Ezekiel 4

Romani Ursari 2018 (Biblia Ande Chib Romani)

← Chapter 3 Jump to: Chapter 5 →

1Tu, chavo e manuseko, le chuke iek chikla ta thov la angla tute, ta pisisar pe late o foro katar o Jerusalem.

2Pisisar iek than, ta truial latar boñikura ta chare inzarde, cher zidura, cher iek phurd te liken pe zidura.

3Mapalal le iek kotor sastruno ta thov le sargo zido po maskaral tutar ta katar o foro, ta ka avel sargo iek bar, ta ka thove la truial, te sai dikhel o Israel sar ka chere le.

4Ta tu ka inzo pe chi rig e stingo ta ka thove pe goia rig o bilachipe katar o Israel. E llivesa kai ka sove pe goia rig, ka terpi pe tute lengo bilachipe.

5Me ka dav tut e bursa katar lengo bilachipe kai si sargo llivesa, trin stotine ta iniavardes llive, ta gia tu ka inllare o bilachipe katar o foro katar o Israel.

6Kana ka nakhel gava vreme, ka inzo pale pe chi rig e chachi ta ka inllare o bilachipe katar o foro e Judaeko saranda llive, llive sargo burs, llive sargo o burs diem le chuke.

7Mapalal ka lla kai o Jerusalem kai si truial latar e dusmanura, ka thove cho va dunado pe late ta ka phene iek poroka cheres late.

8Me phanglem tut te na pere pe iek rig ni pe aver, lligo ni ka getonpe e llivesa katar cho phandipe.

9Ta le chuke lliu, sebada, aba, lenteja, millo ta avena ta thov len ande iek piri, ta cher lendar marrno prema e llivesa kai ka inzo pe chi rig. Trin stotine ta iniavardes llive ka ja letar.

10Ka chine pe star kotora iek kilo ta ka ja iek kotor ando llive, ande iek saiato e lliveseko suako drom.

11Ta ka pie dopas katar o litro pai ando llive, ande iek saiato e lliveseko suako drom.

12Ta ka ja marrno cherdo katar e sebada cherdo telal katar o prajo e iagako ta ka cherele angla lende pe iag katar e pogastia manuseki.

13Ta o Del phenda: Gia ka jan po marrno pokalime e chave katar o Israel, kana ka chudav len maskar e phuvia.

14Ta me phendem: ¡Ioi, Gazda Devle! mo zivoto inai pokalime, ta nikada sar kana sema terno ni jalem o mas katar iek zivirinia kai saia po meripe, o kai chinde la pe kotora ta nikada ni jalem o mas pokalime.

15Ondaka vou phenda mange: Ka mukav te thove gosnia guruveke po than katar e pogastia manuseki te chere cho marrno.

16Ta phenda mange: Chavo e manuseko, ka cherav te avel cherricha marrno ando Jerusalem, ta phariaven o marrno te jan le brigaia, ta ka llinen o pai kai pien daraia,

17ta kana ka trubul len o marrno ta o pai, ka dikhen iek pe aver ta ka meren ande po bilachipe.

← Chapter 3 Jump to: Chapter 5 →