Ezekiel 14

Romani Ursari 2018 (Biblia Ande Chib Romani)

← Chapter 13 Jump to: Chapter 15 →

1Avile mande nesave katar e phure katar o Israel, ta besle angla mande.

2Ta o Del phenda mange gia:

3Chavo e manuseko, gala manusa thode ande po lio pe delen, ta achardol pe lende kai peren ande po bilachipe. ¿Soke aven mande te puchen man?

4Goleke de lenchar orba ta phen lenge: Gia phenda o Del o Gazda: Varesavo lleno katar o Israel kai thoda ande po lio pe delen ta te achardol pe lete kai si bilacho ta te avilo kai o profeta, me o Del ka dav le anglal prema leke dela kai si le,

5te istarav e Israele katar o lio, soke durile mandar sa pala lenge dela.

6Goleke phen e llenenge katar o Israel: Gia phenel o Del o Gazda: Muken o bilachipe, irin tumen katar tumare dela ta den e zea pe sa tumaro gadope kai cheren.

7Soke fisavo lleno katar o Israel, ta fisavo lleno katar aver phuvia ta zivil ando Israel, te duriola mandar ta ni llala pala mande ta te thovela pe dela ande po lio ta te achardol pe lete kai cherel o bilachipe, ta te llala kai o profeta te puchel le mandar, isto me ka dav le anglal.

8Ta ka dav pe gua manus ta ka cherav te dikhen ta te sikon pala leko bilachipe, ta ka ikanav le katar mo foro ta ka llanen kai me sem o Del o Gazda.

9Ta kana ka avel kojadino o profeta ta ka del orba, me kojadem gole profeta ta ka vazdav mo va pe lete, ta ka ikanav le katar mo foro o Israel.

10Ta e dui ka terpin e duk katar pi dos, o profeta ta o lleno kai llelo te puchel le.

11Ta gia e llene katar o Israel ni ka muken te llan pala mande ta te na meliaon ios ande po bilachipe ta te avav me lengo Del, gia phenel le o Del o Gazda.

12O Del phenda mange:

13Chavo e manuseko, kana e phuv ka cherel mange o bilachipe ta ni ka kandel man bilachimaia ta te vazdava mo va pe late ta te lava latar o marrno ta te bichalav pe late e bok ta llenen ta zivirinien te marenpe laia,

14ta te avena po maskaral letar o Noe, o Moises ta o Job, pala lengo chachipe braduina samo piro zivoto, gia phenel le o Del o Gazda.

15Ta te cherel te nakhen katar e phuv e zivirinie dive ta te zatrin la ta te achela pusti ta te na avel ko te nakhel latar pala e zivirinie,

16ta gala trin llene te avena po maskaral latar, dav tumen mo alav me, o Del ta Gazda, kai ni lenge chaurre ta ni lenge chorra ni braduina pe, samo von braduina piro zivoto ta e phuv achela pusti.

17O te anava me o maripe pe phuv ta te phenav: O jarni nakhel katar e phuv ta te mundarav lea manusen ta zivirinien,

18ta gala trin manusa te aven po maskaral, dav tumen mo alav, me, o Del o Gazda, kai nasti braduina tumare chaurren ni tumare chorren, samo von braduina piro zivoto.

19O te bichalava nasualipe pe goia phuv te perel pe lende mi joli ta te lav o zivoto kata e murus ta katar e diskinie,

20ta te avena maskar lende o Noe, o Daniel ta o Job, dav tumen mo alav, me, o Del o Gazda, kai nasti braduina ni tumare chaurren ni tumare chorren, samo von braduina piro zivoto.

21Goleke o Del o Gazda phenda gia: ¿Ni ka avel ios mai gore kana ka bichalav me star bare krisa po Jerusalem, o jarni, e bok, e zivirinie dive ta o nasualipe, te sai meren e manusa ta e zivirinie?

22A ka achel lendar nesave llene, chaurre ta chorra ka aven ikande katar o foro, von ka aven tumende ta tumen ka dikhen lengo phiripe ta so cheren ta gia ka lelpe tumendar e duk kai cherden te perel po Jerusalem, katar sa e ezgode kai andem pe lete.

23Ta ka den tumen zor kana ka dikhen so von cheren ta ka llanen soke cherdem sa gola ezgode ando foro, gia phenel o Del o Gazda.

← Chapter 13 Jump to: Chapter 15 →