1 Kings 19

Shan

← Chapter 18 Jump to: Chapter 20 →

1ဢႃႇႁပ်ႉ မွၵ်ႇလၢတ်ႈလွင်ႈတၢင်းၵႃႈဢၼ် ဢေးလီႉယႃႉ ႁဵတ်းဢိၵ်ႇတင်းလွင်ႈတၢင်းဢၼ်မၼ်းဢဝ်ပရေႃးၽႅတ်ႈၵႃႈမီးၼၼ်ႉ တၢႆလူၺ်ႈလၢပ်ႇလူၺ်ႈလႅဝ်းၼၼ်ႉတီႈ ယေႇၸပေႇလႃႉ ဢေႃႈ။-

2ယေႇၸပေႇလႃႉ ပွႆႇၸႂ်ႉတမၢၼ်ႇၵႂႃႇၵႃႈတီႈ ဢေးလီႉယႃႉ လႄႈ သင်ႇလၢတ်ႈၵႂႃႇလႄႈဝႃႈ၊ ပေႃးၵဝ်ဢမ်ႇႁႂ်ႈဢသၢၵ်ႈမႂ်း ပဵၼ်ၸိူဝ်ႉၼင်ႇဢသၢၵ်ႈပရေႃးၽႅတ်ႈၸိူဝ်းၼၼ်ႉသေၵေႃႉၵေႃႉ ၼႂ်းဝၼ်းမိူဝ်ႈၽုၵ်ႈ မိူဝ်ႈဢၼ်ႁွတ်ႈထိုင်ၶိင်ႇၼႆႉၼၼ်ႉၸိုင်၊ ယင်းဢမ်ႇၵႃးဢၼ်ၼၼ်ႉလႄႈ ႁႂ်ႈၽြႃးတင်းလၢႆႁဵတ်းလိူဝ်တွၼ်းၼႃႇသေၼၼ်ႉတီႈၵဝ်သေၵမ်းလူၺ်ႈ၊ ဝႃႈၼင်ႇၼႆဢေႃႈ။-

3မိူဝ်ႈၼၼ်ႉမၼ်းၵူဝ်ႁႄလႄႈ လုၵ်ႉၵႂႃႇႁႂ်ႈဢသၢၵ်ႈမၼ်းလႆႈလွတ်ႈလႄႈ ႁွတ်ႈထိုင်ၵႃႈတီႈ ပေႇရသေႇၽႃႉ ၼႂ်းလိၼ် ယူႉတႃႉ သေယဝ်ႉ၊ ဢဝ်ၵူၼ်းဢွၼ်ႇမၼ်းဝႆႉၵႃႈတီႈဝဵင်းၼၼ်ႉဢေႃႈ။-

4တူဝ်မၼ်းၸမ်ႉ ၶဝ်ႈၵႂႃႇၵႃႈၼႂ်းထိူၼ်ႇၶၢဝ်းတၢင်းဝၼ်းၼိုင်ႈသေလႄႈ ႁွတ်ႈထိုင်ၵႃႈတီႈတႂ်ႈတူၼ်ႈ ရႃႇသမ်ႇ လႄႈ ၼင်ႈယူႇသေယဝ်ႉ သူးတွင်းပုၼ်ႈမၼ်းႁႂ်ႈလႆႈတၢႆလႄႈဝႃႈ၊ မိူဝ်ႈလဵဝ်ၼႆႉ ပဵၼ်ဢၼ်ထုၵ်ႇဢၼ်လီတီႈၶႃႈယဝ်ႉ။ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈသိမ်းဢဝ်ဢသၢၵ်ႈၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈၼႆႉဢမ်ႇလီလိူဝ်တွၼ်းသေပူႇမွၼ်ႇၶႃႈၸဝ်ႈတင်းလၢႆၼၼ်ႉတီႈၶႃႈ၊ ဝႃႈၼင်ႇၼႆသေယဝ်ႉ။-

