1 Kings 8 — Shan

1မိူဝ်ႈၼၼ်ႉ သေႃးလမုၼ်ႇ ၼၼ်ႉ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢီႉသရေႇလႃႉ တင်းလၢႆ ဢိၵ်ႇတင်းၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ၼႂ်းမဵဝ်းတင်းလၢႆဢၼ်ဝႃႈ ၶဝ်ၸိူဝ်းဢၼ်ဢုပ်ႉၵႃႈၼိူဝ်ပီႈၼွင်ႉၸိူဝ်ႉၶိူဝ်းပေႃႈၶဝ်ၵႃႈၼႂ်းၵူၼ်းမဵဝ်း ဢီႉသရေႇလႃႉ ၼၼ်ႉ တင်းသဵင်ႈတင်းလူင် မႃးၵႃႈတီႈၶုၼ်ႁေႃၶမ်း ၵႃႈၼႂ်းဝဵင်း ယေႇရူႉသလႅမ်ႇ ႁႂ်ႈလႆႈဢဝ်တိူၵ်ႈတႃႇပတီႉၺိၺ်ႇထႃႇဝရႃႉၽြႃး ဢွၵ်ႇသေၵႃႈၼႂ်းဝဵင်း တႃႇဝိတ်ႈ ဢၼ်လႆႈၸိုဝ်ႈ ၸီႉဢုၼ်ႇ ၼၼ်ႉမႃးလႄႈ၊-

2ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်မႃးၸူႉၵၼ်တုမ်ၵၼ်ၵႃႈတီႈ ၶုၼ်လူင် သေႃးလမုၼ်ႇ ၼႂ်းပွႆးဢၼ်ႁဵတ်းၼႂ်းလိူၼ် ဢေးသၼိမ်း ဢၼ်ပဵၼ်လိူၼ်သတ်ႉတမႃႉၼၼ်ႉဢေႃႈ။-

3ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢီႉသရေႇလႃႉ တင်းသဵင်ႈတင်းလူင်မႃးလႄႈ ယိတ်ႈပရေႃးႁဵၵ်ႈၸိူဝ်းၼၼ်ႉၵေႃႈ ႁၢပ်ႇတိူၵ်ႈတႃႇထႃႇဝရႃႉၽြႃးယူႇသေလႄႈ၊-

4ဢွၼ်ၵၼ်ပႃးဢဝ်တိူၵ်ႈတႃႇၸဝ်ႈ ဢိၵ်ႇတင်းမူဝ်းၵႃႇၸဝ်ႈ တီႈၸူႉတီႈတုမ်ပရဵၵ်ႈသၢတ်ႈတင်းၶိူင်ႈပိူင်ဢၼ်မူတ်းၸၢင်ႇၵႃႈဢၼ်မီး ၵႃႈၼႂ်းမူဝ်းၵႃႇၸဝ်ႈၸိူဝ်းၼၼ်ႉမႃးဢေႃႈ၊ ၼင်ႇၼၼ်လႄႈယိတ်ႈပရေႃးႁဵၵ်ႈတင်းလၢႆ တင်းၵူၼ်းမဵဝ်း လေႇဝီႉ ၸိူဝ်းၼၼ်ႉဢွၼ်ၵၼ် ဢဝ်ၸိူဝ်းၼၼ်ႉမႃးဢေႃႈ။-

5ၶုၼ်လူင် သေႃးလမုၼ်ႇ ဢိၵ်ႇတင်းပရဵၵ်ႈသၢတ်ႈ ဢီႉသရေႇလႃႉ တင်းသဵင်ႈတင်းလူင် ဢၼ်မႃးၸူႉၵၼ်တုမ်ၵၼ်ၵႃႈတီႈမၼ်းၼၼ်ႉ ဢွၼ်ၵၼ်ယူႇၵႃႈတီႈၽၢႆႇၼႃႈတိူၵ်ႈတႃႇၸဝ်ႈသေလႄႈ ပုၵ်ႈၸေႃႇယိတ်ႈသူဝ်းဝူဝ်းၼမ်ၼႃႇ ဢမ်ႇႁူႉၼမ်လႂ်ဢၼ်ထၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈၼၼ်ႉယူႇဢေႃႈ။-

6ယိတ်ႈပရေႃးႁဵၵ်ႈၸိူဝ်းၼၼ်ႉဢွၼ်ၵၼ်ဢဝ်တိူၵ်ႈတႃႇပတီႉၺိၺ်ႇထႃႇဝရႃႉၽြႃး သႂၢင်းၶဝ်ႈဝႆႉၵႃႈၼႂ်းတီႈမၼ်း ၵႃႈၼႂ်းထႃႇၼႃႉတီႈပျႃႇတိၵ်ႈၸဝ်ႈဢၼ်ဝႃႈ ထႃႇၼႃႉတီႈဢၼ်မူတ်းၸၢင်ႇၼႃႇသေပိူၼ်ႈ ၵႃႈတႂ်ႈပိၵ်ႇ ၶေႇရူႉၽဵမ်ႇ ၼၼ်ႉဢေႃႈ။-

7ၶေႇရူႉၽဵမ်ႇ ၸိူဝ်းၼၼ်ႉ ၵီႈၽႄႇပိၵ်ႇၶဝ်ၵႃႈၼိူဝ်တီႈယူႇတိူၵ်ႈတႃႇၸဝ်ႈၼၼ်ႉလႄႈ ၶေႇရူႉၽဵမ်ႇ ၸိူဝ်းၼၼ်ႉမုင်းႁူမ်ႇတိူၵ်ႈတႃႇၸဝ်ႈတင်းၵၢၼ်းမၼ်းၸိူဝ်းၼၼ်ႉယူႇဢေႃႈ။-

8ၶဝ်တိုတ်ႉထွတ်ႇၵၢၼ်းၸိူဝ်းၼၼ်ႉဢွၵ်ႇဝႆႉဢိတ်းၼိုင်ႈလႄႈ ယူႇၵႃႈၼႂ်းထႃႇၼႃႉတီႈမူတ်းၸၢင်ႇ ၵႃႈတီႈၽၢႆႇၼႃႈထႃႇၼႃႉတီႈပျႃႇတိၵ်ႈၸဝ်ႈၼၼ်ႉ ႁၼ်ဢမၢင်ႇႁူဝ်ၵၢၼ်းၸိူဝ်းၼၼ်ႉယူႇလႄႈ ၵႃႈတီႈၼွၵ်ႈၸိုင်ဢမ်ႇႁၼ်လႆႈ၊ မီးယူႇၵႃႈတီႈၼၼ်ႈတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

9ၵႃႈၼႂ်းတိူၵ်ႈတႃႇၸဝ်ႈၼၼ်ႉလိူဝ်သေၶႅပ်းမၢၵ်ႇႁိၼ်သွင်ၽႅၼ်ႇ ဢၼ် မူဝ်းသေႇ ဢဝ်သႂၢင်းသႂ်ႇဝႆႉ ၵႃႈၼႂ်းမၼ်းၵႃႈတီႈ ႁေႃးရပ်ႉ တီႈဢၼ်ထႃႇဝရႃႉၽြႃး ႁဵတ်းပတီႉၺိၺ်ႇလူၺ်ႈၵၼ်တင်းၵူၼ်းမဵဝ်း ဢီႉသရေႇလႃႉ တင်းလၢႆ ၼႂ်းမိူဝ်ႈဢၼ်ၶဝ်ဢွၵ်ႇသေၵႃႈၼႂ်း မိူင်း ဢေႇၵိပ်ႉတူႉ မႃးၼၼ်ႉၸိူဝ်းၼၼ်ႉ ဢမ်ႇမီးၵႃႈသင်သေၸိူဝ်ႉသေပိူင်။

