Ezekiel 7

Romani Ursari 2018 (Biblia Ande Chib Romani)

← Chapter 6 Jump to: Chapter 8 →

1O Del phenda mange gia:

2Tu, chavo e manuseko, gia phenda o Del o Gazda e phuviake katar o Israel: O son, o son avel pe star riga e suetoke.

3Akana o son ka avel pe tute, ta ka bichalav pe tute mi joli, ta ka krisiu tut prema che droma, ta ka thovav pe tute sa cho gadope.

4Ni ka lav me akha tutar ta ni ka prostiv tut ta ni ka avel mange zalba. Ka thovav pe tute sa so cherdan ta po maskaral tutar ka avel cho gadope, ta ka llanen kai me sem o Del.

5Gia phenda o Del o Gazda: Iek bilachipe, avel iek bilachipe.

6Avel o son, o son avel, llungadilo pala tute, etalo avel.

7E thiarin avel chuke, tu kai zivi pe phuv, avel o vreme, pase si o llive, o llive darano, sai te na veselil tut.

8Akana ka perel pe tute mi joli ta pe tute ka dikhol mo silnope, ka krisiu tut prema che droma ta ka thovav pe tute cho gadope.

9Ni ka dikhav pe tute zalbaia ta ni ka prostiv tut. Prema so chere ka dosarav tut ta po maskaral tutar ka avel cho gadope ta ka llanen kai me sem o Del kai dukhavel.

10Etalo o llive, etalo avel, llivosalia, likiste e lulunlla pe ran, zelenisarda o bilachipe.

11O silnope vazdinailo pe ran e bilachimaki. Ni iek ni ka achel lendar, katar gachin llene, ni iek lendar kai ka braduilpe.

12Avilo o vreme, pase si o llive, gua kai chinel, te na veselilpe, a gua kai bichinel, te na rovel, soke mi joli ka perel pe but llene.

13Soke gua kai bichinel, ni ka avel leko pale so bichinda ni te achile llunde. So me phendem kai ka avelpe bute llenenchar ni ka delpe palpale, ta pala lengo bilachipe niko nasti ka arakhel po zivoto.

14Ka basalen e tuturuga ta ka lacharen sa e ezgode, a ni ka avel ko te llal te marelpe, soke mi joli si pe sa e but llene.

15Avri katar o foro ka meren po jarni ta bokhatar, ko ka avel ando vos ka merel po jarni, a ko ka avel ando foro ka merel bokhatar ta nasualimatar.

16Ta gola kai ka kurtulinpe lendar ka nasen ta ka achen pe burdura sargo e gulubura kai llan pe umalia, sa ka roven, suako iek pala po bilachipe.

17Suako va ka jasarel e zor ta sa e porrne ka aven kovle sargo pai.

18Ka thoven pe pete patave zalosne ta ka avel pe lende e dar, ka pinllardol pe lengo mui o lallao ta sa lenge sore ka aven jaliarde.

19Ka chuden po drom lengo rup ta lengo sunakai sargo llubri, ni lengo rup ni lengo sunakai nasti ka braduil len ando llive katar e joli e Devleki. Nasti ka chaliaren po zivoto ta nasti ka pheren po lli lenchar soke gola ezgode cherde len te peren.

20Sa gola ezgode sukar von cherde len iek baripe ta cherde lendar e slike katar lenge gado dela, goleke me ka cherav len iek ezgoda gadomaki.

21Diem la ande va katar e llene avere phuvienge te len peke lake ezgode ta ka aven pe late e bilache llene katar e phuv ta ka mukenla ando lallao.

22Ta ka lav mo mui lendar ta ka den pe zor ande mo cher, ka den andre e kochkaria ta ka muken le ando lallao.

23Cher iek lancho, soke e phuv si pherdo mundaripe ta o foro si pherdo silnope.

24Goleke ka anav katar e phuvia e mai bilache llenen ta ka len peke lenge chera ta ka achavav o baripe katar e llene kai gazdarin ta lenge delenge chera ka achen ando lallao.

25E zatrania avel, ka roden e pas ta ni ka malaven la.

26Ka avel pe lende e duk ta ka avel buna pala e buna, ka mangen katar o profeta te llanen so si, a o zakono ka duriol katar o popo ta katar e phure ka duriol o sikadipe.

27O charo ka achel zalosno ta gua kai gazdaril ka thovel patave zalbake ta ka llanen kai me sem o Del.

← Chapter 6 Jump to: Chapter 8 →