Ezekiel 32

Romani Ursari 2018 (Biblia Ande Chib Romani)

← Chapter 31 Jump to: Chapter 33 →

1Ando purvo llive katar o chon desuduito katar o burs desuduito, o Del dia manchar orba ta phenda mange:

2Chavo e manuseko, uste ta rov pala o Faraon o charo katar o Ejipto, ta phen leke: Tu san sargo iek liono maskar e phuvia, ta san sargo e azdava e moraki, soke sukarea che paia, ta cherea te vazdiniaol o glibo andre ando pai che porrnenchar, ta ustavea e phuv kana likea katar o pai.

3Gia phenda o Del o Gazda: Me ka chudav pe tute mi mreza ta ka aven chidine but forura, ta ka ikanav tut me mrezaia.

4Ta ka mukav tut pe phuv, ka chudav tut pe umal, a ka cherav te aven pe tute sa e chiriklia e milosoke, ta ka chalion tutar sa e zivirinie e phuviake.

5Ka thovav cho mas pe burdura, ta ka pherav e bare umalia che llenenchar kai mule.

6Ta ka rispiu cho rat pe phuv kai akana kote plivi, llik kai e burdura, ta e lenorra ka pherdon.

7Ta kana ni ka ave ios, ka ucharav o miloso ta ka thovav u truniariko pe leke cheraia, ka ucharav o kham e oblakonenchar, ta o chon ni ka klichil.

8Ka thovav o truniariko pe sa e cheraia kai kletosaren ando miloso pala tu, ta thovav e tufina pe chi phuv, gia phenel o Del o Gazda.

9Ta ka cherav te tristonpe but forura, kana ka inllarav phangle che llenen maskar e phuvia, maskar e forura kai ni pinllarea.

10Ka cherav te chudinpe pala tute but forura, ta lenge charura ka avel lenge bari dar cheres tute, kana ka klichil mo jarni pe lengo mui, ta sa ka daran ande suako vreme ando llive kai ka peren.

11Soke gia phenda o Del o Gazda: O jarni katar o charo katar e Babilonia ka avel pe tute.

12Llene zurale pe jarnienchar ka cheren te perel cho foro, sa von ka aven e zurale katar e phuvia, ta ka zatrin o baripe katar o Ejipto, ta sa lenge llene ka aven zatrime.

13Ka zatriv sa leke azdave kai si ande but paia, ta ni ka ni ka cheren truniariko ios o pai e porrne e manuseke, ni e porrne e zivirinienge.

14Ondaka ka cherav te avel bristo o pai, ta ka cherav te llal leki len sargo o zeitino, gia phenel o Del.

15Ta kana ka mukav pusto o Ejipto, ta kana e phuv ni ka avel la niso, kana ka zatriv sa so zivil ande late, ka llanen kai me sem o Del.

16Gava si o roipe, ta ka llilaben le, e chea katar e phuvia ka llilaben la, ka roven po Ejipto ta pe sa so si la, gia phenel o Del o Gazda.

17Ando burs desuduito, endo llive desupanch katar o chon, o Del dia manchar orba ta phenda mange:

18Chavo e manuseko, rov pe sa so si le o Ejipto, ta cher te perel katar e jar vou ta sa e chorra katar phuvia e zurale, e zurale peren chak andre ande phuv, golenchar kai fulien ando limori.

19Soke san gia sukar fulie ta achi golenchar kai ni cherde e sirkunsision.

20Ka perel maskar gola kai mule e jarniea, soke dino si kai o jarni, anen le lete ta sa leke foronen.

21Katar o limori ka den letar orba e zurale zuralendar, golenchar kai pomozisarde le, kai fuliste ta si golenchar kai ni cherde e sirkunsision gola kai mundarde len e jarniea.

22Kote si e Asiria sa pe llenenchar, truial letar si leke limoria, saurren mundarde e jarniea.

23Leke limoria thode len pe iek riga katar o baro anadipe, ta leke llene si truial katar leko limori, saurren mundarde e jarniea, gola kai thode e dar ande phuv katar e llunde.

24Kote si o Elam ta sa leke llene truial katar leko limori, saurren mundarde e jarniea, ta fuliste bi te cheren e sirkunsision chak andre ande phuv, soke thode pi dar ande phuv katar e llunde, a inllarde po mislo kai ni llanen so ka cheren ando limori.

25Po maskaral katar e mule cherde leke than sa leke llenenchar, saurre bi te cheren lenge e sirkunsision, mundarde e jarniea, soke avili thodi lengi dar pe phuv katar e llunde, ta inllarde po mislo kai ni llanen so ka cheren golenchar kai fulien ando limori, vou avilo thodo maskar e mule.

26Kote o Mesek ta o Tubal, ta sa lenge llene, lenge limoria truial lendar, saurre bi te cheren e sirkunsision, mundarde e jarniea, soke thode pi dar ande phuv katar e llunde.

27Ta ni ka achen e zuralenchar kai ni cherde e sirkunsision ta mule ta fuliste ando limori pe ezgodenchar kai marenpe lenchar, ta lengo jarni thodo telal katar lenge sore, a lengo bilachipe ka achen pe lenge kokala, soke sea a dar katar e llene zurale ande phuv katar e llunde.

28Goleke tu, ka avel phago maskar e llene kai ni cherde e sirkunsision, ta ka ache e llenenchar kai mule len e jarniea.

29Kote o Edom, leke charura ta sa leke sudura, gola kai lenge gazdarimaia avile thode e llenenchar kai mule e jarniea, von si e llenenchar kai ni cherde e sirkunsision, ta golenchar kai fulien ando limori.

30Kote si e charura katar o norte, saurre, ta sa e sidoniura, kai daravena, a akana fuliste e mulenchar, ando lallao katar po gazdaripe, von ni cherde e sirkunsision ta si e llenenchar kai mundarde len e jarniea, ta avere llenenchar fulaven po mislo kai ni llanen so ka cheren e llenenchar kai fulien ando limori.

31Galen ka dikhel o Faraon, ta ka lel peke zor pala sa pe llene, soke vou ta sa leke boñikura mule e jarniea, gia phenel o Del.

32Soke thodem mi dar maskar e llene kai zivin, i o Faraon ta sa leke llene si e llenenchar kai ni cherde e sirkunsision e llenenchar kai mundarde len e jarniea.

← Chapter 31 Jump to: Chapter 33 →