1 Kings 22 — Shan

1မိူင်း သူႉရီႉ တင်းမိူင်း ဢီႉသရေႇလႃႉ ၼၼ်ႉ ယင်းဢမ်ႇပဵၼ်သိုၵ်းပဵၼ်သိူဝ်ၵၼ်လႄႈယူႇသၢမ်ပီႊသေယဝ်ႉ၊-

2ၼႂ်းပီႊတႃႉတီႉယႃႉၼၼ်ႉ ယူဝ်းသၽတ်ႉ ၶုၼ်ႁေႃၶမ်း ယူႉတႃႉ လူင်းၸူးၵႃႈတီႈၶုၼ်ႁေႃၶမ်း ဢီႉသရေႇလႃႉ ဢေႃႈ။-

3ၶုၼ်ႁေႃၶမ်း ဢီႉသရေႇလႃႉ ၵေႃႈလၢတ်ႈတီႈၶႃႈမၼ်းၵူၼ်းမၼ်းလႄႈဝႃႈ၊ သူဢမ်ႇႁူႉလွင်ႈဢၼ်ဝဵင်း ရႃႇမုတ်ႉ မိူင်း ၵီႉလတ်ႉ ၼၼ်ႉပဵၼ်မိူင်းႁဝ်းလႄႈ၊ ႁဝ်းယင်းဢမ်ႇၼုၵ်ႈဢမ်ႇဢဝ်ၵႃႈၼႂ်းမိုဝ်းၶုၼ်ႁေႃၶမ်း သူႉရီႉ လႄႈယူႇၼိမ်ၼိမ်ယူႇၼၼ်ႉႁိုဝ်။ ဝႃႈၼင်ႇၼႆဢေႃႈ။-

4မၼ်းထၢမ်တီႈ ယူဝ်းသၽတ်ႉ လႄႈဝႃႈ၊ ၸဝ်ႈတၵ်းၶီႇသိုၵ်းလူၺ်ႈၵၼ်တင်းၵဝ်ၶႃႈၵႂႃႇၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ ပုၼ်ႉႁိုဝ်။ ဝႃႈၼင်ႇၼႆသေယဝ်ႉ၊ ယူဝ်းသၽတ်ႉ ၶိုၼ်းလၢတ်ႈတီႈၶုၼ်ႁေႃၶမ်း ဢီႉသရေႇလႃႉ လႄႈဝႃႈ၊ ၵဝ်ၶႃႈၼႆႉပဵၼ်မိူၼ်ၸိူဝ်ႉၼင်ႇၸဝ်ႈယူႇ၊ ၵူၼ်းၵဝ်ၶႃႈၸိူဝ်းၼႆႉ ပဵၼ်မိူၼ်ၸိူင်ႉၼင်ႇၵူၼ်းၸဝ်ႈၸိူဝ်းၼၼ်ႉယူႇသေလႄႈ မႃႉၵဝ်ၶႃႈတင်းလၢႆ ပဵၼ်မိူၼ်ၸိူဝ်ႉၼင်ႇမႃႉၸဝ်ႈၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

5လႆႈသမ်ႉ ယူဝ်းသၽတ်ႉ လၢတ်ႈတီႈၶုၼ်ႁေႃၶမ်း ဢီႉသရေႇလႃႉ လႄႈဝႃႈ၊ တွင်ႈထၢမ်ၼုၵ်ႈၵပၢတ်ႈထႃႇဝရႃႉၽြႃးဝၼ်းမိူဝ်ႈၼႆႉသေၵမ်း။ မိူဝ်ႈဢၼ်ဝႃႈၼင်ႇၼႆၸိုင်၊-

6ၶုၼ်ႁေႃၶမ်း ဢီႉသရေႇလႃႉ ၼၼ်ႉ ႁႂ်ႈပရေႃးၽႅတ်ႈသီႇပၢၵ်ႇၸမ်ၸမ်ၸူႉၵၼ်တုမ်ၵၼ်သေယဝ်ႉ၊ ထၢမ်လႄႈဝႃႈ၊ ၵဝ်ထုၵ်ႇလီၶီႇသိုၵ်းၵႂႃႇၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ ၼၼ်ႉႁိုဝ်။ ဢမ်ႇၼၼ်ၵဝ်ယင်းဢမ်ႇၶီႇလႄႈထုၵ်ႇလီယူႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ဢွၼ်ၵၼ်လဝ်ႊလၢတ်ႈလႄႈဝႃႈ၊ ၶီႇၵႂႃႇသေၵမ်းတီႈၶႃႈ။ ထႃႇဝရႃႉၽြႃးတၵ်းဢဝ်ဢၢပ်ႈပၼ် ၵႃႈၼႂ်းမိုဝ်းၸဝ်ႈၶုၼ်လူင်တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

7ယူဝ်းသၽတ်ႉ သမ်ႉထၢမ်လႄႈဝႃႈ၊ ပုၼ်ႈဢၼ်ႁဝ်းတၵ်းလႆႈတွင်ႈထၢမ်ၸိုင် ၵႃႈတီႈၼႆႈဢမ်ႇမီးပရေႃးၽႅတ်ႈထႃႇဝရႃႉၽြႃး သေတူၼ်သေပႃးၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

