1 Kings 7 — Shan

1လႆႈသမ်ႉ သေႃးလမုၼ်ႇ တႄႇႁဵတ်းႁေႃၸဝ်ႈသိပ်းပၢႆသၢမ်ပီႊတဵမ်တဵမ်လႄႈ ႁေႃၸဝ်ႈယဝ်ႉတူဝ်ႈတင်းႁေႃဢေႃႈ။-

2မၼ်းတႄႇႁဵတ်းႁေႃၸဝ်ႈထိူၼ်ႇ လေႇပၼုၼ်ႇ လႄႈ ၼႃႈယၢဝ်းမၼ်းမီးပၢၵ်ႇသွၵ်ႇ၊ ၼႃႈပွတ်းမၼ်းႁႃႈသိပ်းသွၵ်ႇ၊ ဢၼ်သုင်မၼ်းသၢမ်သိပ်းသွၵ်ႇ ပဵၼ်သဝ်မႆႉ ဢႃႇရိတ်ႉ သီႇထႅဝ် ဢိၵ်ႇတင်းႁုၼ်ႈမႆႉ ဢႃႇရိတ်ႉ ၵႃႈၼိူဝ်သဝ်ၸိူဝ်းၼၼ်ႉဢေႃႈ။-

3မၼ်းဢဝ်ၽႅၼ်ႇပႅၼ်ႈမႆႉ ဢႃႇရိတ်ႉ မုင်းၵႃႈၼိူဝ်ႁၢၼ်ႉလုၵ်းတင်းလၢႆဢၼ်မီးၵႃႈၼိူဝ်သဝ် ဢၼ်ယေႈထႅဝ်မီးသိပ်းႁႃႈသဝ်ၼင်ႇၵၼ်လႄႈ ပွင်းၵၼ်မီးသီႇသိပ်းပၢႆႁႃႈသဝ်ၸိူဝ်းၼၼ်ႉဢေႃႈ။-

4ႁူးလၢင်းတဵၼ်သၢမ်ထႅဝ်ၼင်ႇၵၼ်တေႃႇၵၼ်သိုဝ်ႈၵၼ် ပဵၼ်ႁၢၼ်ႉပဵၼ်ႁၢၼ်ႉယူႇသေလႄႈမီးဝႆႉဢေႃႈ။

5ႁူးၽၵ်းတူဢိၵ်ႇတင်းသဝ်ၽၵ်းတူ ၵႃႈမီးၼၼ်ႉပဵၼ်သီႇၸဵင်ႇၶိုင်ႈဝႆႉလႄႈ ႁူးလၢင်းတဵၼ်တင်းလၢႆတေႃႇၵၼ်သိုဝ်ႈၵၼ် ပဵၼ်ႁၢၼ်ႉပဵၼ်ႁၢၼ်ႉယူႇသေလႄႈ မီးသၢမ်ထႅဝ်ဢေႃႈ။-

6မၼ်းႁဵတ်းလၢင်းၼႃႈႁေႃ ဢၼ်ပျေႉၸုမ်ႇဝႆႉတင်းသဝ်တင်းလၢႆလႄႈ ၼႃႈယၢဝ်းမၼ်းမီးႁႃႈသိပ်းသွၵ်ႇ၊ ၼႃႈပွတ်းမၼ်းသၢမ်သိပ်းသွၵ်ႇဢေႃႈ။ ၵႃႈတီႈၽၢႆႇၼႃႈလၢင်းၼႃႈႁိူၼ်းၸဝ်ႈၼၼ်ႉ မီးလၢင်းဢၼ်ပဵၼ်တုပ်ႈ ဢၼ်ပျေႉၸုမ်ႇတင်းသဝ်တင်းလၢႆ ဢိၵ်ႇတင်းၶူင်ႇၽၵ်းတူဝႆႉဢေႃႈ။-

7မၼ်းႁဵတ်းလၢင်းဢၼ်ပဵၼ်တုပ်ႈတီႈဢၼ်ဝႆႉ ရႃႇၸႃႉပလၢင်ႇတြႃးဢၼ်ဝႃႈ လၢင်းဢၼ်ပဵၼ်တုပ်ႈတီႈဢၼ်ၸီႇယၢင်ႇတြႃးလႄႈ ဢဝ်ၽႅၼ်ႇပႅၼ်ႈမႆႉ ဢႃႇရိတ်ႉ ႁဵတ်းဢၼ်သိူဝ်ႇမၼ်းၸႃႉၸဵမ်ၽၢႆႇၼိုင်ႈ တေႃႇထိုင်ႁွတ်ႈၽၢႆႇၼိုင်ႈဢေႃႈ။-

