1 Kings 3

Shan

← Chapter 2 Jump to: Chapter 4 →

1သေႃးလမုၼ်ႇ ၼၼ်ႉႁဵတ်းၵေႃႉႁဵတ်းသေႈၵၼ်တင်းၶုၼ်ႁေႃၶမ်း ၽႃႇရေႃး မိူင်း ဢေႇၵိပ်ႉတူႉ ယူႇသေလႄႈ ပဵၼ်ၵူပ်ႉပဵၼ်ၵူႈလူၺ်ႈၵၼ်တင်းလုၵ်ႈယိင်းၸဝ်ႈ ၽႃႇရေႃး ၼၼ်ႉလႄႈ ပၼ်တီႈယူႇတီႈသဝ်း ၵႃႈၼႂ်းဝဵင်း တႃႇဝိတ်ႈ တေႃႇထိုင်ႁွတ်ႈမၼ်းတႄႇႁဵတ်းႁေႃၸဝ်ႈ ဢိၵ်ႇတင်းႁိူၼ်းထႃႇဝရႃႉၽြႃး တင်းလမ်းဝဵင်း ယေႇရူႉသလႅမ်ႇ ဢၼ်လဵပ်ႈၸွမ်းႁိမ်းမၼ်းၼၼ်ႉထၼ်ႈပေႃးယဝ်ႉတူဝ်ႈယဝ်ႉၼၼ်ႉဢေႃႈ။-

2မိူဝ်ႈၼၼ်ႉ ၵွပ်ႈပိူဝ်ႈဢၼ်ဢမ်ႇပႆႇတႄႇပႆႇႁဵတ်းႁိူၼ်းၸဝ်ႈ ပုၼ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃးၼၼ်ႉလႄႈ ၵူၼ်းတင်းလၢႆၸင်ႇပုၵ်ႈၸေႃႇယိတ်ႈၵႃႈၼိူဝ်ထႃႇၼႃႉတီႈသုင်တင်းလၢႆဢေႃႈ။-

3သေႃးလမုၼ်ႇ ၼၼ်ႉႁၵ်ႉထႃႇဝရႃႉၽြႃးလႄႈ ၸၢင်ႈပႂ်ႉၵမ်ပႂ်ႉၸွမ်းထုင်းၽိင်ႈဢၼ်ၸဝ်ႈပေႃႈမၼ်း တႃႇဝိတ်ႈ ႁဵတ်းဝႆႉၸိူဝ်းၼၼ်ႉဢေႃႈ။ ၵူၺ်းၵႃႈမၼ်းပုၵ်ႈၸေႃႇယိတ်ႈလႄႈ ဢဝ်ၽႆးတုတ်ႇၼၢမ်ႇသႃႇၵႃႈၼိူဝ်ထႃႇၼႃႉတီႈသုင်ၸိူဝ်းၼၼ်ႉဢေႃႈ။

4ၽဝ်ႇၼိုင်ႈ ၶုၼ်ႁေႃၶမ်းၵႂႃႇၵႃႈတီႈဝဵင်း ၵီႉပွင်ႇ ႁႂ်ႈလႆႈပုၵ်ႈၸေႃႇယိတ်ႈၵႃႈတီႈၼၼ်ႈ ၵွပ်ႈပိူဝ်ႈဢၼ်ထႃႇၼႃႉတီႈသုင်ဢၼ်မျၢတ်ႈၼႃႇလူင်လၢင် မီးၵႃႈတီႈၼၼ်ႈၼၼ်ႉလႄႈ သေႃးလမုၼ်ႇ ဢဝ်ယိတ်ႈဢၼ်တုတ်ႇၽႆးႁဵင်ၼိုင်ႈ ပုၵ်ႈၸေႃႇၵႃႈၼိူဝ်ယိတ်ႈပလၢင်ႇၼၼ်ႉဢေႃႈ။

5ထႃႇဝရႃႉၽြႃးပေႃႇမႃးတီႈ သေႃးလမုၼ်ႇ ၵႃႈၼႂ်းတၢင်းဢၼ်ၼွၼ်းၽၼ်ႁၼ်ၶိင်ႇၵၢင်ၶိုၼ်း ၵႃႈၼႂ်းဝဵင်း ၵီႉပွင်ႇ ၼၼ်ႉလႄႈ ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ ယွၼ်းဢဝ်သူးဢၼ်ၵဝ်တၵ်းလႆႈပၼ်တီႈမႂ်းၼၼ်ႉတႃႉ၊ ဝႃႈၼင်ႇၼႆဢေႃႈ။-

