1 Chronicles 16 — Lao Bible 2012 (ພຣະຄຳພີສັກສິ)

1ພວກເຂົາໄດ້ນຳຫີບພັນທະສັນຍາຂອງພຣະເຈົ້າໄປສູ່ຫໍເຕັນ ຊຶ່ງກະສັດດາວິດໄດ້ຈັດຕຽມໄວ້ແລະນຳເອົາຫີບເຂົ້າໄປໄວ້ໃນທີ່ນັ້ນ. ແລ້ວພວກເຂົາກໍໄດ້ຖວາຍເຄື່ອງບູຊາແລະຖວາຍບູຊາເພື່ອຄວາມສາມັກຄີທຳແກ່ພຣະເຈົ້າ.

2ຫລັງຈາກກະສັດດາວິດໄດ້ຖວາຍເຄື່ອງບູຊາແລ້ວ ໃນນາມຊື່ຂອງພຣະເຈົ້າຢາເວເພິ່ນໄດ້ອວຍພອນປະຊາຊົນ

3ແລະແຈກຢາຍອາຫານໃຫ້ພວກເຂົາທຸກຄົນ. ເພິ່ນໄດ້ເອົາເຂົ້າຈີ່ຢາຍໃຫ້ຜູ້ຊາຍ ແລະຜູ້ຍິງໃນຊາດອິດສະຣາເອນ ຄົນລະກ້ອນ, ຊີ້ນປີ້ງຄົນລະຕ່ອນ, ແລະໝາກອະງຸ່ນແຫ້ງ.

4ກະສັດດາວິດໄດ້ແຕ່ງຕັ້ງຊາວເລວີບາງຄົນເປັນຜູ້ນຳໃນການນະມັດສະການຕໍ່ໜ້າຫີບຂອງພຣະເຈົ້າຢາເວ ໂດຍຮ້ອງເພງໂມທະນາຂອບພຣະຄຸນ ແລະສັນລະເສີນພຣະເຈົ້າຢາເວ ພຣະເຈົ້າແຫ່ງຊາດອິດສະຣາເອນ.

5ອາສັບໄດ້ຖືກແຕ່ງຕັ້ງໃຫ້ເປັນຫົວໜ້າ ແລະເຊກາຣີຢາເປັນຜູ້ຮອງ. ເຢອີເອນ, ເຊມີຣາໂມດ, ເຢຮີເອນ, ມັດຕີທີຢາ, ເອລີອາບ, ເບນາອີຢາ, ໂອເບັດເອໂດມ ແລະເຢອີເອນ ເປັນພວກດີດພິນ. ອາສັບເປັນຜູ້ຕົບແສ່ງ,

6ແລະປະໂຣຫິດສອງຄົນຄືເບນາອີຢາແລະຢາຮາຊີເອນ ເຮັດໜ້າທີ່ເປົ່າແກຢູ່ຕໍ່ໜ້າຫີບພັນທະສັນຍາຂອງພຣະເຈົ້າຢ່າງສະໝໍ່າສະເໝີ.

7ນີ້ເປັນເທື່ອທຳອິດທີ່ກະສັດດາວິດໄດ້ໃຫ້ອາສັບ ແລະພີ່ນ້ອງຊາວເລວີຂອງລາວ ຮັບຜິດຊອບຮ້ອງເພງສັນລະເສີນພຣະເຈົ້າຢາເວ.

8ຈົ່ງໂມທະນາຂອບພຣະຄຸນພຣະເຈົ້າຢາເວ ຈົ່ງຮ້ອງອອກນາມຊື່ຂອງພຣະອົງ ຈົ່ງປະກາດຄວາມຍິ່ງໃຫຍ່ຂອງພຣະອົງ ຈົ່ງບອກຊົນຊາດທັງຫລາຍ ສິ່ງທີ່ພຣະອົງໄດ້ກະທຳນັ້ນ.

9ຈົ່ງຮ້ອງເພງສຳລັບພຣະອົງ ຈົ່ງຮ້ອງເພງສັນລະເສີນແດ່ພຣະອົງ ຈົ່ງບອກສິ່ງໜ້າງຶດງໍ້ທີ່ພຣະອົງໄດ້ກະທຳ.

