1 Kings 10

Shan

← Chapter 9 Jump to: Chapter 11 →

1ၼၢင်းႁေႃၶမ်းဢၼ်ဢုပ်ႉပိူင်ႇမိူင်း သေးၽႃႉ ၼၼ်ႉ ငိၼ်းသတၢင်းသဵင်ၶၢဝ်ႇမုၼ်သရေႇ သေႃးလမုၼ်ႇ ဢၼ်ၸၢပ်ႈသႅင်ႇၵၼ်တင်းၼႃႇမႃႉၸိုဝ်ႈသဵင်ထႃႇဝရႃႉၽြႃးၼၼ်ႉသေယဝ်ႉ၊ မႃးႁႂ်ႈလႆႈဢဝ်ပျၢတ်ႈသၼႃႇဢၼ်လိုၵ်ႉလမ်ႇယၢပ်ႇၽိုတ်ႇၼႃႇၼၼ်ႉၸၢမ်းတူၺ်း သေႃးလမုၼ်ႇ ဢေႃႈ။-

2မၼ်းၼၼ်ႉ ပႃးဢဝ်တင်းၵူၼ်းဢၼ်ၸွမ်းၼမ်ၼႃႇ ဢိၵ်ႇတင်းၵလႃးဢုၵ်ႉဢၼ်ပႃးတင်းမဵဝ်းၼၢမ်ႇသႃႇ တင်းၶမ်းၼမ်ၼႃႇတင်းသႅင်ဢၼ်ထိူၵ်ႈၵႃႈယႂ်ႇၶၼ်ယႂ်ႇၸိူဝ်းၼၼ်ႉ မႃးၵႃႈတီႈဝဵင်း ယေႇရူႉသလႅမ်ႇ လႄႈ ႁွတ်ႈထိုင်တီႈ သေႃးလမုၼ်ႇ သေယဝ်ႉ၊ တိူင်ႇပၢင်ႇတွင်ႈထၢမ်လူၺ်ႈလွင်ႈ ၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။-

3သေႃးလမုၼ်ႇ ၵေႃႈ ၵႄႈလိတ်ႈပျၢတ်ႈသၼႃႇၵႃႈဢၼ်မၼ်းတွင်ႈမၼ်းထၢမ်ၼၼ်ႉဢေႃႈ။ လွင်ႈတၢင်းဢၼ် သေႃးလမုၼ်ႇ ဢမ်ႇႁူႉလႄႈ ဢမ်ႇၵႄႈလိတ်ႈလႆႈၼၼ်ႉဢမ်ႇမီးသေၸိူဝ်ႉသေပိူင်။-

4မိူဝ်ႈဢၼ်ၼၢင်းႁေႃၶမ်းမိူင်း သေးၽႃႉ ႁၼ်ပိင်ႇၺႃႇ သေႃးလမုၼ်ႇ တင်းသဵင်ႈတင်းလူင် ဢိၵ်ႇတင်းႁိူၼ်းၸဝ်ႈဢၼ်မၼ်းတႄႇႁဵတ်း၊-

5ၶိူင်ႈပိူင်ၶူင်ႇတီႈၵိၼ်ၸဝ်ႈ၊ တီႈယူႇတီႈၼင်ႈဢၼ်ၵူၼ်းဢၼ်ပႂ်ႉဢမူႉၸဝ်ႈတင်းလၢႆၼင်ႈၼၼ်ႉ၊ တီႈဢၼ်ၵူဝ်ႇရမ်ႇဢွၼ်ႇၸၢႆးၸဝ်ႈတင်းလၢႆၸုၵ်းၶႃးၸႃးယူႇၼၼ်ႉ၊ ၶူဝ်းၼုင်ႈတၢင်းမႆဢၼ်ၶဝ်ၼုင်ႈမႆၸိူဝ်းၼၼ်ႉ၊ ၵူၼ်းယိပ်းၵွၵ်းၸဝ်ႈတင်းလၢႆ ဢိၵ်ႇတင်းၶၼ်ႈလႆတီႈဢၼ်ၶိုၼ်ႈၸူးၵႃႈတီႈႁိူၼ်းထႃႇဝရႃႉၽြႃးၼၼ်ႉၸိူဝ်းၼၼ်ႉၸိုင် မီးတၢင်းဢၼ်လိုမ်းတူဝ်လိုမ်းႁၢင်ႈယူႇသေလႄႈ၊-