8ၶုၼ်ႁေႃၶမ်း ဢီႉသရေႇလႃႉ ၶိုၼ်းလၢတ်ႈတီႈ ယူဝ်းသၽတ်ႉ လႄႈဝႃႈ၊ ၵေႃႉဢၼ်ဢဝ်တွင်ႈထၢမ်တီႈထႃႇဝရႃႉၽြႃးလႆႈဢၼ်ဝႃႈ မိၵ်ႉၶႃႇ လုၵ်ႈၸၢႆး ဢီႉမလႃႉ ၼၼ်ႉယင်းမီးၵေႃႉၼိုင်ႈဢေႃႈ။ ၼႂ်းဝႃႈၼၼ်သေၵေႃႈ ၵဝ်ၶႃႈၸင်းမၼ်းဢေႃႈ။ မၼ်းဢမ်ႇႁေႃးလၢတ်ႈၵႂၢမ်းမင်ႇၵလႃႇလူၺ်ႈလွင်ႈၵဝ်လႄႈ ၸၢင်ႈႁေႃးလၢတ်ႈၵႂၢမ်းဢႃႉမင်ႇၵလႃႇၵူၺ်းၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ ယူဝ်းသၽတ်ႉ ၶိုၼ်းလၢတ်ႈလႄႈဝႃႈ၊ ၶုၼ်လူင်ယႃႇပေလၢတ်ႈၸိူဝ်ႉၼင်ႇၼၼ်သေၵမ်း၊ ဝႃႈၼင်ႇၼႆဢေႃႈ။-

9မိူဝ်ႈၼၼ်ႉၶုၼ်ႁေႃၶမ်း ဢီႉသရေႇလႃႉ ၼၼ်ႉႁွင်ႉဢဝ်ၵေႃႉဢၼ်မီးဢရႃႇၵေႃႉၼိုင်ႈလႄႈ မီးဢမိင်ႉဝႃႈ၊ ႁွင်ႉဢဝ် မိၵ်ႉၶႃႇ လုၵ်ႈၸၢႆး ဢီႉမလႃႉ ၼၼ်ႉ မႃးၶၼ်ၶၼ်ၽႂ်းၽႂ်းတႃႉ၊ ဝႃႈၼင်ႇၼႆဢေႃႈ။-

10မိူဝ်ႈၶိင်ႇၼၼ်ႉၶုၼ်ႁေႃၶမ်း ဢီႉသရေႇလႃႉ ဢိၵ်ႇတင်း ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၼၼ်ႉ ၼုင်ႈမႆႁၢင်ႈၶိူင်ႈၶူဝ်းၼုင်ႈၶူဝ်းမႆၶုၼ်ယူႇသေလႄႈ ၼင်ႈယူႇၵႃႈၼိူဝ်ရႃႇၸႃႉပလၢင်ႇ ႁင်းၽႂ်ႁင်းမၼ်းၼႂ်းတီႈဢၼ်ပၢင်ႇလီပဵင်းလီ ၵႃႈတီႈၽၢႆႇၼႃႈႁူးၽၵ်းတူဝဵင်း သမႃႇရီႉ ၼၼ်ႉယူႇလႄႈ ပရေႃးၽႅတ်ႈၵႃႈမီးၸိူဝ်းၼၼ်ႉ ဢွၼ်ၵၼ်ႁေႃးလၢတ်ႈၵႃႈတီႈၽၢႆႇၼႃႈၸဝ်ႈယူႇဢေႃႈ။-

11ၸေႇတၵီႉ လုၵ်ႈၸၢႆး ၶေးၼႃႇၼႃႉ ၼၼ်ႉ ႁဵတ်းၶဝ်လႅမ်လဵၵ်းသေလႄႈ သင်ႇလၢတ်ႈလႄႈဝႃႈ၊ ထႃႇဝရႃႉၽြႃး မီးဢမိင်ႉလႄႈဝႃႈၸမ်ႉ၊ ၸဝ်ႈႁဝ်းတၵ်းလႆႈဢဝ်ၶဝ်လႅမ်ၸိူဝ်းၼႆႉတႅင်းၵူၼ်းမိူင်း သူႉရီႉ တေႃႇထိုင်ႁွတ်ႈၶဝ်ထၼ်ႈပေႃးလူႉပေႃးလႅဝ်ဢေႃႈ၊ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

12ပရေႃးၽႅတ်ႈၵႃႈမီးၸိူဝ်းၼၼ်ႉၵေႃႈ ဢွၼ်ၵၼ်ႁဵတ်းပရေႃးၽႅတ်ႈသေလႄႈ ႁေႃးလၢတ်ႈလႄႈဝႃႈ၊ ၸဝ်ႈႁဝ်းၶီႇသိုၵ်းၶိုၼ်ႈၸူးၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ လႄႈ ႁႂ်ႈပႄႉၼႅင်ႇသေၵမ်းတီႈၶႃႈ။ ထႃႇဝရႃႉၽြႃးတၵ်းဢဝ်ဢၢပ်ႈပၼ် ၵႃႈၼႂ်းမိုဝ်းၸဝ်ႈၶုၼ်လူင်တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

