1 Kings 9

Shan

← Chapter 8 Jump to: Chapter 10 →

1မိူဝ်ႈဢၼ် သေႃးလမုၼ်ႇ ႁဵတ်းႁိူၼ်းထႃႇဝရႃႉၽြႃးဢိၵ်ႇတင်းႁေႃၸဝ်ႈယဝ်ႉတူဝ်ႈလႄႈ၊ ဢလူဝ်ႇသၼ်ႇတႃႉ သေႃးလမုၼ်ႇ ၵႃႈမီး ပျေႉၸုမ်ႇယဝ်ႉၼၼ်ႉၸိုင်၊-

2ထႃႇဝရႃႉၽြႃးသမ်ႉၶိုၼ်းပေႃႇမႃးတီႈ သေႃးလမုၼ်ႇ ၵမ်းတူႉတီႉယႃႉ မိူၼ်ၸိူဝ်ႉၼင်ႇဢၼ်မၼ်းၸဝ်ႈပေႃႇမႃးတီႈမၼ်းၵႃႈတီႈဝဵင်း ၵီႉပွင်ႇ ၼၼ်ႉလႄႈ၊-

3ထႃႇဝရႃႉၽြႃးမီးဢမိင်ႉလႄႈဝႃႈ၊ ၵဝ်ငိၼ်းၵႂၢမ်းဢၼ်မႂ်းသူးတွင်းလဝ်ႊယွၼ်းၵႃႈတီႈၽၢႆႇၼႃႈၵဝ်ၼၼ်ႉယဝ်ႉ။ ၵဝ်ႁႂ်ႈႁိူၼ်းဢၼ်မႂ်းတႄႇႁဵတ်းၼႆႉမူတ်းၸၢင်ႇလႄႈ ႁႂ်ႈၼႃႇမႃႉၸိုဝ်ႈသဵင်ၵဝ်တႄႇယူႇၵႃႈတီႈၼၼ်ႈတႃႇသေႇယဝ်ႉ။ တႃၵဝ်ဢိၵ်ႇတင်းႁူဝ်ၸႂ်ၵဝ်တၵ်းမီးယူႇၵႃႈတီႈၼၼ်ႈသေႇသေႇဢေႃႈ။-

4ပေႃးမႂ်းမီးတၢင်းဢၼ်ႁူဝ်ၸႂ်သိုဝ်ႈတေႃႇ၊ တၢင်းဢၼ်ႁူဝ်ၸႂ်ၸေးၸုမ်ႇသေလႄႈ ၵႂႃႇမႃးၵႃႈတီႈၽၢႆႇၼႃႈၵဝ် မိူၼ်ၸိူဝ်ႉၼင်ႇဢၼ်ပေႃႈမႂ်း တႃႇဝိတ်ႈ ၵႂႃႇမႃးၼၼ်ႉ ႁႂ်ႈလႆႈႁဵတ်းၸွမ်းၵႃႈဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉလႄႈ ပႂ်ႉၵမ်ပႂ်ႉၵျၢင်ႉထုင်းၽိင်ႈတြႃးၵဝ်၊ လွင်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉယူႇၸိုင်၊-

5ၵဝ်တၵ်းႁႂ်ႈရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းမႂ်း မိူင်း ဢီႉသရေႇလႃႉ တႄႇယူႇတႃႇသေႇဢမ်ႇထၢတ်ႇၸွမ်းၵႃႈၼင်ႇဢၼ် ၵဝ်မီးၵတီႉဝႆႉတီႈပေႃႈမႂ်း တႃႇဝိတ်ႈ ၼၼ်ႉလႄႈဝႃႈ၊ ၸိူဝ်ႉၶိူဝ်းမႂ်းတၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇမိူင်း ဢီႉသရေႇလႃႉ ဢမ်ႇလႆႈထၢတ်ႇ၊ ဝႃႈၼင်ႇၼႆၼၼ်ႉဢေႃႈ။-

6ပေႃးဢမ်ႇၼၼ် ပေႃးသူဢိၵ်ႇတင်းလုၵ်ႈသူလၢၼ်သူယင်းဢမ်ႇၸွမ်းလင်ၵဝ်လႄႈ ငႅၵ်းဢွၵ်ႇတၢင်းၵႂႃႇသေလႄႈ ဢမ်ႇပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ် ဢိၵ်ႇတင်းထုင်းၽိင်ႈတြႃးၵဝ် ဢၼ်ၵဝ်ဢဝ်ဝႆႉၵႃႈတီႈၽၢႆႇၼႃႈသူၼၼ်ႉလႄႈ ၵႂႃႇႁဵတ်းဝၢတ်ႈၵူဝ်းၵႂၢႆႇတီႈၽြႃးတၢင်ႇသူႇတၢင်ႇပႃးၸိုင်၊-

