Exodus 32

Quechuan QXO (Biblia en Quechua del sur de Conchucos)

← Chapter 31 Jump to: Chapter 33 →

1Jirkapita Moisés mana urämuptinmi Israel runakuna Aarónta niyarqan: «Egiptupita jipimaqnintsik Moiséspä manam ima päsanqantapis musyantsiktsu. Tsaynö kaykaptinqa juk diosta ruray puntantsikta aywar pushamänantsikpä».

2Tsaynö niyaptinmi Aarón nirqan: «Warmikikuna y tsurikikuna jatiräyanqan qori arëtikunata apayämuy».

3Tsaymi jatiräyanqan qori arëtikunata Aarónman llapan apayarqan.

4Aarónnam tsay qorita tsulluskatsir fundirqan taksha torïtuta. Tsayta rikaykurmi llapan niyarqan: «¡Israel runakuna, kaymi Egiptupita jipimaqnintsik diosnintsik!»

5Tsayta rikarmi Aarónqa torïtupa puntanchö juk altarta rurarqan. Tsaypitanam Israel runakunata nirqan: «Waray junaqmi Tayta Diospa jutinchö fiestata rurashun».

6Tsaynö niptinmi waraynin junaq tsaka tsakalla shärikuskir ashmakunata pishtar rupatsina sacrificiukunata y alli päsakuy sacrificiukunatapis rupatsiyarqan. Tsaypitam llapan jamaykur mikuyarqan y upyayarqan. Kushikurmi juknin jukninpis jutsata rurar kayarqan.

7Tsaymi Moisésta Tayta Dios nirqan: «Kay jirkapita ras kutiy. Egiptupita jipimunqayki Israel runakunam jutsata rurar kaykäyan.

8Paykunaqa pöcu tiempullachö qonqaskamarmi qoripita torïtuta ruraskir adoraykäyan. Tsaynöllam sacrificiukunata rupatsir nikäyan: «¡Israel runakuna, kaymi Egiptupita jipimaqnintsik diosnintsik!»

9Mastam Moisésta Tayta Dios nirqan: «Noqa rikarqümi Israel runakuna pasaypa mana wiyakuq kayanqanta.

10Paykunapa favornin ama shäriynatsu. Pasaypa rabyanätsiyämanqanpitam paykunata ushakätsishä. Qamllapitanam mirayanqa jatun nación kayanqanyaq».

11Tsaynö niptinmi Tayta Diospa rabyaynin päsananpä rugakur Moisés nirqan: «Tayta Dios, poderyuq kanqaykita pïmaytapis musyatsirmi Israel runakunata Egiptupita jipimurqayki. Tsaynö jipiykämurqa Israel runakunapä ama tsayjinanpa rabyakuykullaytsu.

12Ushakätsiptikiqa Egipto runakunam niyanqa: «Desiertuchö ushakätsinanpäku kay nacionpita jipishqa». Tsaynö mana parlayänanpä ama ushakaykatsillaytsu. Taytay, tsaypa rantin jutsata rurayanqanpita perdonaykullay.

13Sirvishuqniki Abrahamta, Isaacta y Israelta awninqaykita yarpaykullay. Paykunatam nirqayki: «Noqam qamkunapita miraqkunata alli rikashä qoyllurkunanörä atska kayänanpä. Awninqänöllam paykunata entregashä kay entëru jallqakunata y raqrakunata imayyaqpis herenciankuna kananpä».

14Tsaynö Moisés rugakuptinmi Israel runakunata kuyaparnin Tayta Dios ushakätsirqantsu.

15Tsay jirkapita urämurmi Moisés apamurqan ishkay läja rumikunata. Tsay läjakunachömi Israel runakunawan Tayta Dios ruranqan pactu ishkan lädunpa qellqashqa karqan.

16Tsay läjakunataqa kikin Tayta Diosmi rurarqan. Tsaychö qellqashqa kaqkunataqa kikin Tayta Diosmi qellqarqan.

17Runakunata qayaykachaqta wiyarmi Josuéqa Moisésta nirqan: «Guërrachö pelyar qayaraykaqnörämi campamentupita wiyakaykämun».