6လၢတ်ႈတီႈၶုၼ်ႁေႃၶမ်းလႄႈဝႃႈ၊ ၵႂၢမ်းသတၢင်းသဵင်ၶၢဝ်ႇဢၼ်ၵဝ်ၶႃႈယူႇၵႃႈတီႈမိူင်းၵဝ်ၶႃႈလႄႈ လႆႈငိၼ်းလွင်ႈတၢင်းဢၼ်ၸဝ်ႈႁဝ်းႁဵတ်းတင်းလၢႆ ဢိၵ်ႇတင်းပိင်ႇၺႃႇၸဝ်ႈႁဝ်းၼၼ်ႉ ပဵၼ်ဢၼ်မၢၼ်ႇဢၼ်မႅၼ်ႈၶႃႈဢေႃႈ။-

7ၼႂ်းဝႃႈၼၼ်သေၵေႃႈ ၸူဝ်ႈဢၼ်ၵဝ်ၶႃႈဢမ်ႇပႆႇႁွတ်ႈထိုင်လႄႈထူပ်းႁၼ်ၼၼ်ႉ၊ ၵဝ်ၶႃႈဢမ်ႇယုမ်ႇၵႂၢမ်းၼၼ်ႉ၊ မိူဝ်ႈလဵဝ်ၼႆႉၸမ်ႉ၊ ၵႂၢမ်းဢၼ်ၵဝ်ၶႃႈလႆႈငိၼ်းဢွၼ်တၢင်းၼၼ်ႉ ဢမ်ႇၶိုတ်းသေၶိုင်ႈၼိုင်ႈလႄႈ ပိင်ႇၺႃႇၸဝ်ႈႁဝ်းတင်းၸေးၸိမ်ႇၸဝ်ႈႁဝ်းၼႆႉ ပဵၼ်ဢၼ်ပူၼ်ႉလိူဝ်သတၢင်းသဵင်ၶၢဝ်ႇ ဢၼ်ၵဝ်ၶႃႈလႆႈငိၼ်းၼၼ်ႉၶႃႈဢေႃႈ။-

8ၵူၼ်းၸဝ်ႈႁဝ်းတင်းၶႃႈၸဝ်ႈႁဝ်း ဢၼ်ယူႇၵႃႈတီႈၽၢႆႇၼႃႈၸဝ်ႈႁဝ်းယူႇသေလႄႈ လႆႈငိၼ်းပိင်ႇၺႃႇၸဝ်ႈႁဝ်းၸိူဝ်းၼႆႉ မီးမင်ႇၵလႃႇၶႃႈဢေႃႈ။-

9ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈႁဝ်း ဢၼ်ထုၵ်ႇၸႂ်တီႈၸဝ်ႈႁဝ်းလႄႈ ဢဝ်ၸဝ်ႈႁဝ်းတၢင်ႇၵႃႈၼိူဝ်ရႃႇၸႃႉပလၢင်ႇ ဢီႉသရေႇလႃႉ ၼႆႉၼၼ်ႉ မီးမင်ႇၵလႃႇသေၵမ်းလူၺ်ႈ။ ၵွပ်ႈပိူဝ်ႈဢၼ်ထႃႇဝရႃႉၽြႃး ႁၵ်ႉမဵဝ်း ဢီႉသရေႇလႃႉ ယူႇတႃႇသေႇလႄႈ မၼ်းၸဝ်ႈၶၢၼ်းၸဝ်ႈႁဝ်းဝႆႉၵႃႈၼႂ်းဢရႃႇၶုၼ်ႁေႃၶမ်း ႁႂ်ႈလႆႈႁဵတ်းတၢင်းဢၼ်ၸီႇယၢင်ႇတြႃးဢိၵ်ႇတင်း တၢင်းဢၼ်တႅပ်းတတ်းသိုဝ်ႈသိုဝ်ႈတေႃႇတေႃႇၼၼ်ႉၶႃႈယဝ်ႉ၊ ဝႃႈၼင်ႇၼႆလႄႈ၊-

