1 Kings 6

Shan

← Chapter 5 Jump to: Chapter 7 →

1လိုၼ်းသေၵူၼ်းမဵဝ်း ဢီႉသရေႇလႃႉ တင်းလၢႆဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉ သီႇပၢၵ်ႇပၢႆပႅတ်ႇသိပ်းပီႊ သေႃးလမုၼ်ႇ ၸၢမ်ႇႁၢင်ႈၸၢမ်ႇႁေႃသီႇပီႊ၊ လိူၼ် ၸီႉၽႃႉ ဢၼ်ပဵၼ်လိူၼ်တူႉတီႉယႃႉၼၼ်ႉ၊ မၼ်းၸႃႉတႄႇႁဵတ်းႁိူၼ်းထႃႇဝရႃႉၽြႃးဢေႃႈ။-

2ႁိူၼ်းဢၼ်ၶုၼ်လူင် သေႃးလမုၼ်ႇ တႄႇႁဵတ်းပုၼ်ႈထႃႇဝရႃႉၽြႃးၸမ်ႉ၊ ၼႃႈယၢဝ်းမၼ်းမီးႁူၵ်းသိပ်းသွၵ်ႇ၊ ၼႃႈပွတ်းမၼ်းသၢဝ်းသွၵ်ႇ၊ ဢၼ်သုင်မၼ်းသၢမ်သိပ်းသွၵ်ႇဢေႃႈ။-

3ႁိူၼ်းၼႃႈႁိူၼ်းၸဝ်ႈၵေႃႈ ၼႃႈယၢဝ်းမၼ်းမီးသၢဝ်းသွၵ်ႇထၢၼ်ႇပဵင်းၵၼ်တင်းၼႃႈပွတ်းႁိူၼ်းၸဝ်ႈလႄႈ ၼႃႈပွတ်းမၼ်းမီးသိပ်းသွၵ်ႇၵႃႈတီႈၽၢႆႇၼႃႈပိၵ်ႈမၢၼ်ႇၸဝ်ႈဢေႃႈ။-

4ႁူးလၢင်းတဵၼ်ဢၼ်ပဵၼ်ၽႃ ပဵၼ်ႁၢၼ်ႉ ပဵၼ်ထၢပ်ႈ တင်းလၢႆၵေႃႈ မၼ်းႁဵတ်းသႂ်ႇတီႈႁိူၼ်းၸဝ်ႈဢေႃႈ။

5မၼ်းႁဵတ်းႁၢၼ်ႉလုၵ်းတင်းလၢႆၸွမ်းၽႃႁိူၼ်းၸဝ်ႈ ၵႃႈတီႈလဵပ်ႈႁွပ်ႈမၼ်းဢၼ်ဝႃႈ ၵႃႈတီႈလဵပ်ႈႁွပ်ႈၽႃႁိူၼ်းၸဝ်ႈဢၼ်ဝႃႈ ပိၵ်ႈမၢၼ်ႇၸဝ်ႈဢိၵ်ႇတင်းထႃႇၼႃႉ တီႈပျႃႇတိၵ်ႈၸဝ်ႈၼၼ်ႉဢေႃႈ။ ၼင်ႇၼၼ်လႄႈမၼ်းႁဵတ်းလုၵ်းၸိူဝ်းၼၼ်ႉၵႃႈတီႈႁိမ်းမၼ်းဢေႃႈ။-

