1 Kings 20 — Shan

1ပိၼ်ႇႁႃႇတတ်ႉ ၶုၼ်ႁေႃၶမ်း သူႉရီႉ ၼၼ်ႉ ႁႂ်ႈပူဝ်ႇပႃႇမၼ်းတင်းသဵင်ႈတင်းလူင်ၸူႉၵၼ်တုမ်ၵၼ်လႄႈ ပႃးဢဝ်တင်းၶုၼ်လူင်သၢမ်သိပ်းပၢႆသွင်ပႃး၊ ႁူဝ်ႁၢၼ်ၵူၼ်းသိုၵ်းၶီႇမႃႉ၊ ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးတင်းလၢႆသေလႄႈ ၶီႇသိုၵ်းၶိုၼ်ႈၸူးသေယဝ်ႉ လွမ်ႉႁွပ်ႈဝဵင်း သမႃႇရီႉ လႄႈတိုၵ်းတေႃးဢေႃႈ။-

2မၼ်းပွႆႇၸႂ်ႉသၢၼ်ႇတမၢၼ်ႇတင်းလၢႆၶဝ်ႈၵႃႈၼႂ်းဝဵင်းၸူးၵႃႈတီႈ ဢႃႇႁပ်ႉ ၶုၼ်ႁေႃၶမ်း ဢီႉသရေႇလႃႉ လႄႈ သင်ႇလၢတ်ႈၵႂႃႇလႄႈဝႃႈ၊-

3ငိုၼ်းမႂ်းၶမ်းမႂ်းၸိူဝ်းၼၼ်ႉပဵၼ်ၶွင်ၵဝ်ဢေႃႈ။ လုၵ်ႈမႂ်းမေးမႂ်းဢၼ်လီၼႃႇသေပိူၼ်ႈၸိူဝ်းၼၼ်ႉၵေႃႈ၊ ပဵၼ်ၶွင်ၵဝ်ဢေႃႈ၊ ဝႃႈၼင်ႇၼႆဢေႃႈ။-

4ၶုၼ်ႁေႃၶမ်း ဢီႉသရေႇလႃႉ ၶိုၼ်းလၢတ်ႈလႄႈဝႃႈ၊ ၸဝ်ႈၵဝ်ၶႃႈၸဝ်ႈၶုၼ်လူင်ဢိူၺ်း၊ ၸွမ်းၵႃႈၼင်ႇဢၼ်ဢမိင်ႉၸဝ်ႈႁဝ်းမီးၼၼ်ႉလႄႈ၊ ၵဝ်ၶႃႈတင်းဢုၵ်ႉၸႃႇၵဝ်ၶႃႈၵႃႈမီးၼႆႉပဵၼ်ဢုၵ်ႉၸႃႇၸဝ်ႈႁဝ်းၶႃႈယဝ်ႉ၊ ဝႃႈၼင်ႇၼႆဢေႃႈ။-

5သၢၼ်ႇတမၢၼ်ႇၸိူဝ်းၼၼ်ႉသမ်ႉၶိုၼ်းၵႂႃႇထႅင်ႈလႄႈဝႃႈ၊ ဢမိင်ႉၸဝ်ႈ ပိၼ်ႇႁႃႇတတ်ႉ ၸမ်ႉ၊ ပိၵ်ႉသမ်ႉၵဝ်သင်ႇလၢတ်ႈၵႂႃႇလႄႈဝႃႈ၊ မႂ်းတၵ်းလႆႈဢဝ်ငိုၼ်းမႂ်း ၶမ်းမႂ်း လုၵ်ႈမေးမႂ်းၸိူဝ်းၼၼ်ႉ ဢၢပ်ႈပၼ်တီႈၵဝ်ဢေႃႈ၊ ဝႃႈၼင်ႇၼႆသေၵေႃႈ၊-

6ဝၼ်းမိူဝ်ႈၽုၵ်ႈမိူဝ်ႈဢၼ်ႁွတ်ႈထိုင်ၶိင်ႇၼႆႉၼၼ်ႉ ၵဝ်တၵ်းပွႆႇၸႂ်ႉၶႃႈၵဝ်တင်းလၢႆၵႂႃႇတီႈမႂ်းလႄႈ ၶဝ်တၵ်းလႆႈသွၵ်ႈလႆႈႁႃၵႃႈၼႂ်းႁိူၼ်းမႂ်း ဢိၵ်ႇတင်းႁိူၼ်းၶႃႈမႂ်းၸိူဝ်းၼၼ်ႉသေယဝ်ႉ၊ ဢဝ်မိုဝ်းယိပ်းၵမ်ဢဝ်ၵႃႈဢၼ်ထုၵ်ႇတႃမႂ်းၼၼ်ႉသေလႄႈဢဝ်ၵႂႃႇဢေႃႈ၊ ဝႃႈၼင်ႇၼႆဢေႃႈ။-