13တမၢၼ်ႇၵူၼ်းၸႂ်ႉဢၼ်ၵႂႃႇႁႂ်ႈလႆႈႁွင်ႉ မိၵ်ႉၶႃႇ မႃးၼၼ်ႉလၢတ်ႈလႄႈဝႃႈ၊ ပရေႃးၽႅတ်ႈၸိူဝ်းၼၼ်ႉ ၽွမ်ႉၵၼ်ႁေႃးလၢတ်ႈၵႂၢမ်းမင်ႇၵလႃႇၵူၺ်း တီႈၶုၼ်ႁေႃၶမ်းၶႃႈဢေႃႈ။ ၸဝ်ႈႁဝ်းၵေႃႈၶႅၼ်းတေႃႈ ႁႂ်ႈၵႂၢမ်းၸဝ်ႈႁဝ်းပဵၼ်ၸိူဝ်ႉၼင်ႇ ၵႂၢမ်းၶဝ်ၼၼ်ႉလႄႈ ႁေႃးလၢတ်ႈၵႂၢမ်းမင်ႇၵလႃႇသေၵမ်းၶႃႈ၊ ဝႃႈၼင်ႇၼႆသေယဝ်ႉ၊-

14မိၵ်ႉၶႃႇ ၶိုၼ်းလၢတ်ႈလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃး ဢသၢၵ်ႈလိပ်းယူႇၼၼ်ႉ ၵဝ်တၵ်းလႆႈၶိုၼ်းလၢတ်ႈၵႂၢမ်းဢၼ်ထႃႇဝရႃႉၽြႃး၊ မီးဢမိင်ႉၼၼ်ႉၵူၺ်းဢေႃႈ၊ ဝႃႈၼင်ႇၼႆဢေႃႈ။

15မိူဝ်ႈဢၼ်မၼ်းႁွတ်ႈထိုင်ၵႃႈတီႈၶုၼ်ႁေႃၶမ်းၼၼ်ႉၸိုင်၊ ၶုၼ်ႁေႃၶမ်းထၢမ်တီႈမၼ်းလႄႈဝႃႈ၊ မိၵ်ႉၶႃႇ ဢိူၺ်း၊ ႁဝ်းထုၵ်ႇလီၶီႇသိုၵ်းၵႂႃႇၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ ၼၼ်ႉႁိုဝ်။ ဢမ်ႇၼၼ်ႁဝ်းယင်းဢမ်ႇၶီႇလႄႈထုၵ်ႇလီယူႇႁိုဝ်။ ဝႃႈၼင်ႇၼႆသေယဝ်ႉ၊ မိၵ်ႉၶႃႇ လဝ်ႊလၢတ်ႈလႄႈဝႃႈ၊ ၶီႇသိုၵ်းၶိုၼ်ႈၸူးလႄႈ ႁႂ်ႈပႄႉၼႅင်ႇသေၵမ်းတီႈၶႃႈ။ ထႃႇဝရႃႉၽြႃးတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းၶုၼ်လူင်တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

16ၶုၼ်ႁေႃၶမ်းၵေႃႈထၢမ်လႄႈဝႃႈ၊ လိူဝ်သေၵႂၢမ်းဢၼ်မၢၼ်ႇဢၼ်မႅၼ်ႈၼၼ်ႉ လွင်ႈၼင်ႇႁိုဝ်မႂ်းတၵ်းဢမ်ႇဢဝ်တင်းဢၶႂၢင်ႉထႃႇဝရႃႉၽြႃးသေလႄႈ ႁေႃးလၢတ်ႈၵႂၢမ်းတၢင်ႇၸိူဝ်ႉတၢင်ႇဢၼ်တီႈၵဝ်ၸိုင် ၵဝ်တၵ်းလႆႈပၼ်တၢင်းဢၼ်ၵိၼ်ႇဢၼ်ဝႃႈတီႈမႂ်းတေႃႇထိုင်ႁွတ်ႈလၢႆပွၵ်ႈလၢႆၽဝ်ႇလူးၵွၼ်ႇ၊ မိူဝ်ႈဢၼ်ဝႃႈၼင်ႇၼႆၸိုင်၊-

17မၼ်းၵေႃႈသမ်ႉလဝ်ႊလၢတ်ႈလႄႈဝႃႈ၊ ၶႃႈၸဝ်ႈလႆႈႁၼ်ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်မီးတၢင်းဢၼ်ၽၢတ်ႇၽႄၵၼ်ယူႇ ၵႃႈၼိူဝ်လွႆၼိူဝ်ၵုင်းတင်းလၢႆမိူၼ်ၸိူဝ်ႉၼင်ႇသူဝ်းဢၼ်ဢမ်ႇမီးၵေႃႉဢၼ်လဵင်ႉဢၼ်ထိင်းၼၼ်ႉတီႈၶႃႈယဝ်ႉ။ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵွပ်ႈပိူဝ်ႈဢၼ်ၶဝ်ၸိူဝ်းၼႆႉဢမ်ႇမီးၸဝ်ႈမီးၸွမ်လႄႈ ႁႂ်ႈၶဝ်ၶိုၼ်းမိူဝ်းၸူးၵႃႈတီႈႁိူၼ်းတီႈဢၼ်ၶဝ်ယူႇၼၼ်ႉ ႁင်းၽႂ်ႁင်းမၼ်းသေ၊ ဝႃႈၼင်ႇၼႆတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

