Ezekiel 44

Romani Ursari 2018 (Biblia Ande Chib Romani)

← Chapter 43 Jump to: Chapter 45 →

1Mapalal o manus cherda te iriu man kai o udar kai si avri katar o santuario pe rig karing perel o kham, ta o udar saia phanglo.

2Ta o Del phanda mange: Gava udar ka achel phanglo, ni ka putaol, ta ni ka del latar nisavo manus, soke o Del o Gazda dia latar, goleke ka achel phangli.

3A o lleno kai gazdaril, vou sai ka besel pasa o udar, ta ka cherel le samo kana ka jal angla mande iek kotor katar so si dino. A ka del katar o gua udar katar e soba kai si anglal.

4Mapalal o manus inllarda man kai o udar katar o norte angla o cher, ta kote dikhlem o baripe e Devleko kai pherda leko cher, ta bangilem llik te avel mo mui pe phuv.

5Ta o Del phenda mange: Chavo e manuseko, thov sama ta dik che akhenchar, ta asun che kanenchar sa so dav tuia orba katar sa so si te sikon katar o cher e Devleko, ta sa leke zakonura, ta thov sama pe sa e thana kai den ta liken katar o cher e Devleko.

6Ta ka phene e llenenge kai vazdiniaon, e llenenge katar o Israel: Gia phenda o Del o Gazda: Dosta Israel katar gachin gadope kai cheren,

7kai anen llenen katar aver phuvia kai ni cherde e sirkunsision katar o mas, ta aven ande mo santuario ta poganin mo cher, ta den mo marrno, e khoi ta o rat, ta phagen e orba kai achilem tumenchar sa tumare gadomaia.

8Soke ni kandien e orba kai saia katar me ezgode sante, ta thoden llenen katar aver phuvia te arakhen e zakonura katar mo santuario.

9Gia phenda o Del o Gazda: Ni iek chaurro avere phuviengo, kai ni cherda e sirkunsision katar o lio ta katar o mas, ni ka del ande mo santuario, katar sa e chaurre avere phuvienge kai si maskar e chaurre katar o Israel.

10Ta e levitura kai fuladile mandar kana o Israel durilo mandar, ta lleletar pala pe dela, ka inllaren po bilachipe.

11Ta ka radin ande mo santuario te arakhen e udara katar o cher ta ka radin ando cher, von ka mundaren e zivirinie e kurbanoke kai phabardon ta e zivirinie e foroke, ta ka aven angla mande te radin.

12Soke radisarde lenge angla lenge dela ta cherde te eskomban e llene katar o Israel pala lengo bilachipe, goleke, vazdiem mo va ta diam mo alav, phenel o Del o Gazda, kai von ka inllaren po bilachipe.

13Ni ka aven pasa mande te radin mange sargo popura, ta ni ka aven pasa ni iek katar me ezgode mai devlikane, soke ka inllaren po lallao ta po gadope kai cherde.

14Goleke ka thovav len te arakhen o cher, ta so trubul leke, ta sa so cherdol andre.

15A e popura katar o porodo e Sadokeko, kai radisarde ando santuario kana e llene katar o Israel durile mandar, von ka aven pasa mande te radin angla mande, ta ka aven angla mande te den e khoi ta o rat, Gia phenel o Del o Gazda.

16Von ka den ande mo santuario, ta ka aven pasa mo stali te radin mange, ta ka cheren so phenen me zakonura.

17Ta kana ka den katar e udara katar e bar kai si andre, ka aven pe lende patave cherde katar o lino, ni ka thoven niso kai si cherdo katar e bal e bakrengi, kana ka radin ande udara katar e bar kai si andre ta andre katar o cher e Devleko.

18Pe pe sore ka ulin dikhle cherde katar o lino, ta ka thoven i sostea cherde katar o lino, ni ka thoven niso kai ka cherel len te esniovin.

19Kana ka liken kai e bar kai si avri, kai o foro, ka ikanen tumendar e patave kai radisarden lenchar, ta ka muken len ande sobe katar o santuario, ta ka thoven aver patave, te na achen sante e llene katar o foro pala tumare patave.

20Ta ni ka jaliaren po soro, ta ni ka muken te barion lenge chor, samo ka chinen len cherricha.

21Ni iek katar e popura ni ka piel mol kana ka del ande bar kai si andre.

22Ni ka zinil pe ni phivliaia ni golaia kai chudie la, vou trubul te zinil pe pala iek chei katar e vicha katar o Israel, o iek phivli katar iek popo.

23Ta ka cheren te achardol so si santo ta so inai santo, ta te llanen so si chisto ta si inai chisto.

24Kana ka avel iek chingar, von ka aven kote te krisin, prema mi kris von ka krisin, ta ka cheren prema me zakonura ta mo sikadipe ande sa me glamne slave, ta ka blagosin me llivesa e sabadura.

25Ni ka aven pasa iek lleno mulo te na achen melale, a te si o dad o e dei, chaurro o chorri, phlal, o phei kai ni zinisaili, ondaka sai ka meliaon.

26Ta mapalal kana ka chiston tumen, ka llinen efta llive.

27Ta o llive kai ka del ande bar kai si andre, ka del po kurbano pala o bilachipe, gia phenel o Del o Gazda.

28Ni ka den len ni iek phuv ando Israel, soke me sem lengi phuv.

29Ka jan katar so si dino, ta katar o kurbano kai delpe pala o bilachipe, ta suako ezgoda devlikani ando Israel ka avel lengi.

30Ta so likela mai anglal katar sa e purve septelie, ta katar sa so si dino kai ka aven te den, ka avel e poponenge, ta ka avel e poponengo o purvo marrno, te aven blagosime tumare chera.

31E popura ni ka jan ni iek chirikli o zivirinia kai mukla la sa ande kotora aver zivirinia.

← Chapter 43 Jump to: Chapter 45 →