8ႁေႃၸဝ်ႈတီႈဢၼ်မၼ်းယူႇ ၵႃႈၼႂ်းတမ်ႇတိူင်းတၢင်းဢၼ် ဢၼ်မီးၵႃႈတီႈၼႂ်းလၢင်း ဢၼ်ပဵၼ်တုပ်ႈၼၼ်ႉၵေႃႈႁဵတ်းမိူၼ်မိူၼ်ၵၼ်ဢေႃႈ။ ႁေႃၸဝ်ႈလုၵ်ႈယိင်းၶုၼ်ႁေႃၶမ်း ၽႃႇရေႃး ဢၼ် သေႃးလမုၼ်ႇ ႁူမ်ႈပွင်းၼၼ်ႉၵေႃႈ မၼ်းႁဵတ်းႁႂ်ႈမိူၼ်ၸိူဝ်ႉၼင်ႇလၢင်း ဢၼ်ပဵၼ်တုပ်ႈၼၼ်ႉဢေႃႈ။-

9ၵႃႈမီးၼႆႉယဝ်ႉတူဝ်ႈလူၺ်ႈမၢၵ်ႇႁိၼ်ဢၼ်ထိူၵ်ႈၵႃႈထိူၵ်ႈၶၼ် ဢၼ်ဝႃႈမၢၵ်ႇႁိၼ်ဢၼ်ထၢၵ်ႇဢၼ်သပ်းၸွမ်းလူၺ်ႈပမႃႇၼႃႉမၼ်း ဢၼ်ဢဝ်လဵၵ်းလိူဝ်ႈလိူဝ်ႈႁဵတ်းၸိူဝ်းၼၼ်ႉ ၵႃႈတီႈၽၢႆႇၼွၵ်ႈၽၢႆႇၼႂ်း ဢဝ်ၵႃႈတီႈငဝ်ႈႁၢၵ်ႈမၼ်း တေႃႇထိုင်ႁွတ်ႈပၢႆၸိၵ်းမၼ်း ဢိၵ်ႇတင်းဢဝ်ၵႃႈတီႈၽၢႆႇၼွၵ်ႈမၼ်း တေႃႇထိုင်ႁွတ်ႈတမ်ႇတိူင်းလူင်ဢေႃႈ။-

10ငဝ်ႈႁၢၵ်ႈမၼ်းၵေႃႈ ယဝ်ႉတူဝ်ႈလူၺ်ႈမၢၵ်ႇႁိၼ် ဢၼ်ထိူၵ်ႈၵႃႈထိူၵ်ႈၶၼ်ဢၼ်ဝႃႈ မၢၵ်ႇႁိၼ်လူင်ဢၼ်ၼႃႈယၢဝ်းမၼ်းမီးပႅတ်ႇသွၵ်ႇသိပ်းသွၵ်ႇၸိူဝ်းၼၼ်ႉဢေႃႈ။-

11ၵႃႈၼိူဝ်ၼၼ်ႉၵေႃႈ မီးမၢၵ်ႇႁိၼ်ဢၼ်ထိူၵ်ႈၵႃႈထိူၵ်ႈၶၼ်ဢၼ်ဝႃႈ မၢၵ်ႇႁိၼ်ဢၼ်ထၢၵ်ႇဢၼ်သပ်း ၸွမ်းလူၺ်ႈပမႃႇၼႃႉမၼ်း ဢိၵ်ႇတင်းမႆႉ ဢႃႇရိတ်ႉ ဢေႃႈ။-

12တမ်ႇတိူင်းလူင်ၼၼ်ႉယဝ်ႉတူဝ်ႈလူၺ်ႈမၢၵ်ႇႁိၼ်ဢၼ်ထၢၵ်ႇဢၼ်သပ်းသၢမ်ထႅဝ် တင်းမႆႉ ဢႃႇရိတ်ႉ လူင်ထႅဝ်ၼိုင်ႈဢေႃႈ။ တမ်ႇတိူင်းဢၼ်ၵႃႈၼႂ်းႁိူၼ်းထႃႇဝရႃႉၽြႃး ဢိၵ်ႇတင်းတမ်ႇတိူင်းလၢင်း ဢၼ်ပဵၼ်တုပ်ႈႁေႃၸဝ်ႈၸိူဝ်းၼၼ်ႉ ယဝ်ႉတူဝ်ႈၸိူဝ်ႉၼင်ႇၼၼ်ဢေႃႈ။

13ၶုၼ်လူင် သေႃးလမုၼ်ႇ ၵေႃႈ ပွႆႇၸႂ်ႉလႄႈ ႁွင်ႉဢဝ် ႁီႉရမ်ႇ သေၵႃႈတီႈဝဵင်း တူႉရူႉ မႃးဢေႃႈ။-

