Ezekiel 23

Romani Ursari 2018 (Biblia Ande Chib Romani)

← Chapter 22 Jump to: Chapter 24 →

1O Del dia manchar orba ta phenda:

2Chavo e manuseko, sea dui diskinie, chea pe dake,

3kai cherde o kurvaluko ando Ejipto, ande po ternipe. Kote sea chichidine lenge kolina, kote pipisarde lenge kolina cheaka.

4E mai purani ikhardola Aola, a laki phei ikardola Aolibia, e dui cherdile murne ta avila len chaurre ta chorra. Von ikhardona: Samaria e Aola, ta Jerusalem e Aolibia.

5A e Aola cherda o kurvaluko kana saia pala mande, ta volisarda e asirionen kai cherena laia o kurvaluko ta zivina pasa la,

6furiade ando lolipe, sudura ta gazda e boñikonenge, llene terne ta sukar saurre, llene kai llana pe gra.

7Cherde o kurvaluko lenchar, e llenenchar mai esvirime katar e chave e asirionenge, ta sa golenchar kai volisarda, ta melaili sa lenge delenchar.

8Ta ni mukla o kurvaluko kai cherda ando Ejipto, soke sovte laia ande po ternipe, ta von chichidie lake kolina cheake, ta cherde sa o kurvaluko kai mangle laia.

9Goleke diem la ande va katar gola kai volisarde la, ande va katar e chave e asirionenge, soke voi volila len.

10Von dikhle sar saia bi patavenchar, lie lake chaurren ta lake chorren ta mundarde la e jarniea ta cherdili asundi maskar e diskinie, soke sa llangle katar e duk kai nakhla e Aola.

11Ta dikhla laki phei e Aolivia ta cherda mai but kurvaluko neko pi phei ta lako kurvaluko saia mai baro neko lake pheako.

12Volila e asirionen kai zivina pasa late, sudura ta gazda e boñikonenge, kai lenge patave ta lenge ezgode e marimake sea glamne, llene kai llana pe gra, saurre sea terne ta sukar.

13Ta dikhlem kai melaili, isto iek drom istardea e dui phea.

14Ta bariarda po kurvaluko, soke kana dikhla e slike e murusenge po zido, slike but sukar katar e kaldeura,

15kai pe lengo maskar sea kavisa ta pe lengo soro ezgode but sukar ta saurre sea sargo sudura, sargo e llene katar e Babilonia, kai biandile ande Kaldea,

16ta avila lake but baro volipe samo so dikhla len, ta bichalda lende llenen katar e phuv katar e kaldeura.

17Ta gia saia sar e llene katar e Babilonia thodepe laia ande lako than e volimako, ta poganisarde la ta i voi poganisaili lenchar lligo ni gadosaili lendar.

18Ni guruda po kurvaluko ta sikadili isto sar saia voi, goleke gadosailem latar gia sar gadosailem katar laki phei.

19Ta cherda ios mai but kurvaluko, ta cherda te aven ando mislo e llivesa katar lako ternipe, kana cherda o kurvaluko ando Ejipto.

20Ta avila lake volipe pala pe llene bilache kai phabola lengo mas ta sea sargo gra.

21Gia andan pale ando mislo o kurvaluko katar cho ternipe, kana e ejipsiura chichidena che kolina, e kolina katar cho ternipe.

22Goleke o Del o Gazda phenda gia e Aolivake: Ka cherav te aven pe tute gola kai volin tut, gola kai gadosailan lendar, ta ka cherav te thovenpe truial tutar,

23e llene katar e Babilonia ta sa e kaldeura, e llene katar o Pekod, katar e Soa ta katar e Koa, ta sa e llene katar e Asiria lenchar, llene terne ta sukar, gazda ta sudura, llene lache ta glamne, kai saurre llan pe gra.

24Ta ka aven pe tute ande bordona e marimake, ta but forura. Eskudura ta challa sastrune ka aven pe tute truial tutar ta me ka thovav angla lende e kris ta prema lenge zakonura ka krisin tut.

25Ka cherav te perel pe tute mi joli, ta ka aven tuia silne, ka chinen cho nak ta che kan ta so ka achel tut ka avel chindo e jarniea ta ka perel. Von ka len che chaurren ta che chorren ta so ka achel tutar phabardo ande iag.