7မိူဝ်ႈၼၼ်ႉၶုၼ်ႁေႃၶမ်း ဢီႉသရေႇလႃႉ ၼၼ်ႉ ႁွင်ႉဢဝ်ၵူၼ်းဝၢၼ်ႈၵူၼ်းမိူင်း ဢၼ်ဢသၢၵ်ႈထဝ်ႈၵႄႇတင်းသဵင်ႈတင်းလူင်မႃးသေလႄႈ မွၵ်ႇလၢတ်ႈလႄႈဝႃႈ၊ သူဝႆႉၸႂ်လႄႈလူတူၺ်းလွင်ႈဢၼ် ၵေႃႉၼႆႉၶႂ်ႈႁႃတၢင်းၽိတ်းသႂ်ႇထၢၼ်ႇၼႆႉၼၼ်ႉသေၵမ်း။ မိူဝ်ႈဢၼ်သင်ႇလၢတ်ႈမႃးလႄႈ ယွၼ်းဢဝ်လုၵ်ႈမေးၵဝ်၊ ငိုၼ်းၶမ်းၵဝ်ၼၼ်ႉၸိုင်၊ ၵဝ်ယင်းဢမ်ႇတွပ်ႇဢမ်ႇထဵင်မၼ်းလူင်ပႄႇ၊ ဝႃႈၼင်ႇၼႆဢေႃႈ။-

8ၵူၼ်းဢၼ်ဢသၢၵ်ႈထဝ်ႈၵႄႇတင်းသဵင်ႈတင်းလူင် ဢိၵ်ႇတင်းၶုၼ်တင်းသဵင်ႈတင်းလူင် ဢွၼ်ၵၼ်ၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်းယႃႇပေထွမ်ႇဢဝ်ၵႂၢမ်းၼၼ်ႉသေၵမ်းတီႈၶႃႈ။ ယႃႇပေႁပ်ႉတုင်းဢဝ်သေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

9ပိူဝ်ႈၼႆလႄႈမၼ်းလၢတ်ႈတီႈသၢၼ်ႇတမၢၼ်ႇ ပိၼ်ႇႁႃႇတတ်ႉ ၸိူဝ်းၼၼ်ႉလႄႈဝႃႈ သူၶိုၼ်းလဝ်ႊလၢတ်ႈတီႈၸဝ်ႈၵဝ်ၶႃႈ ၸဝ်ႈၶုၼ်လူင်လႄႈဝႃႈ၊ ၶႃႈၸဝ်ႈႁဝ်းတၵ်းႁဵတ်းၵႃႈဢၼ်ၸဝ်ႈႁဝ်းမီးဢမိင်ႉတီႈၶႃႈၸဝ်ႈႁဝ်း ၵမ်းဢွၼ်တၢင်းၼၼ်ႉတီႈၶႃႈဢေႃႈ။ ၵူၺ်းၵႃႈတီႈႁဵင်းၼႆႉၸိုင်၊ ၶႃႈၸဝ်ႈဢမ်ႇလီႁဵတ်းတီႈၶႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆသေယဝ်ႉ၊ သၢၼ်ႇတမၢၼ်ႇၸိူဝ်းၼၼ်ႉဢွၵ်ႇမိူဝ်းလႄႈ ဢဝ်ၵႂၢမ်းၼၼ်ႉၶိုၼ်းလဝ်ႊလၢတ်ႈဢေႃႈ။-

10လႆႈသမ်ႉ ပိၼ်ႇႁႃႇတတ်ႉ ၼၼ်ႉ ပွႆႇၸႂ်ႉထႅင်ႈလႄႈသင်ႇလၢတ်ႈဝႃႈ၊ ပေႃးမုၼ်ႈလိၼ်ဝဵင်း သမႃႇရီႉ ၼၼ်ႉယင်းၸေးယင်းၵုမ်ႇၶဝ်ၸိူဝ်းဢၼ်ၸွမ်းလင်ၵဝ်ၸိူဝ်းၼႆႉ ယေႈၵေႃႉယေႈၵမ်မိုဝ်းၸိုင် ယင်းဢမ်ႇၵႃးဢၼ်ၼၼ်ႉလႄႈ ႁႂ်ႈၽြႃးတင်းလၢႆ ႁဵတ်းလိူဝ်တွၼ်းၼႃႇသေၼၼ်ႉတီႈၵဝ်သေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊-

11ၶုၼ်ႁေႃၶမ်း ဢီႉသရေႇလႃႉ ၶိုၼ်းလၢတ်ႈလႄႈဝႃႈ၊ လဝ်ႊလၢတ်ႈတီႈမၼ်းလႄႈဝႃႈ၊ ယႃႇပေႁႂ်ႈၵေႃႉဢၼ်ၼုင်ႈမႆလၢၵ်ႈၼၢၵ်ႈၸုမ်ႇၼၼ်ႉ ဢုပ်ႇဢၢတ်ႇယူႇ မိူၼ်ၸိူဝ်ႉၼင်ႇဢၼ် ၵေႃႉဢၼ်ထွတ်ႇပႅတ်ႈသေလႄႈ ဢုပ်ႇဢၢတ်ႇၼၼ်ႉသေၵမ်း၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