7ၵဝ်တၵ်းပႄႇၽဵဝ်ႈမဵဝ်း ဢီႉသရေႇလႃႉ ပႅတ်ႈသေၵႃႈၼႂ်းမိူင်းဢၼ်ၵဝ်ပၼ်တီႈၶဝ်ၼႆႉဢေႃႈ။ ႁိူၼ်းၸဝ်ႈဢၼ်ၵဝ်ႁႂ်ႈမူတ်းၸၢင်ႇပုၼ်ႈၼႃႇမႃႉၸိုဝ်ႈသဵင်ၵဝ်ၼႆႉၵေႃႈ ၵဝ်တၵ်းပႄႇပႅတ်ႈသေၵႃႈတီႈသိုဝ်ႈၼႃႈတႂ်ႈတႃၵဝ်လႄႈ မဵဝ်း ဢီႉသရေႇလႃႉ တၵ်းလႆႈပဵၼ်တီႈဢၼ်ႁဵတ်းဢပုမ်ႇတႅၵ်ႈ၊ တီႈဢၼ်သႄႉသွမ်းၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢေႃႈ။-

8ပိၵ်ႉသမ်ႉႁိူၼ်းၸဝ်ႈၼႆႉပဵၼ်ဢၼ်သုင်လီသေၵေႃႈ၊ ၶဝ်ၵႃႈဢၼ်ပႆတၢင်းၸွမ်းတၢင်းၼၼ်ႉတၵ်းဢၢမ်းလႄႈႁဵတ်းသဵင်ဢၼ် သႄႉသွမ်းသီႉသီႉသေႃႉသေႃႉယူႇသေလႄႈတွင်ႈထၢမ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃးႁဵတ်းၸိူဝ်ႉၼင်ႇၼႆတီႈမိူင်းၼႆႉ တင်းႁိူၼ်းၸဝ်ႈၼႆႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

9ပိူၼ်ႈတၵ်းဢွၼ်ၵၼ်ၶိုၼ်းလၢတ်ႈလႄႈဝႃႈ၊ ထႃႇဝရႃႉၽြႃး ႁႂ်ႈၵႃႈဢၼ်ႁုၵ်းဢၼ်ႁၢႆႉၼႆႉႁွတ်ႈထိုင်ၵႃႈၼိူဝ်ၶဝ်ၵွပ်ႈပိူဝ်ႈဢၼ် ၶဝ်ၸုၼ်ႉပႅတ်ႈထႃႇဝရႃႉၽြႃး ၽြႃးပဵၼ်ၸဝ်ႈၶဝ် ဢၼ်ၼုၵ်ႈဢဝ်ပူႇမွၼ်ႇၶဝ် ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉသေလႄႈ ပိုင်ႈဢိင်ၽြႃးတၢင်ႇသူႇတၢင်ႇပႃးယူႇသေလႄႈ ႁဵတ်းဝၢတ်ႈၵူဝ်းၵႂၢႆႇၼၼ်ႉယဝ်ႉ၊ ဝႃႈၼင်ႇၼႆၼၼ်ႉဢေႃႈ၊ ဝႃႈၼင်ႇၼႆဢေႃႈ။

10မိူဝ်ႈဢၼ်ထိုင်ႁွတ်ႈတီႈသုတ်းသၢဝ်းပီႊဢၼ် သေႃးလမုၼ်ႇ လႆႈတႄႇႁဵတ်းႁိူၼ်းၸဝ်ႈသွင်လင်ဢၼ်ဝႃႈ ႁိူၼ်းထႃႇဝရႃႉၽြႃး တင်းႁေႃၸဝ်ႈၼၼ်ႉၸိုင်၊-