10ဢဝ်ၶမ်းပၢၵ်ႇပၢႆသၢဝ်း တလၢၼ်ႇတၢၼ်ႇ မဵဝ်းၼၢမ်ႇသႃႇၼမ်ၼႃႇလူင်လၢင်၊ သႅင်လီသႅင်မျၢတ်ႈတင်းလၢႆ သၢၵ်ႈပၼ်တီႈၶုၼ်ႁေႃၶမ်းဢေႃႈ။ မဵဝ်းၼၢမ်ႇသႃႇဢၼ်ၼမ်ၼႃႇ ပဵင်းတၢၼ်ႇမဵဝ်းၼၢမ်ႇသႃႇဢၼ်ၼၢင်းႁေႃၶမ်းမိူင်း သေးၽႃႉ သၢၵ်ႈပၼ်တီႈၶုၼ်လူင် သေႃးလမုၼ်ႇ ၼၼ်ႉ ၵမ်းလိုၼ်းဢမ်ႇႁွတ်ႈဢမ်ႇၽႅဝ်။

11ႁိူဝ်းသၢင်းၽေႃး ႁီႉရမ်ႇ ဢၼ်ဢဝ်ၶမ်းၵႃႈတီႈမိူင်း ဢေႃႇၽီႉရႃႉ မႃးၸိူဝ်းၼၼ်ႉ ဢွၼ်ၵၼ်ပႃးဢဝ်မႆႉၼၢမ်ႇသႃႇဢိၵ်ႇတင်းသႅင်လီသႅင်မျၢတ်ႈသေ ၵႃႈတီႈမိူင်း ဢေႃႇၽီႉရႃႉ ၼၼ်ႉမႃးဢေႃႈ။-

12ၶုၼ်ႁေႃၶမ်းဢဝ်မႆႉၼၢမ်ႇသႃႇၼၼ်ႉ ႁဵတ်းပွတ်ႈလုင်းႁိူၼ်းထႃႇဝရႃႉၽြႃးတင်းႁေႃၸဝ်ႈ ဢိၵ်ႇတင်းတိင်ႇ၊ တရေႃးပုၼ်ႈၶဝ်ၸိူဝ်းဢၼ်ႁဵတ်းၵႂၢမ်းၼၼ်ႉဢေႃႈ။ မႆႉၼၢမ်ႇသႃႇၸိူဝ်ႉၼင်ႇၼၼ်ၼၼ်ႉ ၵမ်းလိုၼ်းဢမ်ႇႁွတ်ႈဢမ်ႇၽႅဝ်လႄႈ ဢမ်ႇပေႃႇဢမ်ႇမႃးတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

13ၶုၼ်လူင် သေႃးလမုၼ်ႇ ၼၼ်ႉ ၼွၵ်ႈသေလၢၵ်ႈသွင်ႇ ဢၼ် သေႃးလမုၼ်ႇ ပၼ်ၵူၺ်းမၼ်းၼၼ်ႉဢမ်ႇၵႃး၊ ပၼ်ၸွမ်းၵႃႈၼင်ႇဢၼ် ၼၢင်းႁေႃၶမ်းမီးဢလူဝ်ႇသၼ်ႇတႃႉၶႂ်ႈလႆႈလႄႈ ယွၼ်းဢဝ်ၼၼ်ႉဢေႃႈ။ လိုၼ်းၼၼ်ႉမၼ်းၼၼ်ႉ ဢိၵ်ႇလူၺ်ႈၵၼ်တင်းၶႃႈမၼ်းၵူၼ်းမၼ်း ၶိုၼ်းမိူဝ်းၵႂႃႇၵႃႈတီႈမိူင်းမၼ်းသေဢေႃႈ။

