1 Kings 4

Shan

← Chapter 3 Jump to: Chapter 5 →

1ၶုၼ်လူင် သေႃးလမုၼ်ႇ ၼၼ်ႉဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ တင်းသဵင်ႈတင်းမူတ်းလႄႈယူႇဢေႃႈ။-

2မူးမၢတ်ႈၽွင်းမိူင်းၸဝ်ႈတင်းလၢႆၸမ်ႉ၊ ပဵၼ် ဢႃႇၸရီႉ လုၵ်ႈၸၢႆးယိတ်ႈပရေႃးႁဵၵ်ႈ ၸႃႇတုၵ်ႉ ၊-

3ဢေးလီႉႁေႃႇရိပ်ႉ တင်း ဢႁီႉယႃႉ လုၵ်ႈၸၢႆး သီႇသႃႉ ၸိူဝ်းၼၼ်ႉ ပဵၼ်ၸရေးလူင်ၸဝ်ႈဢေႃႈ။ ယူဝ်းသၽတ်ႉ လုၵ်ႈၸၢႆး ဢႁီႉလုတ်ႉ ၼၼ်ႉ ပဵၼ်ဢတႂၢင်းဝုၼ်ႇဢေႃႈ။-

4ပေႇၼႃႇယႃႉ လုၵ်ႈၸၢႆး ယေႃးယတႃႉ ၼၼ်ႉ ပဵၼ်ၶုၼ်ပူဝ်ႇၶျုၵ်ႈဢေႃႈ။ ၸႃႇတုၵ်ႉ တင်း ဢႃႇပျႃႇထႃႇ ၸိူဝ်းၼၼ်ႉ ပဵၼ် ယိတ်ႈပရေႃးႁဵၵ်ႈဢေႃႈ။-

5ဢႃႇၸရီႉ လုၵ်ႈၸၢႆး ၼႃႇသၼ်ႇ ၼၼ်ႉ ပဵၼ်ၵေႃႉဢၼ်ဢုပ်ႉၵႃႈၼိူဝ်ဝုၼ်ႇတင်းလၢႆဢေႃႈ။ ၸႃႇပုတ်ႉ လုၵ်ႈၸၢႆး ၼႃႇသၼ်ႇ ၼၼ်ႉပဵၼ်ဝုၼ်ႇလူင် ဢိၵ်ႇတင်းၵေႃႉသေႈၶုၼ်ႁေႃၶမ်းဢေႃႈ။-

6ဢႁီႉသႃႇ ၼၼ်ႉပဵၼ်ၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈဢေႃႈ။ ဢတေႃးၼီႉရမ်ႇ လုၵ်ႈၸၢႆး ဢႃႇပတႃႉ ၼၼ်ႉပဵၼ်ဝုၼ်ႇၵဵပ်းၶွၼ်ႇၸဝ်ႈဢေႃႈ။

7သေႃးလမုၼ်ႇ ၶၢၼ်းၸရေးလူင်သိပ်းပၢႆသွင်ၵေႃႉဢၼ်လႆႈလႄႉၵၼ်ပွင်ႁႅၼ်းတၢင်းၵိၼ်တၢင်းၶူပ်းပုၼ်ႈၶုၼ်ႁေႃၶမ်း ဢိၵ်ႇတင်းၵူၼ်းႁၢင်ႈၵူၼ်းႁေႃၸဝ်ႈၸိူဝ်းၼၼ်ႉဝႆႉ ၵႃႈၼိူဝ်မိူင်း ဢီႉသရေႇလႃႉ တင်းသဵင်ႈတင်းမူတ်းလႄႈ ၼႂ်းယေႈပီႊယေႈၵေႃႉ တၵ်းလႆႈပွင်ႁႅၼ်းတၢင်းၵိၼ်တၢင်းၶူပ်းယေႈလိူၼ်ဢေႃႈ။-

8ၸိုဝ်ႈသဵင်ၶဝ်ၸမ်ႉ၊ ပဵၼ် ပႅၼ်ႇႁူႉရႃႇ ၵႃႈတီႈႁၢၼ်ႉလွႆ ဢေႇၽရိမ်ႇ ၊-

9ပႅၼ်ႇတေႇၵႃႇ ၵႃႈတီႈဝဵင်း မႃႇၵတ်ႉ ၊ ဝဵင်း သႃႇလပိမ်ႇ ဝဵင်း ပႅတ်ႉသေးမိတ်ႉ ၊ ဝဵင်း ဢေႇလုၼ်ႇ၊ ပႅတ်ႉႁႃႇၼၼ်ႇ ၊-