5ၼွၼ်းလႄႈလပ်းယူႇၵႃႈတီႈတႂ်ႈတူၼ်ႈ ရႃႇသမ်ႇ ၼၼ်ႉဢေႃႈ။ မိူဝ်ႈၼၼ်ႉတမၢၼ်ႇၵၢင်ႁၢဝ် ဢဝ်မိုဝ်းတိူဝ်ႉသႂ်ႇမၼ်းသေလႄႈလၢတ်ႈလႄႈဝႃႈ၊ လုၵ်ႉလႄႈၵိၼ်ၶူပ်းတႃႉ၊ ဝႃႈၼင်ႇၼႆဢေႃႈ။-

6မၼ်းႁႅၼ်တူၺ်းလႄႈ ႁၼ်ၶဝ်ႈမုၼ်းဢၼ်မူၵ်းၽႆးယဝ်ႉ ဢိၵ်ႇတင်းၼမ်ႉတဝ်ႈၵႃႈတီႈႁူဝ်ၼွၼ်းမၼ်းလႄႈ မၼ်းၵိၼ်ၶူပ်းသေယဝ်ႉ၊ သမ်ႉၶိုၼ်းၼွၼ်းလပ်းယူႇဢေႃႈ။-

7တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉသမ်ႉမႃးၵမ်းတူႉတီႉယႃႉလႄႈ တိူဝ်ႉသႂ်ႇမၼ်းသေလႄႈလၢတ်ႈလႄႈဝႃႈ၊ ၵွပ်ႈပိူဝ်ႈဢၼ် သဵၼ်ႈတၢင်းဢၼ်မႂ်းတၵ်းလႆႈၵႂႃႇၼၼ်ႉၵႆၼႃႇလူင်လၢင်လႄႈ လုၵ်ႉလႄႈၵိၼ်ၶူပ်းထႅင်ႈလူးၵွၼ်ႇတႃႉ၊ ဝႃႈၼင်ႇၼႆသေယဝ်ႉ၊-

8မၼ်းသမ်ႉလုၵ်ႉသေလႄႈၵိၼ်ထႅင်ႈလႄႈဢိင်ပိုင်ႈဢႁႃႇရႃႉတၢင်းၵိၼ်ၼၼ်ႉသေလႄႈ ၵႂႃႇၶၢဝ်းတၢင်းသီႇသိပ်းဝၼ်းသီႇသိပ်းၶိုၼ်းတဵမ်တဵမ်လႄႈ ႁွတ်ႈထိုင်ၵႃႈတီႈလွႆ ႁေႃးရပ်ႉ ဢၼ်ပဵၼ်လွႆၽြႃးပဵၼ်ၸဝ်ႈသေယဝ်ႉ။-

9ၶဝ်ႈၵႃႈၼႂ်းႁူးထမ်ႈလႄႈယူႇၵႃႈတီႈၼၼ်ႈဢေႃႈ။ ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈမၼ်းလႄႈ မၼ်းၸဝ်ႈထၢမ်တီႈမၼ်းလႄႈဝႃႈၸမ်ႉ၊ ဢေးလီႉယႃႉ ဢိူၺ်း၊ မႂ်းႁဵတ်းၵႃႈသင်ယူႇၵႃႈတီႈၼႆႈ၊ ဝႃႈၼင်ႇၼႆဢေႃႈ။-

