bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Exodus 34
Exodus 34
Quechuan QXO (Biblia en Quechua del sur de Conchucos)
← Chapter 33
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 35 →
1
Moiséstam Tayta Dios nirqan: «Punta kaqtanölla ishkay läja rumikunata ruray. Tsay läjakunamanmi pakinqayki rumichö qellqanqätanö yapay qellqashä.
2
Alistakuy noqa kaykanqä Sinaí jirkaman waray wäray witsämunaykipä.
3
Qamwanqa ama pipis shamutsuntsu. Tsaynölla Sinaí jirkapa ama pipis puritsuntsu. Tsay jirkapaqa üshata, cabrata ni wäkata ama pipis mitsikutsuntsu».
4
Tsaynö niptinmi punta kanqantanölla Moisés ishkay läja rumikunata rurarqan. Tsaypita waraynin wäraymi Tayta Dios ninqannö ishkan läja rumita apakurkur Sinaí jirkaman witsarqan.
5
Jirkachö kaykaptinnam pukutaychö Tayta Dios urämur jutin Yahweh kanqanta willarqan.
6
Jutinta willarmi Moiséspa ñöpanpa päsar nirqan: «¡Yahweh! ¡Yahweh! Kuyapäkuq y perdonakuq Diosmi kä. Imapitapis jukllaqa mana rabyakuqmi kä. Pasaypa kuyakuqmi kä. Awninqätaqa imaypis cumplïmi.
7
Waranqa waranqa runakuna maytsika kayaptinpis kuyapämi. Mana cäsumar jutsata rurayaptinpis perdonämi. Peru jutsa rurayta mana jaqiqkunatam sïqa castigä kikinta, tsurinkunata, willkankunata y willkanpa tsurinkunatapis».
8
Tsaynö niptinmi jinan höra Moisésqa urkunpis patsaman töpanqanyaq qonqurikuykurqan. Tsaypitam Tayta Diosta adorar
9
nirqan: «Tayta Dios, rasunpa kuyapämarqa mana dëjaypa wallkiykayällämay. Kay runakunaqa mana wiyakuq runakunam kayan. Tsaynö kaptinpis llutankunata rurar jutsata rurayanqäkunata perdonaykayällämay. Tsaynölla imayka herenciaykinö kayänäpä chaskiykayällämay».
10
Moisés tsaynö niptinmi Tayta Dios nirqan: «Mañakamanqaykita awnirmi pactuta rurashun. May nacionchöpis ni may markachöpis mana rikayanqan milagrukunatam puntaykikunachö rurashä. Espantaypä milagrukuna ruranqäta rikarmi wakin nación runakunapis qamkunata yanapanqäta musyayanqa.
11
«Kanan ninqäkunata shumaq wiyamay. Qamkunapa puntaykikunapitam qarqushä amorreo runakunata, cananeo runakunata, heteo runakunata, ferezeo runakunata, heveo runakunata y jebuseo runakunatapis.
12
«Täyänaykipä kaq nacionman chaykur tsaychö täraq runakunawan ama ima pactutapis rurayankitsu. Pactuta rurarqa mana alli costumbrinkunatam yachakuyanki.
13
Tsay runakunapa sacrificiuta rupatsikuyänan altarninkunata juchutsir adorayanqan juytu rumikunatapis chipyaq pakiyanki. Asera diösata adorayänanpä jawiyanqan raku qerukunatapis tseqtayanki.
14
Tsaychö täraq runakunapa diosninkunaman ama qonqurikuyankitsu ni adorayankitsu. Noqallam Tayta Diosniki kä. Juk dioskunata adorayaptikiqa pasaypam rabyakü.
15
«Tsaynö kaykaptinqa tsay nacionchö täraq runakunawan ama ima pactutapis rurayankitsu. Paykunawan pactuta rurayaptikiqa diosninkunapä fiestanta rurarmi tsayman pushayäshunki. Tsayman aywarqa qamkunapis ofrendayanqan mikuykunata mikurmi diosninkunata adoraykuyankiman
16
o warmi tsurinkunawanpis tsurikikunata churayankiman. Churayaptikiqa diosninkunata adorayänanpä pushaptin tsurikikuna adorarpis adoraykuyanmanmi.
17
«Ima metalpitapis fundir dioskunata ama rurayankitsu.