6ႁၢၼ်ႉလုၵ်းဢၼ်ၵႃႈတႂ်ႈၼၼ်ႉၵႂၢင်ႈႁႃႈသွၵ်ႇ၊ ႁၢၼ်ႉလုၵ်းဢၼ်ၶိုင်ႈၵၢင်ၼၼ်ႉၵႂၢင်ႈႁူၵ်းသွၵ်ႇ၊ ႁၢၼ်ႉလုၵ်းတႃႉတီႉယႃႉၼၼ်ႉၵႂၢင်ႈၸဵတ်းသွၵ်ႇဢေႃႈ။ လွင်ႈမၼ်းၸမ်ႉ ၵႃႈတီႈၽၢႆႇၼွၵ်ႈၼၼ်ႉမၼ်းႁႂ်ႈၽႃမၼ်းယိုတ်းယွၼ်ႇၵၼ်ယူႇသေလႄႈ ၶိုၼ်းႁႂ်ႈတူင်မၼ်းတင်းလၢႆ ဢမ်ႇလႆႈၶဝ်ႈၵႃႈၼႂ်းတူဝ်ၽႃႁိူၼ်းၸဝ်ႈၼၼ်ႉဢေႃႈ။-

7မိူဝ်ႈဢၼ်တႄႇႁဵတ်းႁိူၼ်းၸဝ်ႈၼၼ်ႉၸိုင်၊ ၵွပ်ႈပိူဝ်ႈဢၼ်ဢဝ်မၢၵ်ႇႁိၼ်ဢၼ်ထၢၵ်ႇသပ်းယဝ်ႉၸဵမ်မိူဝ်ႈၸူဝ်ႈဢၼ်ဢမ်ႇပႆႇဢဝ်မႃးၵႃႈတီႈၼၼ်ႈၸိူဝ်းၼၼ်ႉတႄႇႁဵတ်းၼၼ်ႉလႄႈ ဢမ်ႇလႆႈငိၼ်းသဵင်ဢၼ်ၶွၼ်ႉလဵၵ်း၊ တႃမၢတ်ႇ၊ ၶိူင်ႈလဵၵ်းလႆႈလင်လႆႈမေႃး ၼႂ်းမိူဝ်ႈဢၼ်ႁဵတ်းယူႇၼၼ်ႉ။-

8ႁူးၽၵ်းတူဢၼ်ၶဝ်ႈၵႃႈၼႂ်းႁၢၼ်ႉလုၵ်းဢၼ်ၵႃႈတႂ်ႈၼၼ်ႉၸိုင်၊ မီးၵႃႈတီႈၽၢႆႇတၢင်းၶႂႃႁိူၼ်းၸဝ်ႈလႄႈ ၶဝ်ၶိုၼ်ႈၸွမ်းၶၼ်ႈလႆဢၼ်လိမ်ႇပၼ်ႇသေလႄႈ ၸူးၵႃႈတီႈႁၢၼ်ႉလုၵ်းဢၼ်ၶိုင်ႈၵၢင်ဢေႃႈ။ သမ်ႉလုၵ်ႉသေၵႃႈတီႈႁၢၼ်ႉလုၵ်းဢၼ်ၶိုင်ႈၵၢင်ၶိုၼ်ႈၸူးၵႃႈတီႈ ႁၢၼ်ႉလုၵ်းဢၼ်ၵႃႈၼိူဝ်ဢေႃႈ။-

9ၼင်ႇၼၼ်လႄႈမၼ်းတႄႇႁဵတ်းႁိူၼ်းၸဝ်ႈလႄႈ ႁႂ်ႈယဝ်ႉႁႂ်ႈတူဝ်ႈသေလႄႈ ဢဝ်ၶိုဝ်ႇလႂ်ဢိၵ်ႇတင်းၽႅၼ်ႇပႅၼ်ႈမႆႉ ဢႃႇရိတ်ႉ လႂ် မုင်းႁိူၼ်းၸဝ်ႈဢေႃႈ။-

10ႁၢၼ်ႉလုၵ်းၸိူဝ်းၼၼ်ႉၵေႃႈ မၼ်းႁဵတ်းၸပ်းႁိူၼ်းၸဝ်ႈတင်းသဵင်ႈတင်းမူတ်းလႄႈ ဢၼ်သုင်ယေႈႁၢၼ်ႉမီးႁႃႈသွၵ်ႇၼင်ႇၵၼ်ဢေႃႈ။ မီးတင်းတူင်မႆႉ ဢႃႇရိတ်ႉ သေလႄႈ ၵၢႆႇသႂ်ႇၵႃႈတီႈႁိူၼ်းၸဝ်ႈၼၼ်ႉဝႆႉဢေႃႈ။

11ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈ သေႃးလမုၼ်ႇ လႄႈဝႃႈ၊-

12လွင်ႈႁိူၼ်းၸဝ်ႈဢၼ်မႂ်းတႄႇႁဵတ်းမိူဝ်ႈလဵဝ်ၼႆႉၸမ်ႉ၊ ပေႃးမႂ်းၸွမ်းသဵၼ်ႈတၢင်းထုင်းၽိင်ႈတြႃးၵဝ်တင်းလၢႆၼၼ်ႉယူႇသေလႄႈ ၸီႇယၢင်ႇၸွမ်းလွင်ႈတၢင်းဢၼ် ၵဝ်ၸီႇယၢင်ႇဝႆႉၼၼ်ႉလႄႈ ပႂ်ႉၵမ်ပႂ်ႉၵျၢင်ႉပိင်းၺၢပ်ႈၵဝ်ၵႃႈမီးၼၼ်ႉၸိုင်၊ ၵဝ်တၵ်းႁႂ်ႈၵႂၢမ်းဢၼ်ၵဝ်ဝႆႉၵတီႉ တီႈပေႃႈမႂ်း တႃႇဝိတ်ႈ ၼၼ်ႉ တႄႇပဵၼ်တီႈမႂ်းဢေႃႈ။-

13ၵဝ်တၵ်းယူႇၵႃႈၼႂ်းၶိုင်ႈၵၢင် ၵူၼ်းမဵဝ်း ဢီႉသရေႇလႃႉ တင်းလၢႆလႄႈ ဢမ်ႇၸုၼ်ႉပႅတ်ႈၵူၼ်းၵဝ်မဵဝ်း ဢီႉသရေႇလႃႉ ၼၼ်ႉလႃးလႃး၊ ဝႃႈၼင်ႇၼႆဢေႃႈ။-

14ၼင်ႇၼၼ်လႄႈ သေႃးလမုၼ်ႇ ၼၼ်ႉ တႄႇႁဵတ်းႁိူၼ်းၸဝ်ႈလႄႈယဝ်ႉတူဝ်ႈဢေႃႈ။

15မၼ်းႁႂ်ႈၽႃႁိူၼ်းၸဝ်ႈ တၢင်းၼႂ်းၼၼ်ႉယဝ်ႉတူဝ်ႈလူၺ်ႈပႅၼ်ႈမႆႉ ဢႃႇရိတ်ႉ လႄႈ ဢဝ်ၵႃႈတီႈဢၼ်သိူဝ်ႇႁိူၼ်းၸဝ်ႈ တေႃႇထိုင်ႁွတ်ႈဢၼ်မုင်းမၼ်းၼၼ်ႉ မၼ်းဢဝ်မႆႉၵင်ႈၵႃႈၼႂ်းမၼ်းသေလႄႈ ႁႂ်ႈဢၼ်သိူဝ်ႇႁိူၼ်းၸဝ်ႈၼၼ်ႉ ယဝ်ႉတူဝ်ႈလူၺ်ႈပႅၼ်ႈမႆႉပႅၵ်ႇဢေႃႈ။-

