Ezekiel 29

Romani Ursari 2018 (Biblia Ande Chib Romani)

← Chapter 28 Jump to: Chapter 30 →

1Ando burs desto, ta ando chon desto, ando llive desuduito katar o chon, o Del dia manchar orba ta phenda:

2Chavo e manuseko, thov tut angla o Faraon charo katar o Ejipto, ta phen pe lete iek poroka ta pe sa o Ejipto.

3De orba ta phen: Gia phenel o Del: Me sem joliariko pe tute Faraon charo katar o Ejipto, o baro iagartano kai si ande leke lena, kai phenda: O Nilo si murno soke me cherdem le.

4Me ka thovav sastrura ande che falke, ta ka chera te lipinpe pe che kore e mache katar che lena ta ka ikanav tut katar che lena, ta sa e mache ka liken lipime pe che kore.

5Ta ka mukav tut po pusto ta sa che machen katar che lena, upral pe umalia ka pere, ni ka ave chidino ta niko ni ka lel tut, diem tut e zivirinienge kai si pe phuv ta e chiriklienge kai si ando miloso te ave lengo jape.

6Ta sa e llene kai zivin ando Ejipto ka llanen kai me sem o Del soke sea iek rovli cherdi katar e ran e Israeleke.

7Kana istarde tut e vastea, phagilan, ta phaglan sa lengo dumo, ta kana muklepe pe tute, phagilan, ta phaglan sa lenge zea.

8Goleke, gia phenda o Del o Gazda: Me anav pe tute o jarni, ta ka aven chide tutar e manusa ta e zivirinie.

9Ta o Ejipto ka achel phago ta pusto, ta ka llanen kai me sem o Del, soke phendem: O Nilo si murno, ta me cherdem le.

10Goleke me sem joliariko pe tute ta pe che lena, ta ka cherav te achel o Ejipto zatrime, te achel korkorre ta pusto, katar o Migdol llik kai o Sevene, llik kote kai resel e Etiopia.

11Ni ka ustaven gua than ni o manusa ni e zivirinie, ta kote ni ka zivin saranda burs.

12Ta ka cherav te achel pusto o Ejipto maskar e phuvia zatrime, ta leke forura maskar e forura phage ka achel zatrime saranda burs, ta ka rispiu o Ejipto maskar e forura ta maskar e phuvia.

13Soke gia phenda o Del o Gazda: Pala e saranda burs ka chidav e Ejipto maskar e forura kai avile rispime,

14ta ka cherav te irinpe e phangle katar o Ejipto, ta ka inllarav len ande phuv katar o Patros, kotar katar likiste, kote ka aven iek charoina kai ka murzin pe late.

15Ka avel chorri prema ogola charoine, nikada ios ni ka vazdiniaol pe aver phuvia, soke me ka chikniarav len te na gazdarin pe phuvia.

16Ta o Israel ni ka uzdilpe ios ando Ejipto, soke cherde o bilachipe kana uzdisaile ande lete, ta ka llanen kai me sem o Del o Gazda.

17Ando burs bis ta efta ando purvo chon, ta o purvo llive katar o chon, o Del dia manchar orba ta phenda mange:

18Chavo e manuseko, o Nabukodonosor thoda pe boñikonen te cheren iek baro rado po Tiro. Sa e llenenge sore achile jaliarde, ta sa e zea ranime, ta ni vou ni leke boñikonenge ni dobisarde niso katar o Tiro pala so cherde pe lende.

19Goleke o Del o Gazda phenda gia: Me dav kai o Nabukodonosor, charo katar e Babilonia, e phuv katar o Ejipto, ta vou ka lel peke lengo barvalipe, ta la lel peke so ka achel, ta ka lel o chari e marimako ta ka avel soia te pochinel pe boñikonenge.

20Pala o rado kai cherda te marelpe lea diem pe e phuv katar o Ejipto, soke radisarde mange, gia phenda o Del o Gazda.

21Ande gua vreme ka cherav te bariol e zor ando Israel. Ta ka de orba maskar lende, ta ka llanen kai me sem o Del o Gazda.

← Chapter 28 Jump to: Chapter 30 →