6သေႃးလမုၼ်ႇ ၵေႃႈလဝ်ႊယွၼ်းလႄႈဝႃႈ၊ ၸဝ်ႈႁဝ်းႁဵတ်းၵျေးၸူးၼမ်ၼႃႇလူင်လၢင်တီႈၶႃႈၸဝ်ႈႁဝ်း တႃႇဝိတ်ႈ ဢၼ်ပဵၼ်ပေႃႈၶႃႈၸဝ်ႈႁဝ်းၼႆႉၼၼ်ႉ ၸွမ်းၵႃႈၼင်ႇဢၼ်မၼ်းၵႂႃႇမႃးၵႃႈတီႈၽၢႆႇၼႃႈၸဝ်ႈႁဝ်း မႅၼ်ႈၸွမ်းၼင်ႇသမ်ႇမႃႇတြႃး၊ တြႃးတၢင်းဢၼ်သိုဝ်ႈတေႃႇ၊ တြႃးတၢင်းဢၼ်ပႃးႁူဝ်ၸႂ်သေလႄႈၵမ်ၵျၢင်ႉသိုဝ်ႈသိုဝ်ႈယူဝ်းယူဝ်းၼၼ်ႉတီႈၶႃႈယဝ်ႉ။ ၸဝ်ႈႁဝ်းပႂ်ႉၸွမ်းၵျေးၸူးတြႃးပုၼ်ႈမၼ်း ၼႂ်းလွင်ႈဢၼ်ၸဝ်ႈႁဝ်းဢဵတ်းလူပၼ်လုၵ်ႈၸၢႆးဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇမၼ်း ၵႃႈၼင်ႇဢၼ်မီးဝၼ်းမိူဝ်ႈၼႆႉၼၼ်ႉတီႈၶႃႈယဝ်ႉ။-

7မိူဝ်ႈလဵဝ်ၼႆႉၸိုင်၊ ထႃႇဝရႃႉၽြႃး ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၸဝ်ႈႁဝ်းၶၢၼ်းၶႃႈၸဝ်ႈႁဝ်းၼႆႉ ဝႆႉႁႂ်ႈပဵၼ်ၶုၼ်ႁေႃၶမ်းတၢင်တူဝ်ပေႃႈၶႃႈၸဝ်ႈႁဝ်း တႃႇဝိတ်ႈ ၼၼ်ႉတီႈၶႃႈယဝ်ႉ။ ၵူၺ်းၵႃႈၶႃႈၸဝ်ႈႁဝ်းၼႆႉပဵၼ်လုၵ်ႈဢွၼ်ႇတီႈၶႃႈဢေႃႈ။ ၶႃႈၸဝ်ႈႁဝ်းၼႆႉဢမ်ႇတၢတ်ႈၼိူင်ႇလႆႈလွင်ႈဢၼ်ၶဝ်ႈဢၼ်ဢွၵ်ႇၼၼ်ႉတီႈၶႃႈ။-

8ၶႃႈၸဝ်ႈႁဝ်းၼႆႉ မီးယူႇၵႃႈၼႂ်းၵၢင်ၵူၼ်းၸဝ်ႈႁဝ်း ဢၼ်ၸဝ်ႈႁဝ်းလိူၵ်ႈၵဵပ်းဢဝ်ဢၼ်ဝႃႈ ၵူၼ်းမဵဝ်းဢၼ်ယႂ်ႇဢၼ်လူင် ဢၼ်ဢမ်ႇၼပ်ႉဢမ်ႇဢၢၼ်ႇလႆႈၼမ်ၼႃႇလူင်လၢင်ၸိူဝ်းၼႆႉတီႈၶႃႈဢေႃႈ။-