10မၼ်းၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈၼႆႉၸႂ်ႁႅင်းၼႃႇၽၢႆႇထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈပူဝ်ႇပႃႇၵၢင်ႁၢဝ်ယဝ်ႉတီႈၶႃႈယဝ်ႉ။ လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ တင်းလၢႆၸုၼ်ႉပႅတ်ႈပတီႉၺိၺ်ႇတြႃးၸဝ်ႈႁဝ်းလႄႈ ၵိူၼ်ႇယႃႉယိတ်ႈပလၢင်ႇၸဝ်ႈႁဝ်းတင်းလၢႆပႅတ်ႈသေလႄႈ ဢဝ်ပရေႃးၽႅတ်ႈၸဝ်ႈႁဝ်းတင်းလၢႆ တၢႆလူၺ်ႈလၢပ်ႇလူၺ်ႈလႅဝ်းယဝ်ႉတီႈၶႃႈယဝ်ႉ။ ၵိုတ်းၵျၢၼ်ႇဝႆႉၶႃႈၸဝ်ႈၼႆႉၵေႃႉလဵဝ်ၵူၺ်းလႄႈ တေႃႈၵႃႈဢသၢၵ်ႈၶႃႈၸဝ်ႈၼႆႉၵေႃႈ ၶဝ်ဢွၼ်ၵၼ်ႁႃႁႂ်ႈလႆႈဢဝ်တၢႆယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

11မၼ်းၸဝ်ႈၵေႃႈမီးဢမိင်ႉလႄႈဝႃႈ၊ ဢွၵ်ႇလႄႈၸုၵ်းယူႇၵႃႈၼိူဝ်လွႆ ၵႃႈတီႈၽၢႆႇၼႃႈထႃႇဝရႃႉၽြႃးတႃႉ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ ထႃႇဝရႃႉၽြႃးၵၢႆၵႂႃႇၵႃႈတီႈႁိမ်းမၼ်းလႄႈ လူမ်းဢၼ်ႁႅင်းလႄႈယႂ်ႇၼႃႇၼၼ်ႉ ၽႃႇပၢႆလွႆတင်းလၢႆတႅၵ်ႇလႄႈ ႁၵ်းမၢၵ်ႇႁိၼ်မၢၵ်ႇၽႃဢၼ်မီးၵႃႈတီႈၽၢႆႇၼႃႈထႃႇဝရႃႉၽြႃးၸိူဝ်းၼၼ်ႉပႅတ်ႈဢေႃႈ။ ၵူၺ်းၵႃႈထႃႇဝရႃႉၽြႃးဢမ်ႇမီးၵႃႈၼႂ်းလူမ်းၼၼ်ႉ။ လိုၼ်းလူမ်းၼၼ်ႉ မီးတၢင်းဢၼ်ဢိင်ႇသၼ်ႇဢေႃႈ။ ၵူၺ်းၵႃႈထႃႇဝရႃႉၽြႃးဢမ်ႇမီးၵႃႈၼႂ်းတၢင်းဢၼ်ဢိင်ႇသၼ်ႇၼၼ်ႉ။-

12လိုၼ်းတၢင်းဢၼ်ဢိင်ႇသၼ်ႇၼၼ်ႉ မီးၽႆးဢေႃႈ။ ၵူၺ်းၵႃႈထႃႇဝရႃႉၽြႃးဢမ်ႇမီးၵႃႈၼႂ်းၽႆးၼၼ်ႉ။ လိုၼ်းၽႆးၼၼ်ႉမီးသဵင်ဢၼ်ဢူၼ်ႈဢၼ်ဢွၼ်ႇထိူင်းထိူင်းလွႆးလွႆးဢေႃႈ။-

13ဢေးလီႉယႃႉ ငိၼ်းသဵင်ၼၼ်ႉသေယဝ်ႉ၊ ဢဝ်ၽႃႈဝႆႁူမ်ႇသုမ်ႇၼႃႈမၼ်းယူႇသေလႄႈ ဢွၵ်ႇလႄႈၸုၵ်းယူႇၵႃႈတီႈပၢၵ်ႇႁူးထမ်ႈဢေႃႈ။ မိူဝ်ႈၼၼ်ႉ မၼ်းငိၼ်းသဵင်မႃးလႄႈဝႃႈ၊ မႂ်းႁဵတ်းၵႃႈသင်ယူႇၵႃႈတီႈၼႆႈ၊ ဝႃႈၼင်ႇၼႆဢေႃႈ။-