12ပိၼ်ႇႁႃႇတတ်ႉ ငိၼ်းၵႂၢမ်းၼၼ်ႉ ၼႂ်းမိူဝ်ႈဢၼ်မၼ်းယင်းတိုၵ်ႉၵိၼ်ယူႇသူတ်ႉယူႇၵႃႈၼႂ်းသုမ်ႉထဵင်ၸဝ်ႈ ဢိၵ်ႇလူၺ်ႈၵၼ်တင်းၶုၼ်လူင်ၸိူဝ်းၼၼ်ႉယူႇၼၼ်ႉသေယဝ်ႉ၊ မီးဢမိင်ႉတီႈၶႃႈမၼ်းၵူၼ်းမၼ်းတင်းလၢႆလႄႈဝႃႈ၊ ဢွၼ်ၵၼ်ႁၢင်ႈသိုၵ်းၶၢင်းသိုၵ်းတႃႉ၊ ဝႃႈၼင်ႇၼႆလႄႈ ၶဝ်ၼၼ်ႉဢွၼ်ၵၼ်ႁၢင်ႈသိုၵ်းၶၢင်းသိုၵ်းၶဝ်ယူႇၽၢႆႇၼိုင်ႈတင်းဝဵင်းဢေႃႈ။

13မိူဝ်ႈၼၼ်ႉပရေႃးၽႅတ်ႈပႃးၼိုင်ႈ သုတ်ႉၸပ်းသုတ်ႉၸူးၵႃႈတီႈ ဢႃႇႁပ်ႉ ၶုၼ်ႁေႃၶမ်း ဢီႉသရေႇလႃႉ လႄႈလၢတ်ႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ မႂ်းႁၼ်မူႇၽုင်မုၵ်ႉၸိူဝ်းဢၼ်ယႂ်ႇၼႃႇတင်းသဵင်ႈတင်းလူင်ၼႆႉယဝ်ႉႁိုဝ်။ ၵဝ်တၵ်းဢဝ်ဢၢပ်ႈပၼ်ၵႃႈၼႂ်းမိုဝ်းမႂ်းဝၼ်းမိူဝ်ႈၼႆႉဢေႃႈ။ မႂ်းတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။-

14ဢႃႇႁပ်ႉ ၵေႃႈထၢမ်လႄႈဝႃႈ၊ တၵ်းဢဝ်တင်းၽူႈလႂ်ဢဝ်ဢၢပ်ႈပၼ်၊ ဝႃႈၼင်ႇၼႆသေယဝ်ႉ၊ မၼ်းၼၼ်ႉၶိုၼ်းလၢတ်ႈလႄႈဝႃႈ၊ တၵ်းဢဝ်တင်းၵူၼ်းဢွၼ်ႇမဵဝ်ႉဝုၼ်ႇတင်းလၢႆ ဢဝ်ဢၢပ်ႈပၼ်ဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းထၢမ်ထႅင်ႈလႄႈဝႃႈ ၽူႈလႂ်တၵ်းလႆႈၸီႇယၢင်ႇဢမူႉသိုၵ်း၊ ဝႃႈၼင်ႇၼႆသေယဝ်ႉ၊ မၼ်းၼၼ်ႉၶိုၼ်းလၢတ်ႈလႄႈဝႃႈ၊ တူဝ်ၶုၼ်လူင်တၵ်းလႆႈၸီႇယၢင်ႇဢေႃႈ၊ ဝႃႈၼင်ႇၼႆဢေႃႈ။-

15မိူဝ်ႈၼၼ်ႉမၼ်းၼပ်ႉဢၢၼ်ႇၵူၼ်းဢွၼ်ႇမဵဝ်ႉဝုၼ်ႇၸိူဝ်းၼၼ်ႉလႄႈ မီးသွင်ပၢၵ်ႇသၢမ်သိပ်းပၢႆသွင်ၵေႃႉဢေႃႈ။ မၼ်းသမ်ႉၼပ်ႉဢၢၼ်ႇၵူၼ်းတင်းသဵင်ႈတင်းလူင်ဢၼ်ဝႃႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်လႄႈ မီးၸဵတ်းႁဵင်ဢေႃႈ။-

16ၶဝ်ၼၼ်ႉဢွၼ်ၵၼ်ဢွၵ်ႇၶိင်ႇဢၼ်ၵၢင်ဝၼ်းတဵင်ႈဢေႃႈ၊ ပိၼ်ႇႁႃႇတတ်ႉ ၸမ်ႉ၊ ၵိၼ်လဝ်ႈၵႃႈတီႈသုမ်ႉၸဝ်ႈလူၺ်ႈၵၼ်တင်းၶုၼ်လူင် ဢၼ်ၸွႆႈထႅမ်မၼ်းသၢမ်သိပ်းပၢႆသွင်ပႃးၸိူဝ်းၼၼ်ႉ ႁႂ်ႈထၼ်ႈပေႃးမဝ်းလဝ်ႈမဝ်းၵမ်ယူႇဢေႃႈ။-

17ၵူၼ်းဢွၼ်ႇမဵဝ်ႉဝုၼ်ႇၸိူဝ်းၼၼ်ႉ ဢွၼ်ၵၼ်ဢွၵ်ႇၵႂႃႇဢွၼ်တၢင်းဢေႃႈ။ ၶုၼ် ပိၼ်ႇႁႃႇတတ်ႉ ပွႆႇၸႂ်ႉၵူၼ်းဢွၵ်ႇတူၺ်းလႄႈ ၶဝ်ၼၼ်ႉၶိုၼ်းလဝ်ႊလၢတ်ႈတီႈမၼ်းလႄႈဝႃႈ၊ ၵူၼ်းဢွၵ်ႇၵႃႈၼႂ်းဝဵင်း သမႃႇရီႉ မႃးတီႈၶႃႈယဝ်ႉ၊ ဝႃႈၼင်ႇၼႆသေယဝ်ႉ၊-

