bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Exodus 28
Exodus 28
Quechuan QXO (Biblia en Quechua del sur de Conchucos)
← Chapter 27
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 29 →
1
«Israel runakunapita wawqiki Aarónta y tsurinkuna Nadabta, Abiúta, Eleazarta y Itamarta sirvimaq sacerdötikuna kayänanpä churanki.
2
Wawqiki Aarón respitädu sacerdöti kar jatikunanpä kuyayllapä sagrädu röpankunata ruratsinki.
3
Röpankunata ruratsinaykipä yachaynin qaranqä runakunata tantiyatsinki imanö rurayänanpäpis. Tsay röpakunata jatikurkurmi sirvimaq sacerdöti kananpä consagrädu kanqa.
4
Wawqiki Aarón y tsurinkuna jatikuyänanpä ruratsinki pectoralta, efodta, sotänata, bordashqa tünicata, görrata y wachukutapis. Paykunam tsay sagrädu röpata jatikuyanqa akranqä sacerdötikuna kar sirviyämänanpä.
5
Tsay röpakunata awayanqa qori jïlupita, azul, granäti y puka millwa jïlukunapita y llanulla putskashqa lïnu jïlupitapis.
6
«Efodta awatsinki qori jïlupita, azul, granäti y puka millwa jïlukunapita y llanulla putskashqa lïnu jïlupitapis. Tsayta awayanqa awayta shumaq yachaqkuna.
7
Tsaynölla efodpa ishkan kuchunchö tirantikuna kanqa umrunchö warkaränanpä.
8
Efodpa wachukuntapis awatsinki qori jïlupita, azul, granäti y puka millwa jïlukunapita y llanulla putskashqa lïnu jïlupita. Tsay wachukuqa efodwan jukllayllanömi kanqa.
9
«Tsaynölla ishkay ónice rumikunaman Israelpa tsurinkunapa jutinkunata qellqatsinki.
10
Tsaynö qellqatsinki mayorpita qallaykur hasta ñuñushyaq. Juknin kaq rumiman joqta jutikunata qellqatsinki y jukaq rumimanpis joqta jutikunata qellqatsinki.
11
Tsay jutikunata rumipita sëlluta ruraqnö alhäja ruraq runawan qellqatsinki. Tsay rumikuna mana shushunanpä tsaraqninkunata qoripita ruraykatsir siguratsinki.
12
Tsay ishkay rumikunata efodpa tirantinkunaman churatsinki sacerdötipa umrunchö kananpä. Tsaynöpam ñöpäman Aarón yaykamur umrunchö apamunqa Israelpa tsurinkunapa jutinkunata imaypis mana qonqayänanpä.
13
Tsay rumikunapa tsaraqninkunata qoripita ruratsinki.
14
Rumikuna kaykanqan kuchunpa churatsinki pilltashqa ishkay qori cordonta.
15
«Pëchunman churakunan pectoralta ruratsinki imata yarpanqätapis sacerdöti musyananpä. Tsaytapis ruratsinki efodta ruratsinqaykinölla. Tsaymi qori jïlupita, azul, granäti y puka millwa jïlukunapita y llanulla putskashqa lïnu jïlupitapis kanqa.
16
Ruraskatsir doblanki bolsanö cuadrädu kananpä. Largunpis anchunpis ishkay chunka ishkay (22) centïmetru kanqa.
17
Tsayman churatsinki chusku fïla kuyayllapä rumikunata. Punta kaq fïlaman churatsinki sárdica rumita, topacio rumita y carbunclo rumita.
18
Ishkay kaq fïlaman churatsinki esmeralda rumita, zafiro rumita y diamanti rumita.
19
Kimsa kaq fïlaman churatsinki jacinto rumita, ágata rumita y amatista rumita.
20
Chusku kaq fïlamanna churatsinki berilo rumita, ónice rumita y jaspe rumitapis. Tsay rumikuna mana shushunanpä qoripita tsaraqninkunata ruraykatsir siguratsinki.
21
Tsay rumikuna chunka ishkaymi kanqa. Chunka ishkay kanqa Israelpa tsurinkuna chunka ishkay kayanqannömi. Cada rumiman juk trïbupa jutinta qellqatsinki rumipita rurashqa sëllunö kananpä.
22
«Pectoralpä cordonkunata qori jïlupita pilltatsinki.
