1 Kings 12

Shan

← Chapter 11 Jump to: Chapter 13 →

1မိူဝ်ႈၼၼ်ႉ ရူဝ်းပုမ်ႇ ၵႂႃႇၵႃႈတီႈဝဵင်း သေႇၶိမ်ႇ ဢေႃႈ။ လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ၵႂႃႇၵႃႈတီႈဝဵင်း သေႇၶိမ်ႇ ႁႂ်ႈလႆႈယုၵ်ႉယွင်ႈမၼ်းဝႆႉၵႃႈၼႂ်းဢရႃႇၶုၼ်ႁေႃၶမ်းဢေႃႈ။-

2မိူဝ်ႈဢၼ် ယေႇရူဝ်းပုမ်ႇ ၊ လုၵ်ႈၸၢႆး ၼေႇပတ်ႉ ဢၼ်ယင်းမီးယူႇၵႃႈၼႂ်းမိူင်း ဢေႇၵိပ်ႉတူႉ တီႈဢၼ်မၼ်းဢွၵ်ႇပၢႆႈသေၵႃႈတီႈ ၶုၼ်လူင် သေႃးလမုၼ်ႇ ၵႂႃႇဢၼ်ဝႃႈ တီႈဢၼ် ယေႇရူဝ်းပုမ်ႇ ယူႇသဝ်းလႄႈ ၶဝ်ပွႆႇၸႂ်ႉႁွင်ႉဢဝ်ၼၼ်ႉငိၼ်းလွင်ႈတၢင်းၼၼ်ႉၸိုင်၊-

3ယေႇရူဝ်းပုမ်ႇ ဢိၵ်ႇတင်းပရဵၵ်ႈသၢတ်ႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ၶဝ်ႈၸူးတီႈ ရူဝ်းပုမ်ႇ သေလႄႈ လဝ်ႊလၢတ်ႈလႄႈဝႃႈ၊-

4ၸဝ်ႈပေႃႈၸဝ်ႈႁဝ်းၼၼ်ႉ ဢဝ်ၵၢၼ်းဢၼ်ၼၵ်းၼႃႇတၢင်ႇသႂ်ႇၵႃႈၼိူဝ်ၶႃႈၸဝ်ႈႁဝ်းၶဝ်တီႈၶႃႈယဝ်ႉ။ ၸဝ်ႈႁဝ်းၶႅၼ်းတေႃႈႁႂ်ႈဢမူႉတၢင်းဢၼ်လႆႈၵိုတ်ႉႁၢပ်ႇယၢပ်ႇၸႂ်ၼႃႇလူင်လၢင်တီႈၸဝ်ႈပေႃႈၸဝ်ႈႁဝ်း ဢိၵ်ႇတင်းၵၢၼ်းႁၢပ်ႇၼၵ်း ဢၼ်မၼ်းတၢင်ႇသႂ်ႇၼၼ်ႉမဝ်မႃးသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈႁဝ်းတင်းလၢႆတၵ်းဢွၼ်ၵၼ် ၵိုတ်ႉႁၢပ်ႇဢမူႉၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

5မၼ်းၵေႃႈမီးဢမိင်ႉလႄႈဝႃႈ၊ သူဢွၼ်ၵၼ်ၵႂႃႇလူးၵွၼ်ႇတႃႉ။ ပူၼ်ႉသၢမ်ဝၼ်းယဝ်ႉၸင်ႇၶိုၼ်းမႃးလူးၵွၼ်ႇတႃႉ၊ ဝႃႈၼင်ႇၼႆသေယဝ်ႉ၊ ၵူၼ်းတင်းလၢႆဢွၼ်ၵၼ်ဢွၵ်ႇၵႂႃႇသေဢေႃႈ။

6မိူဝ်ႈၼၼ်ႉၶုၼ်လူင် ရူဝ်းပုမ်ႇ တိူင်ႇပၢင်ႇၵၼ်တင်းၶဝ်ၸိူဝ်းဢၼ်ဢသၢၵ်ႈယႂ်ႇဢၼ်ၶႃးၸႃးၵႃႈတီႈၸဝ်ႈပေႃႈမၼ်း သေႃးလမုၼ်ႇ ၼႂ်းမိူဝ်ႈဢၼ်ဢသၢၵ်ႈမၼ်းယင်းလိပ်းယူႇၼၼ်ႉၸိူဝ်းၼၼ်ႉလႄႈ ထၢမ်လႄႈဝႃႈ၊ သူတၵ်းပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇႁိုဝ်တီႈၵဝ် ႁႂ်ႈၵဝ်လႆႈၶိုၼ်းလၢတ်ႈတီႈၵူၼ်းတင်းလၢႆၸိူဝ်းၼႆႉ၊ ဝႃႈၼင်ႇၼႆသေယဝ်ႉ၊-

