Ezekiel 33

Romani Ursari 2018 (Biblia Ande Chib Romani)

← Chapter 32 Jump to: Chapter 34 →

1O Del dia manchar orba ta phenda mange:

2Chavo e manuseko, de orba e llenenge katar cho foro, ta phen lenge: Kana me ka anav o jarni pe phuv, ta o foro e phuviako ka lel iekhe llene katar pi phuv ta ka thovel le te prezol,

3ta te dikhela kai avel o jarni pe phuv, ta te basalela e tuturuga te phenel e foroke,

4kogo ka asunel kai basel e tuturuge ta ni thovel sama, ta te avela pe lete o jarni, ka avel dosalo katar po meripe.

5Asunda kai basela e tuturuga ta ni thoda sama, goleke ka avel dosalo katar po meripe, a o lleno kai ka thovel sama ka braduil po zivoto.

6A o lleno kai prezol te dikhela kai avel o jarni ta ni basalela e tuturuga, ta o foro te na thovela sama, ta o jarni te ranila vareka, gua lleno ka merel pala po bilachipe, a ka avel dosalo gua kai prezol.

7Goleke tut, chavo e manuseko thoden tut te prezo po Israel, ta ka asune so ka phenav, ta ka de pe lende ande mo anav.

8Kana me ka phenav e bilacheke: Bilacho, chache ka mere, te na phendan e bilacheke te arakhelpe katar so cherel, o bilachi ka merel pala po bilachipe, a tu ka ave dosalo katar leko meripe.

9A tu te phenea e bilacheke cheres leko drom te sai duriol letar, a vou te na durilo letar, vou ka merel pala po bilachipe, a tu ka bradui cho zivoto.

10Goleke tu, chavo e manuseko, phen e llenenge katar o Israel: Tumen phenden gia: E ezgode bilache kai chera ta amaro bilachipe si upral pe amende, ta cheres lende sam zatrime, ¿Sar ka zivi gia?

11Phen lenge: O Del o Gazda del tumen po alav ta phenel: Ni kamam te merel o lleno bilacho, me mangav te irilpe katar po bilachipe, ta te zivil. Irin tumen, irin tumen katar tumare bilache droma, ¿Soke te meren foro katar o Israel?

12A tu chave e manuseko, phen e llenenge katar cho foro: O chachipe katar iek lleno chacho ni ka braduil le kana ka cherel o bilachipe, ta o bilachipe iekhe lleneko ni ka achavel le kana ka mangel te irilpe katar po bilachipe, o chacho nasti ka zivil pala po chachipe kana ka cherel o bilachipe.

13Kana me ka phenav e chacheke: Tu ka zivi, ta vou te uzdilape ande po chachipe ta te cherel o bilachipe, sa leko chachipe ka avel bristardo, ta ka merel pala o bilachipe ka cherda.

14A kana me ka phenav e bilacheke. Tu ka mere, a vou te mukel po bilachipe, ta te cherela so si orta prema o chachipe,

15ta te irila so chorda, ta te llal prema o zakono e zivotoko ta ni cherel o bilachipe, gua lleno ka zivil ta ni ka merel.

16Ka avel bristardo leko bilachipe kai cherda, ta ka zivil soke cherda prema so si orta ta chacho.

17Mapalal e llene katar cho foro ka phenen: O drom Devleko inai orta, a lengo drom si gua kai inai orta.

18Kana o chacho ka duriol katar po chachipe, ta ka cherel o bilachipe, ka merel pala goia ezgoda.

19A kana o lleno bilacho ka duriol katar po bilachipe, ta te cherela prema so si orta ta prema o chachipe, ka zivil pala goia ezgoda.

20Ta phendan: Inai orta o drom e Devleko. Me ka krisiu tumen, israelitura, suakone llene prema so cherel.

21Ando burs desuduito sar kai sama phangle, ando chon desto, ta ando llive panchto katar o chon, avilo mande iek lleno kai naslo katar o Jerusalem ta phenela: O Jerusalem akana si averengo.

22Iek riat palpale mai anglal te avel o lleno kai naslo, o Del avilo mande ta thoda po va pe mande ta cherda man te na dav orba, a thiarinako avilo mande ta cherda te dav orba.

23Ta o Del dia manchar orba ta phenda mange:

24Chavo e manuseko, e llene kai zivin pe thana zatrime katar e phuv katar o Israel den orba gia: O Abraam sai iek, ta e phuv saia leki, a amen sam but, amenge si dini e phuv te achel amenge.

25Goleke, phen lenge: Gia phenda o Del o Gazda: ¿Tumen ka jan e ratea, ta ka dikhen pe tumare Dela ta ka cheren te chordol o rat tumari ka avel e phuv?

26Uzdisailen ande tumaro jarni, cherden o gadope, ta meliarden suako lleno avereke diskinia, ¿Ta tumari ka avel e phuv?

27Phen lenge gia: Gia phenda o Del o Gazda: Dav tumen mo alav kai gola kai zivin pe gola thana zatrime ka mundaren len e jarniea, a gole kai ka achel pe umalia ka dav len kai e zivirinie dive te jan len, a ta a golen kai si maskar e zidura ta maskar e barra, ka meren nasualimatar.

28Ta ka cherav e phuv te cherdol pusti, ta ni ka avel ios o baripe katar lengi zor, ta ka aven zatrime e burdura katar o Israel ta ni ka avel niko te phirel len.

29Ta ka llanen kai me sem o Del, kana ka cherav te achel e phuv korkorre ta pusti, pala sa o bilachipe kai cherde.

30Ta tu, chavo e manuseko, e llene katar cho foro maren tutar espurnia pasa e zidura ta pasa e udara e cherenge ta denpe orba iek avereke, suako lleno pe phlalea, ta phenen: Aven akana ta asunen savo alav avel e Devletar.

31Ta ka aven tute sargo kana avel o foro, ta ka asunen che alava ta ni ka kanden len, pe muiea blagosin, a lengo lio llal pala lengi jamllia.

32Goleke tu san lenge sargo iek lleno kai llilabel e volimake, kai leko avazi si guglo ta llilabel sukar, ta ka asunen che alava, a ni ka kanden len.

33A kana gaia ezgoda ka avel, ta si pase, ka llanen kai saia profeta maskar lende.

← Chapter 32 Jump to: Chapter 34 →