9ပိူဝ်ႈဢၼ်ပဵၼ်ၼင်ႇၼႆလႄႈ ၶႅၼ်းတေႃႈဢဵတ်းလူပၼ်ႁူဝ်ၸႂ်ဢၼ်မီးၺၢၼ်ႇပုၼ်ႈဢၼ်ၶႃႈၸဝ်ႈႁဝ်းၼႆႉ တၵ်းၸီႇယၢင်ႇတြႃးတီႈၵူၼ်းၸဝ်ႈႁဝ်းတင်းလၢႆ ႁႂ်ႈၶႃႈၸဝ်ႈႁဝ်းၼႆႉ ၸၢင်ႈၸၵ်းၽႄလႄႈ ႁူႉလွင်ႈဢၼ်လီဢၼ်ဢမ်ႇလီၼၼ်ႉသေၵမ်းတီႈၶႃႈ။ ၽူႈလႂ်တၵ်းတၢတ်ႈၼိူင်ႇႁႂ်ႈလႆႈၸီႇယၢင်ႇတြႃးတီႈၵူၼ်းၸဝ်ႈႁဝ်းဢၼ်ၼမ်ၼႃႇလူင်လၢင်ထၢၼ်ႇၼႆႉၸိူဝ်းၼၼ်ႉလႆႈတီႈၶႃႈ၊ ဝႃႈၼင်ႇၼႆဢေႃႈ။-

10ၵႂၢမ်းဢၼ် သေႃးလမုၼ်ႇ လဝ်ႊယွၼ်းၸိူဝ်ႉၼင်ႇၼၼ်ၼၼ်ႉ ထုၵ်ႇၸႂ်ၵျိူၵ်ႈၸႂ်ထႃႇဝရႃႉၽြႃးလႄႈ၊-

11ၽြႃးပဵၼ်ၸဝ်ႈမီးဢမိင်ႉတီႈမၼ်းလႄႈဝႃႈ၊ ၵွပ်ႈပိူဝ်ႈဢၼ်မႂ်းယွၼ်းဢဝ်ဢၼ်ၼႆႉၵူၺ်း၊ ယင်းဢမ်ႇယွၼ်းဢဝ်ၸူဝ်ႈဢသၢၵ်ႈဢၼ်ယၢဝ်းဢၼ်ယိုၼ်း၊ ဢမ်ႇယွၼ်းဢဝ်ၸေးၸိမ်ႇ၊ ဢမ်ႇယွၼ်းဢဝ်ဢသၢၵ်ႈရၢၼ်ႇသူႇမႂ်းလႄႈ လဝ်ႊယွၼ်းဢဝ်ၺၢၼ်ႇဢၼ်တၢတ်ႈၼိူင်ႇႁႂ်ႈလႆႈၸီႇယၢင်ႇတြႃးလႆႈၼၼ်ႉၵူၺ်းပုၼ်ႈတူဝ်ၸဝ်ႈၵဝ်ႇၼၼ်ႉလႄႈ၊-

12ၵဝ်ပၼ်ၸွမ်းၵႃႈၼင်ႇဢၼ်မႂ်းလဝ်ႊယွၼ်းဢဝ်ၼၼ်ႉဢေႃႈ။ ၵဝ်ပၼ်ၸႂ်ဝီႉၺိၺ်ႇဢၼ်ပျေႉၸုမ်ႇဝႆႉတင်းတၢင်းလၵ်းတၢင်းလႅမ်၊ ၺၢၼ်ႇထၼ်ႈပေႃးၵေႃႉဢၼ်မိူၼ်ၵၼ်တင်းမႂ်း ဢမ်ႇမီးမိူဝ်ႈဢွၼ်တၢင်းမႂ်းလႄႈ မိူဝ်ႈၵမ်းလိုၼ်းမႂ်းၼၼ်ႉၵေႃႈ ဢမ်ႇမီးသေၵေႃႉသေၵူၼ်းၼၼ်ႉတီႈမႂ်းဢေႃႈ။-

13ၼွၵ်ႈသေၼႆႉ ၵဝ်ပၼ်သူးဢၼ်မႂ်းဢမ်ႇယွၼ်းဢၼ်ဝႃႈ ၸေးၸိမ်ႇဢုၵ်ႉၸႃႇ၊ မုၼ်ၵုင်ႇသရေႇထၼ်ႈပေႃးၶုၼ်ႁေႃၶမ်း ဢၼ်မိူၼ်ၵၼ်တင်းမႂ်း တၵ်းဢမ်ႇပေႃႇဢမ်ႇမီးၼႂ်းၸူဝ်ႈပၢၼ်မႂ်းၼၼ်ႉတီႈမႂ်းဢေႃႈ။-