7ၶဝ်ဢွၼ်ၵၼ်လဝ်ႊလၢတ်ႈလႄႈဝႃႈ၊ ပေႃးၸဝ်ႈႁဝ်းၶၢမ်ႇႁဵတ်းၶႃႈ ၵူၼ်းတင်းလၢႆၸိူဝ်းၼႆႉဝၼ်းမိူဝ်ႈၼႆႉယူႇ၊ ပႂ်ႉဢမူႉၶဝ်ယူႇသေလႄႈ ၶိုၼ်းလၢတ်ႈၵႂၢမ်းဢၼ်လီဢၼ်ငၢမ်းတီႈၶဝ်ၸိုင်၊ ၶဝ်တၵ်းဢွၼ်ၵၼ်ၶၢမ်ႇႁဵတ်းၶႃႈၸဝ်ႈႁဝ်းယူႇသေႇသေႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

8ၵူၺ်းၵႃႈ မၼ်းဢမ်ႇၸွမ်းတၢင်းၵျၢမ်ႇတၢင်းပွင် ဢၼ်ၶဝ်ၸိူဝ်းဢၼ်ဢသၢၵ်ႈယႂ်ႇၸိူဝ်းၼၼ်ႉပၼ်ၼၼ်ႉလႄႈ သမ်ႉတိူင်ႇပၢင်ႇတွင်ႈထၢမ်ၵၼ်တင်းၵူၼ်းၼုမ်ႇၵူၼ်းၵမ်ဢၼ်ပဵၼ်ၵေႃႉသေႈမၼ်းလႄႈ ၶႃးၸႃးယူႇၵႃႈတီႈၽၢႆႇၼႃႈမၼ်းသေႇသေႇၸိူဝ်းၼၼ်ႉလႄႈဝႃႈ၊-

9သူတၵ်းပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇႁိုဝ် ႁႂ်ႈႁဝ်းလႆႈၶိုၼ်းလၢတ်ႈတီႈၵူၼ်းတင်းလၢႆ ဢၼ်လဝ်ႊလၢတ်ႈတီႈၵဝ်လႄႈဝႃႈ၊ ၶႅၼ်းတေႃႈႁႂ်ႈၵၢၼ်းႁၢပ်ႇဢၼ်ၸဝ်ႈပေႃႈၸဝ်ႈႁဝ်းတၢင်ႇသႂ်ႇဝႆႉ ၵႃႈၼိူဝ်ၶႃႈၸဝ်ႈႁဝ်းၶဝ်ၼၼ်ႉမဝ်မႃးသေၵမ်းတီႈၶႃႈ၊ ဝႃႈၼင်ႇၼႆၼၼ်ႉၸိူဝ်းၼၼ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

10ၵူၼ်းၼုမ်ႇၵူၼ်းၵမ်ဢၼ်ပဵၼ်ၵေႃႉသေႈမၼ်းၸိူဝ်းၼၼ်ႉ ဢွၼ်ၵၼ်ၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်းၶႅၼ်းတေႃႈၶိုၼ်းလၢတ်ႈတီႈၵူၼ်းတင်းလၢႆ ဢၼ်လဝ်ႊလၢတ်ႈလႄႈဝႃႈ၊ ၸဝ်ႈပေႃႈၸဝ်ႈႁဝ်းၼၼ်ႉ ႁႂ်ႈၵၢၼ်းႁၢပ်ႇၼၵ်းၼႃႇတီႈၶႃႈၸဝ်ႈႁဝ်းတင်းလၢႆတီႈၶႃႈယဝ်ႉ။ ၶႅၼ်းတေႃႈႁႂ်ႈမဝ်မႃးသေၵမ်းတီႈၶႃႈ၊ ဝႃႈၼင်ႇၼႆၸိူဝ်းၼၼ်ႉလႄႈဝႃႈ၊ ၼိဝ်ႉၵွႆႈၵဝ်ၼႆႉယဵင်ႈၶႅၼ်းတၵ်းယႂ်ႇၼႃႇသေဢႅဝ်ၸဝ်ႈပေႃႈၵဝ်ဢေႃႈ။-