18
«Imanöpis rurayänaykipä ninqänölla Levadüraynaq Tanta Mikuna fiestata imaypis rurar qanchis junaq mikuyanki levadüraynaq tantata. Abib killachö Egiptupita yarqayämunqaykita yarparmi Abib killachö tsay fiestata rurayanki.
19
«Mayor kaq ollqu tsurikikunam noqapa kaykan. Tsaynöllam wäkapa, üshapa y cabrapa punta kaq wawankunapis orqu yurirqa noqapa kaykan.
20
Ashnupa punta wawan orqu yuriptinqa trokinta noqa Tayta Diospä apayämunki juk carnishta o malta cabrata karpis. Trokinta mana apamurqa kunkanta pakiriyanki wanunanpä. Tsaynölla mayor tsurikipa trokin noqa Tayta Diospä ofrendata apayämunki. Adorayämänaykipä shamurqa ama jinayllaqa shayämunkitsu.
21
«Joqta junaq aruskir murukuy tiempu o cosëcha tiempu kaptinpis llapanta dëjaykur qanchis kaq junaqchöqa jamayanki.
22
«Semäna fiestatapis rurayanki punta cosechayanqayki trïguta noqa Tayta Diospä apaykur. Tsaynölla wata ushananchö cosëchata qoriyta ushaskir Cosëcha Ushay fiestatapis rurayanki.
23
«Tsay kimsan fiestata rurayänaykipä watachö kimsa kuti llapan ollqu kaqkuna adoramaq shayämunqa.
24
Cada watachö kimsa kuti noqa Tayta Diosta adoramaq shayämunqaykiyaq manam pipis chakraykita duëñu tukunqatsu. Tsaynö mana duëñu tukunanpämi tänaykipä kaq nacionpita tsaychö täraq runakunata qarqushä.
25
«Ashmakunata noqapä sacrificiuta rupatsirqa yawartawan levadürayuq tantata tallurkur ama rupatsiyankitsu. Tsaynölla Pascua fiestapä rurayanqayki mikuy sobraqtaqa ama waraynin junaqpä churayankitsu.
26
«Muruyanqaykipita primiciata wayïman apayämunki. «Malta cabrapa aytsantaqa mamanpa lichinwan ama kusinayankitsu».
27
Tsaypitanam Moisésta Tayta Dios nirqan: «Ninqä leykunata kanan qellqay. Tsay leykunachömi qamwan y Israel mayikikunawanpis pactu ruranqä qellqashqa kanqa».
28
Imatapis mana mikur ni yakutapis mana upuypam Moisésqa tsaychö Tayta Dioswan chusku chunka (40) junaq chusku chunka (40) paqas karqan. Tsaychömi läjakunaman qellqarqan Israel runakunawan Tayta Dios pactu ruranqanta. Tsay qellqanqankunam chunka mandamientukuna kaykan.
29
Tsaypitanam ishkan läja rumikunata apakurkur Sinaí jirkapita Moisés kutirqan. Tsay läjakunachömi Israel runakunawan Tayta Dios ruranqan pactu qellqashqa karqan. Jirkapita kutir Moisésqa manam cuentata qokurqantsu Tayta Dioswan parlamunqanpita cäran chipipiykanqanta.
30
Cäran chipipiykaqta rikarmi Aarónpis y Israel runakunapis Moiséspa ñöpanman witiyta mantsariyarqan.
31
Tsaymi Aarónta y Israel runakunapa mandaqninkunata qayaykur Moisés parlaparqan.
32
Tsaypitanam wakin Israel runakunapis Moiséspa ñöpanman witiyarqan. Witiykuyaptinmi Sinaí jirkachö Tayta Dios ninqankunata willarqan.
33
Willayta ushaskirnam Moisésqa vëluwan cäranta tsapakurqan.
34
Tayta Diospa puntanman parlaq aywarmi Moisésqa cäran tsapakunqan vëluta imaypis jipiq. Parlanqanpita yarqurnam Tayta Dios ninqankunata Israel runakunata willaq.
35
Willaptinmi Israel runakuna rikayaq Moiséspa cäran pasaypa chipipiykaqta. Tsaymi Moisésqa cäranta tsapakuq Tayta Dioswan parlaq kutinqanyaq.
← Chapter 33
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 35 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40