18ၶုၼ်ႁေႃၶမ်း ဢီႉသရေႇလႃႉ လၢတ်ႈတီႈ ယူဝ်းသၽတ်ႉ လႄႈဝႃႈ၊ ၸွင်ႇၵဝ်ၶႃႈဢမ်ႇလၢတ်ႈတီႈၸဝ်ႈလႄႈဝႃႈ၊ မၼ်းၼႆႉဢမ်ႇႁေႃးလၢတ်ႈၵႂၢမ်းမင်ႇၵလႃႇလူၺ်ႈလွင်ႈၵဝ်ၶႃႈ၊ ၸၢင်ႈႁေႃးလၢတ်ႈၵႂၢမ်းဢႃႉမင်ႇၵလႃႇၵူၺ်းဢေႃႈ၊ ဝႃႈၼင်ႇၼႆဝႆႉယဝ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။-

19မၼ်းၼၼ်ႉၵေႃႈႁေႃးလၢတ်ႈလႄႈဝႃႈ၊ ပိူဝ်ႈဢၼ်ပဵၼ်ၼင်ႇၼႆလႄႈ ၶႅၼ်းတေႃႈထွမ်ႇငိၼ်းဢမိင်ႉထႃႇဝရႃႉၽြႃးသေၵမ်းတီႈၶႃႈ။ ၶႃႈၸဝ်ႈႁၼ်ထႃႇဝရႃႉၽြႃးၼင်ႈယူႇၵႃႈၼိူဝ်ပလၢင်ႇၸဝ်ႈလႄႈ၊ ပူဝ်ႇပႃႇၵၢင်ႁၢဝ်တင်းသဵင်ႈတင်းလူင် ဢွၼ်ၵၼ်ၸုၵ်းယူႇၵႃႈတီႈၽၢႆႇၶႂႃၸဝ်ႈ၊ ၵႃႈတီႈၽၢႆႇသၢႆႉၸဝ်ႈၼၼ်ႉတီႈၶႃႈယဝ်ႉ။-

20ထႃႇဝရႃႉၽြႃးၵေႃႈထၢမ်လႄႈဝႃႈ ၽူႈလႂ်တၵ်းတိုၵ်းယူင်းၸူဝ်းဢဝ် ဢႃႇႁပ်ႉ ႁႂ်ႈမၼ်းၶီႇသိုၵ်းၶိုၼ်ႈၸူးၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ လႄႈ သုမ်းၸွမ်းဝႃႈၼင်ႇၼႆသေယဝ်ႉ၊ ၶဝ်ၼၼ်ႉဢွၼ်ၵၼ်ၶိုၼ်းလဝ်ႊလၢတ်ႈယေႈၵေႃႉယေႈၸိူဝ်း၊ ယေႈၵေႃႉယေႈၼႄးဢေႃႈ။-

21လႆႈသမ်ႉဝီႉၺိၺ်ႇပႃးၼိုင်ႈမႃးလႄႈၸုၵ်းယူႇ ၵႃႈတီႈၽၢႆႇၼႃႈထႃႇဝရႃႉၽြႃးယူႇသေလႄႈ လဝ်ႊလၢတ်ႈလႄႈဝႃႈ၊ ၶႃႈၸဝ်ႈတၵ်းတိုၵ်းယူင်းၸူဝ်းဢဝ်တီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

22ထႃႇဝရႃႉၽြႃးထၢမ်လႄႈဝႃႈ တၵ်းႁဵတ်းၸိူဝ်ႉၼင်ႇႁိုဝ်သေလႄႈ တိုၵ်းယူင်းၸူဝ်းဢဝ်၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၶႃႈၸဝ်ႈတၵ်းၵႂႃႇလႄႈ ပဵၼ်ၸႂ်ဝီႉၺိၺ်ႇဢၼ်ၸၢင်ႈလၢတ်ႈၵႂၢမ်းမူႉသႃႇ ၵႃႈၼႂ်းသူပ်းပရေႃးၽႅတ်ႈၶုၼ်လူင်ၵႃႈမီးၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈမီးဢမိင်ႉလႄႈဝႃႈ၊ မႂ်းတၵ်းတိုၵ်းယူင်းၸူဝ်းဢဝ်မၼ်းလႄႈပႄႉၼႅင်ႇဢေႃႈ။ ၵႂႃႇလႄႈႁဵတ်းၸိူဝ်ႉၼင်ႇၼၼ်တႃႉ၊ ဝႃႈၼင်ႇၼႆဢေႃႈ။-

23ပိူဝ်ႈဢၼ်ပဵၼ်ၼင်ႇၼႆလႄႈ ထႃႇဝရႃႉၽြႃးဢဝ်ၸႂ်ဝီႉၺိၺ်ႇဢၼ်ၸၢင်ႈလၢတ်ႈၵႂၢမ်းမူႉသႃႇၼၼ်ႉ သႂၢင်းသႂ်ႇပၼ်ၵႃႈၼႂ်းသူပ်းပရေႃးၽႅတ်ႈၶုၼ်လူင်ၸိူဝ်းၼႆႉတီႈၶႃႈယဝ်ႉ။ ထႃႇဝရႃႉၽြႃးလၢတ်ႈၵႂၢမ်းဢႃႉမင်ႇၵလႃႇလူၺ်ႈလွင်ႈၶုၼ်လူင်တီႈၶႃႈယဝ်ႉ၊ ဝႃႈၼင်ႇၼႆဢေႃႈ။

