Ezekiel 13

Romani Ursari 2018 (Biblia Ande Chib Romani)

← Chapter 12 Jump to: Chapter 14 →

1O del phenda mange gia:

2Chavo e manuseko, porokisar pe poraukura katar o Israel, gola kai porokin ta phen golenge kai porokin so si ande lengo lio: Asunen o alav e Devleko.

3Gia phenda o Del o Gazda: ¡Tesko e profetonenge kai si dile, kai llan prema so phenel lenge lengo lio ta ni dikhle niso!

4Sargo lisiche po pusto sea che poraukura, ioi Israel.

5Ni llelen te arakhen e Israele ta ni cherden iek zido truial, te na perel kana ka maren tumen ando llive e Devleko.

6Dikhen sargo sune kojamne ta cheren baripe, kojaven pe orbenchar. Phenen kai o Del phenda, a o Del ni bichalda len, a tumen aduricharen te cherel so von phenen.

7¿Ni dikhlen sargo sune kojamne, ta ni apogodisarden kojaimaia, ni phenen: O Del phenda, a me ni phendem niso?

8Goleke, gia phenda o Del o Gazda: Soke tumen phenden so ni mol le niso, ta dikhlen o kojaipe, me sem joliariko pe tumende, o Del o Gazda phenel le.

9Ka vazdav mo va pe poraukura kai dikhen so ni mol le niso ta apogodin kojaimaia, von ni ka aven chidine me foroia, ta ni ka avel pisime lengo anav ando lil katar o Israel ta ni ka irinpe ando Israel, ta ka llanen kai me sem o Del o Gazda.

10Soke kojaden me foro ta phenden, pas, kana ni saia pas ta iek lleno vazdela o zido ta ogola llene ucharena la e gliboia,

11phen e llenenge kai ucharen e gliboia zido, kai ka perel, ka avel iek baro bursin ta ka bichalav krupe sargo barra te peraven la ta bari balav ka phagel le.

12Ta kana ka perel o zido, e llene ka puchen tumen: ¿Kaitalo o glibo kai ucharden lea o zido?

13Goleke, gia phenel o Del o Gazda: Ka cherav te phagel le e bari balav me jolinaia ta o baro bursin katar mo silnope ta krupe sargo barra katar ande joli ka zatrin le.

14Gia ka zatriv o zido kai tumen ucharden e gliboia ta ka peravav le pe phuv ta ka dikhon leke barra kai si ande phuv ta ka perel ta tumen ka aven zatrime maskar o zido. Ta ka llanen kai me sem o Del.

15Gia ka cherdol mi joli po zido ta pe llene kai ucharde la e gliboia, ta ka phenav tumenge: Akana inai ios o zido, ni e llene kai ucharde le,

16e poraukura kai porokin katar o Jerusalem ta dikhen latar sargo sune katar e pas, kana inai pas, gia phenel o Del o Gazda.

17A tu, chavo e manuseko, de pe diskinie katar cho foro kai porokin katar so si ande lengo lio ta porokisar pe lende,

18ta phen: Gia phenda o Del o Gazda: ¡Tesko golenge kai suven doria e vastenge ta dikhle chirimatarke kai thodon po soro katar suako manus, te phanden e zivotura! ¿Ka istaren phangle e zivotura katar mo foro, te sai braduin tumaro zivoto?

19¿Ta den man ando lallao maskar mo foro pala iek umpa sebada ta kotora katar o marrno ta mundaren e llenen kai inai soke te meren, ta den zivoto e llenen kai inai soke te zivin, ta kojaven me foro kai asunel o kojaipe?

20Goleke gia phenda o Del o Gazda: Inai mange drago tumare kirpe chirimatarke kai phande lenchar e zivotura kai furian, me ka mukliarav len katar tumare va ta ka mukav len te furian sargo chiriklia e zivotura kai tumen istaren len kana furian.

21Ta ka pharravav tumare chitura chirimatarke ta ka mukliarav me foro katar tumaro va ta ni ka aven ios phangle ande tumaro va ta ka llanen kai me sem o Del.

22Soke tristosarden kojaimaia o lio katar o lleno chacho gole kai me ni tristosardem ta dien zor ande va katar o lleno bilacho te na duriol katar po bilacho drom ta dien le vlaga

23goleke, ni ka dikhen ios gola sargo sune kai ni mol len niso, ta ni ka apogodin ios ta ka braduiv katar tumare va me foro ta ka llanen kai me sem o Del.

← Chapter 12 Jump to: Chapter 14 →