1 Kings 17

Shan

← Chapter 16 Jump to: Chapter 18 →

1ဢေးလီႉယႃႉ ၵူၼ်းဝဵင်း တီႉသၽီႉ မိူင်း ၵီႉလတ်ႉ ၼၼ်ႉဢွၵ်ႇသူပ်းလၢတ်ႈတီႈ ဢႃႇႁပ်ႉ လႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢၼ်ၵဝ်ၵူဝ်းၵႂၢႆႇၼၼ်ႉဢသၢၵ်ႈလိပ်းယူႇၼၼ်ႉ၊ ပေႃးၵဝ်ဢမ်ႇမီးဢၶႂၢင်ႉၸိုင်၊ ၼႂ်းပီႊၸိူဝ်းၼႆႉၽူၼ်ဢမ်ႇလႆႈတူၵ်း၊ ၼမ်ႉၼၢႆးဢမ်ႇလႆႈတူၵ်း၊ ဝႃႈၼင်ႇၼႆဢေႃႈ။-

2ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈမၼ်းၼၼ်ႉလႄႈဝႃႈၸမ်ႉ၊-

3မႂ်းဢွၵ်ႇသေၵႃႈတီႈၼႆႈလႄႈ ဝၢႆႇၼႃႈတေႃႇၽၢႆႇဝၼ်းဢွၵ်ႇၵႂႃႇသေလႄႈ တဵတ်ႇမႅပ်ႉယူႇၵႃႈတီႈႁိမ်းၼမ်ႉႁွင်ႈ ၶေးရိတ်ႉ ဢၼ်မီးသိုဝ်ႈၵၼ် တင်းၼမ်ႉႁွင်ႈ ယေႃးတၢၼ်ႇ ၼၼ်ႉတႃႉ။-

4မႂ်းတၵ်းလႆႈၵိၼ်ၼမ်ႉတီႈၼမ်ႉႁွင်ႈၼၼ်ႉဢေႃႈ။ ၵဝ်သင်ႇလၢတ်ႈဝႆႉတီႈၵႃလမ်တင်းလၢႆႁႂ်ႈၶဝ်လႆႈလဵင်ႉလူမႂ်းယဝ်ႉ၊ ဝႃႈၼင်ႇၼႆလႄႈ၊-

5မၼ်းၵႂႃႇလႄႈ ႁဵတ်းၸွမ်းၵႃႈၼင်ႇဢၼ်ဢမိင်ႉထႃႇဝရႃႉၽြႃးမီးၼၼ်ႉဢေႃႈ။ မၼ်းၵႂႃႇလႄႈယူႇၵႃႈတီႈႁိမ်းၼမ်ႉႁွင်ႈ ၶေးရိတ်ႉ ဢၼ်မီးသိုဝ်ႈၵၼ်တင်းၼမ်ႉႁွင်ႈ ယေႃးတၢၼ်ႇ ၼၼ်ႉဢေႃႈ။-

6ၵႃလမ်တင်းလၢႆဢွၼ်ၵၼ်ဢဝ်ၶဝ်ႈမုၼ်းတင်းၼိူဝ်ႉၶိင်ႇၵၢင်ၼႂ်ပွၵ်ႈၼိုင်ႈ ဢိၵ်ႇတင်းၶဝ်ႈမုၼ်းတင်းၼိူဝ်ႉၶိင်ႇၵၢင်ၶမ်ႈပွၵ်ႈၼိုင်ႈမႃးဢေႃႈ။ ၼမ်ႉတီႈၼမ်ႉႁွင်ႈၵေႃႈလႆႈၵိၼ်ဢေႃႈ။-

7လိုၼ်းၼၼ်ႉၵွပ်ႈပိူဝ်ႈဢၼ်ၽူၼ်ဢမ်ႇတူၵ်းၵႃႈတီႈမိူင်းၼၼ်ႉလႄႈ ၼမ်ႉႁွင်ႈၼၼ်ႉယူတ်းႁႅင်ႈၵႂႃႇဢေႃႈ။

8မိူဝ်ႈၼၼ်ႉ ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈမၼ်းလႄႈဝႃႈၸမ်ႉ၊-