14မၼ်းၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈၼႆႉၸႂ်ႁႅင်းၼႃႇၽၢႆႇထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈပူဝ်ႇပႃႇၵၢင်ႁၢဝ်ယဝ်ႉတီႈၶႃႈယဝ်ႉ။ လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ၸုၼ်ႉပႅတ်ႈပတီႉၺိၺ်ႇတြႃးၸဝ်ႈႁဝ်းလႄႈ ၵိူၼ်ႇယႃႉယိတ်ႈပလၢင်ႇၸဝ်ႈႁဝ်းတင်းလၢႆပႅတ်ႈသေလႄႈ ဢဝ်ပရေႃးၽႅတ်ႈၸဝ်ႈႁဝ်းတင်းလၢႆ တၢႆလူၺ်ႈလၢပ်ႇလူၺ်ႈလႅဝ်းယဝ်ႉတီႈၶႃႈယဝ်ႉ။ ၵိုတ်းၵျၢၼ်ႇဝႆႉၶႃႈၸဝ်ႈၼႆႉၵေႃႉလဵဝ်ၵူၺ်းလႄႈ တေႃႈၵႃႈဢသၢၵ်ႈၶႃႈၸဝ်ႈၼႆႉၵေႃႈ ၶဝ်ဢွၼ်ၵၼ်ႁႃႁႂ်ႈလႆႈဢဝ်တၢႆယူႇတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်။-

15ထႃႇဝရႃႉၽြႃးမီးဢမိင်ႉလႄႈဝႃႈ၊ မႂ်းၵႂႃႇတႃႉ။ ၶိုၼ်းမိူဝ်းၸွမ်းသဵၼ်ႈတၢင်းမႂ်းၸူးၵႃႈတီႈထိူၼ်ႇ ထမ်ႇမသႅတ်ႉ လႄႈ ႁွတ်ႈထိုင်သေယဝ်ႉ ပၼ်ၽိၵ်ႈသိၵ်ႈတီႈ ႁႃႇၸေႇလႃႉ ႁႂ်ႈမၼ်းပဵၼ်ၶုၼ်ႁေႃၶမ်း သူႉရီႉ တႃႉ။-

16ပၼ်ၽိၵ်ႈသိၵ်ႈတီႈ ယေႇႁူႉ လုၵ်ႈၸၢႆး ၼိမ်းသီႉ ႁႂ်ႈမၼ်းပဵၼ်ၶုၼ်ႁေႃၶမ်း ဢီႉသရေႇလႃႉ တႃႉ။ ပၼ်ၽိၵ်ႈသိၵ်ႈတီႈ ဢေးလီႉသႄး လုၵ်ႈၸၢႆး သႃႇၽတ်ႉ ဢၼ်ယူႇၵႃႈတီႈဝဵင်း ဢႃႇပေႇလႃႉမႁေႃႇလႃႉ ၼၼ်ႉ ႁႂ်ႈပဵၼ်ပရေႃးၽႅတ်ႈတၢင်တူဝ်မႂ်းတႃႉ။-

17ၵေႃႉဢၼ်လွတ်ႈတင်းလၢပ်ႇ ႁႃႇၸေႇလႃႉ ၼၼ်ႉၸိုင်၊ ယေႇႁူႉ တၵ်းဢဝ်တၢႆဢေႃႈ။ ၵေႃႉဢၼ်လွတ်ႈတင်းလၢပ်ႇ ယေႇႁူႉ ၼၼ်ႉၸိုင်၊ ဢေးလီႉသႄး တၵ်းဢဝ်တၢႆဢေႃႈ။-

18ၼႂ်းဝႃႈၼၼ်သေၵေႃႈ ၵူၼ်းမဵဝ်း ဢီႉသရေႇလႃႉ ၸဵတ်းႁဵင်ဢၼ်ဝႃႈ မၢၵ်ႇၵၢဝ်ႈၵႃႈဢၼ်ဢမ်ႇၶုပ်ႉၶဝ်ႇၵႃႈတီႈၽၢႆႇၼႃႈ ပႃႇလႃႉ ဢိၵ်ႇတင်း သူပ်းၵႃႈဢၼ်ဢမ်ႇၸုပ်ႇဢမ်ႇၼူမ်မၼ်းၼၼ်ႉၸိူဝ်းၼၼ်ႉၸိုင်၊ ၵဝ်ႁႂ်ႈၵိုတ်းၵျၢၼ်ႇဝႆႉပုၼ်ႈၵဝ်ယဝ်ႉ၊ ဝႃႈၼင်ႇၼႆဢေႃႈ။