11ပိူဝ်ႈဢၼ် ႁီႉရမ်ႇ ၶုၼ်လူင် တူႉရူႉ ၼၼ်ႉ ပၼ်မႆႉ ဢႃႇရိတ်ႉ ၊ မႆႉပႅၵ်ႇ ဢိၵ်ႇတင်းၶမ်း ၸွမ်းၵႃႈၼင်ႇဢၼ်ဢလူဝ်ႇမၼ်းမီးၼၼ်ႉဝႆႉယဝ်ႉလႄႈ ၶုၼ်လူင် သေႃးလမုၼ်ႇ ၼၼ်ႉ ဢဝ်ဝဵင်းၵႃႈတီႈမိူင်း ၵႃႇလီႉလႄး သၢဝ်းၼိုင်ႈ ပၼ်တီႈၶုၼ်လူင် ႁီႉရမ်ႇ ဢေႃႈ။-

12ႁီႉရမ်ႇ လုၵ်ႉသေၵႃႈတီႈဝဵင်း တူႉရူႉ မႃးလႄႈ လူတူၺ်းဝဵင်းဢၼ် သေႃးလမုၼ်ႇ ပၼ်တီႈမၼ်းၸိူဝ်းၼၼ်ႉသေယဝ်ႉ၊ ဢမ်ႇၶိုတ်းၸႂ်ပဵင်းၸႂ်လႄႈ၊-

13လၢတ်ႈဝႃႈ၊ ၸဝ်ႈၼွင်ႉၵဝ်ဢိူၺ်း၊ ဝဵင်းဢၼ်ၸဝ်ႈပၼ်တီႈၵဝ်ၸိူဝ်းၼႆႉ ပဵၼ်ဝဵင်းၸိူဝ်ႉၼင်ႇႁိုဝ်။ ဝႃႈၼင်ႇၼႆသေလႄႈ ႁွင်ႉႁဵၵ်ႈၸိုဝ်ႈၵႃႈတီႈၼၼ်ႈ ၵႃႇပူႉလႃႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

14ႁီႉရမ်ႇ ၼၼ်ႉပၼ်ၶမ်း ပၢၵ်ႇပၢႆသၢဝ်း တလၢၼ်ႇတၢၼ်ႇ တီႈၶုၼ်ႁေႃၶမ်းဢေႃႈ။

15လွင်ႈဢၼ်ၶုၼ်လူင် သေႃးလမုၼ်ႇ လႆႈၽႃႇၵဵပ်းဢဝ်ၵူၼ်းၼၼ်ႉၸမ်ႉ၊ ပဵၼ်ပုၼ်ႈဢၼ်တၵ်းလႆႈတႄႇႁဵတ်းႁိူၼ်းထႃႇဝရႃႉၽြႃး၊ ႁေႃၸဝ်ႈ၊ တီႈ မီႉလေႃႇ ၊ လမ်းဝဵင်း ယေႇရူႉသလႅမ်ႇ ၊ ဝဵင်း ႁႃႇၸေႃႇ ၊ ဝဵင်း မေႇၵိတ်ႉတေႃႇ ၊ ဝဵင်း ၵေႇၸႃႇ ၸိူဝ်းၼၼ်ႉဢေႃႈ။-

16ဝဵင်း ၵေႇၸႃႇ ၸမ်ႉ ၽႃႇရေႃး ၶုၼ်ႁေႃၶမ်းမိူင်း ဢေႇၵိပ်ႉတူႉ ၶီႇသိုၵ်းလႄႈ တိုၵ်းဢဝ်ဝဵင်းၼၼ်ႉ၊ ဢဝ်ၽႆးတုတ်ႇပႅတ်ႈသေယဝ်ႉ၊ ၶႃႈၽၼ်းဢဝ်တၢႆၵူၼ်း ၶႃႇၼၼီႉ ဢၼ်ယူႇၵႃႈၼႂ်းဝဵင်းၼၼ်ႉၸိူဝ်းၼၼ်ႉသေလႄႈ ဢဝ်ဝဵင်းၼၼ်ႉ ႁဵတ်းလၢၵ်ႈသွင်ႇပၼ်တီႈလုၵ်ႈယိင်းမၼ်း မေး သေႃးလမုၼ်ႇ ၼၼ်ႉဝႆႉယဝ်ႉ။-

17ပိူဝ်ႈဢၼ်ပဵၼ်ၼင်ႇၼႆလႄႈ သေႃးလမုၼ်ႇ လႆႈတႄႇႁဵတ်းဝဵင်း ၵေႇၸႃႇ ၊ ဝဵင်း ပေႇသေႃႇရုၼ်ႇ ဢၼ်ၵႃႈတႂ်ႈ၊-