10ပႅၼ်ႇႁေႇသႅတ်ႉ ၵႃႈတီႈဝဵင်း ဢႃႇရူႉပုတ်ႉ ဢိၵ်ႇတင်းဝဵင်း သေႃႇၶေႃႇ ၊ မိူင်း ႁေႇၽႃႇ တင်းမိူင်း၊-

11ပႅၼ်ႇဢၽီႉၼတပ်ႉ ၵႃႈတီႈမိူင်း တေႃႇရႃႉ တီႈ ဢၼ်သုင်တင်းမိူင်း၊ ဢၼ်ပဵၼ်ၵူပ်ႉပဵၼ်ၵူႈႁူမ်ႈၵၼ်တင်း တႃႇၽတ်ႉ လုၵ်ႈယိင်းၸဝ်ႈ သေႃးလမုၼ်ႇ ၼၼ်ႉ၊-

12ပႃႇၼႃႇ လုၵ်ႈၸၢႆး ဢႁီႉလုတ်ႉ ၵႃႈတီႈဝဵင်း တႃႇၼၵ်ႉ ၊ ဝဵင်း မေႇၵိတ်ႉတေႃႇ ဢိၵ်ႇတင်းလိၼ်ဝဵင်း ပႅတ်ႉသၼ်ႇ တင်းသဵင်ႈတင်းမူတ်း ဢၼ်မီးၵႃႈတီႈႁိမ်းဝဵင်း ၸႃႇရတၼ်ႇ ၊ၽၢႆႇတႂ်ႈဝဵင်း ယေႇၸရေႇလႃႉ ဢၼ်ဢဝ်ၵႃႈတီႈဝဵင်း ပႅတ်ႉသၼ်ႇ တေႃႇထိုင်ႁွတ်ႈဝဵင်း ဢႃႇပေႇလႃႉမႁေႃႇလႃႉ ၼၼ်ႉလႄႈ ပူၼ်ႉသေ ယွၵ်ႉမမ်ႇ ၼၼ်ႉၵႂႃႇၼၼ်ႉ၊-

13ပႅၼ်ႇၵေႇပႃႉ ၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ ၊ ၵေႃႉဢၼ်ဢုပ်ႉၵႃႈၼိူဝ်ဝဵင်းတင်းလၢႆ ဢၼ် ယႃႇဢီႉရႃႉ ၵူၼ်း မၼႃႇသေႇ ပိူင်ႇၵႃႈတီႈမိူင်း ၵီႉလတ်ႉ ဢိၵ်ႇတင်းလိၼ် ဢႃႇၵေႃႇၽႃႉ မိူင်း ပႃႇသၢၼ်ႇ ၊ ဢၼ်ဝႃႈဝဵင်းလူင်ႁူၵ်းသိပ်းဝဵင်း ဢၼ်မီးလမ်းဝဵင်းလႂ် တင်းၵိူၼ်ႇတွင်းလိူင်လႂ်ၸိူဝ်းၼၼ်ႉၼၼ်ႉ၊-

14ဢႁီႉၼတပ်ႉ လုၵ်ႈၸၢႆး ဢီႉတေႃႇ ၵႃႈတီႈဝဵင်း မႁႃႇၼိမ်ႇ ၼၼ်ႉ၊-

15ဢႁီႉမတ်ႉ ၵႃႈတီႈဢိူင်ႇ ၼပ်ႉထလီႉ ဢၼ်ပဵၼ်ၵူပ်ႉပဵၼ်ၵူႈ ႁူမ်ႈၵၼ်တင်း ပႃႇသမတ်ႉ လုၵ်ႈယိင်းၸဝ်ႈ သေႃးလမုၼ်ႇ ၼၼ်ႉ၊-