10မိူဝ်ႈဢၼ်ယိတ်ႈပရေႃးႁဵၵ်ႈၸိူဝ်းၼၼ်ႉ ဢွၵ်ႇသေၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉၸိုင် မွၵ်ႇၵုမ်ႈတဵမ်ဝႆႉၵႃႈၼႂ်းႁိူၼ်းထႃႇဝရႃႉၽြႃးၼၼ်ႉ၊-

11ထၼ်ႈပေႃးယိတ်ႈပရေႃးႁဵၵ်ႈၸိူဝ်းၼၼ်ႉဢမ်ႇၸုၵ်းၶၢမ်ႇယူႇႁႂ်ႈလႆႈပွင်ႁဵတ်းဢမူႉၸဝ်ႈၵွပ်ႈပိူဝ်ႈမွၵ်ႇၵုမ်ႈၼၼ်ႉလႆႈ၊ လွင်ႈမၼ်းၸမ်ႉ မုၼ်ၽုင်းထႃႇဝရႃႉၽြႃးတဵမ်ဝႆႉၵႃႈၼႂ်းႁိူၼ်းထႃႇဝရႃႉၽြႃးၼၼ်ႉဢေႃႈ။-

12မိူဝ်ႈၼၼ်ႉ သေႃးလမုၼ်ႇ ဢွၵ်ႇသူပ်းလႄႈဝႃႈ၊ ထႃႇဝရႃႉၽြႃးလၢတ်ႈလူၺ်ႈလွင်ႈဢၼ်မၼ်းၸဝ်ႈတၵ်းယူႇၵႃႈၼႂ်းလပ်းသိင်ႇ ဢၼ်ၼႃတၼ်ၼႃႇၼၼ်ႉဝႆႉဢေႃႈ။-

13ၵူၺ်းၵႃႈၶႃႈၸဝ်ႈတႄႇႁဵတ်းႁိူၼ်းတီႈဢၼ်ၸဝ်ႈႁဝ်းတၵ်းၵိင်းဝၢပ်ႈယူႇ၊ ထႃႇၼႃႉတီႈဢၼ်ၸဝ်ႈႁဝ်းတၵ်းယူႇတၵ်းသဝ်းတႃႇသေႇၼၼ်ႉဢမၢၼ်ႇၶၼ်ပဵၼ်တီႈၶႃႈယဝ်ႉ၊ ဝႃႈၼင်ႇၼႆဢေႃႈ။

14လႆႈသမ်ႉ ၶုၼ်ႁေႃၶမ်းဝၢႆႇၼႃႈတူၺ်းလႄႈ ပၼ်တၢင်းလီတီႈပရဵၵ်ႈသၢတ်ႈမဵဝ်း ဢီႉသရေႇလႃႉ တင်းသဵင်ႈတင်းလူင်လႄႈ ပရဵၵ်ႈသၢတ်ႈမဵဝ်း ဢီႉသရေႇလႃႉ တင်းသဵင်ႈတင်းလူင်ဢွၼ်ၵၼ်ၸုၵ်းယူႇဢေႃႈ။-

15မၼ်းဢွၵ်ႇသူပ်းဝႃႈလႄႈဝႃႈ၊ ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢၼ်ဝႆႉပျႃႇတိၵ်ႈၸဝ်ႈတီႈၸဝ်ႈပေႃႈၵဝ် တႃႇဝိတ်ႈ လႄႈ ႁဵတ်းၸွမ်းၵႃႈၼင်ႇပျႃႇတိၵ်ႈၸဝ်ႈၼၼ်ႉသေလႄႈဝႃႈ၊-

16ၸႃႉၸဵမ်မိုဝ်ႉဝၼ်းဢၼ်ၵဝ်ၼုၵ်ႈဢဝ်ၵူၼ်းၵဝ် ၵူၼ်းမဵဝ်း ဢီႉသရေႇလႃႉ တင်းလၢႆဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉ၊ ပိၵ်ႉသမ်ႉၵဝ်ဢမ်ႇလိူၵ်ႈၵဵပ်းဢဝ်ဝဵင်းသေတီႈသေဝဵင်း ၵႃႈၼႂ်းလိၼ်မဵဝ်း ဢီႉသရေႇလႃႉ ၵႃႈမီး ႁႂ်ႈလႆႈတႄႇႁဵတ်းႁိူၼ်းတီႈဢၼ် ၼႃႇမႃႉၸိုဝ်ႈသဵင်ၵဝ်တၵ်းတႄႇယူႇၼၼ်ႉသေၵေႃႈ၊ ၵဝ်လိူၵ်ႈၵဵပ်းဢဝ် တႃႇဝိတ်ႈ ႁႂ်ႈမၼ်းလႆႈဢုပ်ႉၵႃႈၼိူဝ်ၵူၼ်းၵဝ် ၵူၼ်းမဵဝ်း ဢီႉသရေႇလႃႉ တင်းလၢႆဝႆႉယဝ်ႉ၊ ဝႃႈၼင်ႇၼႆၼၼ်ႉ မီးမင်ႇၵလႃႇသေၵမ်းလူၺ်ႈ။-

17ၸဝ်ႈပေႃႈၵဝ် တႃႇဝိတ်ႈ ၼၼ်ႉ မီးတၢင်းၵျၢမ်ႇတၢင်းပွင်တၵ်းတႄႇႁဵတ်းႁိူၼ်း ပုၼ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢေႃႈ။-

18ၵူၺ်းၵႃႈ ထႃႇဝရႃႉၽြႃးမီးဢမိင်ႉတီႈၸဝ်ႈပေႃႈၵဝ် တႃႇဝိတ်ႈ လႄႈဝႃႈ၊ ၵွပ်ႈပိူဝ်ႈဢၼ်မႂ်းမီးတၢင်းၵျၢမ်ႇတၢင်းပွင် တၵ်းတႄႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်ႈသဵင်ၵဝ်လႄႈ လွင်ႈတၢင်းဢၼ်မီးၼႂ်းၸႂ်မႂ်းၼၼ်ႉပဵၼ်ဢၼ်လီယဝ်ႉ။-

19ၼႂ်းဝႃႈၼၼ်သေၵေႃႈ မႂ်းဢမ်ႇလႆႈတႄႇႁဵတ်းႁိူၼ်းၸဝ်ႈ။ လုၵ်ႈၸၢႆးဢွၵ်ႇမႂ်းၼၼ်ႉတၵ်းလႆႈတႄႇႁဵတ်းႁိူၼ်းၸဝ်ႈ ပုၼ်ႈၼႃႇမႃႉၸိုဝ်ႈသဵင်ၵဝ်ဢေႃႈ၊ ဝႃႈၼင်ႇၼႆဢေႃႈ။-

20ထႃႇဝရႃႉၽြႃးၼၼ်ႉ ႁဵတ်းၸွမ်းၵႃႈၼင်ႇဢၼ်ဢမိင်ႉၸဝ်ႈမီးၼၼ်ႉသေလႄႈ ၵဝ်လႆႈပေႃႇပဵၼ်မႃးတၢင်တူဝ်ၸဝ်ႈပေႃႈၵဝ် တႃႇဝိတ်ႈ ၼၼ်ႉလႄႈ ၼင်ႈယူႇၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်း ဢီႉသရေႇလႃႉ မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃးမီးၵတီႉၸဝ်ႈဝႆႉၼၼ်ႉယူႇသေလႄႈ တႄႇႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ယဝ်ႉ။-