14ပေႃးမႂ်းၸွမ်းသဵၼ်ႈတၢင်းၵဝ်ယူႇလႄႈ ပႂ်ႉၵမ်ပႂ်ႉၸွမ်းထုင်းၽိင်ႈတြႃးၵဝ် ဢိၵ်ႇတင်းလွင်ႈတၢင်းဢၼ် ၵဝ်ၸီႇယၢင်ႇဝႆႉတင်းလၢႆၼၼ်ႉယူႇ မိူၼ်ၸိူဝ်ႉၼင်ႇဢၼ်ပေႃႈမႂ်း တႃႇဝိတ်ႈ ၵမ်ၵျၢင်ႉၼၼ်ႉၸိုင်၊ ၵဝ်တၵ်းႁႂ်ႈၸူဝ်ႈဢသၢၵ်ႈမႂ်းယၢဝ်းယိုၼ်းဢေႃႈ၊ ဝႃႈၼင်ႇၼႆဢေႃႈ။-

15သေႃးလမုၼ်ႇ တိုၼ်ႇမႃးလႄႈ ႁူႉပဵၼ်တၢင်းဢၼ်ၼွၼ်းၽၼ်ႁၼ်ၼၼ်ႉဢေႃႈ။ လႆႈသမ်ႉ မၼ်းၵႂႃႇၵႃႈတီႈဝဵင်း ယေႇရူႉသလႅမ်ႇ လႄႈ ၸုၵ်းယူႇၵႃႈတီႈၽၢႆႇၼႃႈတိူၵ်ႈတႃႇပတီႉၺိၺ်ႇထႃႇဝရႃႉၽြႃးသေလႄႈ ပုၵ်ႈၸေႃႇယိတ်ႈဢၼ်တုတ်ႇၽႆးလႂ်၊ ယိတ်ႈမိၵ်ႉသႃႇႁႃယႃႉလႂ် လႄႈႁဵတ်းပွႆးပုၼ်ႈၶႃႈမၼ်းၵူၼ်းမၼ်းတင်းသဵင်ႈတင်းလူင်ဢေႃႈ။

16ၽဝ်ႇၼိုင်ႈ မႄႈမွၵ်ႇယႃႈသွင်ၵေႃႉ ဢွၼ်ၵၼ်မႃးၸူးတီႈၶုၼ်ႁေႃၶမ်းလႄႈ ၸုၵ်းယူႇၵႃႈတီႈၽၢႆႇၼႃႈမၼ်းသေယဝ်ႉ၊-

17မႄႈယိင်းၵေႃႉၼိုင်ႈလဝ်ႊလၢတ်ႈလႄႈဝႃႈ၊ ၸဝ်ႈတီႈၶႃႈ၊ ၶိင်းပဵၼ်ၶႃႈၸဝ်ႈႁဝ်းဢိၵ်ႇတင်းမႄႈယိင်းၵေႃႉၼႆႉ ယူႇႁိူၼ်းလဵဝ်ၵၼ်တီႈၶႃႈဢေႃႈ။ ယူႇႁိူၼ်းလဵဝ်ၵၼ်ယူႇသေလႄႈ ၶိင်းပဵၼ်ၶႃႈၸဝ်ႈႁဝ်းၵိူတ်ႇလဵင်ႉလုၵ်ႈမႃးတီႈၶႃႈဢေႃႈ။-

18လိုၼ်းသေဢၼ်ၶိင်းပဵၼ်ၶႃႈၸဝ်ႈႁဝ်းၼႆႉၵိူတ်ႇလဵင်ႉယဝ်ႉၼၼ်ႉ၊ ပူၼ်ႉသၢမ်ဝၼ်းသေယဝ်ႉ၊ မႄႈယိင်းၼႆႉၵိူတ်ႇလဵင်ႉလုၵ်ႈလႄႈ ၶိူဝ်ၶႃမီးလူၺ်ႈၵၼ်တီႈၶႃႈဢေႃႈ။ ၵႃႈတီႈႁိူၼ်းၼၼ်ႉဢမ်ႇမီးၶႅၵ်ႇသေၵေႃႉသေၵူၼ်းတီႈၶႃႈ။ မီးၶႃႈၸဝ်ႈႁဝ်းသွင်ၵေႃႉၵူၺ်းတီႈၶႃႈဢေႃႈ။-

19လုၵ်ႈဢွၼ်ႇမႄႈယိင်းၼႆႉတၢႆ ၶိင်ႇၵၢင်ၶိုၼ်း ၵွပ်ႈပိူဝ်ႈဢၼ်မၼ်းၼွၼ်းလႄႈ တဵင်မႅၼ်ႈလုၵ်ႈဢွၼ်ႇမၼ်းၼၼ်ႉတီႈၶႃႈဢေႃႈ။-