10ຈົ່ງດີໃຈທີ່ພວກເຮົາໄດ້ເປັນຂອງພຣະອົງ; ໃຫ້ທຸກຄົນຊົມຊື່ນຍິນດີນະມັດສະການພຣະອົງ

11ຈົ່ງຊອກຫາພຣະເຈົ້າຢາເວໃຫ້ຊ່ວຍເຫລືອ ແລະນະມັດສະການພຣະອົງສືບໄປເລື້ອຍໆ.

12ພວກເຊື້ອສາຍຂອງຢາໂຄບ ຜູ້ຮັບໃຊ້ຂອງພຣະອົງເອີຍ ຄືເຊື້ອສາຍຂອງຊາດອິດສະຣາເອນ ຜູ້ທີ່ພຣະເຈົ້າໄດ້ເລືອກໄວ້ ຈົ່ງຈື່ຈຳການອັດສະຈັນທີ່ພຣະເຈົ້າໄດ້ກະທຳ ແລະການຕັດສິນທີ່ພຣະອົງໄດ້ປະກາດນັ້ນ.

14ພຣະອົງເປັນພຣະເຈົ້າຢາເວ ພຣະເຈົ້າຂອງພວກເຮົາ ການຕັດສິນທັງຫລາຍຂອງພຣະອົງກໍຢູ່ທົ່ວໄປໃນໂລກນີ້.

15ຢ່າລືມພັນທະສັນຍາຂອງພຣະອົງຈັກເທື່ອ ທີ່ພຣະອົງໄດ້ຕັ້ງໄວ້ໃຫ້ຍືນຍົງຕະຫລອດໄປ

16ຄືພັນທະສັນຍາທີ່ເຮັດໄວ້ກັບອັບຣາຮາມ ແລະບັນດາຄຳສັນຍາທີ່ເຮັດໄວ້ກັບອີຊາກ.

17ພຣະອົງໄດ້ເຮັດພັນທະສັນຍາກັບຢາໂຄບ ຄືສິ່ງໜຶ່ງທີ່ຈະຍືນຍົງຄົງຢູ່ເປັນນິດ.

18ພຣະອົງກ່າວວ່າ, “ເຮົາຈະມອບດິນແດນການາອານໃຫ້ ດິນແດນນັ້ນຈະເປັນກຳມະສິດ ຂອງພວກເຈົ້າເທົ່ານັ້ນ.”

19ຄົນຂອງພຣະເຈົ້າມີຈຳນວນໜ້ອຍ ເປັນຄົນຕ່າງດ້າວຢູ່ໃນການາອານນັ້ນ.

20ພວກເຂົາທ່ອງທ່ຽວຈາກປະເທດນີ້ສູ່ທີ່ອື່ນໄກ ຈາກອານາຈັກນີ້ໄປສູ່ອານາຈັກອື່ນອີກ.

21ແຕ່ພຣະອົງບໍ່ຍອມໃຫ້ຜູ້ໃດກົດຂີ່ພວກເຂົາ ພຣະອົງເຕືອນກະສັດໃຫ້ປົກປ້ອງພວກເຂົາໄວ້ວ່າ,

22“ຢ່າສູ່ທຳຮ້າຍຜູ້ຮັບໃຊ້ທີ່ເຮົາເລືອກເອົາ ຢ່າສູ່ແຕະຕ້ອງຜູ້ທຳນວາຍຂອງເຮົານັ້ນ.”

23ທົ່ວແຜ່ນດິນໂລກເອີຍ ຈົ່ງຮ້ອງເພງຖວາຍແດ່ ພຣະເຈົ້າຢາເວຂອງພວກເຮົາ ທຸກມື້ຈົ່ງປະກາດຂ່າວດີ ທີ່ໄດ້ຊ່ວຍພວກເຮົາໃຫ້ພົ້ນ.

24ຈົ່ງປະກາດສະຫງ່າຣາສີຂອງພຣະອົງໃນທ່າມກາງບັນດາປະຊາຊາດ ແລະການອັດສະຈັນທັງຫຼາຍຂອງພຣະອົງໃນທ່າມກາງຄົນທັງປວງດ້ວຍ.