11ၸဝ်ႈပေႃႈၵဝ်ၼၼ်ႉ ဢဝ်ၵၢၼ်းႁၢပ်ႇဢၼ်ၼၵ်းၼႃႇတၢင်ႇသႂ်ႇၵႃႈၼိူဝ်သူယဝ်ႉ။ ၵဝ်ၵေႃႈတၵ်းထၢပ်ႈလႄႈတၢင်ႇသႂ်ႇထႅင်ႈဢေႃႈ။ ၸဝ်ႈပေႃႈၵဝ်ၼၼ်ႉဢဝ်တင်းၶွၼ်ႉဝၢႆပေႃႉယႅၼ်ႉသူယဝ်ႉ။ ၵဝ်ၵေႃႈတၵ်းဢဝ်တင်းမႅင်းၵူၼ်ႈငေႃး ပေႃႉယႅၼ်ႉသူထႅင်ႈဢေႃႈ၊ ဝႃႈၼင်ႇၼႆသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

12ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ ယေႇရူဝ်းပုမ်ႇ ဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်ႁွတ်ႈမႃးတီႈ ရူဝ်းပုမ်ႇ ၸွမ်းၵႃႈၼင်ႇဢၼ် ၶုၼ်ႁေႃၶမ်းမၵ်းၶိၼ်းဝႆႉလႄႈဝႃႈ၊ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ သူသမ်ႉဢွၼ်ၵၼ်ၶိုၼ်းမႃးထႅင်ႈလူးၵွၼ်ႇတႃႉ၊ ဝႃႈၼင်ႇၼႆၼၼ်ႉဢေႃႈ။-

13မိူဝ်ႈၼၼ်ႉၶုၼ်ႁေႃၶမ်း ၶိုၼ်းလၢတ်ႈႁၢဝ်ႈၵျၢမ်းၼႃႇလူင်လၢင်တီႈၶဝ်လႄႈ ပႄႇပႅတ်ႈတၢင်းၵျၢမ်ႇတၢင်းပွင် ဢၼ်ၶဝ်ၸိူဝ်းဢၼ်ဢသၢၵ်ႈယႂ်ႇၸိူဝ်းၼၼ်ႉပၼ်ၼၼ်ႉသေလႄႈ၊-

14ၸွမ်းဢဝ်တၢင်းၵျၢမ်ႇတၢင်းပွင်ဢၼ်ၵူၼ်းၼုမ်ႇၵူၼ်းၵမ်ၸိူဝ်းၼၼ်ႉပၼ်ၼၼ်ႉလႄႈ ၶိုၼ်းလၢတ်ႈႁၢဝ်ႈၵျၢမ်းၼႃႇလူင်လၢင်လႄႈဝႃႈ၊ ၸဝ်ႈပေႃႈၵဝ်ၼၼ်ႉဢဝ်ၵၢၼ်းႁၢပ်ႇဢၼ်ၼၵ်းၼႃႇတၢင်ႇသႂ်ႇၵႃႈၼိူဝ်သူယဝ်ႉ။ ၵဝ်ၵေႃႈတၵ်းထၢပ်ႈလႄႈတၢင်ႇသႂ်ႇထႅင်ႈဢေႃႈ။ ၸဝ်ႈပေႃႈၵဝ်ၼၼ်ႉဢဝ်တင်းၶွၼ်ႉဝၢႆပေႃႉယႅၼ်ႉသူယဝ်ႉ။ ၵဝ်ၵေႃႈတၵ်းဢဝ်တင်းမႅင်းၵူၼ်ႈငေႃးပေႃႉယႅၼ်ႉသူဢေႃႈ၊ ဝႃႈၼင်ႇၼႆဢေႃႈ။-