23
Tsaypita ishkay taksha argöllakunata qoripita ruratsinki. Tsay argöllakunata churatsinki pectoralpa jana kaq ishkan esquïnanman.
24
Tsay argöllakunaman qoripita pilltashqa cordonta ullutsinki.
25
Cordonpa ishkan puntankunatana siguratsinki umrunchö kaq tsaraqninkunaman. Tsayqa pëchunchömi wataranqa.
26
«Tsaynölla ishkay taksha argöllakunata qoripita ruratsinki pectoralpa ura kaq kuchunkunaman churananpä. Tsay argöllakunam pectoral rurinchö kar efod jananchö kanqa.
27
Tsaynölla ishkay taksha argöllakunata qoripita ruratsinki efodpa wachukun jana lädunman churananpä. Tsaykunam efodpa tirantinkunachö kar pectoralpa costüranman tinkuranqa.
28
Tsaypitam pectoralpa y efodpa argöllankunata azul cordonwan watanki efodpita mana yarqunanpä.
29
«Lugar Santuman pectoralnin jatishqa Aarón yaykurmi Israelpa tsurinkunapa jutinkunata pëchunchö apanqa. Pectoralnin jatishqa ñöpächö kaptinmi paykunata y paykunapita miraqkunata imaypis yarparäshä.
30
Tsay pectoralman Urimta y Tumimta wiñanki pëchunchö Aarón apananpä. Tsaynöpam Lugar Santuman yaykur noqapa ñöpächö imaypis tsararanqa allipä kaqta y mana allipä kaqtapis Israel runakunata tantiyatsinäpä.
31
«Efodpa rurinman jatikunanpä azul jïlupita sotänata awatsinki.
32
Uman yaykunanpä tsay sotänata kunkayuqta ruratsinki. Sotänapa kunkan mana rachinanpä rebëtita jiratsinki. Tsay rebëtim qara casäcapa kuchun jirashqanö kanqa.
33
Sotänapa ura kuchunpa granadïllatanö churatsinki azul, granäti y puka millwa jïlukunawan. Tsaynölla tsay kuchunpa qoripita rurashqa campanillakunata churatsinki.
34
Tsaynöpam juk qori campanilla, juk granadïlla, juk qori campanilla, juk granadïlla sotäna kuchunchö tumaypa kanqa.
35
Tsay sotänan jatishqam Lugar Santuman imaypis Aarón yaykunqa. Tsaymi sirvimänanpä yaykuptinpis y yarqamuptinpis campanillan wiyakämunqa. Sotänan jatishqa yaykurqa manam wanunqatsu.
36
«Tsaynölla qoripita vinchata ruratsinki. Tsayman qellqatsinki «Tayta Diospa karmi santu» nir qellqaränanpä. Tsayta qellqatsinki rumipita rurashqa sëllunö kananpä.
37
Tsay ruratsinqayki vinchata Aarónpa görranman azul cordonwan watapanki.
38
Tsay vinchata Aarón imaypis urkunchö jatikutsun. Tsaynöpam Israel runakuna sagrädu sacrificiukunata apayämuptin munanqänö mana kaptinpis perdonashä. Israel runakunapa rantin Aarónnam jutsayuq kanqa.
39
«Aarónpä tünicatapis lïnu jïlupita awaskatsir shumaq bordatsinki. Görrantapis lïnu jïlupita awatsinki. Wachukuntapis shumaq bordatsinki.
40
«Aarónpa tsurinkunapä tünicankunata, wachukunkunata y görrankunata shumaq kuyayllapäta ruratsinki.
41
Tsaykunata rurarkatsir wawqiki Aarónta y tsurinkunata jatitsinki. Umankunaman sagrädu aceitita wiñapunki sirvimaq sacerdötikuna kayänanpä.
42
«Tsaynölla penqayninta tsapananpä tseqllapita qonquryaq lïnupita calzoncïllunta ruratsinki.
43
Tsay calzoncïllutaqa Aarón y tsurinkunam jatikuyanqa Tinkunantsik Tolduman yaykuyänanpä. Tsaynin jatishqam Lugar Santuchö kaq altarchöpis sirviyämanqa. Calzoncïllun jatishqa mana yaykurqa jutsayuq karmi wanuyanqa. Tsay ninqäkunaqa imayyaqpis leymi Aarónpä, tsurinkunapä y paypita miraqkunapäpis kanqa.
← Chapter 27
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 29 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40