Ezekiel 37

Romani Ursari 2018 (Biblia Ande Chib Romani)

← Chapter 36 Jump to: Chapter 38 →

1O va e Devleko avilo pe mande, ta inllarda man ando duo e Devleko, ta thoda man po maskaral katar iek bari umal kai saia pherdi kokala.

2Ta cherda man te phirav truial pasa lende, ta sea but pe phuv e umaliaki, ta sea but suke.

3Ta phenda mange: Chavo e manuseko, ¿Ka zivin gala kokala? Me phendem: Gazda Devla, tu llanele.

4Ondaka phenda mange: Porokisar pe gala kokala, ta phen lenge: Kokala suke, asunen o alav e Devleko.

5Gia phenda o Del o Gazda gale kokalenge: Me cherav te del ande tumende duo, ta ka zivin.

6Ta ka thovav pe tumende zile, ta ka cherav te likel pe tumende mas, ta ka thovav ande tumende duo ka zivin, ta ka llanen kai me sem o Del.

7Phendem e poroka, gia sar phenda mange o Del, ta vareso asundilo kana me porokiva, ta dermosaili e phuv, ta e kokala chidinaile suako kokalo pe kokaloia.

8Ta dikhlem e zile upral pe lende, ta likista pe lende o mas, a ni saia duo ande lende.

9Ta o Del phenda mange: Porokisar e duoke, porokisar, chavo e manuseko, ta phen e duoke: Gia phenda o Del o Gazda: Duo, aide katar e star baliava, ta phurde pe gala mule, ta ka zivin.

10Ta porokisardem gia sar phenda mange, ta dia duo ande lende, ta zivisarde, ta thodepe pe pe porrne, but llene sea, sargo boñikura.

11Mapalal phenda mange: Chavo e manuseko, sa gala kokala si e llene katar o Israel. Von phenen: Amare kokala sukile, ta mulo so mangaia te chera, ta sam sa zatrime.

12Goleke, porokisar, ta phen lenge: Gia phenda o Del o gazda: Me putarav tumare limoria, foro murno, ta ka cherav te liken katar tumare limoria, ta ka anav tumen kai e phuv katar o Israel.

13Ta ka llanen kai me sem o Del, kana ka putarav tumare limoria ta ka ikanav tumen andral, foro murno.

14Ta ka thovav mo duo ande tumende, ta ka zivin, ta ka zivin pe tumari phuv, ta ka llanen kai me o Del diem orba, ta cherdem le, gia phenel o Del.

15O Del dia manchar orba ta phenda mange:

16Chavo e manuseko, le akana iek kotor kas, ta pisisar pe lete: E Judaeke, ta e llenenge katar o Israel kai llan lea. Le mapalal aver kotor kas, ta pisisar pe lete: E Joseeke, kotor kas katar o Efrain, ta sa e llenenge katar o Israel kai llan lea.

17Mapalal chide len iek averea, te aven samo iek, ta ka aven samo iek ande cho va.

18Ta kana e llene katar cho foro ka puchen tut gia: ¿Ni ka sikave amenge so mange te chere golea?,

19phen lenge gia: Gia phenda o Del o Gazda: Me lav o kotor kas e Joseeke kai si ando va e Efraineko, ta e vichen kai llan lea, ta ka thovav len kote kai si o kotor kas katar o Juda, ta ka cherav len iek kotor kas, ta ka aven iek ande mo va.

20Ta e kotora kastune kai ka pisi pe lende ka aven ande cho va angla lende,

21ta ka phene lenge: Gia phenda o Del o Gazda: Me lav e llenen katar o Israel kai si maskar e phuvia kai llele, ta ka chidav len katar suako rig, ta ka anav len kai lengi phuv,

22ta ka cherav len iek foro pe phuv, pe burdura katar o Israel, ta ka avel len iek charo saurren, ta nikada ios ni ka aven dui forura, ta nikada ios ni ka aven fulade ande dui charoine.

23Ta ni ka meliaon ios pe delenchar, lenge gadomaia ta sa lenge bangimaia, ta ka braduiv len katar sa lengo bangipe kai cherde lea o bilachipe, ta ka chistou len, ta ka aven mo foro, ta me ka avav lengo Del.

24Mo sluga o David ka avel lengo charo, ta saurren ka avel iek chobano, ta ka phiren prema me alava, ta ka guruven me zakonura, ta ka cheren len.

25Ka zivin ande phuv kai diem me sluga e Jakobe kote kai zivisarde tumare dada, kote ka zivin von, lenge chaurre ta lenge unukura ostade, ta mo sluga o David ka avel lengo charo ostade.

26Ta ka achav lenchar pe iek alav katar e pas, iek alav ostade ka avel lenchar, ta ka cherav te achen pe iek than ta ka cherdon mai but, ta ka thovav mo santuario maskar lende ostade.

27Ta maskar lende ka avel mi chara, ta ka avav lengo Del ta von ka aven mo foro.

28Ta e phuvia ka llanen kai me o Del blagosiv e Israele, kana mo santuario ka avel po maskaral lendar ostade.

← Chapter 36 Jump to: Chapter 38 →