1 Chronicles 26

Lao Bible 2012 (ພຣະຄຳພີສັກສິ)

← Chapter 25 Jump to: Chapter 27 →

1ຄົນເລວີເຫຼົ່ານີ້ມີໜ້າທີ່ເຝົ້າຍາມພຣະວິຫານ. ຈາກຕະກຸນຂອງໂກຣາແມ່ນເມເຊເລມີຢາ ລູກຊາຍຂອງໂກເຣໃນຄອບຄົວຂອງອາສັບ.

2ລາວມີລູກຊາຍເຈັດຄົນຕາມລຳດັບອາຍຸ ດັ່ງນີ້: ເຊກາຣີຢາ, ເຢດີອາເອນ, ເຊບາດີຢາ, ຢາທະນິເອນ,

3ເອລາມ, ເຢໂຮຮານານ ແລະເອລີເອໂຮນາຍ.

4ພຣະເຈົ້າໄດ້ອວຍພອນໂອເບັດເອໂດມໃຫ້ມີລູກຊາຍແປດຄົນ ຕາມລຳດັບອາຍຸ ດັ່ງນີ້: ເຊມາອີຢາ, ເຢໂຮຊາບັດ, ໂຢອາ, ສາກາ, ເນທາເນນ,

5ອາມມີເອນ, ອິດຊາຄາ ແລະເປອູນເລໄທ.

6ເຊມາອີຢາ ລູກຊາຍກົກຂອງໂອເບັດເອໂດມມີລູກຊາຍຫົກຄົນດັ່ງນີ້: ໂອທະນີ, ເຣຟາເອນ, ໂອເບັດ, ເອນຊາບັດ, ເອລີຮູ ແລະເສມາກີຢາ. ພວກເຂົາເປັນຄົນສຳຄັນໃນຕະກຸນເພາະພວກເຂົາມີຄວາມສາມາດສູງ; ສອງຄົນສຸດທ້າຍນີ້ຍິ່ງມີຄວາມສາມາດເລີດ.

8ຄອບຄົວຂອງໂອເບັດເອໂດມສືບທອດ ຜູ້ມີຄວາມສາມາດສູງໃຫ້ທັງໝົດຫົກສິບສອງຄົນ ເພື່ອປະກອບສ່ວນເຂົ້າໃນວຽກງານດ້ານນີ້.

9ຄອບຄົວຂອງເມເຊເລມີຢາ ສືບທອດຜູ້ມີຄວາມສາມາດໃຫ້ ສິບແປດຄົນ.

10ໂຮສາ ຈາກຕະກຸນເມຣາຣີ ມີລູກຊາຍສີ່ຄົນດັ່ງນີ້: ຊີມຣີ (ພໍ່ຂອງລາວໄດ້ຕັ້ງລາວໃຫ້ເປັນຫົວໜ້າ ເຖິງແມ່ນວ່າບໍ່ແມ່ນອ້າຍກົກກໍຕາມ),

11ຮິນກີຢາ, ເຕບາລີຢາ ແລະເຊກາຣີຢາ. ສະມາຊິກທັງໝົດໃນຄອບຄົວຂອງໂຮສາທີ່ເປັນຜູ້ເຝົ້າຍາມພຣະວິຫານມີສິບສາມຄົນ.

12ຄົນເຝົ້າຍາມໃນວິຫານຂອງພຣະເຈົ້າຢາເວໄດ້ຖືກແບ່ງອອກເປັນໝວດຕາມຄອບຄົວ ແລະພວກເຂົາໄດ້ຖືກມອບໝາຍໜ້າທີ່ໃນພຣະວິຫານດັ່ງຄົນເລວີອື່ນໆ.

13ແຕ່ລະຄອບຄົວຈະໃຊ້ສະຫລາກເອົາ ວ່າຕົນຈະຮັບຜິດຊອບປະຕູດ້ານໃດ ໂດຍບໍ່ຄຳນືງເຖິງວ່າຄອບຄົວມີຄົນຫລາຍ ຫລືຄົນໜ້ອຍ.

14ເຊເລມີຢາ ຮັບສະຫລາກຖືກປະຕູດ້ານຕາເວັນອອກ ແລະເຊກາຣີຢາລູກຊາຍຂອງເພິ່ນ ຜູ້ໃຫ້ຄຳປຶກສາທີ່ດີຕະຫລອດມາ ກໍໄດ້ຮັບສະຫລາກຖືກປະຕູດ້ານເໜືອ.