25ພຣະເຈົ້າຢາເວຊົງຍິ່ງໃຫຍ່ຫລາຍ ແລະຄວນເປັນທີ່ສັນລະເສີນຢ່າງສູງສົ່ງ; ພຣະອົງຄວນເປັນທີ່ຍົກຍໍສັນລະເສີນ ໃຫ້ກຽດສັກສີກວ່າພະອື່ນໆທັງສິ້ນ.

26ບັນດາພະຂອງຊົນຊາດອື່ນນັ້ນ ເປັນພະຈອມປອມທັງໝົດ ແຕ່ພຣະເຈົ້າຢາເວຂອງພວກເຮົາ ເປັນຜູ້ສ້າງຈັກກະວານ.

27ສະຫງ່າຣາສີແລະກຽດຕິຍົດນັ້ນ ກໍອ້ອມລ້ອມເຕັມຢູ່ໃນພຣະອົງ ຣິດອຳນາດແລະຄວາມຊົມຊື່ນຍິນດີ ກໍມີເຕັມຢູ່ໃນພຣະວິຫານດ້ວຍ.

28ຈົ່ງສັນລະເສີນພຣະເຈົ້າຢາເວເຖີດ ມວນມະນຸດທົ່ວທັງໂລກາ ຈົ່ງສັນລະເສີນສະຫງ່າຣາສີ ແລະຄວາມຍິ່ງໃຫຍ່ຂອງພຣະເຈົ້າຢາເວ.

29ຈົ່ງຍົກຍໍນາມອັນຍິ່ງໃຫຍ່ຂອງພຣະເຈົ້າຢາເວ ໂດຍນຳເຄື່ອງບູຊາມາທີ່ພຣະວິຫານດ້ວຍ. ຈົ່ງກົ້ມຂາບຕໍ່ໜ້າພຣະເຈົ້າຢາເວອົງບໍຣິສຸດ ເມື່ອພຣະອົງມາປາກົດໃນສະພາບນັ້ນ;

30ທົ່ວໂລກ ຈົ່ງສະທ້ານຢູ່ຊ້ອງໜ້າພຣະອົງ ແຜ່ນດິນໂລກຄົງຢູ່ກັບທີ່ເຄື່ອນຍ້າຍບໍ່ໄດ້.

31ຈັກກະວານ ແລະແຜ່ນດິນໂລກເອີຍ ຈົ່ງຊົມຊື່ນຍິນດີເຖີດ ຈົ່ງບອກຊົນຊາດທັງຫລາຍວ່າ, “ພຣະເຈົ້າຢາເວແມ່ນຈອມກະສັດ.”

32ທ້ອງທະເລກັບທຸກສິ່ງໃນນັ້ນ ຈົ່ງສົ່ງສຽງສະໜັ່ນຫວັ່ນໄຫວ ໃຫ້ທົ່ງນາກັບທຸກສິ່ງທີ່ຢູ່ໃນນັ້ນ ຈົ່ງພາກັນຊົມຊື່ນຍິນດີເທີ້ນ

33ຕົ້ນໄມ້ໃນປ່າຈະໂຮຮ້ອງແລະຍິນດີ ຕໍ່ໜ້າພຣະເຈົ້າຢາເວ, ເມື່ອພຣະອົງມາຕັດສິນແຜ່ນດິນໂລກ.

34ຈົ່ງໂມທະນາຂອບພຣະຄຸນພຣະເຈົ້າຢາເວ ເພາະພຣະອົງຊົງຄຸນຄວາມດີ ແລະຄວາມຮັກຂອງພຣະອົງ ກໍດຳລົງຢູ່ຕະຫລອດໄປເປັນນິດ.

35ຈົ່ງກ່າວວ່າ, “ຂ້າແດ່ພຣະເຈົ້າ ພຣະຜູ້ຊ່ວຍຂອງພວກຂ້ານ້ອຍເອີຍ ໂຜດຊ່ວຍພວກຂ້ານ້ອຍແດ່ ໂຜດເຕົ້າໂຮມພວກຂ້ານ້ອຍໄວ້ສາ ໂຜດຊ່ວຍກູ້ພວກຂ້ານ້ອຍ ຈາກບັນດາຊົນຊາດທັງຫລາຍດ້ວຍ ເພື່ອວ່າພວກຂ້ານ້ອຍຈະໄດ້ໂມທະນາຂອບພຣະຄຸນແກ່ນາມອັນບໍຣິສຸດຂອງພຣະອົງ ແລະຍົກຍໍສັນລະເສີນສະຫງ່າຣາສີຂອງພຣະອົງ.”