18မၼ်းၼၼ်ႉမီးဢမိင်ႉလႄႈဝႃႈ၊ ဢွၵ်ႇမႃးႁႂ်ႈသိုၵ်းယဵၼ်သေဢမ်ႇဝႃႈ၊ တီႉဢဝ်တူဝ်လိပ်းမၼ်းတႃႉ။ ဢွၵ်ႇမႃးႁႂ်ႈလႆႈတိုၵ်းသေဢမ်ႇဝႃႈ၊ တီႉဢဝ်တူဝ်လိပ်းမၼ်းတႃႉ၊ ဝႃႈၼင်ႇၼႆဢေႃႈ။-

19ၼင်ႇၼၼ်လႄႈ ၵူၼ်းဢွၼ်ႇမဵဝ်ႉဝုၼ်ႇၸိူဝ်းၼၼ်ႉ ဢိၵ်ႇတင်းပူဝ်ႇပႃႇၵူၼ်းသိုၵ်းဢၼ်ၸွမ်းၶဝ်ၸိူဝ်းၼၼ်ႉ ဢွၼ်ၵၼ်ဢွၵ်ႇသေၵႃႈၼႂ်းဝဵင်းလႄႈ ဢဝ်ၵူၼ်းတၢႆၵေႃႉတေႃႇၵေႃႉၵူႈၵေႃႉသေယဝ်ႉ၊-

20ၵူၼ်း သူႉရီႉ ၸိူဝ်းၼၼ်ႉဢွၼ်ၵၼ်ဢွၵ်ႇပၢႆႈလႄႈ၊ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်လိုပ်ႈၸွမ်းလႄႈ၊ ပိၼ်ႇႁႃႇတတ်ႉ ၶုၼ်ႁေႃၶမ်း သူႉရီႉ ၸိူဝ်းၼၼ်ႉ ၶီႇမႃႉသေလႄႈပၢႆႈလူၺ်ႈၵၼ်တင်းႁူဝ်ႁၢၼ်ၵူၼ်းသိုၵ်းၶီႇမႃႉတင်းလၢႆလႄႈ လွတ်ႈၵႂႃႇဢေႃႈ။-

21ၶုၼ်ႁေႃၶမ်း ဢီႉသရေႇလႃႉ ၵေႃႈဢွၵ်ႇလႄႈ ယႃႉတပ်ႉမႃႉ၊ တပ်ႉလေႃႉရထႃး ပႅတ်ႈလႄႈႁဵတ်းတၢင်းဢၼ်ၶႃႈၽၼ်းဢဝ်တၢႆ ဢၼ်ယႂ်ႇၼႃႇ ဢဝ်ၵူၼ်း သူႉရီႉ ၸိူဝ်းၼၼ်ႉတၢႆဢေႃႈ။-

22လႆႈသမ်ႉပရေႃးၽႅတ်ႈၼၼ်ႉသုတ်ႉၸပ်းသုတ်ႉၸူးၵႃႈတီႈ ၶုၼ်ႁေႃၶမ်း ဢီႉသရေႇလႃႉ သေလႄႈ လဝ်ႊလၢတ်ႈလႄႈဝႃႈ၊ ၵႂႃႇလႄႈႁဵတ်းႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇသေၵမ်းတီႈၶႃႈ။ ႁဵတ်းသတီႉလႄႈၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်ၸဝ်ႈႁဝ်း တၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉသေၵမ်းတီႈၶႃႈ။ မိူဝ်ႈဢၼ်ၶွပ်ႈၶူပ်ႇယဝ်ႉၼၼ်ႉၸိုင်၊ ၶုၼ်ႁေႃၶမ်း သူႉရီႉ ၼၼ်ႉ တၵ်းၶီႇသိုၵ်းမႃးထႅင်ႈလူးၵွၼ်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။

23ၶႃႈၵူၼ်း ၶုၼ်ႁေႃၶမ်း သူႉရီႉ ၸိူဝ်းၼၼ်ႉၵေႃႈ ဢွၼ်ၵၼ်လဝ်ႊလၢတ်ႈလႄႈဝႃႈ၊ ၽြႃးၶဝ်ၼၼ်ႉၸိူဝ်းၼၼ်ႉ ပဵၼ်ၽြႃးဢၼ်လႆႈဢုပ်ႉပိူင်ႇၵႃႈတီႈလွႆၵူၺ်းတီႈၶႃႈဢေႃႈ။ ၵွပ်ႈပိူဝ်ႈၼင်ႇၼၼ်လႄႈ ၶဝ်ႁႅင်းယႂ်ႇၼႃႇသေၶႃႈၸဝ်ႈႁဝ်းၶဝ်တီႈၶႃႈဢေႃႈ။ ၵႂႃႇတိုၵ်းတေႃးၶဝ်ၵႃႈတီႈပၢင်ႇတီႈပဵင်းထႅင်ႈသေပွၵ်ႈလူးၵွၼ်ႇတီႈၶႃႈႁဝ်း။ ပေႃးတိုၵ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈႁဝ်းၶဝ်တၵ်းႁႅင်းယႂ်ႇၼႃႇသေၶဝ်ဢမၢၼ်ႇၶၼ်ပဵၼ်တီႈၶႃႈဢေႃႈ။-