9မႂ်းလုၵ်ႉလႄႈၵႂႃႇၵႃႈတီႈဝဵင်း ၸႃႇရပ်ႉတႃႉ ၊ မိူင်း ၸီႉတုၼ်ႇ ပုၼ်ႉသေလႄႈယူႇၵႃႈတီႈၼၼ်ႈတႃႉ။ ၵဝ်သင်ႇလၢတ်ႈဝႆႉတီႈမႄႈမူၵ်းမႄႈမၢႆႈ ဢၼ်ယူႇၵႃႈတီႈဝဵင်းၼၼ်ႉၵေႃႉၼိုင်ႈ ႁႂ်ႈမၼ်းလဵင်ႉလူမႂ်းယဝ်ႉ၊ ဝႃႈၼင်ႇၼႆလႄႈ၊-

10မၼ်းလုၵ်ႉလႄႈၵႂႃႇၸူးၵႃႈတီႈဝဵင်း ၸႃႇရပ်ႉတႃႉ ဢေႃႈ။ မိူဝ်ႈဢၼ်မၼ်းႁွတ်ႈထိုင်ၵႃႈတီႈၽၵ်းတူဝဵင်းၼၼ်ႉၸိုင်၊ မႄႈမူၵ်းမႄႈမၢႆႈၵေႃႉၼိုင်ႈဢဝ်ၽိုၼ်းယူႇဢေႃႈ။ မၼ်းႁွင်ႉၸူးတီႈမၼ်းၼၼ်ႉလႄႈလၢတ်ႈလႄႈဝႃႈ၊ ဢဝ်ၵွၵ်းသႂ်ႇၼမ်ႉမႃးပုၼ်ႈဢၼ်ၵဝ်တၵ်းၵိၼ်ဢိတ်းၼိုင်ႈသေၵမ်း၊ ဝႃႈၼင်ႇၼႆဢေႃႈ။-

11ၼႂ်းမိူဝ်ႈဢၼ်မၼ်းၼၼ်ႉယင်းတိုၵ်ႉၵႂႃႇႁႂ်ႈလႆႈဢဝ်ၼမ်ႉမႃးယူႇၼၼ်ႉၸိုင်၊ မၼ်းသမ်ႉႁွင်ႉၸူးတီႈမၼ်းၼၼ်ႉထႅင်ႈလႄႈဝႃႈ၊ ဢဝ်မိုဝ်းမႂ်းယိပ်းပႃးဢဝ်မႃးၶဝ်ႈမုၼ်းသေၽၢၵ်ႇၼိုင်ႈသေၵမ်း၊ ဝႃႈၼင်ႇၼႆသေယဝ်ႉ၊-

12မၼ်းၼၼ်ႉၶိုၼ်းလၢတ်ႈတီႈမၼ်းလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းၸဝ်ႈၼၼ်ႉဢသၢၵ်ႈယင်းလိပ်းယူႇၼၼ်ႉ၊ ၵဝ်ၶႃႈဢမ်ႇမီးၶဝ်ႈမုၼ်းၶႅပ်းသေၶႅပ်း။ မီးၽွင်ၶဝ်ႈမုၼ်းၵႃႈၼႂ်းမေႃႈဝၵ်ႉမိုဝ်းၼိုင်ႈဢိၵ်ႇတင်းၼမ်ႉမၼ်းၵႃႈၼႂ်းတဝ်ႈဢိတ်းဢွၼ်ႇၼိုင်ႈၵူၺ်းဢေႃႈ။ ၵဝ်ၶႃႈဢဝ်ၽိုၼ်းသွင်လိုၼ်ႈ ႁႂ်ႈလႆႈၶဝ်ႈၵႃႈၼႂ်းလႄႈၽဝ်ပုၼ်ႈၵဝ်ၶႃႈဢိၵ်ႇတင်းလုၵ်ႈၸၢႆးဢွၼ်ႇၵဝ်ၶႃႈသေလႄႈၵိၼ်သေယဝ်ႉ၊ ႁႂ်ႈလႆႈတၢႆဢေႃႈ၊ ဝႃႈၼင်ႇၼႆဢေႃႈ။-

13ဢေးလီႉယႃႉ ၵေႃႈလၢတ်ႈလႄႈဝႃႈ၊ မႂ်းယႃႇပေမႆႈၸႂ်။ ၵႂႃႇႁဵတ်းၸွမ်းၵႃႈၼင်ႇဢၼ်မႂ်းဝႃႈၼၼ်ႉတႃႉ။ ၵူၺ်းၵႃႈႁဵတ်းၶဝ်ႈမုၼ်းၶႅပ်းဢွၼ်ႇၶႅပ်းၼိုင်ႈပုၼ်ႈၵဝ်ဢွၼ်တၢင်းလႄႈ ဢဝ်ဢွၵ်ႇမႃးတႃႉ။ လိုၼ်းၼၼ်ႉၸင်ႇႁဵတ်းပုၼ်ႈမႂ်းဢိၵ်ႇတင်းလုၵ်ႈၸၢႆးဢွၼ်ႇမႂ်းတႃႉ။-

14ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ ၽွင်ၶဝ်ႈမုၼ်းဢၼ်မီးၵႃႈၼႂ်းမေႃႈၼၼ်ႉဢမ်ႇလႆႈသဵင်ႈလႆႈမူတ်း။ ၼမ်ႉမၼ်းဢၼ်မီးၵႃႈၼႂ်းတဝ်ႈၼၼ်ႉဢမ်ႇလႆႈယွမ်းတေႃႇထိုင်ႁွတ်ႈဝၼ်းဢၼ် ထႃႇဝရႃႉၽြႃးႁႂ်ႈၽူၼ်တူၵ်းၵႃႈၼိူဝ်လိၼ်မိူင်းၼႆႉၼၼ်ႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆလႄႈ၊-

15မၼ်းၼၼ်ႉၵႂႃႇလႄႈႁဵတ်းၸွမ်းၵႃႈၼင်ႇၵႂၢမ်း ဢေးလီႉယႃႉ ၼၼ်ႉသေယဝ်ႉ၊ မၼ်းၼၼ်ႉဢိၵ်ႇတင်းမၼ်းတင်းၵူၼ်းႁိူၼ်းၵူၼ်းယေးမၼ်းၼၼ်ႉၸိူဝ်းၼၼ်ႉ လႆႈၵိၼ်ႁိုင်ၼႃႇလူင်လၢင်ဢေႃႈ။-

16ၽွင်ၶဝ်ႈမုၼ်းဢၼ်မီးၵႃႈၼႂ်းမေႃႈၼၼ်ႉ ဢမ်ႇသဵင်ႈဢမ်ႇမူတ်း၊ၼမ်ႉမၼ်းဢၼ်မီးၵႃႈၼႂ်းတဝ်ႈၼၼ်ႉဢမ်ႇယုတ်ႈဢမ်ႇယွမ်း၊ မႅၼ်ႈၸွမ်းၵႃႈၼင်ႇၵႂၢမ်းဢၼ် ထႃႇဝရႃႉၽြႃးဢဝ် ဢေးလီႉယႃႉ မီးဢမိင်ႉၸဝ်ႈဝႆႉၼၼ်ႉဢေႃႈ။

17လိုၼ်းၼၼ်ႉ လုၵ်ႈၸၢႆးမႄႈယိင်းဢၼ်ပဵၼ်ၸဝ်ႈႁိူၼ်းၼၼ်ႉၸပ်းတၢင်းၶႆႈတၢင်းပဵၼ်ဢေႃႈ။ ၵွပ်ႈပိူဝ်ႈဢၼ်တၢင်းၶႆႈတၢင်းပဵၼ်မၼ်းႁႅင်းယႂ်ႇၼႃႇလႄႈ ၶျုၵ်ႈဢသၢၵ်ႈမၼ်းသေဢေႃႈ။-

18မၼ်းၼၼ်ႉထၢမ်တီႈ ဢေးလီႉယႃႉ လႄႈဝႃႈ၊ ၵူၼ်းၽြႃးပဵၼ်ၸဝ်ႈဢိူၺ်း၊ ၸဝ်ႈႁဝ်းၸၢပ်ႈသႅင်ႇၵၼ်တင်းၵဝ်ၶႃႈၸိူဝ်ႉၼင်ႇႁိုဝ်။ ၸဝ်ႈႁဝ်းမႃးတီႈၵဝ်ၶႃႈ ႁႂ်ႈၵဝ်ၶႃႈၶုၵ်းၸႂ်လႆႈၶႆႈၸႂ်ထူပ်းဢပႅတ်ႈၵဝ်ၶႃႈလႄႈဢဝ်လုၵ်ႈၸၢႆးၵဝ်ၶႃႈတၢႆလူင်ပႄႇ၊ မိူဝ်ႈဢၼ်ဝႃႈၼင်ႇၼႆၸိုင်၊-