16မၼ်းၵင်ႈႁိူၼ်းၸဝ်ႈပွတ်းၽၢႆႇတၢင်းလင်ဢၼ်ၼႃႈယၢဝ်းမၼ်း ၼႃႈပွတ်းမၼ်းမီးသၢဝ်းသွၵ်ႇၼင်ႇၵၼ်ၼၼ်ႉ လူၺ်ႈပႅၼ်ႈမႆႉ ဢႃႇရိတ်ႉ လႄႈ ဢဝ်ၵႃႈတီႈဢၼ်သိူဝ်ႇမၼ်းတေႃႇထိုင်ႁွတ်ႈၽႃမၼ်းတင်းလၢႆၼၼ်ႉ ႁႂ်ႈယဝ်ႉတူဝ်ႈၸိူဝ်ႉၼင်ႇၼၼ် ၵႃႈတီႈတၢင်းၼႂ်းမၼ်း ပုၼ်ႈထႃႇၼႃႉတီႈပျႃႇတိၵ်ႈၸဝ်ႈ ဢၼ်ဝႃႈထႃႇၼႃႉတီႈမူတ်းၸၢင်ႇၼႃႇသေပိူၼ်ႈဢေႃႈ။-

17ဢၼ်ယၢဝ်းပိၵ်ႈမၢၼ်ႇၸဝ်ႈဢၼ်မီးၵႃႈတီႈၽၢႆႇၼႃႈလုၵ်းၼၼ်ႉမီးသီႇသိပ်းသွၵ်ႇဢေႃႈ။-

18မႆႉ ဢႃႇရိတ်ႉ ၵႃႈၼႂ်းႁိူၼ်းၸဝ်ႈၼၼ်ႉ လႆႈၶၢမ်ႇတၢင်းဢၼ်တွင်ႈဢၼ်ၶၵ်းလႄႈ ပဵၼ်လၢႆးမၢၵ်ႇၼမ်ႉတဝ်ႈ၊ လၢႆးတုမ်ႇမွၵ်ႇလူင်ႇမွၵ်ႇဝႆႉဢေႃႈ။ တင်းသဵင်ႈတင်းလူင်ပဵၼ်မႆႉ ဢႃႇရိတ်ႉ လႄႈ ဢမ်ႇလႆႈႁၼ်မၢၵ်ႇႁိၼ်လႃးလႃး။

19ၼင်ႇၼၼ်လႄႈ မၼ်းပွင်ႁဵတ်းပွင်မႄးထႃႇၼႃႉတီႈပျႃႇတိၵ်ႈၸဝ်ႈ ၵႃႈၼႂ်းႁိူၼ်းၸဝ်ႈပုၼ်ႈဢၼ်တၵ်းဢဝ်တိူၵ်ႈတႃႇပတီႉၺိၺ်ႇထႃႇဝရႃႉၽြႃးတၢင်ႇဝႆႉဢေႃႈ။-

20လုၵ်းထႃႇၼႃႉတီႈပျႃႇတိၵ်ႈၸဝ်ႈၸမ်ႉ၊ ၼႃႈယၢဝ်းမၼ်းမီးသၢဝ်းသွၵ်ႇ၊ ၼႃႈပွတ်းမၼ်းမီးသၢဝ်းသွၵ်ႇ ဢၼ်သုင်မၼ်းမီးသၢဝ်းသွၵ်ႇဢေႃႈ၊ လုၵ်းၼၼ်ႉၸိုင် မၼ်းဢဝ်ၶမ်းလွတ်ႈငၢၼ်ႇဢုမ်ႇႁေႃႇသေလႄႈ ယိတ်ႈပလၢင်ႇၵေႃႈမၼ်းဢဝ်မႆႉ ဢႃႇရိတ်ႉ မူမ်ႇႁေႃႇသေဢေႃႈ။-

21ၼင်ႇၼၼ်လႄႈ သေႃးလမုၼ်ႇ ဢဝ်ၶမ်းလွတ်ႈငၢၼ်ႇဢုမ်ႇႁေႃႇၽၢႆႇၼႂ်းႁိူၼ်းၸဝ်ႈသေယဝ်ႉ၊ ဢဝ်ၸိူၵ်ႈၶမ်းမတ်ႉၼုင်ႈဝႆႉၵႃႈတီႈၽၢႆႇၼႃႈ ထႃႇၼႃႉတီႈပျႃႇတိၵ်ႈၸဝ်ႈၼၼ်ႉလႄႈ ဢဝ်ၶမ်းဢုမ်ႇႁေႃႇဢေႃႈ။-