15လွင်ႈဢၼ်ၶုၼ်ႁေႃၶမ်းဢမ်ႇထွမ်ႇဢဝ်ၵႂၢမ်းၵူၼ်းဝၢၼ်ႈၵူၼ်းမိူင်းတင်းလၢႆၼၼ်ႉၸမ်ႉ၊ ပဵၼ်ဢွၵ်ႇသေၵႃႈတီႈထႃႇဝရႃႉၽြႃးမႃး လွင်ႈၼင်ႇႁိုဝ်မၼ်းၸဝ်ႈတၵ်းႁႂ်ႈၵႂၢမ်းဢၼ်မၼ်းၸဝ်ႈဢဝ် ဢႁီႉယႃႉ ၵူၼ်းဝဵင်း သီႉလေႃႇ ၼၼ်ႉ မီးဢမိင်ႉဝႆႉတီႈ ယေႇရူဝ်းပုမ်ႇ ၊ လုၵ်ႈၸၢႆး ၼေႇပတ်ႉ ၼၼ်ႉ လႆႈပျေႉၸုမ်ႇဢေႃႈ။-

16ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ႁူႉႁၼ်လွင်ႈဢၼ်ၶုၼ်ႁေႃၶမ်းဢမ်ႇထွမ်ႇဢဝ်ၸွမ်းဢဝ်ၵႂၢမ်းၶဝ်ၼၼ်ႉသေယဝ်ႉ၊ ၵူၼ်းတင်းလၢႆဢွၼ်ၵၼ်ၶိုၼ်းလၢတ်ႈတီႈၶုၼ်ႁေႃၶမ်းလႄႈဝႃႈ၊ ႁဝ်းၼႆႉၸၢပ်ႈသႅင်ႇၵၼ်တင်း တႃႇဝိတ်ႈ ၸိူဝ်ႉၼင်ႇႁိုဝ်။ ႁဝ်းဢမ်ႇၶၢမ်ႇဢမူၺ်ႇလူၺ်ႈၵၼ်တင်းလုၵ်ႈၸၢႆး ယေႇသႄး ၵူၺ်ႉ။ မဵဝ်း ဢီႉသရေႇလႃႉ ဢိူၺ်း၊ ဢွၼ်ၵၼ်ၵႂႃႇၸူးၵႃႈတီႈမူဝ်းၵႃႇတီႈယူႇသူသေတႃႉ။ တႃႇဝိတ်ႈ ဢိူၺ်း၊ လူတူၺ်းႁိူၼ်းမႂ်းတႃႉ၊ ဝႃႈၼင်ႇၼႆသေလႄႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢွၼ်ၵၼ်ၶိုၼ်းမိူဝ်းၵႂႃႇၸူးၵႃႈတီႈမူဝ်းၵႃႇတီႈယူႇၶဝ်သေဢေႃႈ။-

17ၵူၺ်းၵႃႈ ၵူၼ်းမဵဝ်း ဢီႉသရေႇလႃႉ ဢၼ်ယူႇၵႃႈတီႈဝၢၼ်ႈဝဵင်း ယူႉတႃႉ ၸိူဝ်းၼၼ်ႉၸိုင်၊ ရူဝ်းပုမ်ႇ ယင်းလႆႈဢုပ်ႉပိူင်ႇယူႇဢေႃႈ။-

18မိူဝ်ႈၼၼ်ႉၶုၼ်လူင် ရူဝ်းပုမ်ႇ ပွႆႇၸႂ်ႉ ဢတေႃးရမ်ႇ ၊ ဝုၼ်ႇၵဵပ်းၶွၼ်ႇၼၼ်ႉၵႂႃႇလႄႈ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ဢဝ်မၢၵ်ႇႁိၼ်ထိမ်ႈမၼ်းထၼ်ႈပေႃးတၢႆဢေႃႈ ၶုၼ်လူင် ရူဝ်းပုမ်ႇ ၼၼ်ႉႁိပ်ႈၼႅတ်ႈၶိုၼ်ႈၶီႇလေႃႉရထႃးၸဝ်ႈသေလႄႈ ပၢႆႈၸူးၵႃႈတီႈဝဵင်း ယေႇရူႉသလႅမ်ႇ ဢေႃႈ။-

19ၼင်ႇၼၼ်လႄႈ မဵဝ်း ဢီႉသရေႇလႃႉ ပူင်ႇၵၢၼ်ႇမဵဝ်းၸိူဝ်ႉၶိူဝ်းၶုၼ် တႃႇဝိတ်ႈ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