24မိူဝ်ႈၼၼ်ႉ ၸေႇတၵီႉ လုၵ်ႈၸၢႆး ၶေးၼႃႇၼႃႉ ၼၼ်ႉ သုတ်ႉၸပ်းသုတ်ႉၸူးလႄႈ တူပ်းသႂ်ႇၵႅမ်ႈ မိၵ်ႉၶႃႇ ယူႇသေလႄႈထၢမ်လႄႈဝႃႈ၊ ဝီႉၺိၺ်ႇထႃႇဝရႃႉၽြႃးဢွၵ်ႇသေၵႃႈတီႈၵဝ်ၵႂႃႇတၢင်းသဵၼ်ႈလႂ် ႁႂ်ႈလႆႈတၵ်ႉလၢတ်ႈမႂ်း၊ ဝႃႈၼင်ႇၼႆသေယဝ်ႉ၊-

25မိၵ်ႉၶႃႇ ၵေႃႈလၢတ်ႈလႄႈဝႃႈ၊ မႂ်းတၵ်းလႆႈႁၼ်ၼႂ်းမိုဝ်ႉဝၼ်းဢၼ် မႂ်းတၵ်းၶဝ်ႈၵႃႈၼႂ်းလုၵ်းတၢင်းၼႂ်း ႁႂ်ႈလႆႈတဵတ်ႇမႅပ်ႉယူႇၼၼ်ႉဢေႃႈ၊ ဝႃႈၼင်ႇၼႆဢေႃႈ။-

26မိူဝ်ႈၼၼ်ႉၶုၼ်ႁေႃၶမ်း ဢီႉသရေႇလႃႉ ၸီႇယၢင်ႇလႄႈဝႃႈ၊ ဢဝ် မိၵ်ႉၶႃႇ ၶိုၼ်းမိူဝ်းၵႂႃႇၸူး ၵႃႈတီႈ ဢႃႇမုၼ်ႇ ၶုၼ်မဵဝ်ႉဝုၼ်ႇ တင်း ယေႃးသႃႉ လုၵ်ႈၸၢႆးၸဝ်ႈၼၼ်ႉလႄႈ၊-

27သင်ႇလၢတ်ႈဝႆႉလႄႈဝႃႈ၊ ၶုၼ်ႁေႃၶမ်းမီးဢမိင်ႉၸမ်ႉ၊ ဢွၼ်ၵၼ်ဢဝ်ၵေႃႉၼႆႉ ၶင်ဝႆႉၵႃႈၼႂ်းထွင်ႇလႄႈ ႁႂ်ႈမၼ်းၵိၼ်ၶူပ်းၶဝ်ႈမုၼ်းတုၵ်ႉၶႃႉတၢင်းဢၼ်ၶၢၼ်ၸႂ်လႄႈ သူတ်ႉၵိၼ်ၼမ်ႉတုၵ်ႉၶႃႉတၢင်းဢၼ်ၶၢၼ်ၸႂ်ယူႇ တေႃႇထိုင်ႁွတ်ႈၵဝ်လႆႈၶိုၼ်းမႃးၼိမ်ၼိမ်လီလီၼၼ်ႉတႃႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

28မိၵ်ႉၶႃႇ ၵေႃႈၶိုၼ်းလၢတ်ႈလႄႈဝႃႈ၊ ပေႃးၸဝ်ႈၶုၼ်လူင်လႆႈၶိုၼ်းမႃးၼိမ်ၼိမ်လီလီၸိုင်၊ ထႃႇဝရႃႉၽြႃးဢမ်ႇဢဝ်ၶႃႈၸဝ်ႈ မီးဢမိင်ႉဝႆႉတီႈၶႃႈ။ ၵူၼ်းၵႃႈမီးတင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းဝႆႉတႃႉ၊ ဝႃႈၼင်ႇၼႆဢေႃႈ။

29ၼင်ႇၼၼ်လႄႈၶုၼ်ႁေႃၶမ်း ဢီႉသရေႇလႃႉ တင်း ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၼၼ်ႉ ဢွၼ်ၵၼ်ၶီႇသိုၵ်းၶိုၼ်ႈၸူး ၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ ဢေႃႈ။-

30ၶုၼ်ႁေႃၶမ်း ဢီႉသရေႇလႃႉ လၢတ်ႈတီႈ ယူဝ်းသၽတ်ႉ လႄႈဝႃႈ၊ ၵဝ်တၵ်းယႃႉႁၢင်ႈယႃႉၽၢင်ၵဝ်သေလႄႈ ၶဝ်ႈၼႂ်းပွႆးသိုၵ်းဢေႃႈ။ ၸဝ်ႈၸမ်ႉ၊ ၼုင်ႈမႆႈႁၢင်ႈၶိူင်ႈၶူဝ်းၼုင်ႈၶူဝ်းမႆၶုၼ်ယူႇသေၵမ်း၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်း ဢီႉသရေႇလႃႉ ၼၼ်ႉယႃႉႁၢင်ႈယႃႉၽၢင်မၼ်းသေလႄႈၶဝ်ႈၵႃႈၼႂ်းပွႆးသိုၵ်းဢေႃႈ။-