16ပႃႇၼႃႉ လုၵ်ႈၸၢႆး ႁူႉသေး ၵႃႈတီႈဢိူင်ႇ ဢႃႇသႃႇ တင်းဝဵင်း ပေႇဢႃႇလုတ်ႉ ၼၼ်ႉ၊-

17ယူဝ်းသၽတ်ႉ လုၵ်ႈၸၢႆး ပႃႇရႂႃႇ ၵႃႈတီႈဢိူင်ႇ ဢီႉသၶႃႇ ၼၼ်ႉ၊-

18သီႉမီႉ လုၵ်ႈၸၢႆး ဢေးလႃႇ ၵႃႈတီႈဢိူင်ႇ ပိၼ်ႇယႃႇမိၼ်ႇ ၼၼ်ႉ၊-

19ၵေႇပႃႉ လုၵ်ႈၸၢႆး ဢူႉရီႉ ၵႃႈတီႈမိူင်း ၵီႉလတ်ႉ ဢၼ်ဝႃႈလိၼ် သီႉႁုၼ်ႇ ၶုၼ်ႁေႃၶမ်း ဢႃႇမေႃးရီႉ ဢိၵ်ႇတင်းလိၼ် ဢေႃႇၶႃႉ ၶုၼ်ႁေႃၶမ်း ပႃႇသၢၼ်ႇ ဢၼ်မၼ်းၵေႃႉလဵဝ်ၵူၺ်းလႆႈၸီႇယၢင်ႇၵႃႈၼႂ်းမိူင်းၼၼ်ႉၼၼ်ႉဢေႃႈ။

20မိူဝ်ႈၼၼ်ႉ ၵူၼ်းမဵဝ်း ယူႉတႃႉ တင်းၵူၼ်းမဵဝ်း ဢီႉသရေႇလႃႉ တင်းလၢႆၼမ်ၼႃႇလႄႈ ၼပ်ႉဢၢၼ်ႇပဵၼ်မိူၼ်ၸိူဝ်ႉၼင်ႇသၢႆးၼမ်ႉသမ်ႇမုၵ်ႉတြႃႇၼၼ်ႉလႄႈ ဢွၼ်ၵၼ်ၵိၼ်ၶူပ်းမူၼ်ႈပျေႃႇယူႇဢေႃႈ။-

21သေႃးလမုၼ်ႇ လႆႈဢုပ်ႉပိူင်ႇၸၢမ်ႇၸႃးသိုင်ႇၸိုင်ႈဝၢၼ်ႈမိူင်းၵႃႈမီး ဢဝ်ၵႃႈတီႈၸႃႉၸဵမ်ၼမ်ႉႁွင်ႈလူင် တေႃႇထိုင်ႁွတ်ႈမိူင်း ၽီႉလိတ်ႉတီႉ ၊ ဢိၵ်ႇတင်းၶွပ်ႇၼမ်ႉလႅၼ်လိၼ်မိူင်း ဢေႇၵိပ်ႉတူႉ ယူႇသေလႄႈ ဢွၼ်ၵၼ်သၢၵ်ႈလၢၵ်ႈသွင်ႇပၼ်ႇၼႃႇလႄႈ ၵိုတ်ႉႁၢပ်ႇဢမူႉ သေႃးလမုၼ်ႇ ၼႂ်းၸူဝ်ႈပၢၼ်မၼ်းၼၼ်ႉတဵမ်တဵမ်ဢေႃႈ။-

22ၸရိပ်ႈတၢင်းၵိၼ်ဢၼ်ၸၢပ်ႈသႅင်ႇၵၼ်တင်း သေႃးလမုၼ်ႇ ပုၼ်ႈယေႈဝၼ်းယေႈဝၼ်းၸမ်ႉ၊ ၽွင်ၶဝ်ႈမုၼ်းၵျုင်ႇသၢမ်သိပ်း ၵေႃးရႃႉ ၊ ၽွင်ၶဝ်ႈမုၼ်းမူႉယေႃးႁူၵ်းသိပ်း ၵေႃးရႃႉ ၊-

23ဝူဝ်းဢၼ်ပီးလီမၼ်းလီသိပ်းၼိုင်ႈ၊ ဝူဝ်းဢၼ်ဢဝ်ၵႃႈၼႂ်းတီႈဢၼ်ပွႆႇလႄႈယၢမ်ႈၵိၼ်ယူႇၼၼ်ႉသၢဝ်းၼိုင်ႈ၊ သူဝ်းပၢၵ်ႇၼိုင်ႈ ဢိၵ်ႇတင်းယိူင်း၊ ၵႂၢင်၊ ၸၢၵ်ႇၶၢႆးလႂ် ၼူၵ်ႉဢၼ်ပီးလီမၼ်းလီလႂ်ဢေႃႈ။-