14မၼ်းၼၼ်ႉၸမ်ႉ၊ ပဵၼ်လုၵ်ႈၸၢႆးမႄႈမူၵ်းမႄႈမၢႆႈ မဵဝ်း ၼပ်ႉထလီႉ လႄႈ ပေႃႈမၼ်းၸမ်ႉ၊ ပဵၼ်ၵူၼ်းမဵဝ်း တူႉရူႉ လႄႈ ၸၢင်ႈႁဵတ်းတွင်းလိူင်ဢေႃႈ၊ မၼ်းၼၼ်ႉပျေႉၸုမ်ႇတင်းၺၢၼ်ႇပိင်ႇၺႃႇတၢင်းၵတ်ႉတၢင်းၶၼ် ဢၼ်မေႃႁဵတ်းတၢင်းႁဵတ်းတွင်းလိူင်ၵူႈၸိူဝ်ႉၵူႈပိူင်လႄႈ မႃးၸူးၵႃႈတီႈၶုၼ်လူင် သေႃးလမုၼ်ႇ သေလႄႈ ႁႂ်ႈတၢင်းႁဵတ်းမၼ်းၵႃႈမီးယဝ်ႉတူဝ်ႈဢေႃႈ။-

15မၼ်းၼၼ်ႉလေႃႇသွၼ်းႁဵတ်းသဝ်တွင်းလိူင်သွင်လႅမ်ႈ ဢၼ်တၢင်းသုင်မၼ်းမီးသိပ်းပၢႆပႅတ်ႇသွၵ်ႇ၊ ဝႅင်းမူၼ်းလဵပ်ႈႁွပ်ႈမၼ်းသိပ်းပၢႆသွင်သွၵ်ႇၼၼ်ႉဢေႃႈ။-

16မၼ်းလေႃႇသွၼ်းႁဵတ်းႁူဝ်သဝ်တွင်းလိူင်သွင်ဢၼ် ပုၼ်ႈဢၼ်တၵ်းတၢင်ႇသႂ်ႇၵႃႈၼိူဝ်သဝ်ၸိူဝ်းၼၼ်ႉဢေႃႈ။ ဢၼ်သုင်ႁူဝ်သဝ်ဢၼ်ၼိုင်ႈမီးႁႃႈသွၵ်ႇ၊ ဢၼ်သုင်ႁူဝ်သဝ်တၢင်ႇဢၼ်မီးႁႃႈသွၵ်ႇဢေႃႈ။-

17မီးတႃၶႄတွင်းလိူင် ဢိၵ်ႇတင်းၸိူၵ်ႈတွင်းလိူင် ပုၼ်ႈႁူဝ်သဝ်ဢၼ်မီးၵႃႈၼိူဝ်သဝ်ၸိူဝ်းၼၼ်ႉ ဢၼ်ဝႃႈ တႃၶႄၸဵတ်းဢၼ်ပုၼ်ႈႁူဝ်သဝ်ဢၼ်ၼိုင်ႈ၊ တႃၶႄၸဵတ်းဢၼ်ပုၼ်ႈႁူဝ်သဝ်တၢင်ႇဢၼ်ဢေႃႈ။-

18ၼင်ႇၼၼ်လႄႈ မၼ်းႁဵတ်းသဝ်ၸိူဝ်းၼၼ်ႉဢေႃႈ၊ မီးမၢၵ်ႇၸင်ႈသွင်ထႅဝ် ဢၼ်ႁၢင်ႈၶိူင်ႈသႂ်ႇၵႃႈၼိူဝ်တႃၶႄ ဢၼ်ႁူမ်ႇသုမ်ႇႁူဝ်သဝ်ဢၼ်မီးၵႃႈၼိူဝ်ၼၼ်ႉဢေႃႈ။ မိူၼ်ၸိူဝ်ႉၼင်ႇၼၼ် မၼ်းႁဵတ်းတီႈႁူဝ်သဝ်တၢင်ႇလႅမ်ႈၼၼ်ႉဢေႃႈ။-

19ႁူဝ်သဝ်ဢၼ်မီးၵႃႈၼိူဝ်ပၢႆသဝ် ဢၼ်မီးဝႆႉၵႃႈၼႂ်းလၢင်းဢၼ်ပဵၼ်တုပ်ႈၼၼ်ႉပဵၼ်ပုင်ႇႁၢင်ႈမွၵ်ႇမူဝ်ဝႆႉလႄႈ ဢၼ်ယၢဝ်းမၼ်းမီးသီႇသွၵ်ႇဢေႃႈ။-