21ၵႃႈၼႂ်းႁိူၼ်းၸဝ်ႈၼၼ်ႉၵေႃႈ၊ ၵဝ်ႁဵတ်းထႃႇၼႃႉတီႈဢၼ်ဝႆႉ တိူၵ်ႈတႃႇၸဝ်ႈ ဢၼ်ပႃးလိၵ်ႈမၢၵ်ႇႁိၼ်ပတီႉၺိၺ်ႇထႃႇဝရႃႉၽြႃး ဢၼ်မၼ်းၸဝ်ႈႁဵတ်းလူၺ်ႈၵၼ်တင်းပူႇမွၼ်ႇႁဝ်း၊ မိူဝ်ႈဢၼ်မၼ်းၸဝ်ႈၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉဝႆႉယဝ်ႉ၊ ဝႃႈၼင်ႇၼႆဢေႃႈ။

22လႆႈသမ်ႉ သေႃးလမုၼ်ႇ ၸုၵ်းယူႇၵႃႈတီႈၽၢႆႇၼႃႈ ယိတ်ႈပလၢင်ႇထႃႇဝရႃႉၽြႃးသိုဝ်ႈၼႃႈတႂ်ႈတႃပရဵၵ်ႈသၢတ်ႈ မဵဝ်း ဢီႉသရေႇလႃႉ တင်းသဵင်ႈတင်းလူင်လႄႈ ၵီႈၽႃႇမိုဝ်းမၼ်းၶိုၼ်ႈၵႃႈၼိူဝ်ၽႃႉၵၢင်ႁၢဝ်ယူႇသေလႄႈ သူးတွင်းလႄႈဝႃႈ၊-

23ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ တီႈၶႃႈ၊ ၵႃႈတီႈၽႃႉၵၢင်ႁၢဝ်ၵႃႈၼိူဝ် ၵႃႈတီႈလိၼ်မိူင်းၵႃႈတႂ်ႈၼႆႉ ၽြႃးဢၼ်မိူၼ်ၵၼ်တင်းၸဝ်ႈႁဝ်း ဢၼ်ပႂ်ႉၵမ်ပႂ်ႉၸွမ်းပတီႉၺိၺ်ႇတြႃး ဢိၵ်ႇတင်းၵရူႉၼႃႇတြႃးပုၼ်ႈၶႃႈၸဝ်ႈႁဝ်းတင်းလၢႆ ဢၼ်ပႃးတင်းႁူဝ်ၸႂ်သဵင်ႈသဵင်ႈၵႂႃႇမႃးၵႃႈတီႈၽၢႆႇၼႃႈၸဝ်ႈႁဝ်း၊-

24ဢၼ်ႁဵတ်းတီႈၶႃႈၸဝ်ႈႁဝ်း ၸဝ်ႈပေႃႈၶႃႈၸဝ်ႈ တႃႇဝိတ်ႈ ၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတီႉတီႈမၼ်းၼၼ်ႉ ဢၼ်ဝႃႈမီးဢမိင်ႉဢွၵ်ႇသူပ်းဝႃႈတီႈမၼ်းလႄႈ ႁႂ်ႈပျေႉၸုမ်ႇပဵၼ်မိူၼ်ၸိူဝ်ႉၼင်ႇဢၼ် ပဵၼ်ဝၼ်းမိူဝ်ႈၼႆႉၼၼ်ႉဢမ်ႇမီးသေသူႇသေပႃး။-

25ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ တီႈၶႃႈ၊ မိူဝ်ႈလဵဝ်ၼႆႉ ၶႅၼ်းတေႃႈပႂ်ႉၸွမ်းၵတီႉၸဝ်ႈဢၼ်ၸဝ်ႈႁဝ်းဝႆႉၵႃႈတီႈၶႃႈၸဝ်ႈႁဝ်း ပေႃႈၶႃႈၸဝ်ႈ တႃႇဝိတ်ႈ ၼၼ်ႉလႄႈ မီးဢမိင်ႉလႄႈဝႃႈ ပေႃးလုၵ်ႈမႂ်းလၢၼ်မႂ်း မီးဢလူဝ်ႇၶႂ်ႈႁဵတ်းသတီႉတီႈသဵၼ်ႈတၢင်းဢၼ်ၶဝ်ၵႂႃႇၼၼ်ႉ ၵႂႃႇမႃးယူႇၵႃႈတီႈၽၢႆႇၼႃႈၵဝ် မိူၼ်ၸိူဝ်ႉၼင်ႇဢၼ်မႂ်းၵႂႃႇမႃးယူႇၵႃႈတီႈၽၢႆႇၼႃႈၵဝ်ၼၼ်ႉၸိုင်၊ မဵဝ်းၸိူဝ်ႉၶိူဝ်းမႂ်း ဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်း ဢီႉသရေႇလႃႉ သိုဝ်ႈၼႃႈတႂ်ႈတႃၵဝ်ၼႆႉ ဢမ်ႇလႆႈထၢတ်ႇ၊ ဝႃႈၼင်ႇၼႆၼၼ်ႉသေၵမ်းတီႈၶႃႈ၊-

26ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ တီႈၶႃႈ၊ မိူဝ်ႈလဵဝ်ၼႆႉ ၶႅၼ်းတေႃႈႁႂ်ႈၵႂၢမ်းၸဝ်ႈႁဝ်း ဢၼ်ၸဝ်ႈႁဝ်းမီး ဢမိင်ႉဝႆႉတီႈၶႃႈၸဝ်ႈႁဝ်း ၸဝ်ႈပေႃႈၶႃႈၸဝ်ႈ တႃႇဝိတ်ႈ ၼၼ်ႉဝႆႉၼၼ်ႉ ပျေႉၸုမ်ႇသေၵမ်းတီႈၶႃႈ၊-

27ၼႂ်းဝႃႈၼၼ်သေၵေႃႈ ၽြႃးပဵၼ်ၸဝ်ႈတၵ်းၵိင်းဝၢပ်ႈယူႇၵႃႈၼိူဝ်လိၼ်မိူင်းၼႆႉဢမၢၼ်ႇၶၼ်ပဵၼ်တီႈၶႃႈႁိုဝ်။ တူၺ်းတီႈၶႃႈလူး၊ ၵၢင်ႁၢဝ်ဢိၵ်ႇတင်းၵၢင်ႁၢဝ်ဢၼ်ပဵၼ်ၸိၵ်းၸွမ်ၵၢင်ႁၢဝ်ၼၼ်ႉ ဢမ်ႇပေႃးဢမ်ႇၶၢမ်ႇၸဝ်ႈႁဝ်းလႆႈလႄႈ ႁိူၼ်းဢၼ်ၶႃႈၸဝ်ႈတႄႇႁဵတ်းၼႆႉ ယဵင်ႈၶႅၼ်းတၵ်းဢမ်ႇပေႃးဢမ်ႇၶၢမ်ႇၸဝ်ႈႁဝ်းလႆႈတီႈၶႃႈ။-