24ႁဵတ်းၸိူဝ်ႉၼင်ႇၼႆသေၵမ်းတီႈၶႃႈ။ ၼုၵ်ႈၶုၼ်လူင်တင်းသဵင်ႈတင်းလူင် ဢွၵ်ႇသေၵႃႈၼႂ်းဢရႃႇၶဝ်လႄႈ ၶၢၼ်းပူဝ်ႇၶျုၵ်ႈဝႆႉ တၢင်တူဝ်ၶဝ်ၼၼ်ႉသေၵမ်းတီႈၶႃႈ၊-

25ႁၢင်ႈပွင်တပ်ႉဢၼ်ၼမ်ၼႃႇ ပဵင်းတၢၼ်ႇတပ်ႉဢၼ်သုမ်းၸွမ်းၵႂႃႇၼၼ်ႉ၊ မႃႉပုၼ်ႈမႃႉ၊ လေႃႉရထႃးပုၼ်ႈလေႃႉရထႃးသေၵမ်းတီႈၶႃႈ။ ၶႃႈၸဝ်ႈႁဝ်းၶဝ်တၵ်းတိုၵ်းတေႃးၶဝ် ၵႃႈတီႈပၢင်ႇတီႈပဵင်းလႄႈႁႅင်းယႂ်ႇၼႃႇသေၶဝ်ဢမၢၼ်ႇၶၼ်ပဵၼ်တီႈၶႃႈဢေႃႈ ဝႃႈၼင်ႇၼႆလႄႈ မၼ်းထွမ်ႇဢၼ်ၵႂၢမ်းဢၼ်ၶဝ်လဝ်ႊလၢတ်ႈၼၼ်ႉသေလႄႈ ၸီႇယၢင်ႇႁဵတ်းဢေႃႈ။-

26မိူဝ်ႈဢၼ်ၶွပ်ႈၶူပ်ႇယဝ်ႉၼၼ်ႉၸိုင် ပိၼ်ႇႁႃႇတတ်ႉ ၼၼ်ႉႁၢင်ႈပွင်ၵူၼ်း သူႉရီႉ တင်းလၢႆသေလႄႈၶီႇၶိုၼ်ႈၸူးၵႃႈတီႈဝဵင်း ဢႃႇၽႅၵ်ႉ ႁႂ်ႈလႆႈတိုၵ်းတေႃး ၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။-

27ၵူၼ်းမဵဝ်း ဢီႉသရေႇလႃႉ တင်းလၢႆ၊ လႆႈၶၢမ်ႇတၢင်းဢၼ်ႁၢင်ႈပွင်ႁဵတ်းတပ်ႉသေလႄႈ မႄးႁႅၼ်းၸရိပ်ႈတၢင်းၵိၼ်သေယဝ်ႉ ၶီႇသိုၵ်းၵႂႃႇဢေႃႈ။ ပိၵ်ႉသမ်ႉၵူၼ်း သူႉရီႉ ၸိူဝ်းၼၼ်ႉ မီးၸွတ်ႇတူဝ်ႈဝႆႉတင်းဝၢၼ်ႈတင်းမိူင်းယူႇသေၵေႃႈ ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ပဵၼ်ၸိူဝ်ႉၼင်ႇၽုင်ပႄႉ ဢၼ်လဵၵ်ႉဢၼ်ဢွၼ်ႇသွင်ၽုင်သေလႄႈ ၶျႃးတပ်ႉၶဝ်ၵႃႈတီႈၽၢႆႇၼႃႈၶဝ်ၼၼ်ႉဢေႃႈ။

28ၵူၼ်းၽြႃးပဵၼ်ၸဝ်ႈၵေႃႉၼိုင်ႈ သုတ်ႉၸပ်းသုတ်ႉၸူးလႄႈ သင်ႇလၢတ်ႈတီႈၶုၼ်ႁေႃၶမ်း ဢီႉသရေႇလႃႉ လႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵွပ်ႈပိူဝ်ႈဢၼ်ၵူၼ်း သူႉရီႉ ၸိူဝ်းၼၼ်ႉလၢတ်ႈလႄႈဝႃႈ၊ ထႃႇဝရႃႉၽြႃးပဵၼ်ၽြႃးဢၼ်ဢုပ်ႉပိူင်ႇလွႆၵူၺ်းဢေႃႈ။ ပဵၼ်ၽြႃးဢၼ်ဢုပ်ႉပိူင်ႇၵႃႈတီႈပၢင်ႇတီႈပဵင်းဢမ်ႇၸႂ်ႈ၊ ဝႃႈၼင်ႇၼႆၼၼ်ႉလႄႈ၊ ၵဝ်တၵ်းဢဝ်မူႇၽုင်မုၵ်ႉၸိူဝ်းဢၼ်ယႂ်ႇၼႃႇတင်းသဵင်ႈတင်းလူင်ၼႆႉ ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။ သူတၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။-

