1 Kings 1 — Shan

1ၶုၼ်လူင် တႃႇဝိတ်ႈ ၼၼ်ႉ မိူဝ်ႈဢၼ်ဢသၢၵ်ႈၵႄႇထူၼ်ႈလႄႈထဝ်ႈယဝ်ႉၼၼ်ႉၸိုင်၊ မႆၽႃႈမႆၶူဝ်းလႄႈဢမ်ႇဢုၼ်ႇလႆႈ။-

2ပိူဝ်ႈဢၼ်ပဵၼ်ၼင်ႇၼႆလႄႈ ၶႃႈၵူၼ်းၸဝ်ႈတင်းလၢႆ လဝ်ႊလၢတ်ႈလႄႈဝႃႈ၊ ႁႂ်ႈလႆႈႁႃဢဝ်သၢဝ်ၵၼ်ႇၺႃႇဢၼ်ဢသၢၵ်ႈယင်းၼုမ်ႇၼၼ်ႉ ပုၼ်ႈၸဝ်ႈႁဝ်းၸဝ်ႈၶုၼ်လူင်သေၵမ်းလူၺ်ႈတီႈၶႃႈ။ ႁႂ်ႈမၼ်းၶႃးၸႃးၵႃႈတီႈၽၢႆႇၼႃႈၶုၼ်လူင်လႄႈ လူတူၺ်းလုမ်းလႃးၸဝ်ႈႁဝ်းသေၵမ်းလူၺ်ႈတီႈၶႃႈ။ ႁႂ်ႈမၼ်းၼွၼ်းၵႃႈၼႂ်းဝၢင်ႈႁူဝ်ဢူၵ်းၸဝ်ႈႁဝ်း ႁႂ်ႈၸဝ်ႈႁဝ်းၸဝ်ႈၶုၼ်လူင်ဢုၼ်ႇလီသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။-

3ၵႃႈၼင်ႇဢၼ်ဝႃႈၼၼ်ႉ၊ ၶဝ်ဢွၼ်ၵၼ်ႁႃဢဝ်သၢဝ်ၵၼ်ႇၺႃႇဢၼ်ႁၢင်ႈလီၼၼ်ႉ ၵႃႈၼႂ်းမိူင်း ဢီႉသရေႇလႃႉ ၵူႈတီႈၵူႈလႅၼ်လႄႈ ထူပ်းႁၼ် ဢၽီႉသၵ်ႉ ၵူၼ်းယိင်းဝဵင်း သူႉၼိမ်ႇ သေယဝ်ႉ၊ ဢဝ်မၼ်းမႃးၸူးၵႃႈတီႈၶုၼ်ႁေႃၶမ်းဢေႃႈ။-

4မႄႈယိင်းၼၼ်ႉႁၢင်ႈလီၼႃႇလူင်လၢင်လႄႈ လႆႈလူတူၺ်းလုမ်းလႃးၶုၼ်ႁေႃၶမ်းဢေႃႈ၊ ၼႂ်းဝႃႈၼၼ်သေၵေႃႈ ၶုၼ်ႁေႃၶမ်းဢမ်ႇႁူမ်ႈဢမ်ႇပွင်းမၼ်း။

5လိုၼ်းၼၼ်ႉ ဢတေႃးၼီႉယႃႉ လုၵ်ႈၸၢႆး ႁၵ်ႉၵိတ်ႉ ၼၼ်ႉ ယုၵ်ႉယွင်ႈတူဝ်ၸဝ်ႈၵဝ်ႇလႄႈဝႃႈ၊ ၵဝ်တၵ်းႁဵတ်းၶုၼ်ႁေႃၶမ်းဢေႃႈ၊ ဝႃႈၼင်ႇၼႆလႄႈ မႄးႁႅၼ်းလေႃႉရထႃးလႂ် မႃႉလႂ် ဢိၵ်ႇတင်းၵူၼ်းႁႃႈသိပ်း ဢၼ်လႆႈၶုၼ်ႇလႅၼ်ႈၵႂႃႇဢွၼ်တၢင်းမၼ်းလႂ်ဢေႃႈ။-

6ၸဝ်ႈပေႃႈမၼ်းဢမ်ႇတွၼ်ႉႁႂ်ႈမၼ်းၽိတ်းၸႂ်ၸဵပ်းၸႂ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းႁဵတ်းၸိူဝ်ႉၼင်ႇၼႆၼင်ႇႁိုဝ်၊ ဝႃႈၼင်ႇၼႆၼၼ်ႉသေပွၵ်ႈ၊ မၼ်းၼၼ်ႉပဵၼ်ၵေႃႉဢၼ်ႁၢင်ႈလီၽၢင်လီလႄႈ ၵိူတ်ႇလဵင်ႉမႃးလိုၼ်းလင် ဢပႃႉသလုမ်ႇ ၼၼ်ႉဢေႃႈ။-

7မၼ်းၼၼ်ႉတိူင်ႇပၢင်ႇၵၼ်တင်း ယႂႃႇၽႃႉ လုၵ်ႈၸၢႆး ၸေႇရူႉယႃႇ ဢိၵ်ႇတင်းယိတ်ႈပရေႃးႁဵၵ်ႈ ဢႃႇပျႃႇထႃႇ လႄႈ ၶဝ်ၼၼ်ႉယူႇၽၢႆႇ ဢတေႃးၼီႉယႃႉ ၼၼ်ႉသေလႄႈ ၸွႆႈထႅမ်မႃႉၸႃႉမၼ်းဢေႃႈ။-

