Ezekiel 6

Romani Ursari 2018 (Biblia Ande Chib Romani)

← Chapter 5 Jump to: Chapter 7 →

1O Del phenda mange gia:

2Chavo e manuseko, dik karing e burdura katar o Israel, ta phen pe lete iek poroka.

3Ta ka phene gia: Burdura katar o Israel, asunen o alav e Devleko: Gia phenda o Del o Gazda e burdonenge, e umalienge ta e paienge: Me ka cherav te avel pe tumende o jarni ta ka zatriv tumare thana vazdine.

4Tumare thana e kurbanoke ka achen puste, ta tumare slike e khameke ka aven phage ta ka cherav te meren tumare llene angla tumare dela.

5Ta ka thovav e eznage mule katar e chave e Israeleke angla lenge dela ta tumare kokala ka rispiu len truial katar tumare thana e kurbanoke.

6Kaigo ka zivi, ka cherdon puste e forura, tumare altarura ka aven zatrime ta puste, ta tumare dela ka aven peradine ta zatrime, e eslike katar o kham ka aven zatrime, sogo cherden ka avel zatrime.

7Ta e llene ka meren maskar tumende ta ka llanen kai me sem o Del.

8Ta ka mukav nesave llenen llunde, te sai avel tumen maskar e phuvia nesave kai ka nasen katar o jarni,

9ta gola llene tumendar kai ka nasen, ka denpe golli mandar ande phuvia kai ka aven phangle, soke me phagilem pala lengo lio kai cherda o kurvaluko ta durile mandar ta pala lenge akha kai cherde o kurvaluko pala e dela. Ta ka avel lenge lallao pala o bilachipe kai cherde ande sa po gadope.

10Ta ka llanen kai me sem o Del. Me ni kojadem kana phendem lenge kai ka anav pe lende gava bilachipe.

11Gia phenda o Del o Gazda: Mar ande palme ta basal che porrne, ta phen: ¡Ioi, gachin gadope cherda o Israel! soke pala jarni, e bok ta o nasualipe ka meren.

12Kor si dur ka merel nasualimatar, ta ko si pase ka merel po jarni, a ko ka achel ta ka den pe lete ka merel bokhatar. Gia ka cherdol pe lende mi joli.

13Ta ka llanen kai me sem o Del, tumare llene mule ka aven maskar tumare dela, truial katar tumare thana e kurbanoke, pe suako than vazdino, pe suako than kai si upre pe burdura, telal katar suako kas baro ta zeleno ta telal katar suako ensina kai si la but krangura, kote kai phabarden o taimano sa tumare delenge.

14Ta ka vazdav mo va pe lende, ta kaigo ka aven ka zatriv goia phuv, katar o pusto llik kai o Diblat, ta ka llanen kai me sem o Del.

← Chapter 5 Jump to: Chapter 7 →