29ၶဝ်ၼၼ်ႉၶျႃးတပ်ႉတေႃႇၵၼ်ယူႇၸဵတ်းဝၼ်းတဵမ်တဵမ်သေယဝ်ႉ၊ ဝၼ်းသတ်ႉတမႃႉၼၼ်ႉ ၶဵင်ႇသိုၵ်းၵၼ်လႄႈၵူၼ်းမဵဝ်း ဢီႉသရေႇလႃႉ တင်းလၢႆ ဢဝ်ၵူၼ်းသိုၵ်းပႆတိၼ် သူႉရီႉ ၸိူဝ်းၼၼ်ႉတၢႆသႅၼ်ၼိုင်ႈ ၼႂ်းဝၼ်းလဵဝ်ၵူၺ်းဢေႃႈ။-

30ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉ ဢွၵ်ႇပၢႆႈၵႂႃႇၸူးၵႃႈတီႈဝဵင်း ဢႃႇၽႅၵ်ႉ လႄႈၶဝ်ႈၵႃႈၼႂ်းဝဵင်းသေယဝ်ႉ၊ လမ်းဝဵင်းၼၼ်ႉလူမ်ႉတူၵ်းတဵင်သႂ်ႇၵူၼ်းသွင်မိုၼ်ႇပၢႆၸဵတ်းႁဵင် ဢၼ်ၵိုတ်းဢၼ်ၵျၢၼ်ႇၼၼ်ႉဢေႃႈ။ ပိၼ်ႇႁႃႇတတ်ႉ ၼၼ်ႉဢွၵ်ႇပၢႆႈလႄႈၶဝ်ႈၵႃႈၼႂ်းဝဵင်းသေယဝ်ႉ တဵတ်ႇမႅပ်ႉယူႇၵႃႈၼႂ်းလုၵ်းတၢင်းၼႂ်းဢေႃႈ။

31ၶႃႈမၼ်းၵူၼ်းမၼ်းၸိူဝ်းၼၼ်ႉလဝ်ႊလၢတ်ႈလႄႈဝႃႈ၊ တူၺ်းတီႈၶႃႈလူး၊ ၶႃႈၸဝ်ႈႁဝ်းၶဝ်လႆႈငိၼ်းလွင်ႈဢၼ်ၶုၼ်ႁေႃၶမ်း မဵဝ်း ဢီႉသရေႇလႃႉ ၸိူဝ်းၼၼ်ႉ ပဵၼ်ၶုၼ်ဢၼ်ၸၢင်ႈဢဵတ်းလူၼၼ်ႉတီႈၶႃႈယဝ်ႉ။ ပၼ်ဢၶႂၢင်ႉဢၼ်ၶႃႈၸဝ်ႈႁဝ်းၶဝ်လႆႈဢဝ်ၶူဝ်းၼုင်ႈၼင်ပေႃၼုင်ႈႁတ်ႉဢႅဝ်လႄႈ ဢဝ်ၸိူၵ်ႈတဵင်ႇသႂ်ႇၵႃႈၼိူဝ်ႁူဝ်သေလႄႈ ဢွၵ်ႇၵႂႃႇၸူးၵႃႈတီႈၶုၼ်ႁေႃၶမ်း ဢီႉသရေႇလႃႉ သေၵမ်းတီႈၶႃႈ။ မၼ်းၸၢင်ႈၶႄးတၵ်းပၼ်ဢသၢၵ်ႈၸဝ်ႈႁဝ်း ၵတ်းယဵၼ်ၶျၢမ်းသႃႇတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

32ၶဝ်ဢွၼ်ၵၼ်ဢဝ်ၶူဝ်းၼုင်ႈၼင်ပေႃၼုင်ႈႁတ်ႉဢႅဝ်လႄႈ ဢဝ်ၸိူၵ်ႈတဵင်ႇသႂ်ႇၵႃႈၼိူဝ်ႁူဝ်သေလႄႈ ႁွတ်ႈထိုင်ၵႃႈတီႈ ၶုၼ်ႁေႃၶမ်း ဢီႉသရေႇလႃႉ သေယဝ်ႉ၊ လဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်း ပိၼ်ႇႁႃႇတတ်ႉ ၼၼ်ႉ တွင်းပၢၼ်ႇလႄႈဝႃႈ၊ ၶႅၼ်းတေႃႈပၼ်ဢသၢၵ်ႈၶႃႈၸဝ်ႈႁဝ်း ၵတ်းယဵၼ်ၶျၢမ်းသႃႇသေၵမ်းတီႈၶႃႈ၊ ဝႃႈၼင်ႇၼႆတီႈၶႃႈဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းထၢမ်လႄႈဝႃႈ၊ မၼ်းၼၼ်ႉဢသၢၵ်ႈယင်းလိပ်းယူႇႁိုဝ်။ မၼ်းပဵၼ်ပီႈဢၢႆႈၵဝ်ဢေႃႈ၊ ဝႃႈၼင်ႇၼႆဢေႃႈ။-