8ယိတ်ႈပရေႃးႁဵၵ်ႈ ၸႃႇတုၵ်ႉ၊ ပေႇၼႃႇယႃႉ လုၵ်ႈၸၢႆး ယေႃးယတႃႉ ၊ ပရေႃးၽႅတ်ႈ ၼႃႇသၼ်ႇ၊ သီႉမီႉ၊ ရေႇဢီႉ ဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇ ဢၼ်မီးလူၺ်ႈၵၼ်တင်း တႃႇဝိတ်ႈ ၸိူဝ်းၼၼ်ႉၸမ်ႉ၊ ဢမ်ႇၶဝ်ႈဢမ်ႇပႃးၽၢႆႇ ဢတေႃးၼီႉယႃႉ ။-

9ဢတေႃးၼီႉယႃႉ ၼၼ်ႉ ဢဝ်သူဝ်းဝူဝ်းတူဝ်ဢၼ်ပီးလီမၼ်းလီၼၼ်ႉတၢႆ ၵႃႈတီႈႁိမ်းမၢၵ်ႇႁိၼ် ၸေႃႇႁေႇလိတ်ႉ ၼႂ်းလိၼ် ဢႅၼ်ႇရေႃႇၵေးလႃႉ ၼၼ်ႉသေယဝ်ႉ၊ ႁွင်ႉပၢင်းဢဝ်ၼွင်ႉၸၢႆးမၼ်း လုၵ်ႈၸၢႆးၶုၼ်ႁေႃၶမ်းတင်းသဵင်ႈတင်းလူင် ဢိၵ်ႇတင်းၵူၼ်းမဵဝ်း ယူႉတႃႉ ၶႃႈၵူၼ်းၶုၼ်ႁေႃၶမ်းတင်းလၢႆၼၼ်ႉဢေႃႈ။-

10ပရေႃးၽႅတ်ႈ ၼႃႇသၼ်ႇ တင်း ပေႇၼႃႇယႃႉ ၊ ဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇတင်းလၢႆ တင်းၼွင်ႉၸၢႆးမၼ်း သေႃးလမုၼ်ႇ ၼၼ်ႉၸမ်ႉ၊ မၼ်းဢမ်ႇႁွင်ႉဢမ်ႇပၢင်း။

11မိူဝ်ႈၼၼ်ႉ ၼႃႇသၼ်ႇ လဝ်ႊလၢတ်ႈတီႈ ပႃႇသသေးၽႃႉ မႄႈ သေႃးလမုၼ်ႇ ၼၼ်ႉလႄႈဝႃႈ၊ ၸဝ်ႈၼၢင်းႁဝ်းလႆႈငိၼ်းလွင်ႈဢၼ် ဢတေႃးၼီႉယႃႉ လုၵ်ႈၸၢႆး ႁၵ်ႉၵိတ်ႉ ၼၼ်ႉၼၼ်ႉ ႁဵတ်းၶုၼ်ႁေႃၶမ်းၼၼ်ႉယဝ်ႉတီႈၶႃႈႁိုဝ်။ ၸဝ်ႈႁဝ်း တႃႇဝိတ်ႈ ၼၼ်ႉ ဢမ်ႇႁူႉတီႈၶႃႈလူင်ပႄႇ။-

12ပိူဝ်ႈၼႆလႄႈမိူဝ်ႈလဵဝ်ၼႆႉ ၼင်ႇႁိုဝ်တၵ်းႁႂ်ႈဢသၢၵ်ႈၸဝ်ႈၼၢင်းႁဝ်း ဢိၵ်ႇတင်းဢသၢၵ်ႈလုၵ်ႈၸၢႆးၸဝ်ႈၼၢင်းႁဝ်း သေႃးလမုၼ်ႇ ၵတ်းယဵၼ်ၶျၢမ်းသႃႇၸိုင်၊ ႁႂ်ႈၶႃႈၸဝ်ႈလႆႈပၼ်တၢင်းၵျၢမ်ႇတၢင်းပွင်တီႈၸဝ်ႈၼၢင်းႁဝ်းသေၵမ်းတီႈၶႃႈ။-

13ၶႅၼ်းတေႃႈၶဝ်ႈၸူးၵႃႈတီႈၶုၼ်လူင် တႃႇဝိတ်ႈ သေလႄႈထၢမ်ဝႃႈ၊ ၸဝ်ႈၵဝ်ၶႃႈၸဝ်ႈၶုၼ်လူင်တီႈၶႃႈဢိူၺ်း၊ ၸဝ်ႈႁဝ်းၵိၼ်ႇဝႃႈတီႈၶႃႈၸဝ်ႈလႄႈဝႃႈ၊ လုၵ်ႈၸၢႆးမႂ်း သေႃးလမုၼ်ႇ ၼၼ်ႉ တၵ်းလႆႈဢုပ်ႉပိူင်ႇၸၢမ်ႇၸႃးလိုၼ်းၵဝ်လႄႈ ၼင်ႈၵႃႈၼိူဝ်ရႃႇၸႃႉပလၢင်ႇၵဝ်ဢေႃႈ၊ ဝႃႈၼင်ႇၼႆဝႆႉယဝ်ႉဢမ်ႇၸႂ်ႈတီႈၶႃႈႁိုဝ်။ ပေႃးပဵၼ်ၼင်ႇၼၼ်ၸိုင်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဢတေႃးၼီႉယႃႉ ၼၼ်ႉလႆႈဢုပ်ႉပိူင်ႇၸၢမ်ႇၸႃးၼင်ႇႁိုဝ်တီႈၶႃႈ၊ ဝႃႈၼင်ႇၼႆသေၵမ်းတီႈၶႃႈ။-

