1 Chronicles 13

Lao Bible 2012 (ພຣະຄຳພີສັກສິ)

← Chapter 12 Jump to: Chapter 14 →

1ກະສັດດາວິດໄດ້ປຶກສາກັບນາຍທະຫານ ທີ່ບັນຊາການກອງພັນແລະກອງຮ້ອຍທຸກຄົນ.

2ແລ້ວເພິ່ນກໍປະກາດຕໍ່ປະຊາຊົນອິດສະຣາເອນທັງໝົດວ່າ, “ຖ້າພວກທ່ານເຫັນດີ ແລະເປັນຄວາມປະສົງຂອງພຣະເຈົ້າຢາເວ ພຣະເຈົ້າຂອງພວກເຮົາ ກໍໃຫ້ພວກເຮົາໃຊ້ຄົນນຳຂ່າວເຫຼົ່ານີ້ອອກໄປບອກພີ່ນ້ອງຮ່ວມຊາດຂອງພວກເຮົາ ລວມກັບພວກປະໂຣຫິດແລະພວກເລວີໃນເມືອງຂອງພວກເຂົາ ໃຫ້ມາເຕົ້າໂຮມກັນທີ່ນີ້ກັບພວກເຮົາ.

3ແລ້ວພວກເຮົາກໍຈະພາກັນໄປເອົາຫີບຂອງພຣະເຈົ້າ ທີ່ໄດ້ຖືກລືມໃນຄາວໂຊນເປັນກະສັດນັ້ນ.”

4ປະຊາຊົນຕ່າງກໍຊົມຊື່ນຍິນດີແລະເຫັນພ້ອມດ້ວຍ.

5ສະນັ້ນ ກະສັດດາວິດຈຶ່ງໄດ້ເຕົ້າໂຮມປະຊາຊົນອິດສະຣາເອນຈາກທົ່ວປະເທດ ຄືຕັ້ງແຕ່ຊາຍແດນຊີໂຮເຣປະເທດເອຢິບດ້ານໃຕ້ ຈົນຮອດຊ່ອງແຄບຮາມັດທາງດ້ານເໜືອ ເພື່ອໄປເອົາຫີບຂອງພຣະເຈົ້າຈາກເມືອງກີຣີອາດເຢອາຣີມ ມາທີ່ນະຄອນເຢຣູຊາເລັມ.

6ກະສັດດາວິດແລະປະຊາຊົນໄດ້ໄປທີ່ເມືອງບາອາລາ, ເມືອງກີຣີອາດເຢອາຣີມ, ຊຶ່ງຢູ່ໃນເຂດແດນຂອງຢູດາຍ ເພື່ອນຳເອົາຫີບຂອງພຣະເຈົ້າກັບມາ ຊຶ່ງມີນາມຊື່ຂອງພຣະເຈົ້າຢາເວຢູ່ເທິງເຄຣຸບນັ້ນ.

7ພວກເຂົາໄດ້ນຳຫີບພັນທະສັນຍາຂອງພຣະເຈົ້າອອກຈາກເຮືອນຂອງອາບີນາດາບ ມາວາງໄວ້ທີ່ເທິງກວຽນໃໝ່ລຳໜຶ່ງ ຂະນະທີ່ອຸດຊາແລະອາຮີໂອໄດ້ຂັບກວຽນໄປ,

8ກະສັດດາວິດ ແລະປະຊາຊົນທັງຫລາຍ, ຕ່າງກໍຟ້ອນຢ່າງສຸດໃຈເພື່ອຖວາຍກຽດແກ່ພຣະເຈົ້າ. ພວກເຂົາຮ້ອງເພງທັງບັນເລງດົນຕຼີເຊັ່ນ: ພິນ, ກອງ, ແສ່ງ ແລະແກ.

9ເມື່ອຂະບວນແຫ່ມາຮອດລານຟາດເຂົ້າຂອງກີໂດນ ງົວເລີຍຕຳສະດຸດ ແລະອຸດຊາຈັບຫີບນັ້ນໄວ້.

10ໃນທັນໃດນັ້ນ ພຣະເຈົ້າຢາເວກໍໂກດຮ້າຍອຸດຊາ ແລະເຮັດໃຫ້ລາວຕາຍ ເພາະລາວແຕະຕ້ອງຫີບນັ້ນ. ລາວໄດ້ສິ້ນໃຈຕາຍຢູ່ທີ່ນັ້ນຕໍ່ໜ້າພຣະເຈົ້າ

11ແລະກະສັດດາວິດກໍໃຈຮ້າຍ ຍ້ອນພຣະເຈົ້າຢາເວໄດ້ລົງໂທດອຸດຊາເຖິງຕາຍ. ສະນັ້ນ ບ່ອນນີ້ຈຶ່ງເອີ້ນວ່າ ເປເຣັດອຸດຊາ ມາຈົນເຖິງເທົ່າທຸກວັນນີ້.

12ແລ້ວກະສັດດາວິດກໍຢ້ານກົວພຣະເຈົ້າຈຶ່ງຖາມວ່າ, “ບັດນີ້ ເຮົາຈະເອົາຫີບພັນທະສັນຍາຂອງພຣະເຈົ້າໄປນຳເຮົາໄດ້ຢ່າງໃດ?”

13ສະນັ້ນ ກະສັດດາວິດຈຶ່ງບໍ່ນຳເອົາຫີບນີ້ໄປທີ່ນະຄອນເຢຣູຊາເລັມ, ແຕ່ເພິ່ນໄດ້ປະໄວ້ທີ່ເຮືອນຂອງຊາຍຜູ້ໜຶ່ງຊື່ວ່າ ໂອເບັດເອໂດມຊາວເມືອງກາດ.

14ຫີບຂອງພຣະເຈົ້າຖືກປະໄວ້ທີ່ນັ້ນ ແລະພຣະເຈົ້າຢາເວກໍໄດ້ອວຍພອນຄອບຄົວຂອງໂອເບັດເອໂດມ ຕະຫລອດທັງທຸກໆສິ່ງທີ່ລາວໄດ້ມີຢູ່.

← Chapter 12 Jump to: Chapter 14 →