20မိူဝ်ႈဢၼ် ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ငိၼ်းလွင်ႈဢၼ် ယေႇရူဝ်းပုမ်ႇ ၶိုၼ်းမႃးၼၼ်ႉၸိုင်၊ ၶဝ်ဢွၼ်ၵၼ်ပွႆႇၸႂ်ႉၵႂႃႇလႄႈ ႁွင်ႉဢဝ်မၼ်းမႃးၵႃႈတီႈပရဵၵ်ႈသၢတ်ႈ ဢၼ်ၸူႉဢၼ်တုမ်ၼၼ်ႉသေယဝ်ႉ၊ ဢဝ်မၼ်းႁဵတ်းၶုၼ်ႁေႃၶမ်းၵႃႈၼိူဝ်မဵဝ်း ဢီႉသရေႇလႃႉ တင်းသဵင်ႈတင်းလူင်ဢေႃႈ။ လိူဝ်သေမဵဝ်း ယူႉတႃႉ ၼၼ်ႉၵူၺ်း၊ မဵဝ်းဢၼ်ၸွမ်းလင်ၸိူဝ်ႉၶိူဝ်း တႃႇဝိတ်ႈ ၼၼ်ႉ ဢမ်ႇမီးသေမဵဝ်း။

21ရူဝ်းပုမ်ႇ ႁွတ်ႈထိုင်ၵႃႈတီႈဝဵင်း ယေႇရူႉသလႅမ်ႇ သေယဝ်ႉ၊ ႁႂ်ႈၵူၼ်းမဵဝ်း ယူႉတႃႉ တင်းၵူၼ်းမဵဝ်း ပိၼ်ႇယႃႇမိၼ်ႇ သႅၼ်ပၢႆပႅတ်ႇမိုၼ်ႇဢၼ်လိူၵ်ႈၵဵပ်းဢဝ်လႄႈ ပဵၼ်ႁူဝ်ႁၢၼ်ၵူၼ်းသိုၵ်းၸိူဝ်းၼၼ်ႉ ၸူႉၵၼ်တုမ်ၵၼ်ႁႂ်ႈလႆႈတိုၵ်းတေႃးမဵဝ်း ဢီႉသရေႇလႃႉ လႄႈ ႁႂ်ႈသိုင်ႇၸိုင်ႈဝၢၼ်ႈမိူင်းၸဝ်ႈ ၶိုၼ်းႁွတ်ႈၵႃႈၼႂ်းမိုဝ်း ရူဝ်းပုမ်ႇ လုၵ်ႈၸၢႆးၸဝ်ႈ သေႃးလမုၼ်ႇ ဢေႃႈ။-

22ၵူၺ်းၵႃႈ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ သေႇမႃႇယႃႉ ၵူၼ်းၽြႃးပဵၼ်ၸဝ်ႈၼၼ်ႉလႄႈဝႃႈ၊-

23မႂ်းမွၵ်ႇလၢတ်ႈတီႈ ရူဝ်းပုမ်ႇ လုၵ်ႈၸၢႆး သေႃးလမုၼ်ႇ ၶုၼ်ႁေႃၶမ်း ယူႉတႃႉ ဢိၵ်ႇတင်းမဵဝ်း ယူႉတႃႉ မဵဝ်း ပိၼ်ႇယႃႇမိၼ်ႇ တင်းသဵင်ႈတင်းလူင် တင်းၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၵႃႈမီးၼၼ်ႉလႄႈဝႃႈ၊-

24ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ယႃႇပေဢွၼ်ၵၼ် ၶီႇသိုၵ်းၶိုၼ်ႈၸူးလႄႈတိုၵ်းတေႃးပီႈၼွင်ႉသူ ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ။ ဢွၼ်ၵၼ်ၶိုၼ်းမိူဝ်းၵႂႃႇၸူးၵႃႈတီႈႁိူၼ်းတီႈယူႇသူႁင်းၽႂ်ႁင်းမၼ်းသေတႃႉ။ ဢမူႉၼႆႉၸိုင် ၵဝ်ၸီႇယၢင်ႇယဝ်ႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။ ၶဝ်ဢွၼ်ၵၼ်ထွမ်ႇဢဝ်ၵႂၢမ်းဢၼ်ထႃႇဝရႃႉၽြႃးမီးဢမိင်ႉၼၼ်ႉလႄႈ ယင်းဢမ်ႇၶီႇသိုၵ်းၶိုၼ်ႈၸူး ယေႇရူဝ်းပုမ်ႇ လႄႈ ဢွၼ်ၵၼ်ၶိုၼ်းမိူဝ်းၵႂႃႇသေဢေႃႈ။