14ၼႂ်းမိူဝ်ႈဢၼ်ၸဝ်ႈၼၢင်းႁဝ်းယင်းတိုၵ်ႉလဝ်ႊလၢတ်ႈတီႈၶုၼ်ႁေႃၶမ်းၸိူဝ်ႉၼင်ႇၼၼ်ယူႇၼၼ်ႉၸိုင်၊ ၶႃႈၸဝ်ႈတၵ်းၶဝ်ႈၸွမ်းလႄႈ ၵမ်ႉထွၵ်ႈၸွႆႈထႅမ်ၵႂၢမ်းၸဝ်ႈၼၢင်းႁဝ်းတီႈၶႃႈဢေႃႈ၊ ဝႃႈၼင်ႇၼႆလႄႈ၊-

15ပႃႇသသေးၽႃႉ ၶဝ်ႈၵႃႈၼႂ်းလုၵ်းတီႈဢၼ်ၶုၼ်ႁေႃၶမ်းမီးၼၼ်ႉဢေႃႈ ၶုၼ်ႁေႃၶမ်းထဝ်ႈၼႃႇလူင်လၢင်လႄႈ ဢၽီႉသၵ်ႉ ၵူၼ်းယိင်းဝဵင်း သူႉၼိမ်ႇ ၼၼ်ႉ လူတူၺ်းလုမ်းလႃးယူႇဢေႃႈ။-

16ပႃႇသသေးၽႃႉ ၼၼ်ႉ ဝၢင်းႁူဝ်လႄႈဝႆႈၶုၼ်ႁေႃၶမ်းသေယဝ်ႉ၊ ၶုၼ်ႁေႃၶမ်းထၢမ်လႄႈဝႃႈ၊ မီးဢလူဝ်ႇၶႂ်ႈလႆႈၵႃႈသင်၊ ဝႃႈၼင်ႇၼႆဢေႃႈ။-

17မၼ်းၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်းတီႈၶႃႈ၊ ၸဝ်ႈႁဝ်းဢဝ်ထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းတိူင်ႇဝႃႈၵိၼ်ႇဝႃႈတီႈ ၶိင်းပဵၼ်ၶႃႈၸဝ်ႈႁဝ်းၼႆႉလႄႈဝႃႈ၊ လုၵ်ႈၸၢႆးမႂ်း သေႃးလမုၼ်ႇ တၵ်းလႆႈဢုပ်ႉပိူင်ႇၸၢမ်ႇၸႃးလိုၼ်းၵဝ်လႄႈ ၼင်ႈၵႃႈၼိူဝ်ရႃႇၸႃႉပလၢင်ႇၵဝ်ဢေႃႈ၊ ဝႃႈၼင်ႇၼႆဝႆႉတီႈၶႃႈယဝ်ႉ။-

18တူၺ်းတီႈၶႃႈလူး။ မိူဝ်ႈလဵဝ်ၼႆႉၸိုင်၊ ဢတေႃးၼီႉယႃႉ ၼၼ်ႉဢုပ်ႉပိူင်ႇၸၢမ်ႇၸႃးတီႈၶႃႈဢေႃႈ။ ၸဝ်ႈၵဝ်ၶႃႈၸဝ်ႈၶုၼ်လူင်ၵေႃႈဢမ်ႇႁူႉတီႈၶႃႈ။-

19မၼ်းၼၼ်ႉဢဝ်သူဝ်းဝူဝ်းတူဝ်ဢၼ်ပီးလီမၼ်းလီၼၼ်ႉတၢႆသေယဝ်ႉ၊ ႁွင်ႉပၢင်းဢဝ်လုၵ်ႈၸၢႆးၸဝ်ႈၶုၼ်လူင်တင်းသဵင်ႈတင်းလူင် ဢိၵ်ႇတင်းယိတ်ႈပရေႃးႁဵၵ်ႈ ဢႃႇပျႃႇထႃႇ ၊ ၶုၼ်ပူဝ်ႇၶျုၵ်ႈ ယႂႃႇၽႃႉ ၸိူဝ်းၼၼ်ႉယဝ်ႉတီႈၶႃႈဢေႃႈ။ ၶႃႈၸဝ်ႈႁဝ်း သေႃးလမုၼ်ႇ ၸမ်ႉ၊ မၼ်းဢမ်ႇႁွင်ႉဢမ်ႇပၢင်းတီႈၶႃႈ။-

20ဢူဝ်းၸဝ်ႈၵဝ်ၶႃႈၸဝ်ႈၶုၼ်လူင်တီႈၶႃႈ၊ မၢၵ်ႇတႃၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင် ဢွၼ်ၵၼ်မုင်ႈတူၺ်းမွင်းတူၺ်းၸဝ်ႈႁဝ်းလူၺ်ႈလွင်ႈဢၼ်ၸဝ်ႈႁဝ်းတၵ်းမီးဢမိင်ႉ ႁႂ်ႈၽူႈလႂ်ၼင်ႈၵႃႈၼိူဝ်ရႃႇၸႃႉပလၢင်ႇၸဝ်ႈႁဝ်း ၸဝ်ႈၶုၼ်လူင်လိုၼ်းၸဝ်ႈႁဝ်းၼၼ်ႉယူႇတီႈၶႃႈဢေႃႈ။-