22မၼ်းဢဝ်ၶမ်းဢုမ်ႇႁေႃႇႁိူၼ်းၸဝ်ႈတင်းႁိူၼ်းၸွတ်ႇတူဝ်ႈၵူႈတီႈၵူႈလႅၼ်ဢေႃႈ။ ယိတ်ႈပလၢင်ႇဢၼ်မီးၵႃႈတီႈႁိမ်းထႃႇၼႃႉတီႈပျႃႇတိၵ်ႈၸဝ်ႈၼၼ်ႉၵေႃႈ၊ မၼ်းဢဝ်ၶမ်းဢုမ်ႇႁေႃႇဝႆႉတင်းသဵင်ႈတင်းမူတ်းဢေႃႈ။-

23ၵႃႈၼႂ်းထႃႇၼႃႉတီႈပျႃႇတိၵ်ႈၸဝ်ႈၼၼ်ႉ၊ မၼ်းဢဝ်မႆႉ သၢၼ်ႇလုၼ်ႇ ႁဵတ်း ၶေႇရူႉၽဵမ်ႇ သွင်ပႃး ဢၼ်သုင်မၼ်းမီး သိပ်းသွၵ်ႇၼၼ်ႉဝႆႉဢေႃႈ။-

24ပိၵ်ႇ ၶေႇရူႉၽဵမ်ႇ ၼၼ်ႉ ၽၢႆႇၼိုင်ႈယၢဝ်းႁႃႈသွၵ်ႇ၊ ပိၵ်ႇ ၶေႇရူႉၽဵမ်ႇ ၼၼ်ႉၽၢႆႇၼိုင်ႈယၢဝ်းႁႃႈသွၵ်ႇၼင်ႇၵၼ်လႄႈ ဢဝ်ၵႃႈတီႈပၢႆပိၵ်ႇၽၢႆႇၼိုင်ႈ တေႃႇထိုင်ႁွတ်ႈပၢႆပိၵ်ႇၽၢႆႇၼိုင်ႈ မီးသိပ်းသွၵ်ႇဢေႃႈ။-

25ၶေႇရူႉၽဵမ်ႇ တၢင်ႇပႃးၼၼ်ႉၵေႃႈ ဢၼ်ယၢဝ်းမၼ်းမီးသိပ်းသွၵ်ႇလႄႈ ၶေႇရူႉၽဵမ်ႇ သွင်ပႃးၼၼ်ႉ တၢင်းဢၼ်ယႂ်ႇဢၼ်သုင် ပမႃႇၼႃႉမိူၼ်ၵၼ်ဢေႃႈ။-

26ဢၼ်သုင် ၶေႇရူႉၽဵမ်ႇ ပႃးၼိုင်ႈ မီးသိပ်းသွၵ်ႇလႄႈ ၶေႇရူႉၽဵမ်ႇ တၢင်ႇပႃးၵေႃႈ မိူၼ်ၵၼ်ဢေႃႈ။-

27မၼ်းဢဝ် ၶေႇရူႉၽဵမ်ႇ ၸိူဝ်းၼၼ်ႉတၢင်ႇဝႆႉၵႃႈၼႂ်းႁိူၼ်းၸဝ်ႈတီႈၵႃႈၼႂ်းလႄႈ ပိၵ်ႇ ၶေႇရူႉၽဵမ်ႇ ၸိူဝ်းၼၼ်ႉ ၵီႈလႄႈ ပၢႆပိၵ်ႇ ၶေႇရူႉၽဵမ်ႇ ပႃးၼိုင်ႈတိူဝ်ႉၸပ်းၽႃၽၢႆႇၼိုင်ႈယူႇ ပၢႆပိၵ်ႇ ၶေႇရူႉၽဵမ်ႇ တၢင်ႇပႃးတိူဝ်ႉၸပ်းၽႃၽၢႆႇၼိုင်ႈယူႇလႄႈ ပိၵ်ႇၼိုင်ႈလႄႈပိၵ်ႇၼိုင်ႈ တိူဝ်ႉၸပ်းၵၼ်ယူႇၵႃႈတီႈၶိုင်ႈၵၢင်ႁိူၼ်းၸဝ်ႈဢေႃႈ။-