15ໂອເບັດເອໂດມ ໄດ້ຮັບສະຫລາກຖືກປະຕູດ້ານໃຕ້ ແລະພວກລູກຊາຍຂອງລາວໄດ້ຮັບສະຫລາກຖືກເຝົ້າຍາມຫ້ອງເກັບເຄື່ອງ.

16ຊຸບປິມແລະໂຮສາ ໄດ້ຮັບສະຫລາກຖືກປະຕູດ້ານຕາເວັນຕົກ ແລະປະຕູຊັນເລເກັດທີ່ຖະໜົນຂ້າງເທິງ. ໜ້າທີ່ເຝົ້າຍາມນັ້ນໄດ້ຖືກແບ່ງຜຽນ ເຂົ້າຮັບໜ້າທີ່ສືບຕໍ່ກັນໄປ.

17ທາງດ້ານຕາເວັນອອກ ແຕ່ລະວັນມີຄົນເຝົ້າຍາມຫົກຄົນ; ທາງດ້ານເໜືອມີສີ່ຄົນ ແລະທາງດ້ານໃຕ້ມີສີ່ຄົນ. ທີ່ຫ້ອງໄວ້ເຄື່ອງມີຄົນເຝົ້າຍາມສີ່ຄົນ ຫ້ອງລະສອງຄົນ.

18ບ່ອນໃກ້ຕຶກທາງດ້ານຕາເວັນຕົກມີຄົນເຝົ້າຍາມສີ່ຄົນ ທີ່ຖະໜົນມີສອງຄົນ ແລະທີ່ຕົວຕຶກມີສອງຄົນ.

19ອັນນີ້ແມ່ນການມອບໝາຍໜ້າທີ່ເຝົ້າຍາມ ໃຫ້ແກ່ຕະກຸນໂກຣາ ແລະເມຣາຣີ.

20ຊາວເລວີອື່ນໆ ມີໜ້າທີ່ເບິ່ງແຍງຄັງຂອງວິຫານຂອງພຣະເຈົ້າ ແລະຫ້ອງໄວ້ຂອງທີ່ໄດ້ອຸທິດຖວາຍແລ້ວ.

21ລາດານ ລູກຊາຍຜູ້ໜຶ່ງຂອງເກໂຊນເປັນບັນພະບຸລຸດຄອບຄົວຕາມໝວດຕ່າງໆ ລວມທັງຄອບຄົວຂອງເຢຮີເອລີ ລູກຊາຍຂອງຕົນ.

22ລູກຊາຍອີກສອງຄົນຂອງລາດານ ເຊດທາມແລະໂຢເອນ ເປັນຜູ້ເບິ່ງແຍງຄັງວິຫານຂອງພຣະເຈົ້າຢາເວແລະຫ້ອງໄວ້ເຄື່ອງ.

23ໜ້າທີ່ຕ່າງໆນີ້ຍັງໄດ້ຖືກມອບໝາຍໃຫ້ເຊື້ອສາຍຂອງອຳຣາມ, ອີຊະຮາ, ເຮັບໂຣນ ແລະອຸດຊີເອນ.

24ເຊບູເອນ ຄົນໃນຕະກຸນເກໂຊມ ຜູ້ທີ່ເປັນລູກຊາຍຂອງໂມເຊ ໄດ້ເປັນຫົວໜ້າເຈົ້າໜ້າທີ່ຮັບຜິດຊອບຄັງຂອງພຣະວິຫານ.

25ໂດຍເປັນດອງກັນກັບເອລີເອເຊນ້ອງຊາຍຂອງເກໂຊມ ລາວຈຶ່ງເປັນພີ່ນ້ອງກັບເຊໂລມິດ. ເອລີເອເຊເປັນພໍ່ຂອງເຣຮາບີຢາ, ເຣຮາບີຢາເປັນພໍ່ຂອງເຢຊາອີຢາ, ເຢຊາອີຢາເປັນພໍ່ຂອງໂຢຣາມ, ໂຢຣາມເປັນພໍ່ຂອງຊີກະຣີ, ຊີກະຣີເປັນພໍ່ຂອງເຊໂລມິດ.