31ၵွပ်ႈပိူဝ်ႈဢၼ်ၶုၼ်ႁေႃၶမ်း သူႉရီႉ သင်ႇလၢတ်ႈဝႆႉ တီႈၶုၼ်ပူဝ်ႇသၢမ်သိပ်းပၢႆသွင်ၵေႃႉဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉဝႆႉလႄႈဝႃႈ၊ ၼွၵ်ႈသေၶုၼ်ႁေႃၶမ်း ဢီႉသရေႇလႃႉ ၼၼ်ႉ ယႃႇပေတိုၵ်းတေႃးၵူၼ်းလူင်ၵူၼ်းဢွၼ်ႇသေၵေႃႉသေၵူၼ်း၊ ဝႃႈၼင်ႇၼႆၼၼ်ႉလႄႈ၊-

32မိူဝ်ႈဢၼ်ၶုၼ်ပူဝ်ႇဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉ ႁၼ် ယူဝ်းသၽတ်ႉ ၼၼ်ႉၸိုင်၊ ၶဝ်လၢတ်ႈလႄႈဝႃႈ၊ ၵေႃႉၼၼ်ႉတၵ်းပဵၼ်ၶုၼ်ႁေႃၶမ်း ဢီႉသရေႇလႃႉ ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆသေလႄႈ ဢွၼ်ၵၼ်ဢုမ်ႇမႃး ႁႂ်ႈလႆႈတိုၵ်းတေႃးမၼ်းလႄႈ၊ ယူဝ်းသၽတ်ႉ ၵေႃႈႁွင်ႉသႅၼ်ႇဢေႃႈ။-

33မိူဝ်ႈဢၼ်ၶုၼ်ပူဝ်ႇဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉ ႁူႉႁၼ်လွင်ႈဢၼ်ဢမ်ႇၸႂ်ႈ ၶုၼ်ႁေႃၶမ်း ဢီႉသရေႇလႃႉ ၼၼ်ႉၸိုင် ၶဝ်ယင်းဢမ်ႇဢုမ်ႇၸွမ်းမၼ်းလႄႈ ဢွၼ်ၵၼ်ဝႄႈပိူင်ႈမၼ်းသေဢေႃႈ။-

34ၵူၼ်းၵေႃႉၼိုင်ႈ ယင်းဢမ်ႇယဵင်းၸူးလႄႈ ဢဝ်ၵၢင်ႇမၼ်းယိုဝ်းလႄႈ ထုၵ်ႇမႅၼ်ႈသႂ်ႇၵႃႈတီႈၵႄႈပွင်ႈသိူဝ်ႈၶႅပ်းလဵၵ်းၶုၼ်ႁေႃၶမ်း ဢီႉသရေႇလႃႉ သေယဝ်ႉ၊ မၼ်းလၢတ်ႈတီႈၵေႃႉဢၼ်ထိင်းလေႃႉရထႃးမၼ်းလႄႈဝႃႈ၊ ဢဝ်ၵဝ်ဝၢႆႇၶိုၼ်းလႄႈဢွၵ်ႇသေၵႃႈၼႂ်းပွႆးသိုၵ်း တႃႉ။ ၵဝ်လႆႈၶၢမ်ႇတၢင်းဢၼ်တိူဝ်ႉမၢတ်ႇ ဢၼ်ၸဵပ်းၼႃႇလူင်လၢင်ယဝ်ႉ၊ ဝႃႈၼင်ႇၼႆဢေႃႈ။-

35ၼႂ်းဝၼ်းၼၼ်ႉ တၢင်းဢၼ်တိုၵ်းၵၼ်တေႃးၵၼ်ၼၼ်ႉ ယဵင်ႈၶႅၼ်းယႂ်ႇမႃးတူဝ်းမႃးယူႇဢေႃႈ။ ၶုၼ်ႁေႃၶမ်းၼၼ်ႉဢိင်ၵူၼ်းယူႇၵႃႈၼႂ်းလေႃႉရထႃးၸဝ်ႈသေလႄႈ ၼင်ႈယူႇၽၢႆႇၼိုင်ႈ တင်းၵူၼ်း သူႉရီႉ ၸိူဝ်းၼၼ်ႉလႄႈ ၶိင်ႇႁူဝ်ၶမ်ႈဢသၢၵ်ႈၸဝ်ႈသဵင်ႈသေဢေႃႈ။ လိူတ်ႈၵႃႈတီႈႁွႆးဢၼ်တိူဝ်ႉမၢတ်ႇၼၼ်ႉ ယွတ်ႇႁူဝ်ႈတူၵ်းသႂ်ႇၵႃႈတီႈပိုၼ်ႉလေႃႉရထႃးၸဝ်ႈဢေႃႈ။-

