Ezekiel 35

Romani Ursari 2018 (Biblia Ande Chib Romani)

← Chapter 34 Jump to: Chapter 36 →

1O Del dia manchar orba ta phenda mange:

2Chavo e manuseko, dik karing o burdo o Seir, ta phen pe lete eik poroka,

3ta phen leke: Gia phenda o el o Gazda: Me sem joliariko pe tute, burdo katar o Seir, ta ka vazdav mo va pe tute, ta ka cherav te acha pusto, ta ka ache korkorre.

4Ka zatriv che forura, ta tu ka ave zatrime, ta ka llane kai me sem o Del o Gazda.

5Soke avila chuke joli ostade, ta dian ando meripe e llenen katar o Israel ando vreme katar lengi duk, ando vreme but bilacho,

6goleke, dav mo alav, phenel o Del, kai si te ave sa ando o rat, ta o rat ka llal pala tute, soke saia chuke drago o rat, o rat ka llal pala tute.

7Ta ka cherav te achel pusto ta korkorre o burdo o Senir, ta ka zatriv suakone llene kai ka nakhel pasa tu,

8Ta ka cherav te pherdol katar e llene mule che burdura, ta che bare umalia ta che paia, ka meren e jarniea.

9Me ka mukav tut zatrime ostade, ta nikada ios ni ka aven vazdine che forura, ta ka llane kai me sem o Del.

10Soke tu phendan: E dui phuvia ta e dui forura ka aven murne, ta ka lav len mange, a me, o Del, sema kote.

11Goleke me, dav tumen mo alav, phenel o Del, me ka cherav prema chi joli ta e jolinaia kai tu cherdan, pala e chingar kai saia tut lenchar, ta ka pinllaren man kana ka krisiu tut.

12Ta ka llane kai me o Del, asundem sar kusea e burdonen katar o Israel, ta phendan: Zatrime si, dine si amenge te jalen.

13Ta cherden baripe pe mande tumare alavenchar, ta me asundem tumen.

14Gia phenda o Del o Gazda: Te sai veselilpe sa o sueto, me ka zatriv tut.

15Veselisailan pe so saia te achel e llenenge katar o Israel, soke avilo zatrime, goleke isto gia ka cherav tuia, zatrime ka avel o burdo o Seir, ta sa o Edom, ta ka llanen kai me sem o Del.

← Chapter 34 Jump to: Chapter 36 →