25လိုၼ်းၼၼ်ႉ ယေႇရူဝ်းပုမ်ႇ တႄႇႁဵတ်းဝဵင်း သေႇၶိမ်ႇ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ လႄႈ ၶျႃးတီႈယူႇတီႈသဝ်း ယူႇၵႃႈၼႂ်းမၼ်းဢေႃႈ။ မၼ်းလုၵ်ႉသေၵႃႈတီႈဝဵင်းၼၼ်ႉၵႂႃႇလႄႈ တႄႇႁဵတ်းဝဵင်း ပေႇၼူၺ်ႇလႃႉ ဢေႃႈ။-

26မိူဝ်ႈၼၼ်ႉ ယေႇရူဝ်းပုမ်ႇ ၶႆႈၸႂ်ဝူၼ်ႉၸႂ်လႄႈဝႃႈ၊ သိုင်ႇၸိုင်ႈဝၢၼ်ႈမိူင်းၼႆႉ ၸၢင်ႈၶႄးတၵ်းၶိုၼ်းႁွတ်ႈထိုင် ၵႃႈၼႂ်းမိုဝ်းၸိူဝ်ႉၶိူဝ်း တႃႇဝိတ်ႈ ဢေႃႈ။-

27ပေႃးၵူၼ်းဝၢၼ်ႈၵူၼ်းမိူင်းတင်းလၢႆၼႆႉ ၶိုၼ်ႈၸူးႁႂ်ႈလႆႈပုၵ်ႈၸေႃႇယိတ်ႈ ၵႃႈၼႂ်းႁိူၼ်းထႃႇဝရႃႉၽြႃး ၵႃႈတီႈဝဵင်း ယေႇရူႉသလႅမ်ႇ ၸိုင်၊ ႁူဝ်ၸႂ်ၵူၼ်းဝၢၼ်ႈၵူၼ်းမိူင်းတင်းလၢႆၼႆႉတၵ်းၶၢႆႉပုတ်ႈၵႂႃႇၸူးတီႈၽၢႆႇၸဝ်ႈၶဝ် ရူဝ်းပုမ်ႇ ၶုၼ်ႁေႃၶမ်း ယူႉတႃႉ ၼၼ်ႉလႄႈ ၶဝ်တၵ်းဢဝ်ၵဝ်တၢႆလႄႈ ၶိုၼ်းၶဝ်ႈယူႇၽၢႆႇ ရူဝ်းပုမ်ႇ ၶုၼ်ႁေႃၶမ်း ယူႉတႃႉ ၼၼ်ႉဢေႃႈ၊ ဝႃႈၼင်ႇၼႆလႄႈ၊-

28ၶုၼ်ႁေႃၶမ်းတိူင်ႇပၢင်ႇၵၼ်တင်းပိူၼ်ႈသေလႄႈ ႁဵတ်းဝူဝ်းၶမ်းဢွၼ်ႇသွင်တူဝ်သေယဝ်ႉ၊ လၢတ်ႈလႄႈဝႃႈ၊ လွင်ႈတၢင်းဢၼ်သူတၵ်းလႆႈၶိုၼ်ႈၸူးၵႃႈတီႈဝဵင်း ယေႇရူႉသလႅမ်ႇ ၼၼ်ႉၸိုင်ပေႃးတႃႉ။ မဵဝ်း ဢီႉသရေႇလႃႉ ဢိူၺ်း၊ လူတူၺ်းၽြႃးမႂ်း ဢၼ်ၼုၵ်ႈဢဝ်မႂ်းဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၸိူဝ်းၼၼ်ႉတႃႉ၊ ဝႃႈၼင်ႇၼႆသေလႄႈ၊-

29ဢဝ်တူဝ်ၼိုင်ႈ ဝႆႉၵႃႈတီႈဝဵင်း ပေႇသလႃႉ လႄႈ ဢဝ်တူဝ်ၼိုင်ႈ ဝႆႉၵႃႈတီႈဝဵင်း တၢၼ်ႇ ဢေႃႈ။-