26ເຊໂລມິດ ແລະສະມາຊິກໃນຄອບຄົວຂອງລາວ ເປັນຜູ້ເບິ່ງແຍງເຄື່ອງຖວາຍທັງໝົດທີ່ກະສັດດາວິດ, ບັນດາຫົວໜ້າຄອບຄົວຕ່າງໆ, ບັນດາຜູ້ນຳຕະກຸນໃນໝວດຕ່າງໆ ແລະບັນດານາຍທະຫານໃນກອງທັບໄດ້ອຸທິດຖວາຍ.

27ພວກເຂົານຳເອົາຂອງທີ່ຢຶດໄດ້ຈາກສະໜາມຮົບ ແລະອຸທິດຖວາຍສິ່ງເຫຼົ່ານັ້ນເພື່ອໃຊ້ໃນວິຫານຂອງພຣະເຈົ້າຢາເວ.

28ເຊໂລມິດກັບຄອບຄົວຂອງລາວເປັນຜູ້ເບິ່ງແຍງທຸກສິ່ງ ທີ່ໄດ້ອຸທິດຖວາຍເພື່ອໃຊ້ໃນພຣະວິຫານ ລວມທັງເຄື່ອງຖວາຍ ຊຶ່ງຜູ້ທຳນວາຍຊາມູເອນ, ກະສັດໂຊນລູກຊາຍຂອງກີເຊ, ອັບເນລູກຊາຍຂອງເນຣະ ແລະໂຢອາບລູກຊາຍຂອງນາງເຊຣູອີຢາ ໄດ້ນຳມາຖວາຍ.

29ໃນຈຳນວນເຊື້ອສາຍຂອງອີຊະຮານັ້ນ ເກນານີຢາກັບລູກຊາຍຂອງລາວ ໄດ້ຖືກມອບໝາຍໜ້າທີ່ການບໍລິຫານພາຍນອກສຳລັບຊາວອິດສະຣາເອນຄື: ເປັນເຈົ້າໜ້າທີ່ ແລະຜູ້ຕັດສິນ.

30ໃນຈຳນວນເຊື້ອສາຍຂອງເຮັບໂຣນນັ້ນ ຮາຊາບີຢາ ແລະພີ່ນ້ອງຂອງລາວ ໜຶ່ງພັນເຈັດຮ້ອຍຄົນ ລ້ວນແຕ່ເດັ່ນໆທັງນັ້ນ ເຮັດໜ້າທີ່ບໍລິຫານຈັດການວຽກງານຂອງພຣະເຈົ້າຢາເວ ພິທີກຳແລະດ້ານພົນລະເຮືອນໃນປະເທດອິດສະຣາເອນ ທາງຝັ່ງຕາເວັນຕົກຂອງແມ່ນໍ້າຈໍແດນ.

31ເຢຣິຢາເປັນຫົວໜ້າໃນເຊື້ອສາຍຂອງເຮັບໂຣນ. (ໃນຣາຊການປີທີສີ່ສິບຂອງກະສັດດາວິດ ໄດ້ມີການສືບສວນເບິ່ງສາຍຄອບຄົວຂອງເຮັບໂຣນ ຕະຫລອດທັງທະຫານຜູ້ທີ່ເກັ່ງກ້າຂອງຄອບຄົວນີ້ ທີ່ຍັງມີຊີວິດຢູ່ທີ່ອາໄສຢູ່ຢາເຊໃນກີເລອາດ.)

32ກະສັດດາວິດໄດ້ເລືອກເອົາບັນດາຫົວໜ້າຄອບຄົວທີ່ເກັ່ງກ້າຈາກພີ່ນ້ອງຂອງເຢຣິຢາ ສອງພັນເຈັດຮ້ອຍຄົນ ເພື່ອໃຫ້ເຮັດໜ້າທີ່ບໍລິຫານທາງດ້ານກິດຈະການຂອງພຣະເຈົ້າ ແລະດ້ານພົນລະເຮືອນທ່າມກາງຊາວອິດສະຣາເອນທີ່ທາງຝັ່ງຕາເວັນອອກຂອງແມ່ນໍ້າຈໍແດນ ເຊັ່ນ: ໃນເຂດແດນຕ່າງໆຂອງຣູເບັນ, ກາດ ແລະມານາເຊເຄິ່ງເຜົ່າຕາເວັນອອກ.

← Chapter 25 Jump to: Chapter 27 →