14ၶၼ်ၸင်ႈၶမ်းဢၼ်မႃးႁွတ်ႈမႃးၽႅဝ်တီႈ သေႃးလမုၼ်ႇ ၼႂ်းယေႈပီႊယေႈပီႊၸမ်ႉ၊ ပဵၼ်ႁူၵ်းပၢၵ်ႇႁူၵ်းသိပ်းပၢႆႁူၵ်း တလၢၼ်ႇတၢၼ်ႇ ဢေႃႈ။-

15ၼွၵ်ႈသေၼၼ်ႉ ယင်းမီးၶမ်းဢၼ်ၵူၼ်းၵႃႉၵူၼ်းၶၢႆလႂ်၊ ၸဝ်ႈၵုၼ်ႇၸဝ်ႈသိၼ်လႂ်၊ ၶုၼ်လူင်တၢင်ႇၸိူဝ်ႉတၢင်ႇမဵဝ်းၵႃႈမီးလႂ်၊ မဵဝ်ႉဝုၼ်ႇတင်းလၢႆလႂ် သၢၵ်ႈၼၼ်ႉလူးၵွၼ်ႇဢေႃႈ။

16ၶုၼ်လူင် သေႃးလမုၼ်ႇ တွင်ႈႁဵတ်းၶိူင်ႈႁႄႉလၢၵ်ႈၼၢၵ်ႈ ဢၼ်ယေႈဢၼ်ပႃးၶမ်းႁူၵ်းပၢၵ်ႇၵျၢပ်ႈ သၶေးလႃႉ ၼၼ်ႉသွင်ပၢၵ်ႇဢၼ်၊-

17ၶိူင်ႈႁႄႉလၢၵ်ႈၼၢၵ်ႈဢွၼ်ႇဢၼ်ယေႈဢၼ်ပႃးၶမ်းသၢမ်ၸွႆႉၼၼ်ႉသၢမ်ပၢၵ်ႇဢၼ်လႄႈ ၶုၼ်ႁေႃၶမ်းဢဝ်ဝႆႉၵႃႈၼႂ်းႁေႃၸဝ်ႈထိူၼ်ႇ လေႇပၼုၼ်ႇ ၼၼ်ႉဢေႃႈ။-

18ၶုၼ်ႁေႃၶမ်းႁဵတ်းရႃႇၸႃႉပလၢင်ႇငႃးၸၢင်ႉလူင်ဢၼ် ဢဝ်တင်းၶမ်းလွတ်ႈငၢၼ်ႇ ဢုမ်ႇႁေႃႇသေၼၼ်ႉဢေႃႈ။-

19ရႃႇၸႃႉပလၢင်ႇၸဝ်ႈၼၼ်ႉ မီးၶၼ်ႈလႆႁူၵ်းသိၵ်ႈလႄႈ ႁူဝ်ႉၽၢႆႇလင်မၼ်းမူၼ်းဝႆႉဢေႃႈ။ ၵႃႈတီႈသွင်ၽၢႆႇတီႈဢၼ်ၼင်ႈၼၼ်ႉ ပျေႉၸုမ်ႇဝႆႉတင်းႁၢဝ်းတီႈဢိင်လႄႈ ၵႃႈတီႈႁိမ်းႁၢဝ်းၼၼ်ႉမီးသၢင်ႇသီႈသွင်တူဝ်ၸုၵ်းယူႇဢေႃႈ။-