28ၶေႇရူႉၽဵမ်ႇ ၸိူဝ်းၼၼ်ႉၵေႃႈ မၼ်းဢဝ်တင်းၶမ်းဢုမ်ႇႁေႃႇသေဢေႃႈ။-

29ၵႃႈတီႈၽၢႆႇတၢင်းၼႂ်း တင်းၽၢႆႇတၢင်းၼွၵ်ႈၽႃႁိူၼ်းၸဝ်ႈၸိူဝ်းၼၼ်ႉ မၼ်းတွင်ႈႁဵတ်းႁၢင်ႈ ၶေႇရူႉၽဵမ်ႇ လႂ်၊ ႁၢင်ႈတူၼ်ႈထၢၼ်လႂ် ဢိၵ်ႇတင်းပူႈမွၵ်ႇလူင်ႇမွၵ်ႇလႂ်ဢေႃႈ။-

30ဢၼ်သိူဝ်ႇၼႂ်းႁိူၼ်းၸဝ်ႈၵႃႈၼႂ်းၵႃႈၼွၵ်ႈၸိူဝ်းၼၼ်ႉၵေႃႈမၼ်းဢဝ်ၶမ်းဢုမ်ႇႁေႃႇသေဢေႃႈ။-

31ပုၼ်ႈႁူးၽၵ်းတူ ထႃႇၼႃႉတီႈပျႃႇတိၵ်ႈၸဝ်ႈၼၼ်ႉၸိုင်၊ မၼ်းႁဵတ်းမႂ်ၽၵ်းတူမႆႉ သၢၼ်ႇလုၼ်ႇ သွင်မႂ်လႄႈ ၶိုဝ်ႇၽၵ်းတူတင်းသဝ်ၽၵ်းတူၸိူဝ်းၼၼ်ႉ ၶဝ်ႈပႃးၼႂ်းၽႃၼၼ်ႉႁႃႈပုၼ်ႈပုၼ်ႈၼိုင်ႈဢေႃႈ။-

32ၼင်ႇၼၼ်လႄႈ မၼ်းႁဵတ်းမႂ်ၽၵ်းတူမႆႉ သၢၼ်ႇလုၼ်ႇ သွင်မႂ်လႄႈ တွင်ႈႁဵတ်းၶၵ်းႁဵတ်းႁၢင်ႈ ၶေႇရူႉၽဵမ်ႇ လႂ်၊ ႁၢင်ႈတူၼ်ႈထၢၼ်လႂ်၊ ႁၢင်ႈပူႈမွၵ်ႇလူင်ႇမွၵ်ႇလႂ်သႂ်ႇလႄႈ ဢဝ်ၶမ်းဢုမ်ႇႁေႃႇသေလႄႈ ဢဝ်ၶမ်းမူမ်ႇႁၢင်ႈ ၶေႇရူႉၽဵမ်ႇ လႂ် ႁၢင်ႈတူၼ်ႈထၢၼ်လႂ်ၸိူဝ်းၼၼ်ႉသေဢေႃႈ။-

33မိူၼ်ၼင်ႇၼၼ် ပုၼ်ႈႁူးၽၵ်းတူပိၵ်ႈမၢၼ်ႇၸဝ်ႈၵေႃႈ၊ ႁဵတ်းသဝ်ၽၵ်းတူမႆႉ သၢၼ်ႇလုၼ်ႇ ဢၼ်ၶဝ်ႈပႃးၼႂ်း ၽႃသီႇပုၼ်ႈ ပုၼ်ႈၼိုင်ႈ၊-