36ຈົ່ງຍົກຍໍສັນລະເສີນພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ຈົ່ງຍົກຍໍສັນລະເສີນພຣະອົງ ແຕ່ບັດນີ້ແລະສືບໆໄປເທີ້ນ. ແລ້ວປະຊາຊົນທຸກໆຄົນຕ່າງກໍເວົ້າວ່າ, “ອາແມນ” ແລະໄດ້ພ້ອມພາກັນຍ້ອງຍໍສັນລະເສີນພຣະເຈົ້າຢາເວ.

37ກະສັດດາວິດໄດ້ຕັ້ງໃຫ້ອາສັບ ແລະພີ່ນ້ອງຊາວເລວີຂອງລາວ ເບິ່ງແຍງການນະມັດສະການຢ່າງຖາວອນ ໃນບ່ອນທີ່ຫີບພັນທະສັນຍາຂອງພຣະເຈົ້າຢາເວຖືກຮັກສາໄວ້. ພວກເຂົາໄດ້ເຮັດໜ້າທີ່ຂອງພວກຕົນຢູ່ໃນທີ່ນັ້ນສະໝໍ່າສະເໝີ.

38ໂອເບັດເອໂດມ ລູກຊາຍເຢດູທູນ ແລະຫົກສິບແປດຄົນໃນຕະກຸນຂອງລາວ ເປັນຜູ້ຊ່ວຍ. ໂຮສາແລະໂອເບັດເອໂດມເປັນຜູ້ເຝົ້າຍາມປະຕູເຂົ້າ.

39ແຕ່ປະໂຣຫິດຊາດົກ ແລະພີ່ນ້ອງປະໂຣຫິດອື່ນໆ ໄດ້ຢູ່ຕໍ່ໜ້າຫໍເຕັນສັກສິດຂອງພຣະເຈົ້າຢາເວທີ່ກີເບໂອນ.

40ທຸກເຊົ້າແລະທຸກແລງ ພວກເພິ່ນໄດ້ເຜົາສັດທັງໂຕຖວາຍແກ່ພຣະເຈົ້າຢາເວເທິງແທ່ນບູຊາ ໂດຍປະຕິບັດຕາມທີ່ໄດ້ມີຂຽນໄວ້ໃນກົດບັນຍັດ ຂອງພຣະເຈົ້າຢາເວທີ່ພຣະອົງໄດ້ໃຫ້ແກ່ຊາດອິດສະຣາເອນ.

41ໃນທີ່ນັ້ນ ເຮມານແລະເຢດູທູນກັບຄົນອື່ນໆ ທີ່ໄດ້ຮັບເລືອກຂຶ້ນໂດຍພິເສດພ້ອມດ້ວຍພວກປະໂຣຫິດ ຈະຮ້ອງເພງໂມທະນາຂອບພຣະຄຸນພຣະເຈົ້າຢາເວ ສຳລັບຄວາມຮັກອັນໝັ້ນຄົງຕະຫລອດໄປຂອງພຣະອົງ.

42ເຮມານແລະເຢດູທູນໄດ້ເຮັດໜ້າທີ່ເປົ່າແກ, ຕົບແສ່ງ ແລະຫລີ້ນເຄື່ອງດົນຕຼີອື່ນໆເມື່ອຮ້ອງເພງສັນລະເສີນ. ສະມາຊິກໃນຕະກຸນເຢດູທູນໄດ້ເປັນຜູ້ເຝົ້າຍາມປະຕູເຂົ້າ.

43ເມື່ອຈົບພິທີແລ້ວ ທຸກຄົນກໍກັບເມືອເຮືອນຂອງຕົນ ແລະກະສັດດາວິດກໍກັບເມືອຢູ່ນຳຄອບຄົວຂອງເພິ່ນ.