Ezekiel 30

Romani Ursari 2018 (Biblia Ande Chib Romani)

← Chapter 29 Jump to: Chapter 31 →

1O Del dia manchar orba ta phenda mange:

2Chavo e manuseko, phen: Gia phenda o Del o Gazda: Roven ta phenen: ¡Tesko katar gua llive!

3Soke pase si o llive, pase si o llive e Devleko, llive kai si pherdo oblakura, llive dukhado e phuvienge.

4Ka avel o jarni ando Ejipto, ta ka avel dar ande Etiopia, kana ka peren e llene ranime ando Ejipto, ta ka len peke lengo barvalipe, ta ka zatrin lenge barra kai si telal katar e phuv.

5E Etiopia, o Fut, o Lud, sa e Arabia ta e llene kai si zanio lenchar, ka peren lenchar po jarni.

6Gia phenda o Del: I gola kai pomozin e Ejipto ka peren, o baripe katar leko gazdaripe ka perel, katar o Migdol llik kai o Sevene ka peren po jarni, gia phenel o Del.

7Ta ka aven zatrime maskar e forura zatrime, ta lenge forura ka aven maskar e forura puste.

8Ta ka llanen kai me sem o Del, katar ka phabarav o Ejipto ta ka phagon sa gola kai pomozin le.

9Ande gua vreme ka liken llene angla mande kai inllaren iek viasta ande llimie, te daraven e Etiopia kai ni daral, ta ka daran zurale sargo ando llive katar o Ejipto, soke avel.

10Gia phenda o Del o Gazda: Ka zatriv o barvalipe katar o Ejipto e vastea katar o Nabukodonosor o charo katar e Babilonia.

11Vou ta leke boñikura, e mai zurale maskar e phuvia, ka aven te zatrin e phuv, ta ka ikanen po jarni po Ejipto, ta ka pheren mule o Ejipto.

12Ta ka sukarav e paia, ta ka dav e phuv kai e bilache llene, ta ka dav ande va katar e llene avere phuvienge te zatriv e phuv ta sa so si ande late. Me o Del phendem le.

13Gia phenda o Del o Gazda: Ka zatriv i e slike, ta ka zatriv e delen katar o Menfis, ta ni ka avel ios charo ando Ejipto, ta ka thovav e dar ando Ejipto.

14Ka zatriv o Patros ta ka phabarav o Zoan, ta ka chinav krisa ando Tebas.

15Ka ikanav sa mi joli po Sin, e zor katar o Ejipto, ta ka zatriv e llenen katar o Tebas kai si but.

16Ka phabarav o Ejipto, ka avel duk ando Sin, ta o Tebas ka avel chindo pe kotora, ta o Menfis ka avel brigime suako llive.

17E llene terne katar o Aven ta katar e Pibeset ka meren po jarni, ta e diskinien ka inllaren len phangle.

18Ta ando Tafnes ka cherdol truniariko kana ka me ka phagav e zor katar o Ejipto, ta ka achel o baripe katar leki zor, ka ucharel la e tufina, ta ka inllaren len phangle e llenen kai zivin ande leke forichura.

19Ka chinav krisa ando Ejipto ta ka llanen kai me sem o Del.

20Avilape kai ando burs desuiekto, ta ando llive eftato katar o purvo chon, o Del dia manchar orba ta phenda mange:

21Chavo e manuseko, phaglem o va e Faraonoko o charo katar o Ejipto, ta ni ulisarde leko le te thoven leke draba, ta ni ulisarde leke iek chiti te sai sastol, ta gia te lel zor te sai istarel o jarni.

22Goleke, gia phenda o Del o Gazda: Kate sem po Faraon o charo katar o Ejipto, ta ka phagav leke va, zuralo ta phago, ta ka cherav te perel o Jarni katar leko va.

23Ta ka rispiu e ejipsionen maskar e forura, ta ka fulavav len ande phuvia.

24Ta ka cherav te avel le zor o charo katar e Babilonia, ta mo jarni ka thovav ande leko va, a ka phagav e va katar o Faraon, ta ka rovel angla le sargo kana si ranime ta si te merel.

25Ka dav zor ande va e charo katar e Babilonia, a e va katar o Faraon ka peren, ta ka llanen kai me sem o Del, kana me ka thovav mo jarni ando va katar o charo katar e Babilonia, ta vou ka vazdel le po Ejipto.

26Ta ka rispiu e ejipsionen maskar e forura, ta ka rispiu len ande phuvia, ta ka llanen kai me sem o Del.

← Chapter 29 Jump to: Chapter 31 →