18Peru Moisésnam nirqan: «Manam vinciskirtsu ni vinciyanqanpitatsu qayaykachäyan, sinöqa fiestata rurar cantayanqanmi wiyakaykämun».

19Israel runakunapa campamentunman chaykurmi Moisés rikarqan qoripita rurashqa torïtuta y runakuna tushur kaykaqta. Tsayta rikaykurmi pasaypa rabyar apamunqan läjakunata pakiqpä jitaskirqan.

20Tsaypitanam qoripita rurashqa torïtuta ninaman jitaskirqan. Tsaypitanam ñuchqu aqaskir yakuman wiñarnin tsay yakutana Israel runakunata uputsirqan.

21Aaróntanam Moisés nirqan: «Israel runakuna ¿imanayäshurquykitä kayjinanpa jutsata ruratsinaykipä?»

22Tsaynö niptinmi Aarón nirqan: «Taytay, ama rabyakuykullaytsu. Qampis musyankim kay runakuna jutsa rurayllapä imaypis kayanqanta.

23Paykunam niyämashqa: «Diosnïkunata rurapäyämay kaypita pushamänantsikpä. Egiptupita jipimaqnintsik Moisésta ima päsanqantapis manam musyantsiktsu».

24Tsaymi nirqä qorita tsararaqkuna qorinta apayämunanpä. Apayämuptin ninaman wiñaptïmi torïtuman tikrashqa».

25Tsaynö niptinmi Moisés tantiyarqan Israel runakuna jutsata rurananpä Aarón jutsayuq kanqanta. Tsaymi yarpachakur nirqan: «Kananqa Israel runakunata penqakuyman churarmi contrankuna manakaqman churayanqa».

26Tsaymi campamentu yaykunaman aywar Israel runakunata Moisés nirqan: «Mayqaykipis Tayta Diosta cäsuyta munaqkuna noqa kaykanqäman qorikäyämuy». Tsaynö niptinmi levitakuna Moisés kaykanqanman qorikäyarqan.

27Paykunatam Moisés nirqan: «Tayta Diosmi nin: «Llapayki campamentu juk kuchunpita juk kuchunyaq espädaykikunawan runakunata wanutsiyay castayki, vecïnuyki o amïguyki kaptinpis».

28Tsaymi Moisés ninqannö rurar tsay junaqchö kimsa waranqatanö (3,000) runakunata wanutsiyarqan.

29Tsaypitanam levitakunata Moisés nirqan: «Tayta Diosta cäsurmi qamkunaqa tsurikikunapa y castaykikunapa contranpis shäriyarquyki. Tsaymi kanan junaq Tayta Dios churayäshurquyki payta imaypis sirviyänaykipä».

30Tsaypita waraynin junaqnam Israel runakunata Moisés nirqan: «Qamkunaqa pasaypam jutsata rurayarquyki. Kananmi Tayta Dios kaykanqan jirkaman yapay kutishä. Capazchi qamkunapä rugakuptï perdonayäshunkiman».

31Tsaynö nirmi Tayta Dios kaykanqan jirkaman kutiykur Moisés rugakurqan: «Qoripita diosninkuna ruraykurmi Israel runakunaqa jutsata rurayashqa.

32Taytay, tsaymi perdonaykunaykipä mañakullä. Mana perdonarqa libruykichö jutï qellqashqatapis börraskillay».

33Tsaynö niptinmi Tayta Dios nirqan: «Noqata mana cäsumaqpa jutintam librüpita börrashä.

34Kanan kutir runakunata awninqä nacionman pushay. Angelnïmi wallkishurniki puntaykita aywanqa. Tsaynö kaptinpis Israel runakuna jutsata rurayanqanqa manam tsayllachötsu ushakanqa, sinöqa castiganä junaq chämuptinmi paykunata castigashä».

35Ninqannöllam Israel runakunata Tayta Dios mantsariypa qeshyawan castigarqan. Tsaynö castigarqan Aarón rurapanqan torïtuta adorayanqanpitam.

← Chapter 31 Jump to: Chapter 33 →