20ႁူဝ်သဝ်သွင်ဢၼ်ၼၼ်ႉတႄႇယူႇၵႃႈၼိူဝ်မၢၼ်းပီ၊ ဢၼ်ၸၢပ်ႈၸမ်ၵၼ်တင်းတႃၶႄၼၼ်ႉယူႇသေလႄႈ ၵႃႈတီႈႁူဝ်သဝ်ယေႈဢၼ်ၼၼ်ႉ မီးမၢၵ်ႇၸင်ႈသွင်ထႅဝ်ၼင်ႇၵၼ်လႄႈ မီးသွင်ပၢၵ်ႇႁူၺ်ႇၼင်ႇၵၼ်ဢေႃႈ။-

21မၼ်းဢဝ်သဝ်ၸိူဝ်းၼၼ်ႉပၵ်းဝႆႉ ၵႃႈၼႂ်းလၢင်းဢၼ်ပဵၼ်တုပ်ႈပိၵ်ႈမၢၼ်ႇၸဝ်ႈလႄႈ ႁွင်ႉႁဵၵ်ႈၸိုဝ်ႈသဝ်ၽၢႆႇၶႂႃဢၼ်ပၵ်းဝႆႉၼၼ်ႉ ယႃႇၶိၼ်ႇ လႄႈႁွင်ႉႁဵၵ်ႈၸိုဝ်ႈသဝ်ၽၢႆႇသၢႆႉဢၼ်ပၵ်းဝႆႉၼၼ်ႉ ပေႃးၸႃႉ ဢေႃႈ။-

22ၵႃႈၼိူဝ်ႁူဝ်သဝ်ၸိူဝ်းၼၼ်ႉ ပဵၼ်လၢႆးမွၵ်ႇမူဝ်ဝႆႉလႄႈ တၢင်းဢၼ်ႁဵတ်းသဝ်ၸိူဝ်းၼၼ်ႉၼၼ်ႉယဝ်ႉတူဝ်ႈဢေႃႈ။

23မၼ်းႁဵတ်းၼမ်ႉၼွင်တွင်းလိူင် ဢၼ်ဢဝ်ၵႃႈတီႈၶွပ်ႇၽၢႆႇၼိုင်ႈတေႃႇထိုင်ႁွတ်ႈၶွပ်ႇၽၢႆႇၼိုင်ႈ မီးသိပ်းသွၵ်ႇ၊ ဢၼ်လိုၵ်ႉမၼ်းမီးႁႃႈသွၵ်ႇ၊ ဢၼ်ဝႅင်းမူၼ်းမၼ်းမီးသၢမ်သိပ်းသွၵ်ႇၼၼ်ႉဢေႃႈ။-

24ၵႃႈတီႈလဵပ်ႈႁွပ်ႈတႂ်ႈၶွပ်ႇၼမ်ႉၼွင်ၼၼ်ႉမီး မၢၵ်ႇၼမ်ႉတဝ်ႈဢၼ်လဵပ်ႈႁွပ်ႈမၼ်းလႄႈ ယေႈသွၵ်ႇယေႈသွၵ်ႇ တဵမ်ယေႈသိပ်းလုၵ်ႈ ယေႈသိပ်းလုၵ်ႈ ၸွမ်းလူၺ်ႈတၢင်းဢၼ်လဵပ်ႈႁွပ်ႈၼမ်ႉၼွင်ၼၼ်ႉသေလႄႈ ပဵၼ်ထႅဝ်မၢၵ်ႇၼမ်ႉတဝ်ႈသွင်ထႅဝ်ဝႆႉလႄႈ လေႃႇႁဵတ်းပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။-

25ၼမ်ႉၼွင်ၼၼ်ႉတၢင်ႇဝႆႉယူႇၵႃႈၼိူဝ်ဝူဝ်းသိပ်းပၢႆသွင်တူဝ် ဢၼ်သၢမ်တူဝ်ဝၢႆႇၼႃႈဢွၵ်ႇၸူးၽၢႆႇဝၼ်းဢွၵ်ႇ၊ သၢမ်တူဝ်ဝၢႆႇၼႃႈဢွၵ်ႇၸူးၽၢႆႇဝၼ်းတူၵ်း၊ သၢမ်တူဝ်ဝၢႆႇၼႃႈဢွၵ်ႇၸူးၽၢႆႇတၢင်းၸၢၼ်း၊ သၢမ်တူဝ်ဝၢႆႇၼႃႈဢွၵ်ႇၸူးၽၢႆႇတၢင်းႁွင်ႇ၊ ၸိူဝ်းၼၼ်ႉလႄႈ ၼမ်ႉၼွင်ၼၼ်ႉလႆႈတၢင်ႇဝႆႉ မီးယူႇၵႃႈၼိူဝ်ဝူဝ်းၸိူဝ်းၼၼ်ႉလႄႈ ဝူဝ်းၸိူဝ်းၼၼ်ႉဝၢႆႇၵူၼ်ႈၶဝ်ၶဝ်ႈတၢင်းၼႂ်းယူႇဢေႃႈ။-

