Acts 3

Malagasy (Baiboly Protestanta Malagasy 2011)

← Chapter 2 Jump to: Chapter 4 →

1Niakatra ho eo amin’ny tempoly i Petera sy i Jaona tamin’ny fotoam-pivavahana tamin’ny ora fahasivy.

2Dia nisy nitondra lehilahy nalemy tongotra hatrany an-kibon-dreniny, izay napetrany isanandro teo anoloan’ny vavahadin’ny tempoly, ilay antsoina hoe Itsaraendrika, mba hangataka fiantrana amin’izay niditra tao amin’ny tempoly;

3nony nahita an’i Petera sy i Jaona izay handeha hiditra ao amin’ny tempoly izy dia nangataka mba homena fiantrana.

4Nibanjina azy i Petera sy i Jaona ka niteny hoe: Mijere anay.

5Dia nijery tsara azy roa lahy izy satria nanantena hahazo zavatra taminy.

6Nefa hoy i Petera: Tsy manana volafotsy na volamena aho, fa izay ananako no omeko anao: Amin’ny anaran’i Jesosy Kristy avy any Nazareta, mitsangàna ka mandehana.

7Dia noraisiny tamin’ny tanany havanana Ralehilahy ka natsangany; ary natanjaka niaraka tamin’izay ny tongony sy ny kitrokeliny.

8Ary niantsambotra izy ka nijoro dia nandeha ka niara-niditra taminy nankao amin’ny tempoly; sady nandehandeha nitsambikimbikina izy no nidera an’Andriamanitra.

9Nahita azy nandehandeha sy nidera an’Andriamanitra ny olona rehetra.

10Ary fantany tsara fa io no ilay nipetraka teo amin’ny vavahady Itsaraendrika, eo amin’ny tempoly, mba hiantrana; dia gaga sady talanjona izy ireo noho ity zava-nitranga tamin-dRalehilahy.

11Raha mbola tsy niala teo amin’i Petera sy i Jaona izy dia niara-nirohotra ho eo amin’izy telo lahy teo amin’ny fialofana izay antsoina hoe Fialofan’i Solomona ny olona rehetra, sady talanjona.

12Rehefa nahita izany i Petera dia niteny tamin’ny vahoaka hoe: Ry lehilahy Israelita, nahoana ianareo no talanjona amin’izao zavatra izao? Ary nahoana ianareo no mandinika anay sahala amin’ny hoe herinay na fahamasinanay no nahatonga azy ho afa-mandeha?

13Andriamanitr’i Abrahama, Andriamanitr’Isaka ary Andriamanitr’i Jakoba, Andriamanitry ny razantsika, no nanome voninahitra an’i Jesosy Mpanompony, izay natolotrareo sy nolavinareo teo anatrehan’i Pilato, rehefa nokasainy halefa.

14Ianareo kosa dia nandà Ilay Masina sy Marina ka mpamono olona no nangatahinareo halefa ho anareo;

15fa ny Tompon’ny aina kosa novonoinareo; nefa Izy dia natsangan’Andriamanitra tamin’ny maty, ary vavolombelon’izany izahay.

16Ny finoana ny anarany no nampahatanjaka io lehilahy hitanareo sy fantatrareo io, noho ny anarany; eny, ny finoana izay azo amin’ny alalany no nahazoany izao fahasitranana feno izao teto imasonareo rehetra.

17Ankehitriny ary, ry rahalahy, fantatro fa tamin’ny tsy fahalalana no nanaovanareo izany, ary toy izany koa ny mpanapaka anareo.

18Nefa izany no nahatanterahan’Andriamanitra ny zavatra nampilazainy mialoha tamin’ny vavan’ny mpaminany rehetra, fa hiaritra fahoriana ny Kristiny.

19Koa mibebaha ianareo ary miverena mba hamafana ny fahotanareo

20ka ho tonga ny fotoana famelombelomana anareo amin’ny fanatrehan’ny Tompo sy hanirahany ny Kristy voatendry ho anareo, dia Jesosy,

21Ilay tsy maintsy noraisin’ny lanitra mandra-piavin’ny fotoana hamerenana ny zavatra rehetra, izay nampilazain’Andriamanitra ny mpaminaniny masina hatramin’ny taloha.

22Fa hoy i Mosesy: «Mpaminany no hatsangan’NY TOMPO Andriamanitra ho anareo avy amin’ny rahalahinareo, tahaka ahy; izy no hohenoinareo amin’izay rehetra holazainy aminareo.

23Fa izay rehetra tsy mihaino izany mpaminany izany dia haringana tsy ho eo amin’ny olona» (Deo 18.15, 19).

24Ary ny mpaminany rehetra koa hatramin’i Samoela sy ireo taorianany, na iza na iza niteny, dia nanambara izao andro izao.

25Ianareo no zanaky ny mpaminany sy ny fanekena nataon’Andriamanitra tamin’ny razanareo, raha hoy Izy tamin’i Abrahama hoe: «Amin’ny taranakao no hitahiana ny firenena rehetra ambonin’ny tany» (Gen 22.18).

26Ho anareo aloha no nananganan’Andriamanitra ny Mpanompony ka nanirahany Azy mba hitahiana anareo amin’ny fialanareo tsirairay avy amin’ny faharatsianareo.

← Chapter 2 Jump to: Chapter 4 →