18ဝဵင်း ပႃႇလတ်ႉ ၊ ဝဵင်း တႃႇတမေႃႇ ဢၼ်မီးၵႃႈၼႂ်းထိူၼ်ႇၼၼ်ႉၸိူဝ်းၼၼ်ႉ ၵႃႈၼႂ်းမိူင်းၸဝ်ႈ၊-

19ၵႃႈပဵၼ်ဝဵင်း တီႈဢၼ်သိမ်းဝႆႉၽၼ်ႇတႃႇၸဝ်ႈလႄႈ သေႃးလမုၼ်ႇ ပိူင်ႇၼၼ်ႉ၊ ဝဵင်းတင်းလၢႆဢၼ်လႆႈလူထိင်းလေႃႉရထႃးၸဝ်ႈ၊ ဝဵင်းတင်းလၢႆဢၼ်လႆႈလဵင်ႉမႃႉၸဝ်ႈ ဢိၵ်ႇတင်းၵႃႈဢၼ် သေႃးလမုၼ်ႇ ၶႂ်ႈတႄႇႁဵတ်းၵႃႈၼႂ်းဝဵင်း ယေႇရူႉသလႅမ်ႇ ၊ ၵႃႈၼိူဝ်လွႆ လေႇပၼုၼ်ႇ ၊ ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈတီႈၵူႈလႅၼ်ၼၼ်ႉဢေႃႈ။

20ၵႃႈဢၼ်ပဵၼ်ၵူၼ်းမဵဝ်း ဢႃႇမေႃးရီႉ ၊ ၵူၼ်းမဵဝ်း ႁိတ်ႉတီႉ ၊ ၵူၼ်းမဵဝ်း ၽေႇရၸီႉ ၊ ၵူၼ်းမဵဝ်း ႁီႉဝီႉ ၊ ၵူၼ်းမဵဝ်း ယေႇပူႉသီႉ ဢၼ်ဢမ်ႇပဵၼ်ၵူၼ်းမဵဝ်း ဢီႉသရေႇလႃႉ လႄႈ ဢၼ်ၵိုတ်းဢၼ်ၵျၢၼ်ႇတီႈမိူင်းၸဝ်ႈ၊-

21ဢၼ်ဝႃႈ လုၵ်ႈၶဝ်လၢၼ်ၶဝ်ဢၼ်ၵိုတ်းဢၼ်ၵျၢၼ်ႇလိုၼ်းၶဝ်ၵႃႈတီႈမိူင်းၸဝ်ႈ ၵွပ်ႈပိူဝ်ႈဢၼ် ၵူၼ်းမဵဝ်း ဢီႉသရေႇလႃႉ တင်းလၢႆ ဢမ်ႇယႃႉၽဵဝ်ႈၶဝ်ပႅတ်ႈမူတ်းမူတ်းသဵင်ႈသဵင်ႈလႆႈၼၼ်ႉၸိုင်၊ သေႃးလမုၼ်ႇ ၽႃႇဢဝ်ၵဵပ်းဢဝ်ၵူၼ်းႁႂ်ႈၶၢမ်ႇႁဵတ်းၶႃႈ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

22ၵူၼ်းမဵဝ်း ဢီႉသရေႇလႃႉ တင်းလၢႆၸမ်ႉ၊ သေႃးလမုၼ်ႇ ဢမ်ႇႁႂ်ႈၶၢမ်ႇႁဵတ်းၶႃႈ။ ၶဝ်ၼၼ်ႉလႆႈပဵၼ်ႁူဝ်ႁၢၼ်ၵူၼ်းသိုၵ်းလႂ်၊ ၵူၼ်းၸႂ်ႉၵူၼ်းသွႆၸဝ်ႈလႂ်၊ မူးမၢတ်ႈၽွင်းမိူင်းလႂ်၊ ၸဵတ်ႈၵႄး လႂ်၊ ၶဝ်ၸိူဝ်းဢၼ်ဢုပ်ႉၵႃႈၼိူဝ်လေႃႉရထႃးၸဝ်ႈလႂ်၊ ၶဝ်ၸိူဝ်းဢၼ်ဢုပ်ႉၵႃႈၼိူဝ်မႃႉၸဝ်ႈလႂ်ဢေႃႈ။-