28ၼႂ်းဝႃႈၼၼ်သေၵေႃႈ ထႃႇဝရႃႉၽြႃး ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႅၼ်းတေႃႈႁူႉၸႅင်ႈထွမ်ႇဢဝ်တၢင်းဢၼ်ၶႃႈၸဝ်ႈႁဝ်းၼႆႉ သူးတွင်းလႄႈလဝ်ႊယွၼ်းၼႆႉ ႁႂ်ႈလႆႈႁပ်ႉတုင်းဢဝ်ၵႂၢမ်းဢၼ်ၶႃႈၸဝ်ႈႁဝ်းၼႆႉ ႁွင်ႉသႅၼ်ႇလႄႈ ႁဵတ်းပထၼႃႇၵႃႈတီႈၽၢႆႇၼႃႈၸဝ်ႈႁဝ်းဝၼ်းမိူဝ်ႈၼႆႉၼၼ်ႉသေၵမ်းတီႈၶႃႈ၊-

29ၶႅၼ်းတေႃႈမိုၼ်းတႃၽုၺ်ႇတႃၸဝ်ႈႁဝ်းၸူး ၵႃႈတီႈႁိူၼ်းၸဝ်ႈၼႆႉ ၵူႈဝၼ်းၵူႈၶိုၼ်းဢမ်ႇထၢတ်ႇဢၼ်ဝႃႈၵႃႈတီႈၼႆႈ ဢၼ်ၸဝ်ႈႁဝ်းမီးဢမိင်ႉလႄႈဝႃႈ၊ ၼႃႇမႃႉၸိုဝ်ႈသဵင်ၵဝ်တၵ်းလႆႈတႄႇယူႇၵႃႈတီႈၼၼ်ႈဢေႃႈ၊ ဝႃႈၼင်ႇၼႆၼၼ်ႉၼႆလႄႈ ထွမ်ႇဢဝ်ၵႂၢမ်းဢၼ် ၶႃႈၸဝ်ႈႁဝ်းၼႆႉသူးတွင်းၸူးၵႃႈတီႈၼႆႈၼၼ်ႉသေၵမ်းတီႈၶႃႈ၊-

30ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ် တီႈဢၼ်ၸဝ်ႈႁဝ်းၵိင်းဝၢပ်ႈယူႇၼၼ်ႉသေလႄႈ ထွမ်ႇငိၼ်းၵႂၢမ်းဢၼ်ၶႃႈၸဝ်ႈႁဝ်းၼႆႉ ဢိၵ်ႇတင်းၵူၼ်းၸဝ်ႈႁဝ်းၵူၼ်းမဵဝ်း ဢီႉသရေႇလႃႉ တင်းလၢႆဢွၼ်ၵၼ်ႁဵတ်းပထၼႃႇ လဝ်ႊယွၼ်းမိူဝ်ႈဢၼ်ၶဝ်ၼၼ်ႉသူးတွင်းၸူးၵႃႈတီႈၼႆႈၼၼ်ႉလႄႈ ထွမ်ႇငိၼ်းသေယဝ်ႉ၊ ပွႆႇလွတ်ႈၵႃႈၼႂ်းဢပႅတ်ႈသေၵမ်းတီႈၶႃႈ၊

31ပေႃးသေၵေႃႉသေၵူၼ်းၽိတ်းပိူင်ႈၵူၼ်းႁိူၼ်းၸမ်ၵၼ်တင်းမၼ်းလႄႈ မီးတၢင်းဢၼ်တိုၵ်းပၼ်တၢင်းဢၼ်ၵိၼ်ႇဢၼ်ဝႃႈတီႈမၼ်းႁႂ်ႈမၼ်းလႆႈၵိၼ်ႇလႆႈဝႃႈသေယဝ်ႉ၊ မၼ်းမႃးလႄႈၵိၼ်ႇဝႃႈၵႃႈတီႈၽၢႆႇၼႃႈယိတ်ႈပလၢင်ႇၸဝ်ႈႁဝ်း ၵႃႈၼႂ်းႁိူၼ်းၸဝ်ႈၼႆႉၸိုင်၊-

32ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းသေယဝ်ႉ၊ ႁဵတ်းၸွမ်းလႄႈတႅပ်းတတ်းတြႃးတီႈၶႃႈၸဝ်ႈႁဝ်းတင်းလၢႆလႄႈ ၸီႇယၢင်ႇဢပႅတ်ႈတီႈၵေႃႉဢၼ်ဢမ်ႇတြႃးၼၼ်ႉ ႁႂ်ႈဢပႅတ်ႈမၼ်းတူၵ်းႁွတ်ႈၵႃႈၼိူဝ်ႁူဝ်မၼ်းသေလႄႈ ၸီႇယၢင်ႇတၢင်းဢၼ်သိုဝ်ႈတေႃႇ တီႈၵေႃႉဢၼ်သိုဝ်ႈတေႃႇၼၼ်ႉလႄႈ ပၼ်ၸွမ်းၵႃႈၼင်ႇတၢင်းဢၼ်မၼ်းသိုဝ်ႈတေႃႇၼၼ်ႉသေၵမ်းတီႈၶႃႈ။

33ယၢမ်းမိူဝ်ႈဢၼ်ၵူၼ်းၸဝ်ႈႁဝ်းၵူၼ်းမဵဝ်း ဢီႉသရေႇလႃႉ တင်းလၢႆ တူၵ်းသုမ်းၵႃႈတီႈၽၢႆႇၼႃႈရၢၼ်ႇသူႇ ၵွပ်ႈပိူဝ်ႈဢၼ်ၶဝ်ၽိတ်းပိူင်ႈၸဝ်ႈႁဝ်းၼၼ်ႉ ပေႃးၶဝ်ၶိုၼ်းမႃးတီႈၸဝ်ႈႁဝ်းလႄႈ ႁပ်ႉတုင်းဢဝ်ၼႃႇမႃႉၸိုဝ်ႈသဵင်ၸဝ်ႈႁဝ်းယူႇ၊ ႁဵတ်းသူးတွင်းပထၼႃႇ လဝ်ႊယွၼ်းၵႃႈတီႈၽၢႆႇၼႃႈၸဝ်ႈႁဝ်း ၵႃႈၼႂ်းႁိူၼ်းၸဝ်ႈၼႆႉၸိုင်၊-

34ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းလႄႈ ပွႆႇၵူၼ်းၸဝ်ႈႁဝ်းၵူၼ်းမဵဝ်း ဢီႉသရေႇလႃႉ တင်းလၢႆ လွတ်ႈသေၵႃႈၼႂ်းဢပႅတ်ႈသေလႄႈ သမ်ႉဢဝ်ၶဝ်ၶိုၼ်းသူင်ႇႁွတ်ႈၵႃႈၼႂ်းမိူင်းဢၼ်ၸဝ်ႈႁဝ်း ဢဵတ်းလူပၼ်တီႈပူႇမွၼ်ႇၶဝ်ၸိူဝ်းၼၼ်ႉၼႆႉသေၵမ်းတီႈၶႃႈ။-

35ယၢမ်းမိူဝ်ႈဢၼ်ၽူၼ်ဢမ်ႇတူၵ်း၊ ၽႃႉလႅင်ႉၵွပ်ႈပိူဝ်ႈဢၼ်ၶဝ်ၽိတ်းပိူင်ႈၸဝ်ႈႁဝ်းၼၼ်ႉ၊ ပေႃးၶဝ်သူးတွင်းၸူးၵႃႈတီႈထႃႇၼႃႉတီႈၼႆႉလႄႈ ႁပ်ႉတုင်းဢဝ်ၼႃႇမႃႉၸိုဝ်ႈသဵင်ၸဝ်ႈႁဝ်းယူႇသေလႄႈ ၸုၼ်ႉပႅတ်ႈတူႉၸရိူၵ်ႈၶဝ် မိူဝ်ႈဢၼ်ၸဝ်ႈႁဝ်းသင်ႇသွၼ်သုင်းမႃႉၶဝ်ၼၼ်ႉၸိုင်၊-

36ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းလႄႈ ပွႆႇၶႃႈၸဝ်ႈႁဝ်းၵူၼ်းၸဝ်ႈႁဝ်း ၵူၼ်းမဵဝ်း ဢီႉသရေႇလႃႉ တင်းလၢႆ လွတ်ႈသေၵႃႈၼႂ်းဢပႅတ်ႈၼႂ်းမိူဝ်ႈဢၼ်ၸဝ်ႈႁဝ်း ၸီႉၼႄသဵၼ်ႈတၢင်းဢၼ်လီဢၼ်ငၢမ်း ဢၼ်ၶဝ်ထုၵ်ႇလီၸွမ်းၼၼ်ႉတီႈၶဝ်ၼၼ်ႉလႄႈ ႁႂ်ႈၽူၼ်တူၵ်းၵႃႈၼိူဝ်လိၼ်ဢၼ် ၸဝ်ႈႁဝ်းပၼ်ဢမူၺ်ႇတီႈၵူၼ်းၸဝ်ႈႁဝ်းတင်းလၢႆၼႆႉသေၵမ်းတီႈၶႃႈ၊

37ၵႃႈၼႂ်းမိူင်းၸဝ်ႈၼႆႉ ပေႃးပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်း၊ ပေႃးပဵၼ်ၽေးၵႃႇလႃႉႁႃႈလႅင်မိူင်း၊ ပေႃးပဵၼ်တၢင်းဢၼ်လူမ်းတိူဝ်ႉထုၵ်ႇသႂ်ႇလႄႈ တူၼ်ႈမႆႉတၢႆ၊ တၢင်းဢၼ်ၼမ်ႉႁူဝ်ႈယွတ်ႇသႂ်ႇလႄႈ တူၼ်ႈမႆႉတၢႆ၊ ပေႃးပဵၼ်တၢင်းဢၼ်မႅင်းၵႅင်း ဢရႃႇၽႃႉ ၊ မႅင်းၵႅင်း ၶႃႇသီႉလႃႉ ၶူပ်းၵိၼ်၊ ပေႃးပဵၼ်တၢင်းဢၼ်ရၢၼ်ႇသူႇၶဝ် တင်းလၢႆမႃးၶၢမ်းယူႇၵႃႈၼႂ်း ၼမ်ႉလိၼ်ဝၢၼ်ႈဝဵင်းၶဝ်၊ ပေႃးပဵၼ်ၽေးဢူႉပၢတ်ႈမဵဝ်းလႂ်သေဢမ်ႇဝႃႈ တၢင်းၶႆႈတၢင်းပဵၼ်မဵဝ်းလႂ်သေဢမ်ႇဝႃႈလႄႈ၊-

38ပေႃးသေၵေႃႉသေၵူၼ်း၊ ဢမ်ႇၼၼ်ၵူၼ်းၸဝ်ႈႁဝ်း ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢၼ်ႁူႉၽေးတၢမ်ႇတုၵ်ႉၶႃႉ ဢၼ်လႆႈၶၢမ်ႇႁင်းၽႂ်ႁင်းမၼ်းၼၼ်ႉယူႇသေလႄႈ ၵီႈၽႃႇမိုဝ်းၶဝ်ႈၸူးၵႃႈတီႈႁိူၼ်းၸဝ်ႈၼႆႉၸိူဝ်းၼၼ်ႉ ဢဝ်တင်းၵႂၢမ်းပထၼႃႇ တၢင်းဢၼ်လဝ်ႊယွၼ်းသေၸိူဝ်ႉသေပိူင် သူးတွင်းယွၼ်းတီႈၸဝ်ႈႁဝ်းၸိုင်၊-

39ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းသေယဝ်ႉ၊ ပွႆႇလွတ်ႈသေလႄႈႁဵတ်းၸွမ်းလႄႈၸီႇယၢင်ႇတီႈၵူၼ်းဢၼ် ၸဝ်ႈႁဝ်းႁူႉသၽေႃးႁူဝ်ၸႂ်ၶဝ်ႁင်းၽႂ်ႁင်းမၼ်းၼၼ်ႉ ၸွမ်းၵႃႈၼင်ႇသဵၼ်ႈတၢင်းဢၼ်ၶဝ်ၵႂႃႇမႃးၵႃႈမီးၼၼ်ႉ ၵွပ်ႈပိူဝ်ႈဢၼ်ၸဝ်ႈႁဝ်းၵူၺ်းႁူႉသၽေႃးႁူဝ်ၸႂ်ၵူၼ်းသတ်ႉတဝႃႇတင်းသဵင်ႈတင်းလူင်ၼၼ်ႉလႄႈ၊-

40ႁႂ်ႈၶဝ်ၵူဝ်ယမ်ၸဝ်ႈႁဝ်းယူႇၶိင်ႇၵႃႇလႃႉမိုဝ်ႉဝၼ်း ဢၼ်ၶဝ်ဢသၢၵ်ႈလိပ်းယူႇၵႃႈၼႂ်းမိူင်းဢၼ် ၸဝ်ႈႁဝ်းဢဵတ်းလူပၼ်တီႈပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼႆႉၼၼ်ႉသေၵမ်းတီႈၶႃႈ။

41ပေႃးၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ဢမ်ႇၸႂ်ႈၵူၼ်းၸဝ်ႈႁဝ်း မဵဝ်း ဢီႉသရေႇလႃႉ ၼၼ်ႉ ထွၵ်ႈလူၺ်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈ လုၵ်ႉသေၵႃႈတီႈမိူင်းဢၼ်ၵႆမႃး ၵွပ်ႈပိူဝ်ႈဢၼ်မၼ်းငိၼ်းသတၢင်းသဵင်ၶၢဝ်ႇၼႃႇမႃႉၸိုဝ်ႈသဵင်ၸဝ်ႈႁဝ်း ဢၼ်ယႂ်ႇမျၢတ်ႈၼႃႇ ဢိၵ်ႇတင်းသတၢင်းသဵင်ၶၢဝ်ႇမိုဝ်းၸဝ်ႈႁဝ်းဢၼ်ႁႅင်းယႂ်ႇၼႃႇ

42တင်းၶႅၼ်ၸဝ်ႈႁဝ်းဢၼ်ယဵတ်ႇယိုၼ်ႈၼၼ်ႉလႄႈ ႁွတ်ႈမႃးသေယဝ်ႉ၊ သူးတွင်းၸူးၵႃႈတီႈႁိူၼ်းၸဝ်ႈၼႆႉၸိုင်၊-

43ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ် တီႈဢၼ်ၸဝ်ႈႁဝ်းၵိင်းဝၢပ်ႈယူႇၼၼ်ႉသေလႄႈ ထွမ်ႇငိၼ်းလႄႈႁဵတ်းၸွမ်း ၵႃႈၼင်ႇဢၼ်ၵူၼ်းတၢင်ႇၸိူဝ်ႉတၢင်ႇမဵဝ်းၼၼ်ႉ သူးတွင်းလဝ်ႊယွၼ်းၼၼ်ႉ ႁႂ်ႈၵူၼ်းလိၼ်မိူင်းတင်းသဵင်ႈတင်းလူင် ႁူႉၸၵ်းၼႃႇမႃႉၸိုဝ်ႈသဵင်ၸဝ်ႈႁဝ်းလႄႈ ၵူဝ်ယမ်ၸဝ်ႈႁဝ်းမိူၼ်ၸိူဝ်ႉၼင်ႇဢၼ် ၵူၼ်းၸဝ်ႈႁဝ်းၵူၼ်းမဵဝ်း ဢီႉသရေႇလႃႉ တင်းလၢႆ ၵူဝ်ယမ်ၸဝ်ႈႁဝ်းၼၼ်ႉလႄႈ ႁႂ်ႈၶဝ်ႁူႉလွင်ႈဢၼ် ႁိူၼ်းၸဝ်ႈဢၼ်ၶႃႈၸဝ်ႈႁဝ်းတႄႇႁဵတ်းၼႆႉလႆႈၶၢမ်ႇတၢင်းဢၼ် ဢဝ်ၼႃႇမႃႉၸိုဝ်ႈသဵင်ၸဝ်ႈႁဝ်းႁွင်ႉႁဵၵ်ႈၼၼ်ႉသေၵမ်းတီႈၶႃႈ။

44ယၢမ်းမိူဝ်ႈဢၼ်ၵူၼ်းၸဝ်ႈႁဝ်း ၶီႇသိုၵ်းၵႂႃႇတီႈဢၼ်ရၢၼ်ႇသူႇၶဝ်မီးၼၼ်ႉ ၸွမ်းၵႃႈၼင်ႇဢၼ်ၸဝ်ႈႁဝ်းပွႆႇၸႂ်ႉၼၼ်ႉလႄႈ ဢွၼ်ၵၼ်သူးတွင်းယွၼ်းၸူးၵႃႈတီႈဝဵင်းဢၼ်ၸဝ်ႈႁဝ်းလိူၵ်ႈၵဵပ်းဢဝ်ၼႆႉ ဢိၵ်ႇတင်းၸူးၵႃႈတီႈႁိူၼ်းၸဝ်ႈ ဢၼ်ၶႃႈၸဝ်ႈတႄႇႁဵတ်း ပုၼ်ႈၼႃႇမႃႉၸိုဝ်ႈသဵင်ၸဝ်ႈႁဝ်းၼႆႉၼၼ်ႉၸိုင်၊-

45ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းဢဝ်ၵႂၢမ်းဢၼ်ၶဝ်သူးတွင်းလႄႈ လဝ်ႊယွၼ်းၼၼ်ႉလႄႈ ပႂ်ႉဢမူႉၶဝ်သေၵမ်းတီႈၶႃႈ။-

46ပေႃးၶဝ်ၽိတ်းပိူင်ႈၸဝ်ႈႁဝ်း ၵွပ်ႈပိူဝ်ႈဢၼ်ၵေႃႉဢၼ်ဢမ်ႇၸၢင်ႈၽိတ်းပိူင်ႈၼၼ်ႉ ဢမ်ႇမီးသေၵေႃႉသေၵူၼ်းၼၼ်ႉလႄႈ ၸဝ်ႈႁဝ်းၸႂ်မႆႈၶႆႈၸႃႉတီႈၶဝ်လႄႈ ၸဝ်ႈႁဝ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇ ထၼ်ႈပေႃးရၢၼ်ႇသူႇၸိူဝ်းၼၼ်ႉသိမ်းဢဝ်ၶဝ်ၵႂႃႇ ၵႃႈတီႈမိူင်းရၢၼ်ႇသူႇ၊ မိူင်းဢၼ်ၵႆ၊ ဢမ်ႇၼၼ် မိူင်းဢၼ်ၸမ်၊-

47ပေႃးၶဝ်လႆႈသတီႉၼႂ်းမိူင်းတီႈဢၼ်ၶဝ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉၼၼ်ႉလႄႈ ၸႂ်ၶၢႆႉပုတ်ႈယူႇသေလႄႈ ယူႇၵႃႈၼႂ်းမိူင်းၶဝ်ၸိူဝ်းဢၼ် သိမ်းဢဝ်ၶဝ်ၵႂႃႇၼၼ်ႉတွင်းပၢၼ်ႇလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ ၽိတ်းပိူင်ႈတီႈၶႃႈယဝ်ႉ၊ ႁဵတ်းဢမူႉဢၼ်ဢမ်ႇသိုဝ်ႈဢမ်ႇတေႃႇတီႈၶႃႈယဝ်ႉ၊ ၵမ်ၵျၢင်ႉဢၼ်ႁၢႆႉဢၼ်ယုတ်ႈတီႈၶႃႈယဝ်ႉ၊ ဝႃႈၼင်ႇၼႆၼၼ်ႉ၊-

48ပေႃးၶဝ်ပႃးတင်းႁူဝ်ၸႂ်သဵင်ႈသဵင်ႈ ၶိုၼ်းမႃးတီႈၸဝ်ႈႁဝ်းၼႂ်းမိူဝ်ႈဢၼ်ၶဝ်ယင်းတိုၵ်ႉယူႇၵႃႈၼႂ်းမိူင်းရၢၼ်ႇသူႇၶဝ် ဢၼ်သိမ်းဢဝ်ၶဝ်ၵႂႃႇၼၼ်ႉယူႇၼၼ်ႉလႄႈ သူးတွင်းလဝ်ႊယွၼ်းၸူးၵႃႈတီႈမိူင်းဢၼ်ၸဝ်ႈႁဝ်းပၼ်တီႈပူႇမွၼ်ႇၶဝ်၊ ဝဵင်းဢၼ်ၸဝ်ႈႁဝ်းလိူၵ်ႈၵဵပ်းဢဝ်၊ ႁိူၼ်းၸဝ်ႈဢၼ်ၶႃႈၸဝ်ႈတႄႇႁဵတ်းပုၼ်ႈၼႃႇမႃႉၸိုဝ်ႈသဵင်ၸဝ်ႈႁဝ်းၼႆႉၸိုင်၊-

49ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်တီႈဢၼ်ၸဝ်ႈႁဝ်းၵိင်းဝၢပ်ႈယူႇၼၼ်ႉသေလႄႈ ထွမ်ႇငိၼ်းၵႂၢမ်းဢၼ်ၶဝ်သူးတွင်းလဝ်ႊယွၼ်းၼၼ်ႉလႄႈ ပႂ်ႉဢမူႉၶဝ်သေၵမ်းတီႈၶႃႈ၊-

50ၶႅၼ်းတေႃႈၵႄႈလိတ်ႈၵူၼ်းၸဝ်ႈႁဝ်းဢၼ်ၽိတ်းပိူင်ႈၸဝ်ႈႁဝ်းၸိူဝ်းၼၼ်ႉလွတ်ႈလႄႈ ပွႆႇလွင်ႈတၢင်းဢၼ်ၶဝ်ၽိတ်းပိူင်ႈ ပူၼ်ႉလိူဝ်ၵႃႈဢၼ်ၶဝ်ၽိတ်းပိူင်ႈပူၼ်ႉလိူဝ်ၸဝ်ႈႁဝ်းၼၼ်ႉပႅတ်ႈမူတ်းမူတ်းသေၵမ်းတီႈၶႃႈ။ ၶႅၼ်းတေႃႈႁႂ်ႈၶဝ်ပဵၼ်လွင်ႈၵရူႉၼႃႇ ၵႃႈတီႈၽၢႆႇၼႃႈၶဝ်ၸိူဝ်းဢၼ်သိမ်းဢဝ်ၵႂႃႇၼၼ်ႉ ႁႂ်ႈၶဝ်ၼၼ်ႉမီးၵရူႉၼႃႇတီႈၶဝ်သေၵမ်းတီႈၶႃႈ၊-