21ပေႃးဢမ်ႇၼၼ် မိူဝ်ႈဢၼ်ၸဝ်ႈၵဝ်ၶႃႈၸဝ်ႈၶုၼ်လူင်ၼွၼ်းလပ်းလူၺ်ႈၵၼ်တင်း ပူႇၸဝ်ႈမွၼ်ႇၸဝ်ႈၸိူဝ်းၼၼ်ႉယဝ်ႉၼၼ်ႉၸိုင်၊ ၶိင်းပဵၼ်ၶႃႈၸဝ်ႈႁဝ်းၼႆႉ၊ ဢိၵ်ႇတင်းလုၵ်ႈၸၢႆးၶိင်းပဵၼ်ၶႃႈ သေႃးလမုၼ်ႇ ၼၼ်ႉ တၵ်းပဵၼ်ၵေႃႉဢၼ်လႆႈၶၢမ်ႇရႃႇၸဝူတ်ႈတီႈၶႃႈဢေႃႈ၊ ဝႃႈၼင်ႇၼႆဢေႃႈ။

22ၼႂ်းမိူဝ်ႈဢၼ်မၼ်းယင်းတိုၵ်ႉလဝ်ႊလၢတ်ႈတီႈၶုၼ်ႁေႃၶမ်းၸိူဝ်ႉၼင်ႇၼၼ်ယူႇၼၼ်ႉၸိုင်၊ ပရေႃးၽႅတ်ႈ ၼႃႇသၼ်ႇ ၶဝ်ႈလႄႈ၊-

23ပိူၼ်ႈဢွၼ်ၵၼ်လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ပရေႃးၽႅတ်ႈ ၼႃႇသၼ်ႇ မႃးတီႈၶႃႈဢေႃႈ၊ ဝႃႈၼင်ႇၼႆဢေႃႈ။ မၼ်းၵေႃႈ ႁွတ်ႈထိုင်ၵႃႈတီႈၽၢႆႇၼႃႈၶုၼ်ႁေႃၶမ်းသေယဝ်ႉ၊ ၶုပ်ႉမူပ်ႇဝၢင်းႁူဝ်တႅတ်ႈႁူဝ်သေလႄႈ ၼႃႇသၼ်ႇ လဝ်ႊလၢတ်ႈလႄႈဝႃႈ၊-

24ဢူဝ်းၸဝ်ႈၵဝ်ၶႃႈၸဝ်ႈၶုၼ်လူင်တီႈၶႃႈ၊ ၸဝ်ႈႁဝ်းမီးဢမိင်ႉလႄႈဝႃႈ၊ ဢတေႃးၼီႉယႃႉ တၵ်းလႆႈဢုပ်ႉပိူင်ႇၸၢမ်ႇၸႃးလိုၼ်းၵဝ်လႄႈ ၼင်ႈၵႃႈၼိူဝ်ရႃႇၸႃႉပလၢင်ႇၵဝ်ဢေႃႈ၊ ဝႃႈၼင်ႇၼႆယဝ်ႉတီႈၶႃႈႁိုဝ်။-

25မၼ်းၼၼ်ႉလူင်းၵႂႃႇဝၼ်းမိူဝ်ႈၼႆႉလႄႈ ဢဝ်သူဝ်း၊ ဝူဝ်း၊ တူဝ်ဢၼ်ပီးလီမၼ်းလီၼၼ်ႉတၢႆသေယဝ်ႉ၊ ႁွင်ႉပၢင်းဢဝ်လုၵ်ႈၸၢႆးၸဝ်ႈတင်းသဵင်ႈတင်းလူင် ဢိၵ်ႇတင်းၶုၼ်ပူဝ်ႇတင်းလၢႆ တင်းယိတ်ႈပရေႃးႁဵၵ်ႈ ဢႃႇပျႃႇထႃႇ တီႈၶႃႈယဝ်ႉ။ တူၺ်းတီႈၶႃႈလူး၊ ၶဝ်ၼၼ်ႉဢွၼ်ၵၼ်ၵိၼ်ၶူပ်းယူႇၵႃႈတီႈၽၢႆႇၼႃႈမၼ်းလႄႈႁွင်ႉဝႃႈ၊ ႁႂ်ႈဢသၢၵ်ႈၶုၼ်လူင် ဢတေႃးၼီႉယႃႉ လိပ်းသေၵမ်းလူၺ်ႈ၊ ဝႃႈၼင်ႇၼႆယူႇတီႈၶႃႈဢေႃႈ။-

26ၶႃႈၸဝ်ႈႁဝ်းဢၼ်ဝႃႈ ၶႃႈၸဝ်ႈၼႆႉဢိၵ်ႇတင်းယိတ်ႈပရေႃးႁဵၵ်ႈ ၸႃႇတုၵ်ႉ၊ ပေႇၼႃႇယႃႉ လုၵ်ႈၸၢႆး ယေႃးယတႃႉ ၊ ၶႃႈၸဝ်ႈႁဝ်း သေႃးလမုၼ်ႇ ၼၼ်ႉၸိူဝ်းၼႆႉၸမ်ႉ၊ မၼ်းဢမ်ႇႁွင်ႉဢမ်ႇပၢင်းတီႈၶႃႈ။-