24မၼ်းၼၼ်ႉဢုပ်ႉပိူင်ႇလိၼ်ၵႃႈမီးၽၢႆႇပႃႈဝၼ်းတူၵ်းၼမ်ႉႁွင်ႈလူင်၊ ဢဝ်ၵႃႈတီႈဝဵင်း တီႉၽသႃႉ တေႃႇထိုင်ႁွတ်ႈဝဵင်း ၵႃႇၸႃႉ ဢၼ်ဝႃႈ ၵႃႈၼိူဝ်ၶုၼ်ႁေႃၶမ်းတင်းသဵင်ႈတင်းလူင် ၽၢႆႇဝၼ်းတူၵ်းၼမ်ႉႁွင်ႈလူင်ၼၼ်ႉလႄႈ ပဵၼ်တၢင်းဢၼ်ၵႃႈတီႈႁိမ်းႁွမ်းလဵပ်ႈႁွပ်ႈမၼ်း ထၢတ်ႇသိုၵ်းယဵၼ်သိုၵ်းဢေႃႈ။-

25ၵူၼ်းမဵဝ်း ယူႉတႃႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းလၢႆ ၸႃႉၸဵမ်ဝဵင်း တၢၼ်ႇ တေႃႇထိုင်ႁွတ်ႈဝဵင်း ပေႇရသေႇၽႃႉ ၸိူဝ်းၼၼ်ႉ လႆႈယူႇၼိမ်ၼိမ်လီလီၵႃႈတႂ်ႈတူၼ်ႈၶိူဝ်းမၢၵ်ႇၸပိတ်ႈၶဝ် တင်းတူၼ်ႈမၢၵ်ႇလိူဝ်ႇသၢင်းၽေႃးၶဝ်ႁင်းၽႂ်ႁင်းမၼ်းယူႇ ၼႂ်းၸူဝ်ႈပၢၼ် သေႃးလမုၼ်ႇ ၼၼ်ႉတဵမ်တဵမ်ဢေႃႈ။

26သေႃးလမုၼ်ႇ ၵေႃႈမီးထၢၼ်ႈမႃႉ ဢၼ်ၸၢပ်ႈသႅင်ႇၵၼ်တင်းလေႃႉရထႃးၼၼ်ႉသီႇမိုၼ်ႇ ဢိၵ်ႇတင်းႁူဝ်ႁၢၼ်ၵူၼ်းသိုၵ်းၶီႇမႃႉမိုၼ်ႇပၢႆသွင်ႁဵင်ဢေႃႈ။-

27ၸရေးလူင်ၸိူဝ်းၼၼ်ႉၵေႃႈ လႆႈပွင်ႁႅၼ်းတၢင်းၵိၼ်တၢင်းၶူပ်းပုၼ်ႈၶုၼ်လူင် သေႃးလမုၼ်ႇ ဢိၵ်ႇတင်းၶဝ်ၸိူဝ်းဢၼ် ၶဝ်ႈပႃးၵႃႈတီႈၶူင်ႇတီႈၵိၼ်ၶုၼ်လူင် သေႃးလမုၼ်ႇ ၼၼ်ႉ ယေႈၵေႃႉယေႈလိူၼ်လႄႈ ဢမ်ႇႁႂ်ႈလႆႈလုတ်ႈလႆႈႁၢမ်ႈသေၸိူဝ်ႉသေပိူင်ဢေႃႈ။-

28ၶဝ်ႈမူႉယေႃးဢိၵ်ႇတင်းယိူဝ်ႈႁႅင်ႈပုၼ်ႈမႃႉၸဝ်ႈ တင်းၵလႃးဢုၵ်ႉတင်းလၢႆၵေႃႈ၊ ၶဝ်လႆႈဢွၼ်ၵၼ်ဢဝ်မႃးၸူးၵႃႈတီႈဢၼ်ၸဝ်ႈယူႇၸဝ်ႈသဝ်းၸွမ်းၵႃႈၼင်ႇဢၼ် ထုၵ်ႇလႄႉထုၵ်ႇၵမ်းႁင်းၽႂ်ႁင်းမၼ်းၼၼ်ႉဢေႃႈ။