51လွင်ႈမၼ်းၸမ်ႉ ၶဝ်ပဵၼ်ၵူၼ်းၸဝ်ႈႁဝ်းမဵဝ်းဢၼ်ၸဝ်ႈႁဝ်းလႆႈၶၢမ်ႇဢမူၺ်ႇဢၼ်ၸဝ်ႈႁဝ်းၼုၵ်ႈဢဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၵႃႈၼႂ်းၵၢင်မုၵ်ႉၽႆးလဵၵ်းၼၼ်ႉမႃးတီႈၶႃႈဢေႃႈ။-

52ၶႅၼ်းတေႃႈၽုၺ်ႇတႃမိုၼ်းတႃၸဝ်ႈႁဝ်းၸူးတၢင်းဢၼ် ၶႃႈၸဝ်ႈႁဝ်းၼႆႉသူးတွင်းလဝ်ႊယွၼ်း ဢိၵ်ႇတင်းတၢင်းဢၼ်ၵူၼ်းၸဝ်ႈႁဝ်း ၵူၼ်းမဵဝ်း ဢီႉသရေႇလႃႉ သူးတွင်းလဝ်ႊယွၼ်းၼၼ်ႉလႄႈထွမ်ႇဢဝ်ၵႂၢမ်းၶဝ် မိူဝ်ႈဢၼ်ၶဝ်ႁွင်ႉသႅၼ်ႇတီႈၸဝ်ႈႁဝ်းၼၼ်ႉသေၵမ်းတီႈၶႃႈ။-

53လွင်ႈမၼ်းၸမ်ႉ ၸဝ်ႈႁဝ်းၽႄဢဝ်ၶဝ်ဢွၵ်ႇသေ ၵႃႈၼႂ်းၵူၼ်းလိၼ်မိူင်းၵူႈၸိူဝ်ႉၵူႈၶိူဝ်းဝႆႉ ႁႂ်ႈၶဝ်ပဵၼ်တီႈဢၼ်ၸဝ်ႈႁဝ်းၶၢမ်ႇ ဢမူၺ်ႇၸွမ်းၵႃႈၼင်ႇဢၼ် ၸဝ်ႈႁဝ်းဢဝ်ၶႃႈၸဝ်ႈႁဝ်း မူဝ်းသေႇ မီးဢမိင်ႉဝႆႉၼႂ်းမိူဝ်ႈဢၼ်ၸဝ်ႈႁဝ်းၼုၵ်ႈဢဝ်ပူႇမွၼ်ႇၶႃႈၸဝ်ႈႁဝ်းတင်းလၢႆၼႆႉၸိူဝ်းၼၼ်ႉ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉတီႈၶႃႈယဝ်ႉ၊ ၸဝ်ႈထႃႇဝရႃႉၽြႃးတီႈၶႃႈ၊ ဝႃႈၼင်ႇၼႆဢေႃႈ။

54မိူဝ်ႈဢၼ် သေႃးလမုၼ်ႇ ႁဵတ်းသူးတွင်းပထၼႃႇတင်းသဵင်ႈတင်းလူင်ၸိူဝ်ႉၼင်ႇၼၼ် ၵႃႈတီႈၽၢႆႇၼႃႈထႃႇဝရႃႉၽြႃး ယဝ်ႉတူဝ်ႈယဝ်ႉၼၼ်ႉၸိုင်၊ မၼ်းလုၵ်ႉသေၵႃႈတီႈၽၢႆႇၼႃႈယိတ်ႈပလၢင်ႇထႃႇဝရႃႉၽြႃး တီႈဢၼ်မၼ်းဢဝ်ႁူဝ်ၶဝ်ႇမၼ်းတဝ်ႉလႄႈ ၵီႈၽႃႇမိုဝ်းမၼ်းၶိုၼ်ႈၸူးၵႃႈတီႈၵၢင်ႁၢဝ်ၼၼ်ႉယူႇၼၼ်ႉလႄႈ၊-

55ၸုၵ်းယူႇသေလႄႈ ႁဵတ်းတင်းသဵင်ဢၼ်ႁႅင်းယႂ်ႇၼႃႇလႄႈ ပၼ်တၢင်းလီတီႈပရဵၵ်ႈသၢတ်ႈမဵဝ်း ဢီႉသရေႇလႃႉ တင်းလၢႆလႄႈဝႃႈၸမ်ႉ၊-

56ႁႂ်ႈထႃႇဝရႃႉၽြႃးဢၼ်ၸီႇယၢင်ႇ ႁႂ်ႈၵူၼ်းမၼ်းၸဝ်ႈမဵဝ်း ဢီႉသရေႇလႃႉ လႆႈယူႇၼိမ်ၼိမ်လီလီၸွမ်းၵႃႈၼင်ႇဢၼ် မၼ်းၸဝ်ႈမီးၵတီႉၸဝ်ႈဝႆႉၼၼ်ႉၼၼ်ႉ မီးမင်ႇၵလႃႇသေၵမ်းလူၺ်ႈ။ ၵႂၢမ်းၵတီႉလီ ဢၼ်မၼ်းၸဝ်ႈဢဝ်ၶႃႈမၼ်းၸဝ်ႈ မူဝ်းသေႇ ဝႆႉၵတီႉၼၼ်ႉ ဢမ်ႇလူႉသေၶေႃႈသေၵမ်း။-

57ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈႁဝ်း မီးယူႇလူၺ်ႈၵၼ်တင်းႁဝ်း မိူၼ်ၸိူဝ်ႉၼင်ႇဢၼ်မၼ်းၸဝ်ႈမီးယူႇလူၺ်ႈၵၼ်တင်းပူႇမွၼ်ႇႁဝ်းၸိူဝ်းၼၼ်ႉသေၵမ်းလူၺ်ႈ။ ယႃႇပေႁႂ်ႈမၼ်းၸဝ်ႈၸုၼ်ႉပႅတ်ႈႁဝ်းလႄႈ ပႄႇပႅတ်ႈႁဝ်းလႃးလႃး။-

58ႁႂ်ႈမၼ်းၸဝ်ႈ ႁႂ်ႈႁူဝ်ၸႂ်ႁဝ်းဢူၼ်ႈၼူပ်ႈၵွမ်းၸူးတီႈမၼ်းၸဝ်ႈ ႁႂ်ႈၸွမ်းသဵၼ်ႈတၢင်းမၼ်းၸဝ်ႈၵႃႈမီးၼၼ်ႉလႄႈ ပႂ်ႉၵမ်ပႂ်ႉၵျၢင်ႉပိင်းၺၢပ်ႈတြႃးမၼ်းၸဝ်ႈ၊ ထုင်းၽိင်ႈတြႃးမၼ်းၸဝ်ႈ၊ လွင်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉ ဢၼ်မၼ်းၸဝ်ႈသင်ႇလၢတ်ႈဝႆႉ တီႈပူႇႁဝ်းမွၼ်ႇႁဝ်းတင်းလၢႆၼၼ်ႉၸိူဝ်းၼၼ်ႉသေၵမ်းလူၺ်ႈ။-