27ၸဝ်ႈႁဝ်းၸဝ်ႈၶုၼ်လူင် ယင်းဢမ်ႇမွၵ်ႇဢမ်ႇလၢတ်ႈလွင်ႈဢၼ်ၽူႈလႂ်တၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇၸဝ်ႈႁဝ်း ၸဝ်ႈၶုၼ်လူင် လိုၼ်းၸဝ်ႈႁဝ်းၼၼ်ႉတီႈၶႃႈၸဝ်ႈႁဝ်းၶဝ်လႄႈ ၸီႇယၢင်ႇဢမူႉၼႆႉယဝ်ႉတီႈၶႃႈႁိုဝ်။ ဝႃႈၼင်ႇၼႆဢေႃႈ။

28မိူဝ်ႈၼၼ်ႉ ၶုၼ်လူင် တႃႇဝိတ်ႈ မီးဢမိင်ႉလႄႈဝႃႈ ႁွင်ႉ ပႃႇသသေးၽႃႉ မႃးတႃႉ၊ ဝႃႈၼင်ႇၼႆလႄႈ၊ မၼ်းၼၼ်ႉမႃးၸူးၵႃႈတီႈၶုၼ်ႁေႃၶမ်းလႄႈ ၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-

29ၶုၼ်ႁေႃၶမ်းၵေႃႈသမ်ႉတိူင်ႇဝႃႈၵိၼ်ႇဝႃႈထႅင်ႈလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃး ဢၼ်ၵႄႇသႄႇၼုၵ်ႈဢဝ်ဢသၢၵ်ႈဝီႉၺိၺ်ႇၵဝ်လွတ်ႈသေၵႃႈၼႂ်းတုၵ်ႉၶႃႉၵူႈၸိူဝ်ႉၵူႈပိူင်ၼၼ်ႉ ဢသၢၵ်ႈလိပ်းယူႇၼၼ်ႉ၊-

30မႅၼ်ႈၸွမ်းၵႃႈၼင်ႇဢၼ် ၵဝ်ဢဝ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ တိူင်ႇဝႃႈၵိၼ်ႇဝႃႈလႄႈဝႃႈ၊ လုၵ်ႈၸၢႆးမႂ်း သေႃးလမုၼ်ႇ တၵ်းလႆႈဢုပ်ႉပိူင်ႇၸၢမ်ႇၸႃးလိုၼ်းၵဝ်လႄႈ ၼင်ႈၵႃႈၼိူဝ်ရႃႇၸႃႉပလၢင်ႇၵဝ် တၢင်တူဝ်ၵဝ်ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဝႆႉၼၼ်ႉသေလႄႈ ၵဝ်တၵ်းႁဵတ်းဝၼ်းမိူဝ်ႈၼႆႉဢေႃႈ၊ ဝႃႈၼင်ႇၼႆဢေႃႈ။-

31ပႃႇသသေးၽႃႉ ၼၼ်ႉ ၶုပ်ႉမူပ်ႇဝၢင်းႁူဝ်တႅတ်ႈႁူဝ်ယူႇ၊ ဝႆႈၶုၼ်ႁေႃၶမ်းယူႇသေလႄႈဢွၵ်ႇသူပ်းဝႃႈ၊ ႁႂ်ႈၸဝ်ႈၵဝ်ၶႃႈၸဝ်ႈၶုၼ်လူင် တႃႇဝိတ်ႈ ဢသၢၵ်ႈလိပ်းယူႇတႃႇသေႇသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။

32ၶုၼ်လူင် တႃႇဝိတ်ႈ ၵေႃႈမီးဢမိင်ႉလႄႈဝႃႈ၊ ႁွင်ႉဢဝ်ယိတ်ႈပရေႃးႁဵၵ်ႈ ၸႃႇတုၵ်ႉ ဢိၵ်ႇတင်းပရေႃးၽႅတ်ႈ ၼႃႇသၼ်ႇ တင်း ပေႇၼႃႇယႃႉ လုၵ်ႈၸၢႆး ယေႃးယတႃႉ ၸိူဝ်းၼၼ်ႉ မႃးတႃႉ၊ ဝႃႈၼင်ႇၼႆလႄႈ၊ ၶဝ်ၼၼ်ႉဢွၼ်ၵၼ်ၶဝ်ႈမႃးၸူးၵႃႈတီႈ ၽၢႆႇၼႃႈၶုၼ်ႁေႃၶမ်းဢေႃႈ။-

33ၶုၼ်ႁေႃၶမ်းၵေႃႈမီးဢမိင်ႉတီႈၶဝ်ၼၼ်ႉလႄႈဝႃႈ၊ ႁွင်ႉဢဝ်ၶႃႈၵူၼ်းၸဝ်ႈသူတင်းလၢႆလႄႈ ႁႂ်ႈလုၵ်ႈၸၢႆးၵဝ် သေႃးလမုၼ်ႇ ၶီႇလီႈၵဝ်သေလႄႈ ဢဝ်မၼ်းလူင်းၵႂႃႇၵႃႈတီႈ ၵီႉႁုၼ်ႇ တႃႉ။-

34ႁႂ်ႈယိတ်ႈပရေႃးႁဵၵ်ႈ ၸႃႇတုၵ်ႉ ဢိၵ်ႇတင်းပရေႃးၽႅတ်ႈ ၼႃႇသၼ်ႇ ပၼ်ၽိၵ်ႈသိၵ်ႈတီႈမၼ်းၵႃႈတီႈၼၼ်ႈ ႁႂ်ႈပဵၼ်ၶုၼ်ႁေႃၶမ်း ဢီႉသရေႇလႃႉ လႄႈ ပဝ်ႇတိုင်ႈၼႄးၶရႃႇသေလႄႈႁွင်ႉပၢဝ်ႇႁွင်ႉသေႃႇလႄႈဝႃႈ၊ ႁႂ်ႈၶုၼ်ႁေႃၶမ်း သေႃးလမုၼ်ႇ ၼႆႉဢသၢၵ်ႈလိပ်းယူႇသေၵမ်းလူၺ်ႈ၊ ဝႃႈၼင်ႇၼႆတႃႉ။-