34ဢိၵ်ႇတင်းမႂ်ၽၵ်းတူမႆႉပႅၵ်ႇသွင်မႂ်ဢေႃႈ ၵႃႈတီႈမႂ်ၽၵ်းတူမႂ်ၼိုင်ႈ မီးသွင်ၽႅၼ်ႇဢၼ်တူပ်ႉလႆႈႁၵ်းလႆႈလႄႈ ၵႃႈတီႈမႂ်ၽၵ်းတူတၢင်ႇမႂ်ၵေႃႈမီးသွင်ၽႅၼ်ႇဢၼ်တူပ်ႉလႆႈႁၵ်းလႆႈဢေႃႈ။-

35တီႈမႂ်ၽၵ်းတူၸိူဝ်းၼၼ်ႉ၊ မၼ်းတွင်ႈႁဵတ်းၶၵ်းႁဵတ်းႁၢင်ႈ ၶေႇရူႉၽဵမ်ႇ လႂ်၊ ႁၢင်ႈတူၼ်ႈထၢၼ်လႂ်၊ ႁၢင်ႈပူႈမွၵ်ႇလူင်ႇမွၵ်ႇလႂ်သႂ်ႇလႄႈ ဢဝ်ၶမ်းဢုမ်ႇႁေႃႇၸွမ်းလၢႆးမၼ်းဝႆႉလီလီငၢမ်းငၢမ်းဢေႃႈ။

36တမ်ႇတိူင်းဢၼ်ၵႃႈၼႂ်းၵေႃႈ မၼ်းဢဝ်မၢၵ်ႇႁိၼ်ဢၼ်ထၢၵ်ႇဢၼ်သပ်း တႄႇႁဵတ်းသၢမ်ထႅဝ် မႆႉ ဢႃႇရိတ်ႉ ထႅဝ်ၼိုင်ႈ ပဵၼ်ၸၼ်ႉပဵၼ်ထၢပ်ႈဝႆႉဢေႃႈ။-

37ၼႂ်းပီႊဢၼ်မၼ်းၸၢမ်ႇႁၢင်ႈၸၢမ်ႇႁေႃ ဢၼ်ထူၼ်ႈထိုင်သီႇပီႊ လိူၼ် ၸီႉၽႃႉ ၼၼ်ႉ ၶဝ်ဢွၼ်ၵၼ်ၶျႃးငဝ်ႈႁၢၵ်ႈတိူၵ်ႈႁိူၼ်းထႃႇဝရႃႉၽြႃးလႄႈ၊-

38ၼႂ်းပီႊဢၼ်မၼ်းၸၢမ်ႇႁၢင်ႈၸၢမ်ႇႁေႃ ဢၼ်ထူၼ်ႈထိုင်သိပ်းဢဵတ်းပီႊ၊ လိူၼ်ဢႃႉထမႃႉ ဢၼ်ဝႃႈလိူၼ် ပူႉလႃႉ ၼၼ်ႉ ႁိူၼ်းၸဝ်ႈယဝ်ႉတူဝ်ႈလီငၢမ်း ဢိၵ်ႇလူၺ်ႈၵၼ်တင်းၵႃႈဢၼ်ၸၢပ်ႈသႅင်ႇၵၼ်တင်းမၼ်းၸိူဝ်းၼၼ်ႉ ၸွမ်းၵႃႈၼင်ႇဢၼ်ပုင်ႇႁၢင်ႈမၼ်းမီးၼၼ်ႉလႄႈ လႆႈႁဵတ်းႁိူၼ်းၸဝ်ႈၼၼ်ႉ ၸဵတ်းပီႊတဵမ်တဵမ်ဢေႃႈ။

← Chapter 5 Jump to: Chapter 7 →