26ၼမ်ႉၼွင်ၼၼ်ႉ တၢင်းဢၼ်ၼႃမၼ်း မီးၽႃႇမိုဝ်းၼိုင်ႈလႄႈ ၶွပ်ႇမၼ်းၼၼ်ႉ ပျေႉၸုမ်ႇဝႆႉတင်းလၢႆးမွၵ်ႇမူဝ်မိူၼ်ၸိူဝ်ႉၼင်ႇၶွပ်ႇၵွၵ်းၼၼ်ႉဢေႃႈ၊ ၶဝ်ႈ ပၢတ်ႈ ၼမ်ႉသွင်ႁဵင် ပၢတ်ႈ ဢေႃႈ။

27လႆႈသမ်ႉ မၼ်းႁဵတ်းၶူင်ႇတွင်းလိူင်သိပ်းၼိုင်ႈ ဢၼ်ပမႃႇၼႃႉၼႃႈယၢဝ်းမၼ်းမီးသီႇသွၵ်ႇ၊ ၼႃႈပွတ်းမၼ်းသီႇသွၵ်ႇ၊ ဢၼ်သုင်မၼ်းသၢမ်သွၵ်ႇၸိူဝ်းၼၼ်ႉဢေႃႈ။-

28ႁၢင်ႈၽၢင်ၶူင်ႇၸိူဝ်းၼၼ်ႉၸမ်ႉ၊ မီးၵမ်းပၢတ်ႈဢိၵ်ႇတင်းၶႅပ်းၽႃ ၶိုင်ႈၵၢင်ၵမ်းပၢတ်ႈၼၼ်ႉဢေႃႈ။-

29ၵႃႈတီႈၶႅပ်းၽႃၶိုင်ႈၵၢင်ၵမ်းပၢတ်ႈၸိူဝ်းၼၼ်ႉ မီးလၢႆးႁၢင်ႈသၢင်ႇသီႈ၊ ဝူဝ်း၊ ၶေႇရူႉၽဵမ်ႇ တင်းလၢႆလႄႈ ၵႃႈၼိူဝ်ၵမ်းပၢတ်ႈၼၼ်ႉၵေႃႈ မီးၶူင်ႇဢၼ်ၼိုင်ႈဢေႃႈ၊ ၵႃႈတီႈတႂ်ႈသၢင်ႇသီႈ တင်းဝူဝ်းၸိူဝ်းၼၼ်ႉၵေႃႈ မီးသွႆႈမွၵ်ႇႁွႆႈယူႇဢေႃႈ။-

30ၵႃႈတီႈၶူင်ႇယေႈဢၼ်မီးမၢၵ်ႇလေႃႉတွင်းလိူင်သီႇလုၵ်ႈၼင်ႇၵၼ် ဢိၵ်ႇလူၺ်ႈၵၼ်တင်းဝၢင်ႇရူဝ်း မၼ်းဢေႃႈ။ ၵႃႈတီႈတိၼ်မၼ်းသီႇဢၼ် မီးႁူဝ်မႃႇလႄႈၵႃႈတႂ်ႈမေႃႈဢႅင်ႇၼၼ်ႉမီးႁူဝ်မႃႇ ဢၼ်လေႃႇသွၼ်းႁဵတ်းလႄႈ ၽၢႆႇၼွၵ်ႈႁူဝ်မႃႇယေႈဢၼ်ၼၼ်ႉမီးသွႆႈမွၵ်ႇဢေႃႈ။-

31ပၢၵ်ႇႁူးၵႃႈတႂ်ႈမေႃႈဢႅင်ႇၼၼ်ႉ မီးၵႃႈၼိူဝ်ၶိုင်ႈၵၢင်ၸိၵ်းၽႃဢၼ်ႁူမ်ႇၼၼ်ႉလႄႈ ယၢၼ်သွၵ်ႇၼိုင်ႈဢေႃႈ။ ပၢၵ်ႇၽႃဢၼ်ႁူမ်ႇၼၼ်ႉ မူၼ်းဝႆႉမိူၼ်ၸိူဝ်ႉၼင်ႇတိၼ်သဝ်လႄႈ ဢၼ်ၵႂၢင်ႈမၼ်းမီးသွၵ်ႇပၢႆၶိုပ်ႈဢေႃႈ၊ ၵႃႈတီႈၸွမ်းႁိမ်းပၢၵ်ႇၼၼ်ႉၵေႃႈ မီးလၢႆးမွၵ်ႇလၢႆးမႂ်လႄႈ ၶႅပ်းၽႃၶိုင်ႈၵၢင်မၼ်းၸိူဝ်းၼၼ်ႉ ယင်းဢမ်ႇမူၼ်းလႄႈ ပဵၼ်သီႇၸဵင်ႇၶိုင်ႈဝႆႉဢေႃႈ။-