36မိူဝ်ႈဢၼ်ၵၢင်ဝၼ်းတူၵ်းၼၼ်ႉၸိုင်၊ ၶဝ်ႁွင်ႉပၢဝ်ႇႁွင်ႉသေႃႇတင်းတပ်ႉလႄႈဝႃႈ၊ ၵူၼ်းၵူႈၵေႃႉၶဝ်ဢိူၺ်း၊ ဢွၼ်ၵၼ်ၶိုၼ်းမိူဝ်းၵႂႃႇ ၵႃႈတီႈဝဵင်းၽႂ်ဝဵင်းမၼ်းတႃႉ။ ဢွၼ်ၵၼ်ၶိုၼ်းမိူဝ်းၵႃႈတီႈမိူင်းၽႂ်မိူင်းမၼ်းတႃႉ၊ ဝႃႈၼင်ႇၼႆဢေႃႈ။-

37ၼင်ႇၼၼ်လႄႈၶုၼ်ႁေႃၶမ်းတၢႆလႄႈ ၶဝ်ဢဝ်မၼ်းမႃးၵႃႈတီႈဝဵင်း သမႃႇရီႉ သေယဝ်ႉ၊ ဢဝ်ၶုၼ်ႁေႃၶမ်း သၢင်းၵျူဝ်ႇၵႃႈၼႂ်းဝဵင်း သမႃႇရီႉ ဢေႃႈ။-

38ၶဝ်ဢဝ်လေႃႉရထႃးၸဝ်ႈ သုၵ်ႈလၢင်ႉၵႃႈတီႈၼမ်ႉၼွင်ဝဵင်း သမႃႇရီႉ ၼၼ်ႉလႄႈ၊ မႃတင်းလၢႆဢွၼ်ၵၼ်လေးၵိၼ်လိူတ်ႈမၼ်းၼၼ်ႉမႅၼ်ႈၸွမ်းၵႃႈၼင်ႇၵႂၢမ်းဢၼ်ထႃႇဝရႃႉၽြႃး မီးဢမိင်ႉဝႆႉၼၼ်ႉဢေႃႈ၊ မႄႈမွၵ်ႇယႃႈတင်းလၢႆၵေႃႈဢၢပ်ႇၼမ်ႉၵႃႈတီႈၼၼ်ႈဢေႃႈ။

39လွင်ႈတၢင်း ဢႃႇႁပ်ႉ ဢၼ်ယင်းၵိုတ်းယင်းၵျၢၼ်ႇဢိၵ်ႇတင်း လွင်ႈႁေႃငႃးၸၢင်ႉ ဢၼ်မၼ်းတႄႇႁဵတ်းတင်းဝဵင်းဢၼ်မၼ်းမႄးၵုမ်းမႄးႁဵတ်းၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

40ဢႃႇႁပ်ႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ၊ ဢႃႇၶၸီႉ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

41ၼႂ်းပီႊဢၼ် ဢႃႇႁပ်ႉ ၶုၼ်ႁေႃၶမ်း ဢီႉသရေႇလႃႉ ၸၢမ်ႇႁၢင်ႈၸၢမ်ႇႁေႃ သီႇပီႊၼၼ်ႉ ယူဝ်းသၽတ်ႉ လုၵ်ႈၸၢႆးၸဝ်ႈ ဢႃႇသႃႉ ၼၼ်ႉ ၸႃႉၼင်ႈႁၢင်ႈၼင်ႈႁေႃ ဢေႃႈ။-

42ယူဝ်းသၽတ်ႉ ၼၼ်ႉ မိူဝ်ႈဢၼ်ဢသၢၵ်ႈမၼ်းလႆႈသၢမ်သိပ်းပၢႆႁႃႈပီႊၼၼ်ႉၸိုင်၊ မၼ်းၸႃႉၼင်ႈႁၢင်ႈၼင်ႈႁေႃလႄႈ ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရူႉသလႅမ်ႇ သၢဝ်းပၢႆႁႃႈပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ဢၸူႉၽႃႉ လုၵ်ႈယိင်း သီႉလႁီႉ ဢေႃႈ။-

43မၼ်းၼၼ်ႉဢမ်ႇဝႄႈပိူင်ႈသေသဵၼ်ႈတၢင်းဢၼ် ဢႃႇသႃႉ ၸဝ်ႈပေႃႈမၼ်းၸွမ်းၼၼ်ႉ၊ ၸွမ်းတင်းသဵင်ႈတင်းမူတ်းယူႇသေလႄႈ ႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးဢေႃႈ။ ၼႂ်းဝႃႈၼၼ်သေၵေႃႈ မၼ်းဢမ်ႇပႄႇၽဵဝ်ႈထႃႇၼႃႉတီႈသုင်တင်းလၢႆပႅတ်ႈ။ ၵူၼ်းတင်းလၢႆဢွၼ်ၵၼ်ပုၵ်ႈၸေႃႇယိတ်ႈလႄႈ ဢဝ်ၽႆးတုတ်ႇၼၢမ်ႇသႃႇ ၵႃႈတီႈထႃႇၼႃႉတီႈသုင်ၸိူဝ်းၼၼ်ႉယူႇဢေႃႈ။-

44ယူဝ်းသၽတ်ႉ ၼၼ်ႉ ႁႂ်ႈသိုၵ်းထၢတ်ႇသိုၵ်းယဵၼ်သေလႄႈ ႁဵတ်းမိၵ်ႉသႃႇႁႃယႃႉၵၼ်တင်းၶုၼ်ႁေႃၶမ်း ဢီႉသရေႇလႃႉ ဢေႃႈ။-

