Ezekiel 25

Romani Ursari 2018 (Biblia Ande Chib Romani)

← Chapter 24 Jump to: Chapter 26 →

1O Del dia manchar orba ta phenda mange:

2Chavo e manuseko, dik pe amonitura ta phen pe lende iek poroka.

3Ka phene gia e amonitonenge: Asunen o alav katar o Del o Gazda. Gia phenel o Del o Gazda: Soke tumen phenden: ¡Sukar!, kana mo santuario saia thodo ando lallao, ta e phuv katar o Israel saia zatrime ta inllarena phangle e llenen katar o Juda,

4goleke me dav tut te ache e llenenge katar o oriente, von ka thoven ande tute pe chare ta ka vazden po pero, von ka jan so del chi phuv, ta ka pien o thud katar che zivirinie.

5Ta ka cherav te zivin ando Raba e deve, ta e forura katar o Amon te aven sargo bakre, ta ka llanen kai me sem o Del.

6Soke gia phenda o Del o Gazda: Soke mardan ande palme, ta mardan e porrnenchar, ta veselisailan ta mardan espurnia katar o Israel,

7goleke me ka vazdav mo va pe tute, ta ka dav tut kai e phuvia te len tutar che ezgode, ka ikanav tut maskar e forura, ta ka zatriv tut maskar e phuvia, ka zatriv tut, ta ka llane kai me sem o Del.

8Gia phenda o Del o Gazda: Soke o Moab phenda e Siriake: O Juda si sargo sa e phuvia,

9goleke, me putarav iek rig katar o Moab katar e forura kai si pasa aver phuvia, e sukar forura katar o Bet Iesimot, Baal Megon ta Kiriataim,

10ka mukav e forura katar likel o kham te gazdarin po foro katar o Amon, te na denpe golli letar nikada ios e phuvia.

11Ta i ando Moab ka chinav krisa, ta ka llanen kai me sem o Del.

12Gia phenda o Del o Gazda: Pala so cherda o Edom, kai ikanda pi joli po Juda, soke cherde but baro bilachipe ta ikande pi joli pe lende,

13goleke gia phenda o Del o Gazda: I me ka vazdav mo va po Edom, ta ka meren maskar lende e manusa ta e zivirinie ta ka zatriv le, katar o Teman llik kai o Dedan ka meren e jarniea.

14Ta ka ikanav mi joli po Edom, ka dav len ande va katar mo foro o Israel, ta ka cheren ando Edom prema mi joli ta prema mo silnope, ta ka pinllaren mi joli, gia phenel o Del o Gazda.

15Gia phenda o Del o Gazda: Prema so cherde e filisteura ande joli, ikande pi duk silnomaia, zatrisarde pala e purani joli,

16Goleke, gia phenda o Del: Me vazdav mo va pe filisteura ta ka ikanav e kereteonen ta ka zatriv so achel pasa e mora.

17Silnomaia ka ikanav pe lende mi bari joli, ta ka llanen kai me sem o Del, kana ka ikanav mi joli pe lende.

← Chapter 24 Jump to: Chapter 26 →