Ezekiel 12

Romani Ursari 2018 (Biblia Ande Chib Romani)

← Chapter 11 Jump to: Chapter 13 →

1O Del phenda mange gia:

2Chavo e manuseko, tu zivi ande po maskaral katar iek foro kai ni kandel, kai si len akha te dikhen a ni dikhen, si len kan te asunen a ni asunen, soke si iek foro kai ni kandel.

3Goleke tu, chavo e manuseko, lachar che ezgode e dromeke ta like ollivesea angla lende, ta ka lla katar iek than pe aver angla lenge akha. Sai te acharen kai von si llene kai ni kanden.

4Ka ikane e ezgode katar cho cher ollivesea angla lende sargo ezgode phanglenge, ta tu ka like pasa e riat angla lende, sargo iek phanglo,

5Angla lende ka putare chuke drom maskar e zidura ta ka like avri.

6Angla lende ka ikane che ezgode pe che dume, orachaia ka ikane len, ka uchare cho mui ta ni ka dikhe pe phuv, soke cherdem te dikhol kai diem tut o Israel.

7Me cherdem sa so phenda mange o Del te cherav.

8Ta o Del phenda mange gia thiarinako:

9Chavo e manuseko, ¿e llene katar o Israel, gola llene kai ni kanden, ni puchle tut: So chere?

10Phen lenge kai o Del o Gazda phenel gia: Gaia poroka del orba katar o charo katar o Jerusalem ta katar sa e llene katar o Israel kai si po maskaral latar.

11Phen lenge gia: Pe mande ka llanen, prema so cherdem me, gia ka cheren tumenchar, ka llan po pusto phangle.

12Ta e charo kai si po maskaral lendar ka inllaren le upral pe pete orachaia ta ka liken, po zido ka cheren iek putardipe ta kotar ka ikanen le ta ka ucharen leke akha te na dikhel e phuv.

13A me ka chudav pe lete mi mreza ta ka perel ta ka achadol, ta ka cherav te inllaren le ande Babilonia, ande phuv katar e kaldeura, a ni ka dikhel la ta incha ka merel.

14Ta sa golen kai ka aven truial letar te pomozin le ta sa leke boñikonen, ka rispiu len pe suako rig ta ka ikanav mo jarni pe lende.

15Ta ka llanen kai me sem o Del, kana ka rispiu len pe phuv.

16Ta ka cherav nesave lendar te nasen katar o jarni, katar e bok ta katar o nasualipe, te sai den orba katar lengo gadope ande sa e phuvia kai ka aven, ta ka llanen kai me sem o Del.

17O Del phenda mange gia:

18Chavo e manuseko, ja cho marrno daraia ta pi cho pai izdramno ta brigaia.

19Ta phen gia e foroke katar e phuv: Gia phenda o Del o Gazda cheres e llene kai zivin ando Jerusalem ta cheres e phuv katar o Israel: Daraia ka jan po marrno, ta ande dar k pien po pai, soke lengi ande lengi phuv ni ka avel niso ta ka achel pusti, pala o bilachipe katar sa e llene kai zivin kote.

20Ta e forura kote kai zivina e llene ka achen puste, ta e phuv ka avel zatrime, ta ka llanen kai me sem o Del.

21O Del phenda mange gia:

22Chavo e manuseko, ¿So si gala alava kai tumen phenen ando Israel, kai phenel gia: E llivesa nakhen ta e sune katar o profeta ni cherdon?

23Goleke, phen lenge: Gia phenda o Del o Gazda: Ka achavav gala alava, ta nikada ios ni ka phenenle ando Israel. Goleke phen lenge: Pase si gola llivesa ta ka cherdol suako sargo suno kai dikhilo.

24Soke ni ka aven ios sargo sune kojamne, ta ni ka aven llene kai apogodin te peren drago e llenenge katar o Israel.

25Soke me o Del ka dav orba ta so me phenav ka cherdol, ni ka aduricharen ios tumen kai ni pachan soke ande tumare llivesa ka cherav so phenav, gia phenel o Del o Gazda.

26Ta o Del phenda mange gia:

27Chavo e manuseko, E llene katar o Israel phenen gia: E sargo sune kai dikhel o Ezekiel si te cherdon but mai angle leki poroka ka cherdol ando vreme kai ka avel but mai angle.

28Goleke phen lenge: Gia phenda o Del o Gazda: Ni ka nakhel ios vreme pe ni iek katar me alava, soke so me ka phenav ka cherdol, gia phenel le o Del o Gazda.

← Chapter 11 Jump to: Chapter 13 →