23မူးလူင်မၢတ်ႈလူင်ဢၼ်ဢုပ်ႉၵႃႈၼိူဝ်ဢမူႉ သေႃးလမုၼ်ႇ လႄႈ ၸီႇယၢင်ႇၵႃႈၼိူဝ်ၵူၼ်းတင်းလၢႆ ဢၼ်ႁဵတ်းဢမူႉတၢင်းဢၼ်တႄႇႁဵတ်းၼၼ်ႉၸိူဝ်းၼၼ်ႉ မီးႁႃႈပၢၵ်ႇပၢႆႁႃႈသိပ်းဢေႃႈ။

24လုၵ်ႈယိင်းၶုၼ်ႁေႃၶမ်း ၽႃႇရေႃး ၼၼ်ႉ ဢွၵ်ႇသေၵႃႈၼႂ်းဝဵင်း တႃႇဝိတ်ႈ လႄႈ ၶၢႆႉၸူးၵႃႈတီႈႁေႃၸဝ်ႈဢၼ် သေႃးလမုၼ်ႇ တႄႇႁဵတ်းပုၼ်ႈမၼ်းၼၼ်ႉသေယဝ်ႉ၊ သေႃးလမုၼ်ႇ ၼၼ်ႉ ပွင်ႁဵတ်းပွင်မႄးတီႈ မီႉလေႃႇ ဢေႃႈ။-

25သေႃးလမုၼ်ႇ ဢဝ်ယိတ်ႈဢၼ်တုတ်ႇၽႆးလႂ် ယိတ်ႈမိၵ်ႉသႃႇႁႃယႃႉလႂ် ပုၵ်ႈၸေႃႇၵႃႈၼိူဝ်ယိတ်ႈပလၢင်ႇဢၼ်မၼ်းတႄႇႁဵတ်း ပုၼ်ႈထႃႇဝရႃႉၽြႃးၼၼ်ႉ ယေႈပီႊသၢမ်ပွၵ်ႈလႄႈ ဢဝ်ၼၢမ်ႇသႃႇတုတ်ႇၽႆးၵႃႈၼိူဝ်ယိတ်ႈပလၢင်ႇ ဢၼ်မီးၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉဢေႃႈ။ ၼင်ႇၼၼ်လႄႈမၼ်းႁဵတ်းႁိူၼ်းၸဝ်ႈယဝ်ႉတူဝ်ႈသေဢေႃႈ။

26လႆႈသမ်ႉ ၶုၼ်လူင် သေႃးလမုၼ်ႇ တႄႇႁဵတ်းႁိူဝ်းသၢင်းၽေႃးတင်းလၢႆ ၵႃႈတီႈဝဵင်း ဢေးၸယုၼ်းၵႃႇပႃႇ ဢၼ်မီးၸပ်းၵၼ်ၸမ်ၵၼ်တင်းဝဵင်း ဢေႇလုတ်ႉ ၵႃႈတီႈၽင်ႇပၢင်ႇလၢႆႇ ဢေႇတုမ်ႇ ၼႂ်းမိူင်း ဢေႇတုမ်ႇ ၼၼ်ႉဢေႃႈ။-

27ၶုၼ် ႁီႉရမ်ႇ ၵေႃႈ ႁႂ်ႈၶႃႈမၼ်းၵူၼ်းမၼ်းဢၼ်ပဵၼ်ၵူၼ်းႁိူဝ်းသၢင်းၽေႃး ဢၼ်ႁူႉလွင်ႈတၢင်းဢၼ်ၶၢမ်ႈပၢင်ႇလၢႆႇၸိူဝ်းၼၼ်ႉ ၶီႇလူၺ်ႈၵၼ်တင်းၶႃႈၵူၼ်း သေႃးလမုၼ်ႇ ၵႃႈၼိူဝ်ႁိူဝ်းသၢင်းၽေႃးၸိူဝ်းၼၼ်ႉဢေႃႈ။-

28ၶဝ်ၼၼ်ႉၵႂႃႇၵႃႈတီႈမိူင်း ဢေႃႇၽီႉရႃႉ လႄႈ ဢဝ်ၶမ်းသီႇပၢၵ်ႇပၢႆသၢဝ်း တလၢၼ်ႇတၢၼ်ႇ ၶိုၼ်းမႃးၸူးၵႃႈတီႈၶုၼ်လူင် သေႃးလမုၼ်ႇ ဢေႃႈ။

← Chapter 8 Jump to: Chapter 10 →