30လွင်ႈတၢင်းၼၼ်ႉ ပဵၼ်လွင်ႈတၢင်းဢၼ်ၽိတ်းပိူင်ႈ ၵွပ်ႈပိူဝ်ႈဢၼ်ၵူၼ်းဝၢၼ်ႈၵူၼ်းမိူင်းတင်းလၢႆ ၸင်ႇဢွၼ်ၵၼ်ၵႂႃႇႁႂ်ႈလႆႈ ၵူဝ်းၵႂၢႆႇဝူဝ်းဢွၼ်ႇတူဝ်ၼိုင်ႈၼၼ်ႉ ၵူႈတီႈၵူႈလႅၼ်တေႃႇထိုင်ႁွတ်ႈဝဵင်း တၢၼ်ႇ ဢေႃႈ။-

31မၼ်းႁဵတ်းႁိူၼ်းၸဝ်ႈၵႃႈၼိူဝ်ထႃႇၼႃႉတီႈသုင်တင်းလၢႆလႄႈ ဢဝ်ၵူၼ်းၵႃႈၼႂ်းၵူၼ်းတင်းလၢႆ ဢၼ်ဢမ်ႇၸႂ်ႈၵူၼ်းမဵဝ်း လေႇဝီႉ ၸိူဝ်းၼၼ်ႉ ၶၢၼ်းဝႆႉၵႃႈၼႂ်းဢရႃႇယိတ်ႈပရေႃးႁဵၵ်ႈဢေႃႈ။

32ယေႇရူဝ်းပုမ်ႇ ၼၼ်ႉ ၸီႇယၢင်ႇႁဵတ်းပွႆး ၼႂ်းလိူၼ်ဢႃႉထမႃႉသိပ်းႁႃႈဝၼ်း မိူၼ်ၸိူဝ်ႉၼင်ႇ ပွႆးဢၼ်ၶၢမ်ႇၵႃႈၼႂ်းမိူင်း ယူႉတႃႉ ၼၼ်ႉလႄႈ ပုၵ်ႈၸေႃႇၵႃႈၼိူဝ်ယိတ်ႈပလၢင်ႇဢေႃႈ။ ၼင်ႇၼၼ်လႄႈ မၼ်းႁဵတ်းၵႃႈၼႂ်းဝဵင်း ပေႇသလႃႉ လႄႈ ပုၵ်ႈၸေႃႇယိတ်ႈတီႈဝူဝ်းဢွၼ်ႇ ဢၼ်မၼ်းႁဵတ်းၸိူဝ်းၼၼ်ႉဢေႃႈ။ ယိတ်ႈပရေႃးႁဵၵ်ႈ ဢၼ်မၼ်းၶၢၼ်းဝႆႉၵႃႈတီႈထႃႇၼႃႉတီႈသုင်တင်းလၢႆၸိူဝ်းၼၼ်ႉၵေႃႈ မၼ်းၶျႃးတီႈယူႇၶဝ်ပၼ်တီႈဝဵင်း ပေႇသလႃႉ ဢေႃႈ။-

33ၼင်ႇၼၼ်လႄႈ မၼ်းပုၵ်ႈၸေႃႇၵႃႈၼိူဝ်ယိတ်ႈပလၢင်ႇဢၼ်မၼ်းႁဵတ်းၵႃႈတီႈဝဵင်း ပေႇသလႃႉ ၼၼ်ႉ ၼႂ်းလိူၼ်ဢႃႉထမႃႉသိပ်းႁႃႈဝၼ်း ဢၼ်မၼ်းၸွမ်းဢလူဝ်ႇမၼ်းသေလႄႈမၵ်းၶိၼ်းဝႆႉၼၼ်ႉဢေႃႈ။ မၼ်းၸီႇယၢင်ႇပွႆးတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ ဢဝ်ယိတ်ႈပုၵ်ႈၸေႃႇၵႃႈၼိူဝ်ယိတ်ႈပလၢင်ႇလႄႈဢဝ်ၼၢမ်ႇသႃႇတုတ်ႇၽႆးဢေႃႈ။

← Chapter 11 Jump to: Chapter 13 →