26Ta ka len tutar che patave, ta ka chirden tutar sa e ezgode kai cherena tut sukar.

27Ka cherav te na izdral ios cho lio pe ezgode bilache, ta cho kurvaluko kai andan katar o Ejipto, ta ni ka thove che akha ios pe gola ezgode ta ni ka de tut go lli ios katar o Ejipto.

28Soke o Del o Gazda phenda gia: Tut ande Me dav tut ande va katar e llene kai murzisardan pe lende, ande va katar e llene kai gadosailan lendar,

29ka murzin pe tute ta ka len tutar sa so lian pe cho rado ta ka muken tut nangi ta puchardi, ta ka dikhol o gadope katar cho kurvaluko ta sa o bilachipe kai izdraian te chere ta cho kurvaluko.

30Gala ezgode ka cheren tuia soke cherdan o kurvaluko e phuvienchar, kai meliardan tut lende delenchar.

31Po phirdan drom che pheako, goleke me ka thovav lako taso ande cho va.

32Gia phenda o Del o Gazda: Ka pie katar o baro ta bulo taso che pheako kai andre sai thodol but, ka maren tutar espurnia e phuvia ta ka muken tut ando lallao.

33Ka ave pherdi matipe ta duk pala o taso pustimako, pala o taso katar chi phei e Samaria.

34Ka pie letar, ta ni ka muke niso, ta mapalal ka phage o taso ta ka rande cho kolin, soke me diem orba, gia phenel o Del o Gazda.

35Goleke, gia phenda o Del o Gazda: Soke bristrailan mandar, ta chudian man pala che zea, goleke terpisar sa cho bilachipe ta cho kurvaluko. Dav tut mo alav kai gia ka cherav le.

36Ta o Del phenda mange gia ios: Chavo e manuseko, ¿Ni ka krisi tu e Aola ta e Aolibia, ta ka phene lenge o gadope kai cherde?

37Soke cherde o kurvaluko ta mundarde, ta cherde o kurvaluko pe delenchar, ta i pe chaurren kai von biande mange nakhade len pe iag ta phabarde len.

38Ta ni cherde samo gua: Poganisarde mo santuario gua llive, mukle ando lallao me sabadura.

39Die kurbano pe ninonen kai pe dela, dena ande mo santuario isto ande gua llive te muken le ando lallao, ta gia cherde le po maskaral katar mo cher.

40Ta i bichalde te ikharen llene duratar, ta von avile, ta soke avila chuke volipe pe lende, jaladan tut, ta makhlan che akha ta lachardan tut te dikho sukar,

41mapalal inzilan pe iek than glamno, ta lacharde iek sinia angla le ta upral thodan mo taimano ta mo zeitino.

42Ta asundona e avazura katar e llene kai veselinape laia ta e llenenchar avile e sabeura katar o pusto, ta thode kore pe lenge va ta sukar korone pe lenge sore.

43Ta phendem katar e llangli ando kurvaluko: ¿Pale ka peren peke laia, ta voi lenchar?

44Soke avile late gia sar aven kai iek kurvichka, gia aven kai e Aola ta kai e Aolivia, kai si kurvichke.

45Goleke ka krisin la murusa chache prema o zakono katar e kurvichke ta prema o zakono katar gola kai mundaren, soke si kurvichke ta mundaren.

46Goleke o Del o Gazda phenda gia: Me ka cherav te aven pe lende but llene, ka thovav len ande nuzda ta ka len peke lenge ezgode,

47ta e llene ka chalaven len e barrenchar ta ka jiraven len e jarnienchar, ta ka mundaren lenge chaurren ta lenge chorren, ta ka phabaren lenge chera,

48Ta ka cherav te achel o kurvaluko katar e phuv ta sa e diskinie ka sikon ta ni ka cheren prema o bilachipe kai cherden tumen.

49Pe tumaro soro ka perel sa tumaro bilachipe ta ka pochinen pala o blagosipe kai dien avere delen, ta ka llanen kai me sem o Del o Gazda.

← Chapter 22 Jump to: Chapter 24 →