19မၼ်းလၢတ်ႈတီႈမၼ်းၼၼ်ႉလႄႈဝႃႈ၊ ပၼ်လုၵ်ႈၸၢႆးမႂ်းၼၼ်ႉတီႈၵဝ်တႃႉ၊ ဝႃႈၼင်ႇၼႆသေလႄႈဢဝ်ၵႃႈၼႂ်းတၵ်းမႄႈယိင်းၼၼ်ႉလႄႈ ၶိုၼ်ႈၵႂႃႇၵႃႈတီႈလုၵ်းဢၼ်ၵႃႈၼိူဝ် ဢၼ်ပဵၼ်တီႈဢၼ်မၼ်းယူႇၼၼ်ႉသေလႄႈ ဝႆႉၵႃႈၼိူဝ်တီႈၼွၼ်းသေယဝ်ႉ၊-

20ႁွင်ႉႁႃထႃႇဝရႃႉၽြႃးလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၸဝ်ႈႁဝ်းႁဵတ်းၽေးဢူႉပၢတ်ႈသႂ်ႇၵႃႈတီႈႁိူၼ်းမႄႈမူၵ်းမႄႈမၢႆႈ ဢၼ်ၶႃႈၸဝ်ႈသွၼ်ႈပိုင်ႈယူႇၼႆႉလႄႈ ႁႂ်ႈလုၵ်ႈၸၢႆးမၼ်းတၢႆတီႈၶႃႈႁိုဝ်။ ဝႃႈၼင်ႇၼႆဢေႃႈ။-

21လႆႈသမ်ႉ မၼ်းဢဝ်တူဝ်မၼ်း ဢူပ်ႇပူပ်ႇသႂ်ႇၵႃႈၼိူဝ်လုၵ်ႈဢွၼ်ႇၼၼ်ႉသၢမ်ပွၵ်ႈသေလႄႈ သမ်ႉၶိုၼ်းႁွင်ႉႁႃထႃႇဝရႃႉၽြႃးလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႅၼ်းတေႃႈႁႂ်ႈဝီႉၺိၺ်ႇလုၵ်ႈဢွၼ်ႇၼႆႉ သမ်ႉၶိုၼ်းၶဝ်ႈၵႃႈၼႂ်းမၼ်းသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

22ထႃႇဝရႃႉၽြႃးငိၼ်းၵႂၢမ်း ဢေးလီႉယႃႉ လႄႈ ဝီႉၺိၺ်ႇလုၵ်ႈဢွၼ်ႇၼၼ်ႉၶိုၼ်းၶဝ်ႈၵႃႈၼႂ်းမၼ်းသေယဝ်ႉ၊ ဢသၢၵ်ႈမၼ်းသမ်ႉၶိုၼ်းလိပ်းဢေႃႈ။-

23ဢေးလီႉယႃႉ ဢဝ်လုၵ်ႈဢွၼ်ႇၼၼ်ႉသေၵႃႈတီႈလုၵ်းႁၢၼ်ႉၼိူဝ်လူင်းၵႂႃႇၵႃႈတီႈလုၵ်းႁၢၼ်ႉတႂ်ႈလႄႈ ဢၢပ်ႈပၼ်တီႈမႄႈမၼ်းလႄႈ ဢေးလီႉယႃႉ ဝႃႈ၊ တူၺ်းလူး၊ လုၵ်ႈၸၢႆးမႂ်းဢသၢၵ်ႈၶိုၼ်းလိပ်းယဝ်ႉ၊ ဝႃႈၼင်ႇၼႆဢေႃႈ၊-

24မႄႈယိင်းၼၼ်ႉၵေႃႈ လၢတ်ႈတီႈ ဢေးလီႉယႃႉ လႄႈဝႃႈ၊ တေႃႈလဵဝ်ၼႆႉၵဝ်ၶႃႈလႆႈႁူႉလွင်ႈဢၼ်ၸဝ်ႈႁဝ်းပဵၼ်ၵူၼ်းၽြႃးပဵၼ်ၸဝ်ႈ ဢိၵ်ႇတင်းလွင်ႈဢၼ်ၵႂၢမ်းထႃႇဝရႃႉၽြႃး ဢၼ်ဢွၵ်ႇသူပ်းၸဝ်ႈႁဝ်းၼၼ်ႉ မၢၼ်ႇမႅၼ်ႈၸိုဝ်ႈၸႂ်ႈၼၼ်ႉယဝ်ႉ၊ ဝႃႈၼင်ႇၼႆဢေႃႈ။

← Chapter 16 Jump to: Chapter 18 →