32မၢၵ်ႇလေႃႉသီႇလုၵ်ႈ တူၵ်းတီႈယူႇၵႃႈတႂ်ႈၶႅပ်းၽႃၶိုင်ႈၵၢင်ၵမ်းပၢတ်ႈၸိူဝ်းၼၼ်ႉယူႇ၊ ဝၢင်ႇရူဝ်းမၢၵ်ႇလေႃႉၸိူဝ်းၼၼ်ႉ ၸပ်းၵၼ်တင်းၶူင်ႇယူႇသေလႄႈ ဢၼ်သုင်မၢၵ်ႇလေႃႉမီးသွၵ်ႇပၢႆၶိုပ်ႈဢေႃႈ။-

33ပုင်ႇႁၢင်ႈမၢၵ်ႇလေႃႉၸမ်ႉ၊ မိူၼ်ၸိူဝ်ႉၼင်ႇမၢၵ်ႇလေႃႉရထႃးၼၼ်ႉဢေႃႈ။ ဝၢင်ႇရူဝ်း၊ ပၼ်ႇတွင်း၊ သိၵ်ႈမၢၵ်ႇလေႃႉ၊ ၶွပ်ႇမၢၵ်ႇလေႃႉ ၸိူဝ်းၼၼ်ႉၵေႃႈ ပဵၼ်ဢၼ်လေႃႇသွၼ်းႁဵတ်းဢေႃႈ။-

34ၵႃႈတီႈသီႇၸဵင်ႇ ၶူင်ႇယေႈဢၼ်ၼၼ်ႉ မီးႁူဝ်မႃႇသီႇဢၼ် ဢၼ်လေႃႇသွၼ်းႁဵတ်းပဵၼ်ၼိူဝ်ႉလဵဝ်ၵၼ်တင်းၶူင်ႇၼၼ်ႉဢေႃႈ။-

35ၵႃႈၼိူဝ်ႁူဝ်ၶူင်ႇၼၼ်ႉ မီးၽႃႁူမ်ႇဢၼ်သူတ်ႇၵွင်ႇၶိုၼ်ႈလႄႈ ဢၼ်သုင်မၼ်းမီးၶိုပ်ႈၼိုင်ႈဢေႃႈ။ ၵႃႈၼိူဝ်ႁူဝ်ၶူင်ႇၼၼ်ႉၵေႃႈ မီးမိုဝ်းပုၼ်ႈဢၼ်တၵ်းယိပ်းၵမ်လႂ် တင်းၶႅပ်းၽႃၶိုင်ႈၵၢင်ၵမ်းပၢတ်ႈမၼ်းလႂ်သေလႄႈ ပဵၼ်ၼိူဝ်ႉလဵဝ်ၵၼ်တင်းၶူင်ႇဢေႃႈ။-

36ၵႃႈၼိူဝ်ၼႃႈၽႅပ်ႉမိုဝ်းမၼ်းၸိူဝ်းၼၼ်ႉ တင်းၶႅပ်းၽႃၶိုင်ႈၵၢင်ၵမ်းပၢတ်ႈမၼ်းၸိူဝ်းၼၼ်ႉၵေႃႈ မၼ်းတွင်ႈႁဵတ်းႁၢင်ႈ ၶေႇရူႉၽဵမ်ႇ ၊ သၢင်ႇသီႈ၊ တူၼ်ႈထၢၼ်ၸွမ်းၵႃႈၼင်ႇဢၼ် ၶႅပ်းၽႅပ်ႉမၼ်းမီးႁင်းၽႂ်ႁင်းမၼ်းၼၼ်ႉ ဢိၵ်ႇတင်းသွႆႈမွၵ်ႇၵႃႈတီႈၸွမ်းႁိမ်းမၼ်းဢေႃႈ။-

37ၼင်ႇၼၼ်လႄႈမၼ်းလေႃႇသွၼ်းႁဵတ်းၶူင်ႇသိပ်းၼိုင်ႈလႄႈ ႁႂ်ႈပုင်ႇႁၢင်ႈၽၢင်တၢင်းဢၼ်လဵၵ်ႉယႂ်ႇတႅမ်ႇသုင် တင်းသဵင်ႈတင်းလူင် ပဵၼ်ပိူင်လဵဝ်ၵၼ်ဢေႃႈ။