20ၶိင်ႇတဵင်ႈၶိုၼ်းၼၼ်ႉ မၼ်းလုၵ်ႉလႄႈဢဝ်လုၵ်ႈဢွၼ်ႇၶိင်းပဵၼ်ၶႃႈၸဝ်ႈႁဝ်း ၼႂ်းမိူဝ်ႈဢၼ်ၶိင်းပဵၼ်ၶႃႈၸဝ်ႈႁဝ်း ယင်းတိုၵ်ႉၼွၼ်းလပ်းယူႇၼၼ်ႉသေလႄႈ ဝႆႉၵႃႈၼႂ်းဝၢင်ႈႁူဝ်ဢူၵ်းမၼ်းတီႈၶႃႈဢေႃႈ။ တူဝ်တၢႆလုၵ်ႈဢွၼ်ႇမၼ်းၼၼ်ႉၸမ်ႉ၊ မၼ်းဢဝ်ဝႆႉၵႃႈၼႂ်းဝၢင်ႈႁူဝ်ဢူၵ်းၶိင်းပဵၼ်ၶႃႈၸဝ်ႈႁဝ်းတီႈၶႃႈဢေႃႈ။-

21ၶိင်ႇၵၢင်ၼႂ်၊ မိူဝ်ႈဢၼ်ၶိင်းပဵၼ်ၶႃႈၸဝ်ႈႁဝ်းလုၵ်ႉႁႂ်ႈလႆႈပၼ်ၵိၼ်ၼူမ်းလုၵ်ႈဢွၼ်ႇၼၼ်ႉၸိုင်၊ ပဵၼ်ဢၼ်တၢႆဝႆႉတီႈၶႃႈဢေႃႈ။ ၵူၺ်းၵႃႈ မိူဝ်ႈဢၼ်ၶိင်းပဵၼ်ၶႃႈၸဝ်ႈႁဝ်းလူတူၺ်းလုၵ်ႈဢွၼ်ႇၼၼ်ႉလီလီငၢမ်းငၢမ်းၼၼ်ႉၸိုင်၊ ဢမ်ႇၸႂ်ႈလုၵ်ႈဢွၼ်ႇဢၼ် ၶိင်းပဵၼ်ၶႃႈၸဝ်ႈႁဝ်းၵိူတ်ႇလဵင်ႉမႃးၼၼ်ႉတီႈၶႃႈ၊ ဝႃႈၼင်ႇၼႆဢေႃႈ။-

22မႄႈယိင်းတၢင်ႇၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊ ဢမ်ႇၸႂ်ႈၵူၺ်ႉ။ လုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉပဵၼ်လုၵ်ႈၸၢႆးၵဝ်ဢိူဝ်ႈ။ လုၵ်ႈဢွၼ်ႇဢၼ်တၢႆၼၼ်ႉပဵၼ်လုၵ်ႈၸၢႆးမႂ်းဢိူဝ်ႈ၊ ဝႃႈၼင်ႇၼႆဢေႃႈ။ မႄႈယိင်းဢွၼ်တၢင်းၼၼ်ႉၵေႃႈလၢတ်ႈလႄႈဝႃႈ၊ ဢမ်ႇၸႂ်ႈၸိူဝ်ႉၼင်ႇၼၼ်။ လုၵ်ႈဢွၼ်ႇဢၼ်တၢႆၼၼ်ႉပဵၼ်လုၵ်ႈၸၢႆးမႂ်းဢိူဝ်ႈ။ လုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉပဵၼ်လုၵ်ႈၸၢႆးၵဝ်ဢိူဝ်ႈ၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈသွင်ၶႃလဝ်ႊလၢတ်ႈၵႃႈတီႈၽၢႆႇၼႃႈၶုၼ်ႁေႃၶမ်းသေယဝ်ႉ၊-