20ၵႃႈတီႈသွင်ၽၢႆႇၼိူဝ်သိၵ်ႈၶၼ်ႈလႆႁူၵ်းသိၵ်ႈၸိူဝ်းၼၼ်ႉၵေႃႈ၊ မီးသၢင်ႇသီႈသိပ်းပၢႆသွင်တူဝ်ၸုၵ်းယူႇဢေႃႈ။ ၵႃႈတီႈသိုင်ႇၸိုင်ႈဝၢၼ်ႈမိူင်းတီႈလႂ်တၢၼ်းလႂ်သေသိုင်ႇသေမိူင်း ဢမ်ႇမီးဢၼ်မိူၼ်ၸိူဝ်ႉၼင်ႇၼၼ်ၼၼ်ႉလႃးလႃး။

21ၵွၵ်းၸဝ်ႈဢၼ်ၶုၼ်လူင် သေႃးလမုၼ်ႇ ၵိၼ်ၵႃႈမီး ဢိၵ်ႇတင်းၵွၵ်းၸဝ်ႈဢၼ်သုင်းသွင်ႇၵႃႈတီႈႁေႃၸဝ်ႈထိူၼ်ႇ လေႇပၼုၼ်ႇ ၵႃႈမီးၼၼ်ႉ၊ ဢမ်ႇၸႂ်ႈၵွၵ်းငိုၼ်း၊ ပဵၼ်ၵွၵ်းၶမ်းလွၼ်ႉလွၼ်ႉဢေႃႈ။ ၼႂ်းၸူဝ်ႈပၢၼ် သေႃးလမုၼ်ႇ ၼၼ်ႉ၊ ဢမ်ႇၸၢင်ႈမၢတ်ႈငိုၼ်းပဵၼ်ၵႃႈသင်လႃးလႃး။-

22ၶုၼ်ႁေႃၶမ်း မီးႁိူဝ်းသၢင်းၽေႃး တႃႇသူႉ တင်းလၢႆ လူၺ်ႈၵၼ်တင်းႁိူဝ်းသၢင်းၽေႃး ႁီႉရမ်ႇ ၸိူဝ်းၼၼ်ႉလႄႈ သၢမ်ပီႊယေႈပွၵ်ႈ ႁိူဝ်းသၢင်းၽေႃး တႃႇသူႉ ၸိူဝ်းၼၼ်ႉၸၢင်ႈပႃးဢဝ်ငိုၼ်း၊ ၶမ်း၊ ငႃးၸၢင်ႉ၊ လိင်းလႂ်၊ ၼူၵ်ႉယုင်းလႂ် ၶိုၼ်းမႃးဢေႃႈ။

23ၼင်ႇၼၼ်လႄႈ ၶုၼ်လူင် သေႃးလမုၼ်ႇ မီးၸေးၸိမ်ႇတင်းပိင်ႇၺႃႇ ယဵင်ႈၶႅၼ်းလိူဝ်တွၼ်းၼႃႇသေ ၶုၼ်ႁေႃၶမ်း ၵႃႈဢၼ်မီးၵႃႈၼိူဝ်လိၼ်မိူင်းဢေႃႈ။-

24ၵူၼ်းလိၼ်မိူင်းတင်းသဵင်ႈတင်းလူင် ဢွၼ်ၵၼ်မႃးၸူးၵႃႈတီႈ သေႃးလမုၼ်ႇ ႁႂ်ႈလႆႈထွမ်ႇလႆႈငိၼ်း ၵႂၢမ်းပိင်ႇၺႃႇဢၼ်ၽြႃးပဵၼ်ၸဝ်ႈ သႂၢင်းသႂ်ႇပၼ်ၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။-