35လိုၼ်းၼၼ်ႉ သူဢွၼ်ၵၼ်ၸွမ်းလူၺ်ႈၵၼ်တင်းမၼ်းၶိုၼ်းမႃးလႄႈ မၼ်းတၵ်းလႆႈမႃးၼင်ႈၵႃႈၼိူဝ်ရႃႇၸႃႉပလၢင်ႇၵဝ်လႄႈ ပဵၼ်ၶုၼ်ႁေႃၶမ်းတၢင်တူဝ်ၵဝ်ဢေႃႈ။ ၵဝ်ၶၢၼ်းမၼ်းဝႆႉႁႂ်ႈပဵၼ်ၶုၼ် ဢီႉသရေႇလႃႉ ၶုၼ် ယူႉတႃႉ ယဝ်ႉ၊ ဝႃႈၼင်ႇၼႆဢေႃႈ။-

36ပေႇၼႃႇယႃႉ လုၵ်ႈၸၢႆး ယေႃးယတႃႉ ၶိုၼ်းလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ဢႃႇမိၼ်ႇ။ ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈႁဝ်း ၸဝ်ႈၶုၼ်လူင်မီးဢမိင်ႉၸိူဝ်ႉၼင်ႇၼၼ်သေၵမ်းလူၺ်ႈတီႈၶႃႈ။-

37ၸိူဝ်ႉၼင်ႇဢၼ်ထႃႇဝရႃႉၽြႃးမီးယူႇလူၺ်ႈၵၼ်တင်းၸဝ်ႈၵဝ်ၶႃႈ ၸဝ်ႈၶုၼ်လူင်ၼၼ်ႉ၊ ႁႂ်ႈမၼ်းၸဝ်ႈမီးယူႇလူၺ်ႈၵၼ်တင်း သေႃးလမုၼ်ႇ လႄႈ ၸီႇယၢင်ႇႁႂ်ႈရႃႇၸႃႉပလၢင်ႇမၼ်းယဵင်ႈၶႅၼ်းမုၼ်ၽုင်းယႂ်ႇလိူဝ်တွၼ်းၼႃႇသေ ရႃႇၸႃႉပလၢင်ႇၸဝ်ႈၵဝ်ၶႃႈ ၸဝ်ႈၶုၼ်လူင် တႃႇဝိတ်ႈ သေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။

38မိူဝ်ႈၼၼ်ႉယိတ်ႈပရေႃးႁဵၵ်ႈ ၸႃႇတုၵ်ႉ ဢိၵ်ႇတင်းပရေႃးၽႅတ်ႈ ၼႃႇသၼ်ႇ၊ ပေႇၼႃႇယႃႉ လုၵ်ႈၸၢႆး ယေႃးယတႃႉ ၊ ၵူၼ်း ၶေးရသီႉ တင်းလၢႆ၊ ၵူၼ်း ပေႇလသီႉ တင်းလၢႆၸိူဝ်းၼၼ်ႉ ဢွၼ်ၵၼ်လူင်းၵႂႃႇလႄႈ ႁႂ်ႈ သေႃးလမုၼ်ႇ ၶီႇလီႈၶုၼ်လူင် တႃႇဝိတ်ႈ သေလႄႈ ဢဝ်ၵႂႃႇၵႃႈတီႈ ၵီႉႁုၼ်ႇ ဢေႃႈ။-

39ယိတ်ႈပရေႃးႁဵၵ်ႈ ၸႃႇတုၵ်ႉ ၼၼ်ႉ ဢဝ်တဝ်ႈၼမ်ႉမၼ်းဢွၵ်ႇသေၵႃႈၼႂ်းမူဝ်းၵႃႇၸဝ်ႈလႄႈ ပၼ်ၽိၵ်ႈသိၵ်ႈတီႈ သေႃးလမုၼ်ႇ သေယဝ်ႉ ၶဝ်ဢွၼ်ၵၼ်ပဝ်ႇတိုင်ႈၼႄးၶရႃႇလႄႈ ၵူၼ်းတင်းသဵင်ႈတင်းလူင်ဢွၼ်ၵၼ်ႁွင်ႉပၢဝ်ႇႁွင်ႉသေႃႇလႄႈဝႃႈ၊ ႁႂ်ႈၶုၼ်လူင် သေႃးလမုၼ်ႇ ၼႆႉ ဢသၢၵ်ႈလိပ်းယူႇသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

40ၵူၼ်းတင်းသဵင်ႈတင်းလူင်ဢွၼ်ၵၼ်ၸွမ်းလူၺ်ႈၵၼ်တင်းမၼ်းၶိုၼ်းမႃးလႄႈ ၵူၼ်းတင်းသဵင်ႈတင်းလူင်ဢွၼ်ၵၼ်ပႃးဢဝ်တင်းၼႄးၶရႃႇသေလႄႈ ပဝ်ႇတိုင်ႈယူႇ၊ ႁဵတ်းတၢင်းဢၼ်ၸူမ်းသိူဝ်းဢၼ်ယႂ်ႇၼႃႇ ၸူမ်းသိူဝ်းယူႇတေႃႇထိုင်ႁွတ်ႈလိၼ်မိူင်းထၼ်ႈပေႃး ႁၢမ်ႉတၵ်းတႅၵ်ႇလူၺ်ႈသဵင်ၼၼ်ႉဢေႃႈ။