23ၶုၼ်ႁေႃၶမ်းမီးဢမိင်ႉလႄႈဝႃႈ၊ မႄႈယိင်းၵေႃႉၼိုင်ႈဝႃႈ၊ လုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉ ပဵၼ်လုၵ်ႈၸၢႆးၵဝ်ဢိူဝ်ႈ။ လုၵ်ႈဢွၼ်ႇဢၼ်တၢႆၼၼ်ႉပဵၼ်လုၵ်ႈၸၢႆးမႂ်းဢိူဝ်ႈ၊ ဝႃႈၼင်ႇၼႆလႄႈ ၵေႃႉၼိုင်ႈဝႃႈ၊ ဢမ်ႇၸႂ်ႈၸိူဝ်ႉၼင်ႇၼၼ်။ လုၵ်ႈၸၢႆးမႂ်းတၢႆယဝ်ႉ။ လုၵ်ႈၸၢႆးၵဝ် ဢသၢၵ်ႈလိပ်းယူႇဢိူဝ်ႈ၊ ဝႃႈၼင်ႇၼႆဢေႃႈ၊ ဝႃႈၼင်ႇၼႆသေယဝ်ႉ၊-

24ၶုၼ်ႁေႃၶမ်းသမ်ႉ မီးဢမိင်ႉလႄႈဝႃႈ၊ ဢဝ်လၢပ်ႇမႃးတီႈၵဝ်တႃႉ၊ ဝႃႈၼင်ႇၼႆလႄႈ၊ ၶဝ်ဢဝ်လၢပ်ႇမႃးၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-

25ၶုၼ်ႁေႃၶမ်းၵေႃႈ မီးဢမိင်ႉလႄႈဝႃႈ၊ ၽႃႇလုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉသေလႄႈ ပၼ်တီႈမႄႈယိင်းသွင်ၵေႃႉၼႆႉ ယေႈၵေႃႉယေႈၶိုင်ႈတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

26မႄႈလုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉ ဢဵတ်းလူလုၵ်ႈဢွၼ်ႇမၼ်းၼႃႇလူင်လၢင်လႄႈ တွင်းပၢၼ်ႇလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၸဝ်ႈတီႈၶႃႈ၊ ဢဝ်လုၵ်ႈဢွၼ်ႇဢၼ်ဢသၢၵ်ႈလိပ်းၼႆႉပၼ်တီႈမႄႈယိင်းၼႆႉသေၵမ်းတီႈၶႃႈ။ ယႃႇပေဢဝ်မၼ်းတၢႆသေၵမ်းတီႈၶႃႈ၊ ဝႃႈၼင်ႇၼႆဢေႃႈ။ မႄႈယိင်းတၢင်ႇၵေႃႉၼၼ်ႉလၢတ်ႈလႄႈဝႃႈ၊ ယႃႇပေႁႂ်ႈမၼ်းပဵၼ်ပုၼ်ႈၵဝ်ၵူၺ်းၵူၺ်း။ ယႃႇပေႁႂ်ႈမၼ်းပဵၼ်ပုၼ်ႈမႂ်းၵူၺ်းၵူၺ်း။ ႁႂ်ႈၽႃႇတႃႉ၊ ဝႃႈၼင်ႇၼႆဢေႃႈ။-

27မိူဝ်ႈၼၼ်ႉ ၶုၼ်ႁေႃၶမ်းမီးဢမိင်ႉလႄႈဝႃႈ၊ ဢဝ်လုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉ ပၼ်တီႈမႄႈယိင်းဢၼ်ဢွၼ်တၢင်းၼၼ်ႉတႃႉ။ ယႃႇပေဢဝ်မၼ်းတၢႆ၊ မၼ်းၼၼ်ႉၸႂ်ႈမႄႈမၼ်းယဝ်ႉ၊ ဝႃႈၼင်ႇၼႆဢေႃႈ။-

28ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်လႆႈႁူႉလႆႈငိၼ်းလွင်ႈတၢင်းဢၼ် ၶုၼ်ႁေႃၶမ်းၸီႇယၢင်ႇၸိူဝ်ႉၼင်ႇၼၼ်သေယဝ်ႉ၊ ရူဝ်ႇသေႇၵူဝ်ယမ်ၶုၼ်ႁေႃၶမ်းၵွပ်ႈပိူဝ်ႈဢၼ် ၶဝ်ႁူႉႁၼ်လွင်ႈဢၼ်ၶုၼ်ႁေႃၶမ်းပျေႉၸုမ်ႇဝႆႉတင်းၺၢၼ်ႇ ဢၼ်ၽြႃးပဵၼ်ၸဝ်ႈပၼ်ႁႂ်ႈလႆႈၸီႇယၢင်ႇတြႃးၼၼ်ႉဢေႃႈ။

← Chapter 2 Jump to: Chapter 4 →