45လွင်ႈတၢင်း ယူဝ်းသၽတ်ႉ ဢၼ်ယင်းၵိုတ်းယင်းၵျၢၼ်ႇ၊လွင်ႈတၢင်းဢၼ်တၼ်းၶူဝ်းမၼ်းယႂ်ႇ၊ လွင်ႈတၢင်းဢၼ်မၼ်းတိုၵ်းသိုၵ်းတိုၵ်းသိူဝ်ၸိူဝ်းၼၼ်ႉၸိုင်၊ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

46ၵူၼ်းဢၼ်ၸၢင်ႈၸွမ်းဢလူဝ်ႇၵူၼ်းၸၢႆးၼင်ႇၵၼ် ဢၼ်ယင်းၵိုတ်းယင်းၵျၢၼ်ႇဝႆႉၼႂ်းၸူဝ်ႈပၢၼ် ဢႃႇသႃႉ ၸဝ်ႈပေႃႈမၼ်းၸိူဝ်းၼၼ်ႉၵေႃႈ မၼ်းဢဝ်ပႄႇၽဵဝ်ႈပႅတ်ႈသေၵႃႈၼႂ်းမိူင်းၸဝ်ႈဢေႃႈ။-

47ၶိင်ႇမိူဝ်ႈၼၼ်ႉ ဢမ်ႇမီးၶုၼ်ႁေႃၶမ်းၵႃႈၼႂ်းမိူင်း ဢေႇတုမ်ႇ မီးၶုၼ်ဢၼ်တၢင်တူဝ်မၼ်းၵူၺ်းဢေႃႈ။-

48ယူဝ်းသၽတ်ႉ ၼၼ်ႉ ႁဵတ်းႁိူဝ်းသၢင်းၽေႃး တႃႇသူႉ တင်းလၢႆ ႁႂ်ႈလႆႈၵႂႃႇၵႃႈတီႈမိူင်း ဢေႃႇၽီႉရႃႉ လႄႈ ဢဝ်ၶမ်းမႃးဢေႃႈ။ ၵူၺ်းၵႃႈ ၵွပ်ႈပိူဝ်ႈဢၼ်ႁၵ်းလူႉၵႃႈတီႈ ဢေးၸယုၼ်းၵႃႇပႃႇ ၼၼ်ႉလႄႈ ဢမ်ႇလႆႈၵႂႃႇ။-

49မိူဝ်ႈၼၼ်ႉ ဢႃႇၶၸီႉ လုၵ်ႈၸၢႆးၸဝ်ႈ ဢႃႇႁပ်ႉ ၼၼ်ႉ ယွၼ်းဢၶႂၢင်ႉတီႈ ယူဝ်းသၽတ်ႉ လႄႈဝႃႈ၊ ႁႂ်ႈၶႃႈၵူၼ်းၵဝ်ၶႃႈတင်းလၢႆ လႆႈၶီႇႁိူဝ်းသၢင်းၽေႃးလူၺ်ႈၵၼ်တင်း ၶႃႈၵူၼ်းၶုၼ်လူင်သေၵမ်း၊ ဝႃႈၼင်ႇၼႆသေၵေႃႈ ယူဝ်းသၽတ်ႉ ဢမ်ႇပၼ်ဢၶႂၢင်ႉ။-

50ယူဝ်းသၽတ်ႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်း ပူႇမွၼ်ႇမၼ်းၸိူဝ်းၼၼ်ႉ ၵႃႈၼႂ်းဝဵင်းၸဝ်ႈပေႃႈမၼ်း တႃႇဝိတ်ႈ ၼၼ်ႉဢေႃႈ။ ယႁူဝ်းရမ်ႇ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃ တၢင်တူဝ်ၸဝ်ႈပေႃႈမၼ်းဢေႃႈ။

51ၼႂ်းပီႊဢၼ် ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃ သိပ်းပၢႆၸဵတ်းပီႊၼၼ်ႉ၊ ဢႃႇၶၸီႉ လုၵ်ႈၸၢႆးၸဝ်ႈ ဢႃႇႁပ်ႉ ၸႃႉၼင်ႈႁၢင်ႈၼင်ႈႁေႃမိူင်း ဢီႉသရေႇလႃႉ ၵႃႈၼႂ်းဝဵင်း သမႃႇရီႉ လႄႈ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ သွင်ပီႊဢေႃႈ။-

52မၼ်းၼၼ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ၸွမ်းသဵၼ်ႈတၢင်းၸဝ်ႈပေႃႈမၼ်း ဢိၵ်ႇတင်းသဵၼ်ႈတၢင်းမႄႈမၼ်း၊ တင်းသဵၼ်ႈတၢင်းဢၼ် ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢၼ်ႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉ ၸွမ်းၼၼ်ႉဢေႃႈ။-

53မၼ်းႁဵတ်းဝၢတ်ႈၵူဝ်းၵႂၢႆႇၽြႃး ပႃႇလႃႉ လႄႈ တိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ၸွမ်းၵႃႈၼင်ႇဢၼ်ၸဝ်ႈပေႃႈမၼ်းၵမ်ၵျၢင်ႉၼၼ်ႉဢေႃႈ။ ထမ်ႇမႃႉရႃႇၸဝၢင်ႇၽိုၼ်တႃႉတီႉယႃႉယဝ်ႉယဝ်ႉဢေႃႈ။