41ဢတေႃးၼီႉယႃႉ ဢိၵ်ႇတင်းၶဝ်ၵႃႈဢၼ်ႁူမ်ႈၵၼ်ပွင်းၵၼ်တင်းမၼ်းၸိူဝ်းၼၼ်ႉ လႆႈငိၼ်းသဵင်ၼၼ်ႉၼႂ်းမိူဝ်ႈဢၼ် ပွႆးၵိၼ်ပွႆးၶူပ်းၶဝ်ယဝ်ႉတူဝ်ႈယဝ်ႉၼၼ်ႉဢေႃႈ။ ယႂႃႇၽႃႉ လႆႈငိၼ်းသဵင်ဢၼ် ပဝ်ႇတိုင်ႈၼႄးၶရႃႇၼၼ်ႉသေယဝ်ႉ၊ ၼႂ်းမိူဝ်ႈဢၼ်မၼ်းယင်းတိုၵ်ႉထၢမ်လႄႈဝႃႈ၊ သဵင်ဢၼ်ႁဵတ်းႁုၼ်ႉႁၼ်ႉဢူၼ်ဢဵၼ်မေႃးမႄးၵႃႈၼႂ်းဝဵင်းတင်းဝဵင်းၼၼ်ႉၸမ်ႉ၊ ပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်။ ဝႃႈၼင်ႇၼႆယူႇၼၼ်ႉၸိုင်၊-

42ယေႃးၼသၼ်ႇ လုၵ်ႈၸၢႆးယိတ်ႈပရေႃးႁဵၵ်ႈ ဢႃႇပျႃႇထႃႇ ၼၼ်ႉႁွတ်ႈမႃးလႄႈ ဢတေႃးၼီႉယႃႉ လၢတ်ႈလႄႈဝႃႈ၊ ၶဝ်ႈမႃးသေၵမ်း။ မႂ်းၼႆႉပဵၼ်ၵူၼ်းဢၼ်လီလႄႈ တၵ်းမွၵ်ႇလၢတ်ႈသတၢင်းသဵင်ၶၢဝ်ႇဢၼ်လီဢေႃႈ၊ ဝႃႈၼင်ႇၼႆသေယဝ်ႉ၊-

43ယေႃးၼသၼ်ႇ ၶိုၼ်းလဝ်ႊလၢတ်ႈတီႈ ဢတေႃးၼီႉယႃႉ လႄႈဝႃႈ၊ ၸဝ်ႈႁဝ်းၶႃႈ ၸဝ်ႈၶုၼ်လူင် တႃႇဝိတ်ႈ ၼၼ်ႉ ၶၢၼ်း သေႃးလမုၼ်ႇ ဝႆႉ ႁႂ်ႈပဵၼ်ၶုၼ်ႁေႃၶမ်းတီႈၶႃႈယဝ်ႉ။-

44ၶုၼ်ႁေႃၶမ်းပွႆႇၵေႃႉၸႂ်ႉ ယိတ်ႈပရေႃးႁဵၵ်ႈ ၸႃႇတုၵ်ႉ ဢိၵ်ႇတင်းပရေႃးၽႅတ်ႈ ၼႃႇသၼ်ႇ၊ ပေႇၼႃႇယႃႉ လုၵ်ႈၸၢႆး ယေႃးယတႃႉ ၊ ၵူၼ်း ၶေးရသီႉ တင်းလၢႆ၊ ၵူၼ်း ပေႇလသီႉ တင်းလၢႆၸိူဝ်းၼၼ်ႉၵႂႃႇလူၺ်ႈၵၼ်တင်းမၼ်းၼၼ်ႉလႄႈ ႁႂ်ႈမၼ်းၶီႇလီႈၶုၼ်ႁေႃၶမ်းတီႈၶႃႈယဝ်ႉ။-

45ယိတ်ႈပရေႃးႁဵၵ်ႈ ၸႃႇတုၵ်ႉ ဢိၵ်ႇတင်းပရေႃးၽႅတ်ႈ ၼႃႇသၼ်ႇ ပၼ်ရႃႇၸႃႉၽိၵ်ႈသိၵ်ႈတီႈမၼ်း ၵႃႈၼႂ်း ၵီႉႁုၼ်ႇ တီႈၶႃႈယဝ်ႉ။ ၶဝ်ၼၼ်ႉဢွၼ်ၵၼ်လုၵ်ႉသေၵႃႈတီႈၼၼ်ႈၶိုၼ်းမႃးလႄႈၸူမ်းသိူဝ်းၼႃႇလူင်လၢင် ထၼ်ႈပေႃးႁုၼ်ႉႁၼ်ႉဢူၼ်ဢဵၼ်မေႃးမႄးၵႂႃႇတင်းဝဵင်းတီႈၶႃႈဢေႃႈ။ သဵင်ၼၼ်ႉပဵၼ်သဵင်ဢၼ်ၸဝ်ႈႁဝ်းငိၼ်းယဝ်ႉၼၼ်ႉတီႈၶႃႈဢေႃႈ။-

46သေႃးလမုၼ်ႇ ၵေႃႈ ၼင်ႈၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းတီႈၶႃႈယဝ်ႉ။-

