Ezekiel 17

Romani Ursari 2018 (Biblia Ande Chib Romani)

← Chapter 16 Jump to: Chapter 18 →

1O Del phenda mange gia:

2Chavo e manuseko, phen iek ezgoda ta cher iek paramichi e llenenge katar o Israel.

3Ta ka phene: Gia phenda o Del o Gazda: Iek bari agila, bare phakhengi ta bare porrnengi, pherdi bal but sukar, avili ando Libano ta lia e umal katar o sedro.

4Ikanda e mai preche raniorri zeleni ta inllarda ande iek foro kai chinen ta bichinen.

5Ta inllarda i simiche katar e phuv ta anda len kai iek lachi phuv, ta thoda len ande phuv pasa but paia thoda len sargo o sause.

6Ta barilo ta cherdilo iek kas drakhengo, pherdo krangura kai ni barile but upre ta lake krangura dikhena karing e agila ta lake zile sea telal katar e agila ta barile e kasta drakhenge ta barile e drakha ta e krangura.

7Ta saia i aver bari agila, bare phakhengi ta pherdi bal ta gala kasta drakhenge chidie pe zile pasa late te sai chudel o pai pe phuv kote kai sea thode.

8Ande iek lachi phuv pasa o pai, te sai cherel krangura ta te del drakha, ta te sai avel kas thulo e drakhengo.

9Phen lenge: Gia phenda o Del o Gazda: ¿Ka llal lake sukar? ¿Ni ka ikanen lake zile ta ka zatrin lake drakha ta ka sukol? Sa lake patra zelene ka sukon, ta ni ka avel pala e but llene ta lengi zor te ikanen lake zile katar e phuv.

10Akana si thodi ande phuv, ¿Ka llal lake sukar? ¿Ni ka sukol sa kana del la e balav tati? Ande phuv zeleni kai barili ka sukol.

11Ta o Del phanda mange gia:

12Phen gia akana e llenenge kai ni kanden: ¿Ni acharen so phenen gala orbe? Phen lenge: O charo katar e Babilonia avilo ando Jerusalem ta dobisarda e charo ta leke sudonen ta inllarda len pea ande Babilonia.

13Ta lia iekhe katar porodo e charoko ta achilo lea pe iek orba ta cherda le te jal sovel ta inllarda peke e llenen kai gazdarina ande phuv,

14te sai avel zatrime e charoina ta te na ustel ios, ta gia te na phagon e sovel kai jala.

15A vou vazdinailo pe lete ta bichalda sudonen ando Ejipto te sai del le gra ta but llene. ¿Ka llal leke sukar, ka nasel o lleno kai cherda gala ezgode? Gua lleno kai phagla e sovel ¿Ka nasel?

16Dav tumen mo alav, phenel o Del o Gazda, kai gua lleno ka merel ande Babilonia, kote kai zivil o charo kai mukla le te charoil, ta ni thoda sama pe leke sovlia ta phagla po alav kai dia.

17Ta ni bute boñikonenchar ni bute llenenchar ni ka cherel niso pala lete o Faraon kana ka llal te marelpe, kana ka vazden e bar ta e bare chera te mundaren bute llenen.

18Soke ni thoda sama pe sovlia ta phagla o alav kai dia man kana dia po va mande, ta cherda sa gala ezgode, ni ka nasel.

19Goleke, gia phenda o Del o Gazda: Dav tumen mo alav, kai e sovlia kai jalem ta ni thoda lenge sama ta mo alav kai phagla, ka cherav te peren pe leko soro.

20Ka chudav pe lete mi mreza ta ka achel phanglo ande mo solo ta ka cherav le te avel ande Babilonia ta kote ka thovav le ande kris soke vazdinailo pe mande bilachimaia.

21Ta sa e llene phangle kai si le, ta sa leke boñikura ka meren po jarni ta gola kai ka achen ka aven rispime pe suako rig. Ta ka llanen kai me o Del diem orba.

22Gia phenda o Del o Gazda: Me ka ikanav katar o kas o mai baro, chak upral iek rran ta ka thovav le ande phuv, katar o mai glamno ta mai zeleno krango ta ka thovav le ande phuv pe iek baro ta glamno burdo.

23Po baro burdo katar o Israel ka thovav le ta ka barion leke krangura ta ka del septelie ta ka cherdol iek glamno sedro ta telal ka zivin sa e chiriklia katar suako chirikli kai si, telal katar lake krangura ka zivin.

24Ta ka llanen sa e kasta katar o vos kai me peradem o kas o glamno ta vazdiem o kas o minono, sukardem o kas o zeleno ta selenisardem o kas o suko. Me o Del phendem le ta ka cherav le.

← Chapter 16 Jump to: Chapter 18 →