19မၼ်းလုၵ်ႉသေၵႃႈတီႈၼၼ်ႈၵႂႃႇလႄႈ ထူပ်းႁၼ် ဢေးလီႉသႄး လုၵ်ႈၸၢႆး သႃႇၽတ်ႉ ဢၼ်ဢဝ်ဝူဝ်းသိပ်းသွင်ၵူႈထႆၼႃးယူႇသေလႄႈ တူဝ်မၼ်းၸွမ်းၵႃႈတီႈၵူႈဝူဝ်းဢၼ်ထူၼ်ႈထိုင်သိပ်းသွင်ၵူႈၼၼ်ႉသေယဝ်ႉ ၵႂႃႇၸူးၵႃႈတီႈႁိမ်းမၼ်းၼၼ်ႉသေလႄႈ၊ ဢဝ်ၽႃႈဝႆမၼ်းပၢႆႉသႂ်ႇၵႃႈၼိူဝ်မၼ်းၼၼ်ႉဢေႃႈ။-

20မၼ်းၼၼ်ႉပႅတ်ႈဝူဝ်းမၼ်းၸိူဝ်းၼၼ်ႉဝႆႉသေလႄႈ ၸွမ်းလင် ဢေးလီႉယႃႉ လႄႈယွၼ်းဢၶႂၢင်ႉလႄႈဝႃႈ၊ ႁႂ်ႈၵဝ်ၶႃႈလႆႈၸုပ်ႇၼူမ်ပေႃႈမႄႈၵဝ်ၶႃႈလူးၵွၼ်ႇသေၵမ်းၶႃႈ။ ႁဵတ်းၸိူဝ်ႉၼင်ႇၼၼ်သေယဝ်ႉ တၵ်းၸွမ်းလင်ၸဝ်ႈႁဝ်းၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းလၢတ်ႈတီႈမၼ်းၼၼ်ႉလႄႈဝႃႈ၊ ၶိုၼ်းမိူဝ်းၵႂႃႇတႃႉ။ ၵဝ်ႁဵတ်းၸိူဝ်ႉၼင်ႇႁိုဝ်တီႈမႂ်းယဝ်ႉ၊-

21မိူဝ်ႈဢၼ်ဝႃႈၼင်ႇၼႆၸိုင် မၼ်းၼၼ်ႉလုၵ်ႉသေၵႃႈတီႈဢၼ်ၸွမ်းလင်မၼ်းယူႇၼၼ်ႉ ၶိုၼ်းမိူဝ်းၵႂႃႇလႄႈ ဢဝ်ဝူဝ်းၵူႈၼိုင်ႈတၢႆသေယဝ်ႉ၊ ဢဝ်ၶိူင်ႈဢၼ်ထႆၼႃးတူမ်ႈၼိူဝ်ႉဝူဝ်းၼၼ်ႉလႄႈ တမ်းပၼ်ၵူၼ်းတင်းလၢႆလႄႈ ၶဝ်ဢွၼ်ၵၼ်ၵိၼ်ဢေႃႈ။ ႁဵတ်းၸိူဝ်ႉၼင်ႇၼၼ်သေယဝ်ႉ မၼ်းၼၼ်ႉလုၵ်ႉလႄႈ ၸွမ်းလင် ဢေးလီႉယႃႉ ယူႇသေလႄႈ ပဵၼ်ၵေႃႉဢၼ်ပုတ်ႈတိၼ်တၢင်မိုဝ်းမၼ်းဢေႃႈ။

← Chapter 18 Jump to: Chapter 20 →