47ၶႃႈၵူၼ်းၶုၼ်ႁေႃၶမ်းတင်းလၢႆၵေႃႈ ဢွၼ်ၵၼ်ၵႂႃႇႁႂ်ႈလႆႈပၼ်တၢင်းလီတီႈၸဝ်ႈႁဝ်းၶႃႈ ၸဝ်ႈၶုၼ်လူင် တႃႇဝိတ်ႈ လႄႈ လဝ်ႊလၢတ်ႈလႄႈဝႃႈ၊ ႁႂ်ႈၽြႃးပဵၼ်ၸဝ်ႈၸဝ်ႈႁဝ်း ယုၵ်ႉယွင်ႈၼႃႇမႃႉၸိုဝ်ႈသဵင် သေႃးလမုၼ်ႇ လိူဝ်တွၼ်းၼႃႇသေ ၼႃႇမႃႉၸိုဝ်ႈသဵင်ၸဝ်ႈႁဝ်းလႄႈ ႁဵတ်းႁႂ်ႈရႃႇၸႃႉပလၢင်ႇမၼ်း မုၼ်ၽုင်းယႂ်ႇလိူဝ်တွၼ်းၼႃႇသေရႃႇၸႃႉပလၢင်ႇၸဝ်ႈႁဝ်းသေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်းၵူမ်ႈၵွမ်းႁူဝ် ၵႃႈၼိူဝ်ၵူႇတီႈၼွၼ်းၸဝ်ႈသေလႄႈဝႃႈ၊-

48ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢၼ်ဢဵတ်းလူပၼ်ၵေႃႉဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇၵဝ် ဝၼ်းမိူဝ်ႈၼႆႉလႄႈ ႁႂ်ႈမၢၵ်ႇတႃၵဝ်လႆႈႁၼ်ၼၼ်ႉ မီးမင်ႇၵလႃႇသေၵမ်းလူၺ်ႈ၊ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

49မိူဝ်ႈၼၼ်ႉ ၶဝ်ၸိူဝ်းဢၼ်ႁူမ်ႈၵၼ်ပွင်းၵၼ်တင်း ဢတေႃးၼီႉယႃႉ ၸိူဝ်းၼၼ်ႉ ၵူဝ်ႁႄယူႇသေလႄႈ ဢွၼ်ၵၼ်လုၵ်ႉလႄႈၵႂႃႇ ယေႈၵေႃႉယေႈတီႈယေႈၵေႃႉယေႈတၢင်းဢေႃႈ။-

50ဢတေႃးၼီႉယႃႉ ၵေႃႈၵူဝ်ႁႄ သေႃးလမုၼ်ႇ ယူႇသေလႄႈ လုၵ်ႉလႄႈၵႂႃႇယိပ်းၵမ်ၶဝ်လႅမ်ယိတ်ႈပလၢင်ႇယူႇဢေႃႈ။-

51ပိူၼ်ႈဢွၼ်ၵၼ်လဝ်ႊလၢတ်ႈတီႈ သေႃးလမုၼ်ႇ လႄႈဝႃႈ၊ ဢတေႃးၼီႉယႃႉ ၼၼ်ႉၵူဝ်ႁႄၶုၼ်လူင် သေႃးလမုၼ်ႇ လႄႈ ယိပ်းၵမ်ၶဝ်လႅမ်ယိတ်ႈပလၢင်ႇယူႇသေလႄႈဝႃႈ၊ ႁႂ်ႈၶုၼ်လူင် သေႃးလမုၼ်ႇ ၵိၼ်ႇဝႃႈတီႈၵဝ်ဝၼ်းမိူဝ်ႈၼႆႉ လွင်ႈဢၼ်မၼ်းၸဝ်ႈတၵ်းဢမ်ႇဢဝ်ၵဝ်တၢႆလူၺ်ႈလၢပ်ႇၼၼ်ႉသေၵမ်းလူၺ်ႈ၊ ဝႃႈၼင်ႇၼႆယူႇတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

52သေႃးလမုၼ်ႇ မီးဢမိင်ႉလႄႈဝႃႈ၊ ပေႃးမၼ်းတၵ်းပဵၼ်ၵူၼ်းလီၸိုင်၊ ၶူၼ်ႁူဝ်မၼ်းသေသဵၼ်ႈၵေႃႈ ဢမ်ႇလႆႈတူၵ်းၵႃႈတီႈလိၼ်။ ၵူၺ်းၵႃႈပေႃးထူပ်းႁၼ်ဢပႅတ်ႈၵႃႈၼႂ်းမၼ်းၸိုင်၊ မၼ်းတၵ်းလႆႈတၢႆဢေႃႈ၊ ဝႃႈၼင်ႇၼႆသေယဝ်ႉ၊-

53ၶုၼ်လူင် သေႃးလမုၼ်ႇ ပွႆႇၸႂ်ႉၵူၼ်းၵႂႃႇလႄႈ၊ ၶဝ်ၼၼ်ႉဢွၼ်ၵၼ်ဢဝ်မၼ်းၼၼ်ႉလူင်းသေၵႃႈတီႈယိတ်ႈပလၢင်ႇလႄႈ မၼ်းၼၼ်ႉမႃးလႄႈ ဝၢင်းႁူဝ်ၵႃႈတီႈၽၢႆႇၼႃႈၶုၼ်လူင် သေႃးလမုၼ်ႇ ဢေႃႈ။ သေႃးလမုၼ်ႇ ၵေႃႈမီးဢမိင်ႉတီႈမၼ်းလႄႈဝႃႈ၊ ၵႂႃႇၵႃႈတီႈႁိူၼ်းမႂ်းတႃႉ၊ ဝႃႈၼင်ႇၼႆဢေႃႈ။