Ezekiel 36

Romani Ursari 2018 (Biblia Ande Chib Romani)

← Chapter 35 Jump to: Chapter 37 →

1Tu, chavo e manuseko, phen e poroka e burdonenge katar o Israel, ta phen: Burdura katar o Israel, asunen o alav e Devleko:

2Gia phenda o Del o Gazda: Soke o dusmano phenda tumendar: ¡Eke bre! i e burdura ostade si dine te achen amenge,

3Goleke, phen e poroka oma, ta phen: Gia phenda o Del o Gazda: Soke zatrisarde tumen ta jale tumen pe suako rig, te sai aven tumen so ka achel avere phuvienge, ta sen ando mui katar e llene kai den e orbe ta te aven o lallao katar e phuvia,

4Goleke, tumen e burdura katar o Israel, asunen o alav katar o Del o Gazda: Gia phenda o Del o Gazda e suakone burdoke, e lenenge, e bare umalienge, e phagimake ta e zatrimake ta e foronenge kai inai len ko te arakhel len, kai lie len peke ta cherde len te nakhen patnia aver phuvia kai si truial,

5goleke, gia phenda o Del o Gazda: Diem orba andral katar e iag katar mi joli pe ogola phuvia, ta pe sa o Edom, kai mardepe te achel lenge mi phuv veselimaia, sa pe liea ta korvane, te sai phanden golen kai tradie len.

6Goleke, phen e poroka po Israel, ta phen sa e burdonenge, e lenenge ta e bare umalienge: Gia phenda o Del o Gazda: But joliariko diem orba, soke e phuvia marde tumendar espurnia.

7Goleke o Del o Gazda phenda gia: Me vazdiem mo va, ta jalem sovel kai e phuvia kai si truial tumendar ka nakhen piro lallao.

8A tumen burdura katar o Israel, ka den tumare krangura ta ka inllaren mange tumare septelie, foro katar o Israel, soke pase sen te aven.

9Soke me sem tumenchar, ta ka avav tumende, ka aven radime ta ka barion tumare simiche.

10Ka cherav te cherdon but e llene katar o Israel, ta ka zivin ande forura, ta ka vazden so saia phagipe.

11Ka cherav te cherdo but e llene ta e zivirinie, ta ka cherdo but ta ka barion, ta ka aven sar sea omanglal, ta ka cherav tumenchar mai but lachipe neko mai omanglal, ta ka llanen kai me sem o Del.

12Ta ka cherav te phirel pale mo foro o Israel, ta ka len tut pale, ta ka ache lenge, ta nikada ios ni ka mundare lenge minonen.

13Gia phenda o Del o Gazda: Soke phenen tumendar gia: Tu ja e llenen ta mundare e minonen katar cho foro,

14goleke ni ka ja ios e manusen, ta nikada ios ni ka mundare e minonen katar cho foro, gia phenel o Del o Gazda.

15Ta nikada ios ni ka asuna kai den bilache orbe tutar e phuvia, ni te kusen tut e forura, ta ni ka chere te meren ios e chave katar chi phuv, gia phenel o Del o Gazda.

16O Del dia manchar orba ta phenda mange:

17Chavo e manuseko, kana e llene katar o Israel zivina ande lengi phuv, meliarde la pe dromenchar ta e ezgodenchar kai cherena, sargo o gado katar e diskinia kai avilo lako chon, gia saia mange lengo drom.

18Ta cherdem te perel pe lende mi joli pala o rat kai e cherde te chordol pe phuv, soke meliarde la pe delenchar.

19Fuladem len maskar e forura ta sea rispime maskar e phuvia, prema lengo drom ta prema so cherena krisisardem len.

20Ta kana avile kote karing llana, mukle ando lallao mo santo anav, soke phende lendar: Gala si foro e Devleko, ta katar leko foro likiste.

21Ta avila mange duk, soke dikhlem sar mukena ando lallao mo santo anav e llene katar o Israel maskar e phuvia kai llele.

22Goleke, phen e llenenge katar o Israel: Gia phenda o Del o Gazda: Ni cherav le pala tumende, manusalen katar o Israel, cherav le pala mo santo anav, gua anav kai tumen muklen le ando lallao maskar e forura kai avilen.

23Ta ka blagosiv mo baro anav, gua anav kai tumen muklen ando lallao maskar gola phuvia, ta e phuvia ka llanen kai me sem o Del, gia phenel o Del o Gazda, kana ka avav blagosime ande tumende angla lenge akha.

24Ta me ka lav tumen katar e forura, ta ka chidav tumen katar sa e phuvia, ta ka anav tumen kai tumari phuv.

25Ka chudav pe tumende pai chisto, ta ka aven chistome katar sa tumaro melalipe, ta katar sa tumare dela ka chistou tumen.

26Ka dav tumen iek lio nevo, ta ka thovav ande tumende iek duo nevo, ka ikanav tumaro lio barreko ta ka dav tumen iek lio maseko.

27Ta ka thovav ande tumende mo duo, ta ka cherav te phiren prema me zakonura ta te cheren len.

28Ka zivin ande phuv kai diem tumare paponen, ta tumen ka aven mo foro, ta me ka avav tumaro Del.

29Ta ka braduiv tumen katar sa tumaro melalipe, ta ka ikharav te avel o lliu, ta ka cherav le but, ta ka thovav tumen ios pe bok.

30Ka cherav te aven mai but septelie pe kasta, ta e septelie katar e umalia, te na avel pe tumende nikada ios o lallao katar e bok maskar e phuvia.

31Ta ka den tumen golli katar tumare bilache droma, ta katar e ezgode kai cherden kai ni sea lache, ta ka avel tumenge lallao isto tumendar pala tumaro bilachipe ta pala o gadope kai cherden.

32Ni cherav le pala tumende, llanen gaia ezgoda, phenel o Del o Gazda, me cherav le te avel tumenge lallao katar o bilachipe kai cheren, foro katar o Israel.

33Gia phenda o Del o Gazda: Ando llive kai ka chistou tumen katar sa tumaro bilachipe, ka cherav i te zivin ande forura ta ka avel vazdino pale o phagipe.

34Ta e phuv zatrime ka radin la pale, ta ka dikhenle sa e llene kai nakhle kotar.

35Ta ka phenen: Gaia phuv kai saia zatrime akana cherdili sargo o vostano katar o Eden, ta gala forura kai sea puste phage ta zatrime, akana si ande zidura ta andre zivin llene.

36Ta e forura kai ka achen truial ka llanen kai me vazdiem pale so saia peradino, ta thodem te bariol so saia zatrime, me o Del diem orba, ta ka cherav le.

37Gia phenda o Del o Gazda: O foro katar o Israel pale ka mangel letar, te cherel lenge gaia ezgoda, ka cherav te cherdon but llene gia sar cherdon but e bakre.

38Sargo e bakre chinade, sargo e bakre katar o Jerusalem kana si e glamne slave, isto gia e forura puste ka aven pherde manusa sargo bakre, ta ka llanen kai me sem o Del.

← Chapter 35 Jump to: Chapter 37 →