29ၽြႃးပဵၼ်ၸဝ်ႈပၼ်ၺၢၼ်ႇပိင်ႇၺႃႇဢၼ်ၼမ်ၼႃႇ ဢိၵ်ႇတင်းႁူဝ်ၸႂ်ဢၼ်ယႂ်ႇၼႃႇၵႂၢင်ႈၼႃႇ မိူၼ်ၸိူဝ်ႉၼင်ႇသၢႆးၼမ်ႉသမ်ႇမုၵ်ႉတြႃႇၼၼ်ႉလႄႈ၊-

30ပိင်ႇၺႃႇ သေႃးလမုၼ်ႇ ၼၼ်ႉ ပူၼ်ႉလိူဝ်တွၼ်းသေပိင်ႇၺႃႇၵူၼ်းမိူင်းဝၼ်းဢွၵ်ႇတင်းသဵင်ႈတင်းလူင် ဢိၵ်ႇတင်းပိင်ႇၺႃႇၵူၼ်းမိူင်း ဢေႇၵိပ်ႉတူႉ တင်းသဵင်ႈတင်းလူင်ဢေႃႈ။-

31မၼ်းၼၼ်ႉယဵင်ႈၶႅၼ်းမီးပိင်ႇၺႃႇလိူဝ်တွၼ်းၼႃႇသေၵူၼ်းတင်းသဵင်ႈတင်းလူင် ဢိၵ်ႇတင်း ဢေႇသၼ်ႇ မဵဝ်း ဢေႇၸရႃႉႁိတ်ႉ တင်း ႁေႇမၼ်ႇ တင်း ၶႃႇလႃႉၵေႃႇလႃႉ တင်း တႃႇရတႃႉ ဢၼ်ပဵၼ်လုၵ်ႈၸၢႆး မႁေႃႇလႃႉ ၸိူဝ်းၼၼ်ႉလႄႈ ပဵၼ်ဢၼ်ႁူင်ႁၢင်းၸွတ်ႇတူဝ်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း ဢၼ်မီးၵႃႈတီႈလဵပ်ႈႁွပ်ႈမၼ်းဢေႃႈ။-

32ၵႂၢမ်းသုၵ်ႉတၢမ်ႇဢၼ်မၼ်းလၢတ်ႈဝႆႉၼၼ်ႉမီးသၢမ်ႁဵင်ဢေႃႈ။ ၵႂၢမ်းႁဵတ်းၵႂၢမ်းမၼ်းၼၼ်ႉမီးႁဵင်ပၢႆႁႃႈဢေႃႈ။-

33မၼ်းဢဝ်လွင်ႈၸႃႉၸဵမ်တူၼ်ႈ ဢႃႇရိတ်ႉ ဢၼ်မီးၵႃႈၼိူဝ်လွႆ လေႇပၼုၼ်ႇ တေႃႇထိုင်ႁွတ်ႈတူၼ်ႈ ႁုတ်ႉသူပ်ႇ ဢၼ်ၸၢင်ႈဢွၵ်ႇၵႃႈတီႈႁိမ်းလမ်းဢုတ်ႇၼၼ်ႉ ဢွၵ်ႇသူပ်းဝႃႈလႄႈ ဢဝ်လွင်ႈမဵဝ်းတူဝ်၊ မဵဝ်းၼူၵ်ႉ၊ မဵဝ်းမူင်ႈမဵဝ်းမႅင်း၊ မဵဝ်းပႃတင်းလၢႆ ဢွၵ်ႇသူပ်းဝႃႈဢေႃႈ။-

34ၶဝ်ၸိူဝ်းဢၼ်ၶုၼ်ႁေႃၶမ်းၵႃႈဢၼ်မီးၵႃႈၼိူဝ်လိၼ်မိူင်း ဢၼ်လႆႈငိၼ်းသတၢင်းသဵင်ၶၢဝ်ႇပိင်ႇၺႃႇ သေႃးလမုၼ်ႇ ၼၼ်ႉ ပွႆႇၸႂ်ႉမႃးၵူႈၸိူဝ်ႉၵူႈၶိူဝ်းၼၼ်ႉ ဢွၼ်ၵၼ်မႃးႁႂ်ႈလႆႈထွမ်ႇငိၼ်းၵႂၢမ်းပိင်ႇၺႃႇမၼ်းဢေႃႈ။

← Chapter 3 Jump to: Chapter 5 →