33ၶဝ်ၼၼ်ႉထွမ်ႇၵႂၢမ်းမၼ်းၸေးၸေးၸွတ်ႇၸွတ်ႇလႄႈ ႁိပ်ႈၼႅတ်ႈတီႉယိပ်းၵမ်ဢဝ်သၢႆငၢႆၵႂၢမ်းၼၼ်ႉ ၵမ်းလဵဝ်သေလႄႈ လဝ်ႊလၢတ်ႈလႄႈဝႃႈ၊ ပိၼ်ႇႁႃႇတတ်ႉ ပီႈၸၢႆးၸဝ်ႈႁဝ်းၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။ မၼ်းၵေႃႈမီးဢမိင်ႉလႄႈဝႃႈ၊ ဢွၼ်ၵၼ်ၵႂႃႇလႄႈႁွင်ႉဢဝ်မၼ်းမႃးတႃႉ၊ ဝႃႈၼင်ႇၼႆသေယဝ်ႉ၊ ပိၼ်ႇႁႃႇတတ်ႉ ဢွၵ်ႇမႃးၸူးၵႃႈတီႈမၼ်းလႄႈ မၼ်းႁႂ်ႈမၼ်းၼၼ်ႉလႆႈၶိုၼ်ႈၵႃႈၼိူဝ်လေႃႉရထႃးၸဝ်ႈဢေႃႈ။-

34ပိၼ်ႇႁႃႇတတ်ႉ ၵေႃႈလၢတ်ႈလႄႈဝႃႈ ၵဝ်ၶႃႈတၵ်းဢဝ်ဝဵင်းဢၼ်ၸဝ်ႈပေႃႈၵဝ်ၶႃႈႁိမ်ဢဝ်သေၵႃႈၼႂ်းမိုဝ်းၸဝ်ႈပေႃႈၸဝ်ႈႁဝ်းၸိူဝ်းၼၼ်ႉ ၶိုၼ်းပၼ်ၶႃႈဢေႃႈ။ ၸဝ်ႈႁဝ်းတၵ်းလႆႈတႄႇႁဵတ်းထႅဝ်ႁဵတ်းတၢၼ်းပုၼ်ႈၸဝ်ႈႁဝ်း ၵႃႈၼႂ်းဝဵင်း ထမ်ႇမသႅတ်ႉ မိူၼ်ၸိူင်ႉၼင်ႇဢၼ် ၸဝ်ႈပေႃႈၵဝ်ၶႃႈတႄႇႁဵတ်းထႅဝ်ႁဵတ်းတၢၼ်း ၵႃႈၼႂ်းဝဵင်း သမႃႇရီႉ ၼၼ်ႉၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ဢႃႇႁပ်ႉ လၢတ်ႈလႄႈဝႃႈ ၵဝ်တၵ်းႁဵတ်းမိၵ်ႉသႃႇႁႃယႃႉၸိူဝ်ႉၼင်ႇၼၼ်ယူႇသေလႄႈပွႆႇမႂ်းဢေႃႈ၊ ဝႃႈၼင်ႇၼႆလႄႈ ႁဵတ်းမိၵ်ႉသႃႇႁႃယႃႉသေလႄႈပွႆႇမၼ်းသေဢေႃႈ။

35ၵူၼ်းမဵဝ်းပရေႃးၽႅတ်ႈၵေႃႉၼိုင်ႈ ၸွမ်းလူၺ်ႈၼုၵ်ႈၵပၢတ်ႈထႃႇဝရႃႉၽြႃးသေလႄႈလၢတ်ႈတီႈၵေႃႉသေႈမၼ်းလႄႈဝႃႈ ပေႃႉယႅၼ်ႉၵဝ်သေၵမ်း၊ ဝႃႈၼင်ႇၼႆဢေႃႈ။ ၵေႃႉၼၼ်ႉထဵင်ပႅတ်ႈလႄႈဝႃႈ ၵဝ်ဢမ်ႇပေႃႉဢမ်ႇယႅၼ်ႉမႂ်း၊ ဝႃႈၼင်ႇၼႆဢေႃႈ။-

36မၼ်းလၢတ်ႈတီႈမၼ်းၼၼ်ႉလႄႈဝႃႈ၊ ၵွပ်ႈပိူဝ်ႈဢၼ်မႂ်းဢမ်ႇထွမ်ႇဢဝ်ၼုၵ်ႈၵပၢတ်ႈထႃႇဝရႃႉၽြႃးလႄႈ ၼႂ်းမိူဝ်ႈဢၼ်မႂ်းယင်းတိုၵ်ႉလုၵ်ႉသေၵႃႈတီႈၵဝ်ၵႂႃႇယူႇၼၼ်ႉၸိုင် သၢင်ႇသီႈတၵ်းဢဝ်မႂ်းတၢႆဢေႃႈ၊ ဝႃႈၼင်ႇၼႆလႄႈ၊ ၼႂ်းမိူဝ်ႈဢၼ်မၼ်းၼၼ်ႉ ယင်းတိုၵ်ႉဢွၵ်ႇၵႂႃႇယူႇၼၼ်ႉသၢင်ႇသီႈထူပ်းမၼ်းၼၼ်ႉလႄႈ ဢဝ်တၢႆဢေႃႈ။-

37မၼ်းသမ်ႉထူပ်းႁၼ်တၢင်ႇၵေႃႉလႄႈလၢတ်ႈထႅင်ႈလႄႈဝႃႈ ပေႃႉယႅၼ်ႉၵဝ်သေၵမ်းတႃႉ၊ ဝႃႈၼင်ႇၼႆသေယဝ်ႉ၊ ၵေႃႉၼၼ်ႉပေႃႉယႅၼ်ႉၸဵပ်းၼႃႇလူင်လၢင်ဢေႃႈ။-