59ႁႂ်ႈၵႂၢမ်းပထၼႃႇ ဢၼ်ၵဝ်သူးတွင်းလဝ်ႊယွၼ်းၵႃႈတီႈၽၢႆႇၼႃႈထႃႇဝရႃႉၽြႃးၼႆႉ မီးယူႇၵႃႈတီႈႁိမ်းထႃႇဝရႃႉၽြႃး ၽြႃးပဵၼ်ၸဝ်ႈႁဝ်း ၵူႈဝၼ်းၵူႈၶိုၼ်းဢမ်ႇထၢတ်ႇ ႁႂ်ႈမၼ်းၸဝ်ႈပႂ်ႉဢမူႉၶႃႈမၼ်းၸဝ်ႈ ဢိၵ်ႇတင်းဢမူႉၵူၼ်းမၼ်းၸဝ်ႈမဵဝ်း ဢီႉသရေႇလႃႉ ယူႇၵႃႈၼင်ႇဢၼ် မီးလွင်ႈမၼ်းယူႇၵူႈဝၼ်းၼၼ်ႉလႄႈ၊-

60ႁႂ်ႈၵူၼ်းလိၼ်မိူင်းၵႃႈမီး လႆႈႁူႉလွင်ႈဢၼ်ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈ ဢိၵ်ႇတင်းလွင်ႈဢၼ်ဢမ်ႇမီးၽြႃးတၢင်ႇသူႇတၢင်ႇပႃးလႃးလႃးၼၼ်ႉသေၵမ်းလူၺ်ႈ။-

61ႁႂ်ႈႁူဝ်ၸႂ်သူမီးတၢင်းဢၼ်ၸေးၸုမ်ႇၵႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈႁဝ်း၊ ႁႂ်ႈသူလႆႈၸွမ်းသဵၼ်ႈတၢင်းထုင်းၽိင်ႈတြႃးမၼ်းၸဝ်ႈလႄႈ ပႂ်ႉၵမ်ပႂ်ႉၵျၢင်ႉပိင်းၺၢပ်ႈတြႃးမၼ်းၸဝ်ႈယူႇ မိူၼ်ၸိူဝ်ႉၼင်ႇဝၼ်းမိူဝ်ႈၼႆႉၼၼ်ႉ သေၵမ်းလူၺ်ႈ၊ ဝႃႈၼင်ႇၼႆဢေႃႈ။

62မိူဝ်ႈၼၼ်ႉၶုၼ်ႁေႃၶမ်းဢိၵ်ႇတင်း ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ႁဵတ်းတၢင်းဢၼ်ပုၵ်ႈၸေႃႇ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

63သေႃးလမုၼ်ႇ ဢဝ်ဝူဝ်းသွင်မိုၼ်ႇပၢႆသွင်ႁဵင်၊ သူဝ်းသႅၼ်ပၢႆသွင်မိုၼ်ႇ ပုၵ်ႈၸေႃႇပုၼ်ႈယိတ်ႈမိၵ်ႉသႃႇႁႃယႃႉ ဢၼ်မၼ်းပုၵ်ႈၸေႃႇတီႈထႃႇဝရႃႉၽြႃးၼၼ်ႉဢေႃႈ။ ၼင်ႇၼၼ်လႄႈ ၶုၼ်ႁေႃၶမ်းဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ႁဵတ်းဢၼူႉမေႃးတၼႃႇႁိူၼ်းထႃႇဝရႃႉၽြႃးဢေႃႈ။-

64ၼႂ်းဝၼ်းၼၼ်ႉၵမ်းလဵဝ် ၶုၼ်ႁေႃၶမ်းႁႂ်ႈထႃႇၼႃႉတီႈတၢင်းၼႂ်းတမ်ႇတိူင်း ဢၼ်မီးၵႃႈတီႈၽၢႆႇၼႃႈႁိူၼ်းထႃႇဝရႃႉၽြႃးၼၼ်ႉ မူတ်းၸၢင်ႇလႄႈ ဢဝ်ယိတ်ႈဢၼ်တုတ်ႇၽႆး၊ ၶိူင်ႈပုၵ်ႈၸေႃႇၽေႃးၸဵၼ်ႇ၊ ၵွၼ်ႈၶႆၵွၼ်ႈမၼ်းတူဝ်ယိတ်ႈမိၵ်ႉသႃႇႁႃယႃႉတင်းလၢႆ ပုၵ်ႈၸေႃႇဢေႃႈ။ လွင်ႈမၼ်းၸမ်ႉ ယိတ်ႈပလၢင်ႇတွင်းလိူင်ဢၼ်မီးၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉ ပဵၼ်ဢၼ်လဵၵ်ႉလႄႈ ဢမ်ႇပေႃးဢမ်ႇၶၢမ်ႇ ယိတ်ႈဢၼ်တုတ်ႇၽႆးလႂ်၊ ၶိူင်ႈပုၵ်ႈၸေႃႇၽေႃးၸဵၼ်ႇ တင်းၵွၼ်ႈၶႆၵွၼ်ႈမၼ်းတူဝ်ယိတ်ႈမိၵ်ႉသႃႇႁႃယႃႉလႂ်ၸိူဝ်းၼၼ်ႉ။-

65ၼင်ႇၼၼ်လႄႈမိူဝ်ႈၼၼ်ႉ သေႃးလမုၼ်ႇ ဢိၵ်ႇလူၺ်ႈၵၼ်တင်း ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢၼ်ဝႃႈ ပရဵၵ်ႈသၢတ်ႈဢၼ်ယႂ်ႇၼႃႇၼမ်ၼႃႇလူင်လၢင် ဢၼ်လုၵ်ႉသေၵႃႈတီႈ ၸႃႉၸဵမ်သူပ်းတၢင်းဢၼ်ၶဝ်ႈၸူးၵႃႈတီႈဝဵင်း ႁႃႇမတ်ႉ တေႃႇထိုင်ႁွတ်ႈ ၼမ်ႉႁွင်ႈ ဢေႇၵိပ်ႉတူႉ ၸိူဝ်းၼၼ်ႉမႃးၸိူဝ်းၼၼ်ႉ ဢွၼ်ၵၼ်ၶၢမ်ႇပွႆး ၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၸဵတ်းဝၼ်းဢိၵ်ႇတင်း ၸဵတ်းဝၼ်းဢၼ်ဝႃႈသိပ်းပၢႆသီႇဝၼ်းတဵမ်တဵမ်ဢေႃႈ။-

66ၼႂ်းဝၼ်းဢၼ် ထူၼ်ႈထိုင်ပႅတ်ႇဝၼ်းၼၼ်ႉ မၼ်းပွႆႇၵူၼ်းတင်းလၢႆသေလႄႈ ၶဝ်ၼၼ်ႉဢွၼ်ၵၼ်ပၼ်တၢင်းလီတီႈၶုၼ်ႁေႃၶမ်းလႄႈ ၸူမ်းသိူဝ်းသႂၢင်ႇၸႂ် ၵွပ်ႈပိူဝ်ႈၵျေးၸူးၵႃႈဢၼ်ထႃႇဝရႃႉၽြႃးႁဵတ်းတီႈၶႃႈမၼ်းၸဝ်ႈ တႃႇဝိတ်ႈ ဢိၵ်ႇတင်းၵူၼ်းမၼ်းၸဝ်ႈ ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉယူႇသေလႄႈ ၶိုၼ်းမိူဝ်းၵႂႃႇၸူးၵႃႈတီႈမူဝ်းၵႃႇ တီႈဢၼ်ၶဝ်ယူႇၼၼ်ႉသေဢေႃႈ။