38မေႃႈဢႅင်ႇတွင်းလိူင် ဢၼ် ပၢတ်ႈ ၼမ်ႉၶဝ်ႈလႆႈသီႇသိပ်း ပၢတ်ႈ လႄႈ ပၢၵ်ႇမၼ်းၵႂၢင်ႈသီႇသွၵ်ႇၼၼ်ႉၵေႃႈ မၼ်းႁဵတ်းသိပ်းလုၵ်ႈလႄႈ ၵႃႈၼိူဝ်ၶူင်ႇယေႈဢၼ်ၼၼ်ႉ ဢဝ်မေႃႈဢႅင်ႇတၢင်ႇဝႆႉယေႈဢၼ်ၼင်ႇၵၼ်ဢေႃႈ။-

39မၼ်းဢဝ်ၶူင်ႇၸိူဝ်းၼၼ်ႉဝႆႉ ၵႃႈတီႈၽၢႆႇၶႂႃႁိူၼ်းၸဝ်ႈႁႃႈဢၼ်၊ ၵႃႈတီႈၽၢႆႇသၢႆႉႁိူၼ်းၸဝ်ႈႁႃႈဢၼ်လႄႈ၊ ၼမ်ႉၼွင်ၸမ်ႉ၊ မၼ်းဢဝ်ၶျႃးတီႈယူႇဝႆႉ ၵႃႈတီႈၽၢႆႇၶႂႃႁိူၼ်းၸဝ်ႈ တၢင်းဝၼ်းဢွၵ်ႇၸဵင်ႇၸၢၼ်းဢေႃႈ။

40ႁီႉရမ်ႇ ၼၼ်ႉ ႁဵတ်းမေႃႈဢႅင်ႇလႂ်၊ ၸေႃႉလႂ်၊ ဝၢၼ်ႇလႂ်ၸိူဝ်းၼၼ်ႉဢေႃႈ။ ၼင်ႇၼၼ်လႄႈလွင်ႈတၢင်းဢၼ် ႁီႉရမ်ႇ ၵွႆႈႁဵတ်းၵႃႈဢၼ်ႁဵတ်းတီႈႁိူၼ်းထႃႇဝရႃႉၽြႃး ပုၼ်ႈၶုၼ်လူင် သေႃးလမုၼ်ႇ ၼၼ်ႉၸမ်ႉ၊-

41ပဵၼ်သဝ်သွင်လႅမ်ႈ၊ ၸိၵ်းႁူဝ်သဝ်သွင်ဢၼ် ဢၼ်မီးၵႃႈၼိူဝ်သဝ်ၸိူဝ်းၼၼ်ႉ၊ တႃၶႄဢၼ်တၵ်းႁူမ်ႇသုမ်ႇၸိၵ်းႁူဝ်သဝ်သွင်ဢၼ် ဢၼ်မီးၵႃႈၼိူဝ်သဝ်ၸိူဝ်းၼၼ်ႉ၊-

42မၢၵ်ႇၸင်ႈသီႇပၢၵ်ႇ ပုၼ်ႈတႃၶႄသွင်ဢၼ် ဢၼ်ဝႃႈမၢၵ်ႇၸင်ႈသွင်ထႅဝ် ပုၼ်ႈတႃၶႄယေႈဢၼ်ႁႂ်ႈလႆႈ ႁူမ်ႇသုမ်ႇၸိၵ်းႁူဝ်သဝ် ဢၼ်မီးၵႃႈၼိူဝ်သဝ်ၸိူဝ်းၼၼ်ႉ၊-

43ၶူင်ႇသိပ်းၼိုင်ႈ၊ မေႃႈဢႅင်ႇ ဢၼ်ဢဝ်တၢင်ႇဝႆႉၵႃႈၼိူဝ်ၶူင်ႇၸိူဝ်းၼၼ်ႉ၊-

44ၼမ်ႉၼွင်လုၵ်ႈၼိုင်ႈ ဢိၵ်ႇတင်းဝူဝ်းဢၼ်ၵမ်ႉထွၵ်ႈၼမ်ႉၼွင်ၼၼ်ႉ သိပ်းပၢႆသွင်တူဝ်၊-

45မေႃႈလႂ်၊ ၸေႃႉလႂ်၊ ဝၢၼ်ႇလႂ်တင်းလၢႆဢေႃႈ။ ၶိူင်ႈပိူင်ၵႃႈတီႈႁိူၼ်းထႃႇဝရႃႉၽြႃး ၵႃႈဢၼ် ႁီႉရမ်ႇ ႁဵတ်းပုၼ်ႈၶုၼ်လူင် သေႃးလမုၼ်ႇ ၸိူဝ်းၼၼ်ႉ ယဝ်ႉတူဝ်ႈလူၺ်ႈတွင်းလိူင်ဢၼ်လုၵ်ႉႁိူဝ်ႈယူႇမၢပ်ႈမၢပ်ႈမႅပ်ႈမႅပ်ႈဢေႃႈ။-