25ၶဝ်ၸိူဝ်းဢၼ်မႃးႁင်းၽႂ်ႁင်းမၼ်းၼၼ်ႉ ဢွၼ်ၵၼ်လႆႈသၢၵ်ႈၵွၵ်းၶမ်း၊ ၵွၵ်းငိုၼ်း၊ ၶိူင်ႈၼုင်ႈတၢင်းမႆ၊ လၢၵ်ႈၼၢၵ်ႈတိုၵ်းသိုၵ်း၊ မဵဝ်းၼၢမ်ႇသႃႇ၊ မႃႉလႂ်လီႈလႂ် ၵူႈပီႊၵူႈပီႊဢေႃႈ။-

26သေႃးလမုၼ်ႇ ၸူႉႁွမ်လေႃႉရထႃးလႂ် တင်းႁူဝ်ႁၢၼ်ၵူၼ်းသိုၵ်းၶီႇမႃႉလႂ်လႄႈ မီးလေႃႉရထႃးႁဵင်ပၢႆသီႇပၢၵ်ႇ၊ ႁူဝ်ႁၢၼ်ၵူၼ်းသိုၵ်းၶီႇမႃႉမိုၼ်ႇပၢႆသွင်ႁဵင် ဢၼ်မၼ်းဢဝ်ဝႆႉၵႃႈတီႈဝဵင်း ဢၼ်ထိင်းလေႃႉရထႃးၸဝ်ႈ ဢိၵ်ႇတင်းၵႃႈတီႈမၼ်းၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉဢေႃႈ။-

27ၶုၼ်ႁေႃၶမ်းႁႂ်ႈငိုၼ်းၼမ်ၼႃႇ ၵႃႈၼႂ်းဝဵင်း ယေႇရူႉသလႅမ်ႇ မိူၼ်ၸိူဝ်ႉၼင်ႇမၢၵ်ႇႁိၼ်မၢၵ်ႇသၢႆးလႄႈ ႁႂ်ႈတူၼ်ႈ ဢႃႇရိတ်ႉ ၼမ်ၼႃႇ မိူၼ်ၸိူဝ်ႉၼင်ႇတူၼ်ႈမၢၵ်ႇလိူဝ်ႇသၢင်းၽေႃး ဢၼ်ဢွၵ်ႇၵႃႈတီႈတႂ်ႈတီႈဢၼ်ပၢင်ႇဢၼ်ပဵင်းၼၼ်ႉဢေႃႈ။-

28မႃႉၼမ်ၼႃႇ ဢၼ်လႆႈဢဝ်ၵႃႈတီႈမိူင်း ဢေႇၵိပ်ႉတူႉ မႃးတီႈ သေႃးလမုၼ်ႇ ၸိူဝ်းၼၼ်ႉၵေႃႈ၊ ၸဝ်ႈၵုၼ်ႇၸဝ်ႈသိၼ်ၶုၼ်ႁေႃၶမ်းတင်းလၢႆ လႆႈဢွၼ်ၵၼ်ပၼ်ၵႃႈပၼ်ၶၼ်မၼ်း ပဵၼ်ၽုင်ပဵၼ်ၽုင်ယူႇသေလႄႈ ၶၢမ်ႇဢဝ်ဢေႃႈ။-

29လေႃႉရထႃးၵေႃႈ၊ ၸၢင်ႈဢဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၶၢႆယေႈလင်ငိုၼ်းႁူၵ်းပၢၵ်ႇၵျၢပ်ႈ သၶေးလႃႉ ၊ မႃႉယေႈတူဝ်ၸမ်ႉ၊ ယေႈပၢၵ်ႇပၢႆႁႃႈသိပ်းၵျၢပ်ႈ သၶေးလႃႉ ဢေႃႈ။ ၼင်ႇၼၼ်လႄႈၶဝ်ဢွၼ်ၵၼ်ဢဝ်ဢွၵ်ႇမႃး ပုၼ်ႈၶုၼ်လူင် ႁိတ်ႉတီႉ ဢိၵ်ႇတင်း ၶုၼ်လူင် သူႉရီႉ တင်းလၢႆဢေႃႈ။

← Chapter 9 Jump to: Chapter 11 →