Ezekiel 24

Romani Ursari 2018 (Biblia Ande Chib Romani)

← Chapter 23 Jump to: Chapter 25 →

1O Del dia manchar orba ando burs iniato, ta ando chon desto, ta ando llive desto katar o chon, ta phenda mange:

2Chavo e manuseko, pisisar kai ande gava llive, o charo katar e Babilonia gazdarisarda po Jerusalem isto allive.

3Ta gale foroke kai ni kandel phen gia ende iek paramichi: Gia phenda o Del o Gazda: Thou iek kavi ta thov andre pai,

4thov andre kotara mas sukar kotora katar o buto ta e zea, per la katar e mai lache kokala.

5Le iek bakro esvirime ta thov e kokala telal ta muk te chiron e kokala andre ande kavi.

6Soke gia phenda o Del kai si le sa e zor: ¡Tesko e foroke kai cherel o mundaripe, e kaviake kai si farruzime, kai lako farruzipe nasti ikandol! Ikan sa e kotora mas katar e kavi ta na esvirisar len.

7Soke e foroko rat si po maskaral letar, upral pe iek barr ortome chordilo, inai chordo pe phuv te ucharel le o prajo.

8I me ka cherav te chordol lengo rat pe zurale barra, soke joliarde man ta cherde te ikanav mi joli.

9Goleke gia phenda o Del kai si le sa e zor: ¡Tesko e foroke kai cherel o mundaripe! Soke i me ka cherav iek bari iag,

10Ka thovav mai but kasta ta ka phabarav e iag te chirol o mas ta te sukol leko pai, ta e kokala ka phabardom.

11Mapalal thov e kavi upral pe iag e angarengi te mukliardol ta te phabol andral, ta te bilaol leki melalipe, ta te phabol lako farruzipe.

12Nasti ikandol sa leko farruzipe. Samo ande iag ka avel ikando leko farruzipe.

13Jerusalem, ande cho pogano bilachipe ka ave dukhado, soke chistosardem tut a tu ni kamlan te chisto tut katar cho poganipe, nikada ios ni ka chisto tut, lligo ni ka ikanav pe tute mi joli.

14Me o Del diam orba, gia ka avelpe ta me ka cherav le. Ni ka dav man palpale ta ni ka avel mange zalba, ta ni ka boldav mo mislo, prema cho drom ta so cherdan ka krisin tut, gia phenel o Del o Gazda.

15O Del dia manchar orba ta phenda mange:

16Chavo e manuseko, ka lav tutar isto akana o sukaripe kai dikhen che akha, na kukisar ta na rov ta te na peren che ausa.

17Na rov ta na thov tut zalosno pala o meripe, phande o dikhlo pe cho soro ta thov che minie ande che porrne, ta na thov pe tute o gertachi te uchare tut ta na ja o marrno zalosno.

18Diem orba e foroia thiarinako ta pasa e riat muli mi rromi, ta thiarinako cherdem sar phende mange.

19Ta o foro phenda mange: ¿Ni ka phene amenge so si gola ezgode kai chere?

20Ta phendem leke: O del dia manchar orba ta phena mange:

21Phen e llenenge katar o Israel: Gia phenda o Del o Gazda: Me mukav ando lallao mo santuario, o blagosipe katar tumari glamni zor, o sukaripe kai dikhen tumare akha ta dragostia katar tumaro lio, a tumare chaurre ta tumare chorra kai muklen len, ka mundaren len e jarniea.

22Ta ka cheren gia sar cherdem me, ni ka thoven o gertachi te ucharen tumen lea ta ni ka jan o marrno katar e llene kai si zalosne.

23Tumare dikhle ka aven pe tumaro soro, ta tumare minie ka aven ande tumare porrne, ni ka kukin ta ni ka roven, ta ka zatrin tumen pala tumaro bilachipe, ta ka roven iek pe aver.

24Goleke prema o Ezekiel ka llanen, prema e ezgode kai cherda, i tumen ka cheren, kana ka avelpe gaia ezgoda, ondaka ka llanen kai me sem o Del o Gazda.

25A tu, chavo e manuseko, o llive kai me ka lav lendar lengi zor, e veselia katar lengo blagosipe, e dragostia katar lenge akha ta so mangel lengo lio, ta lenge chaurren ta lenge chorren,

26gua llive ka avel tute iek lleno kai naslo te anel chuke e viasta.

27Ande gua llive ka mukliardol cho mui te de orba e llenea kai naslo, ta ka de orba ta ni ka ache ios nemao, ta pe tute ka achardol ta ka llanen kai me sem o Del.

← Chapter 23 Jump to: Chapter 25 →