46ၶုၼ်ႁေႃၶမ်းလေႃႇသွၼ်းႁဵတ်းၸိူဝ်းၼၼ်ႉ ၵႃႈတီႈလိၼ်ၼဵဝ်ဢၼ်မီးၵႃႈၼႂ်းၵႄႈဝူင်ႈၵၢင်ဝဵင်း သူႉၵုတ်ႉ တင်းဝဵင်း ၸႃႇရတၼ်ႇ ၵႃႈတီႈပၢင်ႇႁူၺ်ႈ ယေႃးတၢၼ်ႇ ဢေႃႈ။-

47ၵွပ်ႈပိူဝ်ႈဢၼ်ၶိူင်ႈပိူင်ၸိူဝ်းၼၼ်ႉ ၼမ်ၼႃႇလႄႈ သေႃးလမုၼ်ႇ ယင်းဢမ်ႇၸင်ႈဢမ်ႇႁိဝ်ႈလႄႈလေႃႇႁဵတ်းဝႆႉဢေႃႈ။ ၽူႈလႂ်သေၵေႃႉသေၵူၼ်း ဢမ်ႇႁူႉတၢင်းဢၼ်ၸင်ႈဢၼ်ႁိဝ်ႈတွင်းလိူင်ၼၼ်ႉ။

48သေႃးလမုၼ်ႇ ႁဵတ်းၶိူင်ႈပိူင်ၵႃႈဢၼ်ၸၢပ်ႈသႅင်ႇၵၼ်တင်းႁိူၼ်းထႃႇဝရႃႉၽြႃး ဢၼ်ဝႃႈယိတ်ႈပလၢင်ႇၶမ်း၊ ၶူင်ႇတီႈၵိၼ်ၶမ်း တီႈဢၼ်တၢင်ႇၶဝ်ႈမုၼ်းၽၢႆႇၼႃႈၸဝ်ႈဝႆႉ၊-

49ၶူင်ႇတီႈတႆႈၽႆးၶမ်းလွတ်ႈငၢၼ်ႇၵႃႈတီႈၽၢႆႇၼႃႈထႃႇၼႃႉတီႈပျႃႇတိၵ်ႈၸဝ်ႈ ၽၢႆႇၶႂႃႁႃႈဢၼ်၊ ၵႃႈတီႈၽၢႆႇသၢႆႉႁႃႈဢၼ်၊ မွၵ်ႇၶမ်း၊ ဝၢၼ်ႇတႆႈၽႆးၶမ်း၊ ၵိမ်းၺၢပ်ႈၽႆးၶမ်း၊-

50မေႃႈမႅၼ်း၊ ၵိမ်းၵိပ်ႈၽႆး၊ ဝၢၼ်ႇ၊ ၸေႃႉ၊ လၢင်ႇပၢၼ်းဢၼ်ယဝ်ႉတူဝ်ႈလူၺ်ႈၶမ်းလွတ်ႈငၢၼ်ႇတင်းလၢႆ၊ ပတ်ႈတႃႇၶမ်းဢၼ်ႁွႆႈၽၵ်းတူ လုၵ်းဢၼ်ၵႃႈၼႂ်းဢၼ်ဝႃႈ ထႃႇၼႃႉတီႈမူတ်းၸၢင်ႇၼႃႇသေပိူၼ်ႈ ဢိၵ်ႇတင်းၽၵ်းတူႁိူၼ်းၸဝ်ႈဢၼ်ဝႃႈ ပိၵ်ႈမၢၼ်ႇၸဝ်ႈၸိူဝ်းၼၼ်ႉဝႆႉၸိူဝ်းၼၼ်ႉဢေႃႈ။-

51ၼင်ႇၼၼ်လႄႈ တၢင်းႁဵတ်းၵႃႈဢၼ်ၶုၼ်လူင် သေႃးလမုၼ်ႇ ၸီႇယၢင်ႇပွင်ႁဵတ်းၵူႈၸိူဝ်ႉၵူႈပိူင်ပုၼ်ႈႁိူၼ်းထႃႇဝရႃႉၽြႃးၼၼ်ႉယဝ်ႉတူဝ်ႈသေယဝ်ႉ၊ သေႃးလမုၼ်ႇ ပႃးဢဝ်ၶိူင်ႈပိူင်ဢၼ်ၸဝ်ႈပေႃႈမၼ်း တႃႇဝိတ်ႈ လူႇတၢၼ်း ဢၼ်ဝႃႈငိုၼ်း၊ ၶမ်း၊ ၶိူင်ႈပိူင်ၸိူဝ်းၼၼ်ႉ မႃးလႄႈသႂၢင်းသႂ်ႇဝႆႉၵႃႈၼႂ်းတိူၵ်ႈၽၼ်ႇတႃႇႁိူၼ်းထႃႇဝရႃႉၽြႃးၼၼ်ႉဢေႃႈ။