1 Chronicles 14

Lao Bible 2012 (ພຣະຄຳພີສັກສິ)

← Chapter 13 Jump to: Chapter 15 →

1ກະສັດຮີຣາມແຫ່ງຕີເຣໄດ້ສົ່ງຄະນະທູດການຄ້າມາພົບກະສັດດາວິດ. ເພິ່ນໄດ້ຈັດຫາໄມ້ສົນສີດາ ແລະຊ່າງກໍ່ ຊ່າງໄມ້ມາເພື່ອສ້າງວັງໃຫ້ກະສັດດາວິດ.

2ສະນັ້ນ ກະສັດດາວິດຈຶ່ງຮູ້ວ່າ ພຣະເຈົ້າຢາເວໄດ້ຕັ້ງເພິ່ນໃຫ້ເປັນກະສັດຂອງຊາດອິດສະຣາເອນ ແລະເຮັດໃຫ້ອານາຈັກຂອງເພິ່ນຈະເລີນຮຸ່ງເຮືອງ ເພື່ອເຫັນແກ່ປະຊາຊົນທັງຫລາຍ.

3ໃນນະຄອນເຢຣູຊາເລັມນີ້ເອງ ທີ່ກະສັດດາວິດໄດ້ມີເມຍຕື່ມອີກຫລາຍຄົນ ແລະໄດ້ມີລູກຊາຍກັບລູກສາວຕື່ມອີກຫລາຍຄົນ.

4ລູກທີ່ເພິ່ນໄດ້ໃນນະຄອນເຢຣູຊາເລັມ ມີດັ່ງນີ້: ຊາມມູອາ, ໂຊບັບ, ນາທານ, ໂຊໂລໂມນ,

5ອິບຮາ, ເອລີຊູອາ, ເອນເປເລັດ,

6ໂນຄາ, ເນເຟັກ, ຢາເຟຍ,

7ເອລີຊາມາ, ເບເອລີອາດາ, ແລະເອລີເຟເລັດ.

8ເມື່ອພວກຟີລິດສະຕິນໄດ້ຍິນວ່າ ບັດນີ້ ດາວິດໄດ້ຮັບການຫົດສົງໃຫ້ຂຶ້ນເປັນກະສັດປົກຄອງທົ່ວທັງອິດສະຣາເອນແລ້ວ ພວກເຂົາຈຶ່ງຍົກທັບມາເພື່ອຈັບກຸມເພິ່ນ. ສະນັ້ນ ກະສັດດາວິດຈຶ່ງຍົກທັບອອກໄປປະເຊີນໜ້າກັບພວກເຂົາ.

9ພວກຟີລິດສະຕິນໄດ້ມາຮອດຮ່ອມພູເຣຟາອິມ ແລະເລີ່ມຕົ້ນປຸ້ນສະດົມ.

10ກະສັດດາວິດໄດ້ທູນຖາມພຣະເຈົ້າວ່າ, “ຂ້ານ້ອຍຄວນຈະເຂົ້າໂຈມຕີພວກຟີລິດສະຕິນຫລືບໍ່? ພຣະອົງຈະໃຫ້ຂ້ານ້ອຍໄຊຊະນະເໜືອພວກເຂົາຫລືບໍ່?” ພຣະເຈົ້າຢາເວຕອບວ່າ, “ຈົ່ງຂຶ້ນໄປ ເຮົາຈະໃຫ້ເຈົ້າມີໄຊເໜືອພວກເຂົາ.”

11ສະນັ້ນ ກະສັດດາວິດຈຶ່ງເຂົ້າໂຈມຕີພວກເຂົາທີ່ບາອານເປຣາຊິມ ແລະໄດ້ຮົບຊະນະພວກເຂົາ. ເພິ່ນເວົ້າວ່າ, “ພຣະເຈົ້າໄດ້ໃຊ້ຂ້າພະເຈົ້າຕີກອງທັບຂອງສັດຕູ ໃຫ້ທະລຸໄປດັ່ງກະແສນໍ້າທີ່ໄຫລມາໃສ່.” ດັ່ງນັ້ນ ເພິ່ນຈຶ່ງເອີ້ນບ່ອນນັ້ນວ່າ ບາອານເປຣາຊິມ.

12ເມື່ອພວກຟີລິດສະຕິນປົບໜີໄປນັ້ນ, ພວກເຂົາໄດ້ປະຮູບເຄົາຣົບໄວ້ ແລະກະສັດດາວິດໄດ້ສັ່ງໃຫ້ຈູດຮູບເຫຼົ່ານັ້ນຖິ້ມໝົດ.

13ຢູ່ມາບໍ່ນານ ພວກຟີລິດສະຕິນກໍໄດ້ກັບມາທີ່ຮ່ອມພູ ແລະເລີ່ມປຸ້ນສະດົມອີກ.

14ກະສັດດາວິດໄດ້ປຶກສາກັບພຣະເຈົ້າອີກ ແລະພຣະເຈົ້າໄດ້ຕອບເພິ່ນວ່າ, “ຢ່າເຂົ້າໂຈມຕີພວກເຂົາທາງດ້ານນີ້, ແຕ່ໃຫ້ອ້ອມໄປຕຽມໂຈມຕີພວກເຂົາດ້ານອື່ນ ຢູ່ໃກ້ກັບປ່າຕົ້ນໂພ.

15ເມື່ອເຈົ້າໄດ້ຍິນສຽງຍ່າງເທິງປາຍຕົ້ນໄມ້ ໃຫ້ເຂົ້າໂຈມຕີໂລດເພາະພຣະເຈົ້າຈະຍ່າງນຳໜ້າເຈົ້າອອກໄປ ເພື່ອຕີກອງທັບພວກຟີລິດສະຕິນໃຫ້ພ່າຍແພ້.”

16ກະສັດດາວິດໄດ້ເຮັດຕາມສິ່ງທີ່ພຣະເຈົ້າໄດ້ສັ່ງ; ສະນັ້ນ ເພິ່ນຈຶ່ງໄດ້ໄລ່ພວກຟີລິດສະຕິນໜີຈາກກີເບໂອນໄປຈົນຮອດເມືອງເກເຊ.

17ຊື່ສຽງຂອງກະສັດດາວິດຊ່າລືໄປທົ່ວທຸກແຫ່ງ ແລະພຣະເຈົ້າຢາເວໄດ້ເຮັດໃຫ້ຊົນຊາດຕ່າງໆ ເກີດມີຄວາມຢ້ານກົວເພິ່ນ.

← Chapter 13 Jump to: Chapter 15 →