Ezekiel 26

Romani Ursari 2018 (Biblia Ande Chib Romani)

← Chapter 25 Jump to: Chapter 27 →

1Ando burs desuiekto, ando purvo llive katar o chon, o Del dia manchar orba ta phenda mange:

2Chavo e manuseko: O Tiro phenda gia katar o Jerusalem: O udar e phuviengo si zatrime, irisaili mande, akana me ka avav barvalo ta vou ka avel pusto,

3goleke, gia phenda o Del o Gazda: Me sem joliariko tuia, Tiro, ta ka cherav te vazdiniaon pe tute but phuvia, gia sar e mora vazdel pe valura.

4Ta ka phagen e zidura katar o Tiro, ta ka zatrin leke bare chera, ta ka metiv llik lako prajo ta ka achel sargo iek pechina jali.

5E phuvia ka len latar sa so si la ta ka umblavel pe mreze pasa e mora, gia phenel o Del o Gazda.

6Ta ka mundaren e jarniea leke chorren, ta ka llanen kai me sem o Del.

7Soke gia phenda o Del o Gazda: Me cherav te avel po Tiro katar o norte o Nabukodonosor charo katar e Babilonia, charo katar e charura, anel gra ta bordona ta llene kai llan pe gra, ta but llene te marenpe ta but baro foro.

8E jarniea ka mundaren che diskinien kai si ande umalia, ta ka vazdel bare chera pe tute te marelpe tuia, ta ka vazdel zido pe tute ta ka thovel angla pe e eskudura te marel tut.

9Ta ka thovel pe che zidura phurda ta ka che bare chera ka zatril e toverea.

10Gachin gra ka aven pe tute kai ka pherdo katar o prajo kai ka vazden, e gra ta e tochkura katar e bordona ka cheren te izdran che zidura kana ka den katar e udara phage e foroke.

11Sa che droma ka achen ustadine katar e gra ka mundaren che foro e jarniea, ta che bare zidura ka peren pe phuv.

12Ka choren cho barvalipe, ka murin che zidura, ta ka zatrin che sukar chera, ta e barra ta e kotora kastune katar che chera ta o prajo ka chuden len ando pai.

13Ta ka cherav te na asundon ios che llilia ta ni ka asundon ios che arpe.

14Ka mukav tut sargo iek barr jalo, ka ave o than kai umbladon e mreze, ta nikada ios ni ka ave pe porrne, soke me o Del diem orba, gia phenda o Del o Gazda.

15Gia phenda o Del o Gazda e Tiroke: Kana ka pere ta e llene ranime ka urkin, gia zurale ka asundol kai ka izdral e mora, kana ka avel o mundaripe ande tute.

16Ondaka sa e gazda e morake ka fulien katar pe tronura ta ka ikanen po gertachi, ta ka ikanen petar pe sukar patave, ka daran ta ka besen pe phuv ta ka izdran daratar sa o vreme ta ni ka llanen so ka cheren tuia.

17Ta ka roven pe tute ta ka phenen chuke: ¿Sar mulan tu kai sana pherdo llene e morake, foro kai sana blagosime, kai saia zuralo pe mora, vou ta e llene kai zivina ande lete, kai darana letar sa gola kai sea truial?

18Akana ka izdran e forura kai si pe mora ando llive kai ka pere, ea, e forura kai si pe mora ka daran soke avilo cho son.

19Soke gia phenda o Del o Gazda: Ka mukav tut pusto sargo e forura kai ni zivil niko ande lende, ka cherav te avel pe tute e bari jar, ta e bare paia ka ucharen tut.

20Ta ka cherav te fulie e llenenchar kai fuliste ando limori, e foronenchar kai sean ande aver vreme, ta ka thovav tut chak telal katar e phuv, sargo o purano pusto, golenchar kai fulien ando limori, te na zivil ande tute niko nikada, ta ni ka ave blagosime ande phuv katar e llunde.

21Ka cherav te daran tutar, ta ni ka ave ios, ka roden tut a nikada ios ni ka malaven tut, gia phenel o Del o Gazda.

← Chapter 25 Jump to: Chapter 27 →