາມລຳແມ່ນໍ້າໂກຊານຈົນເຖິງທຸກວັນນີ້.

← Chapter 4 Jump to: Chapter 6 →