38ပရေႃးၽႅတ်ႈၼၼ်ႉဢွၵ်ႇၵႂႃႇလႄႈ ပႂ်ႉထႃႈၶုၼ်ႁေႃၶမ်းယူႇၵႃႈတီႈႁိမ်းတၢင်းလႄႈ ဢဝ်ၽႃႈၸဵတ်ႉႁူမ်ႇသုမ်ႇၼႃႈမၼ်းယူႇဢေႃႈ။-

39မိူဝ်ႈဢၼ်ၶုၼ်ႁေႃၶမ်းတႆႇတၢင်းပႆတၢင်းမႃးယူႇၼၼ်ႉၸိုင်၊ ၵေႃႉၼၼ်ႉလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၶႃႈၸဝ်ႈႁဝ်းၼႆႉဢွၵ်ႇၵႂႃႇၸူးၵႃႈၼႂ်းၵၢင်ပွႆးတိုၵ်းသိုၵ်းတီႈၶႃႈဢေႃႈ။ ၵူၼ်းၵေႃႉၼိုင်ႈဢွၵ်ႇသေၵႃႈၼႂ်းပွႆးတိုၵ်းသိုၵ်းမႃးလႄႈ ဢဝ်ၵူၼ်းၵေႃႉၼိုင်ႈဢၢပ်ႈပၼ်တီႈၶႃႈၸဝ်ႈသေယဝ်ႉ သင်ႇလၢတ်ႈဝႆႉလႄႈဝႃႈ၊ ပႂ်ႉၵူၼ်းၵေႃႉၼႆႉလီလီတႃႉ။ ပေႃးမၼ်းႁၢႆၵႂႃႇၵွပ်ႈပိူဝ်ႈသေၸိူဝ်ႉသေပိူင်ၸိုင်၊ ဢသၢၵ်ႈမႂ်းတၵ်းလႆႈပဵၼ်ပုၼ်ႈဢသၢၵ်ႈမၼ်းဢေႃႈ။ ဢမ်ႇၼၼ်ၵေႃႈမႂ်းတၵ်းလႆႈယေႃႇပၼ်ငိုၼ်း တလၢၼ်ႇတၢၼ်ႇ ၼိုင်ႈဢေႃႈ၊ ဝႃႈၼင်ႇၼႆလႄႈ၊-

40မိူဝ်ႈဢၼ်ၶႃႈၸဝ်ႈႁဝ်းၼႆႉ မီးဢမူႉၵူႈတီႈၵူႈလႅၼ်ၼမ်ၼႃႇၼၼ်ႉၸိုင်၊ ၵေႃႉၼၼ်ႉႁၢႆၵႂႃႇတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်း ဢီႉသရေႇလႃႉ မီးဢမိင်ႉတီႈမၼ်းလႄႈဝႃႈ၊ တၵ်းလႆႈၸီႇယၢင်ႇဢမူႉမႂ်းၸိူဝ်ႉၼင်ႇၼၼ်ဢေႃႈ။ တူဝ်မႂ်းၵေႃႈၸီႇယၢင်ႇဝႆႉယဝ်ႉ၊ ဝႃႈၼင်ႇၼႆဢေႃႈ။-

41မၼ်းၼၼ်ႉႁိပ်ႈၼႅတ်ႈဢဝ်ၽႃႈၸဵတ်ႉဢၼ်ႁူမ်ႇၼႃႈမၼ်းၼၼ်ႉပႅတ်ႈၵမ်းလဵဝ်လႄႈ၊ ၶုၼ်ႁေႃၶမ်း ဢီႉသရေႇလႃႉ ႁူႉလွင်ႈဢၼ်ပဵၼ်ပရေႃးၽႅတ်ႈသေတူၼ်သေပႃးၼၼ်ႉဢေႃႈ။-

42မၼ်းလၢတ်ႈလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵွပ်ႈပိူဝ်ႈဢၼ်မႂ်းပွႆႇၵေႃႉဢၼ်ၵဝ်ၵိၼ်ႇဝႃႈႁႂ်ႈလူႉလႅဝ်ၼၼ်ႉ လွတ်ႈသေၵႃႈၼႂ်းမိုဝ်းမႂ်းလႄႈ ဢသၢၵ်ႈမႂ်းတၵ်းလႆႈပဵၼ်ပုၼ်ႈဢသၢၵ်ႈမၼ်း၊ ၵူၼ်းမႂ်းတင်းလၢႆတၵ်းလႆႈပဵၼ်ပုၼ်ႈၵူၼ်းမၼ်းတင်းလၢႆဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

43ၶုၼ်ႁေႃၶမ်း ဢီႉသရေႇလႃႉ မီးတၢင်းၸႂ်ဢၼ်တမ်ႇၼွႆႉမွင်ၸႂ်လႄႈ ႁဵဝ်ႇၸွပ်ႈယူႇသေလႄႈၵႂႃႇၸူးၵႃႈတီႈႁေႃၸဝ်ႈလႄႈႁွတ်ႈထိုင်ၵႃႈတီႈဝဵင်း သမႃႇရီႉ ဢေႃႈ။