1 Kings 21

Shan

← Chapter 20 Jump to: Chapter 22 →

1လိုၼ်းၼၼ်ႉ ၵွပ်ႈပိူဝ်ႈဢၼ် ၼႃႇပုတ်ႉ ၵူၼ်းဝဵင်း ယေႇၸရေႇလႃႉ မီးသူၼ်ဢူးယဵၼ်ႇၸပိတ်ႈဢၼ်မီးၵႃႈၼႂ်းဝဵင်း ယေႇၸရေႇလႃႉ ၵႃႈတီႈႁိမ်းႁေႃၸဝ်ႈ ဢႃႇႁပ်ႉ ၶုၼ်လူင် သမႃႇရီႉ ၼၼ်ႉလႄႈ၊-

2ဢႃႇႁပ်ႉ လၢတ်ႈတီႈ ၼႃႇပုတ်ႉ လႄႈဝႃႈ၊ ၵွပ်ႈပိူဝ်ႈဢၼ်သူၼ်ဢူးယဵၼ်ႇၸပိတ်ႈမႂ်းၼၼ်ႉ မီးၵႃႈတီႈႁိမ်းႁေႃၸဝ်ႈလႄႈ ပၼ်ပုၼ်ႈဢၼ်ၵဝ်တၵ်းႁဵတ်းႁႆႊႁဵတ်းသူၼ်သေၵမ်း။ ၵဝ်တၵ်းဢဝ်သူၼ်ဢူးယဵၼ်ႇဢၼ်ယဵင်ႈၶႅၼ်းလီၼႃႇသေၼၼ်ႉပၼ်တီႈမႂ်းဢေႃႈ။ ဢမ်ႇၼၼ်ၵေႃႈပေႃးမႂ်းမီးဢလူဝ်ႇၸိုင်၊ ၵဝ်တၵ်းပၼ်ၵႃႈမၼ်းၶၼ်မၼ်းဢေႃႈ၊ ဝႃႈၼင်ႇၼႆသေယဝ်ႉ၊-

3ၼႃႇပုတ်ႉ ၶိုၼ်းလဝ်ႊလၢတ်ႈတီႈ ဢႃႇႁပ်ႉ လႄႈဝႃႈ၊ ႁႂ်ႈထႃႇဝရႃႉၽြႃးႁၢမ်ႈတၢပ်ႈႁႄႉၶႅၼ်ဢမူႉတၢင်းဢၼ်ၶႃႈၸဝ်ႈလႆႈဢဝ်လိၼ်ဢမူၺ်ႇ ဢၼ်လႆႈၶၢမ်ႇဢဝ်ၸူဝ်ႈပူႇပၢၼ်မွၼ်ႇၸိူဝ်းၼၼ်ႉ ပၼ်တီႈၸဝ်ႈႁဝ်းၼၼ်ႉသေၵမ်းလူၺ်ႈ။ မိူဝ်ႈဢၼ်ဝႃႈၼင်ႇၼႆၸိုင်၊-

4ၵွပ်ႈပိူဝ်ႈၵႂၢမ်းဢၼ် ၼႃႇပုတ်ႉ ၵူၼ်းဝဵင်း ယေႇၸရေႇလႃႉ လဝ်ႊလၢတ်ႈလႄႈဝႃႈ၊ ၶႃႈၸဝ်ႈဢမ်ႇလႆႈပၼ်လိၼ်ဢၼ်လႆႈၶၢမ်ႇဢဝ်ၸူဝ်ႈပူႇပၢၼ်မွၼ်ႇၸိူဝ်းၼၼ်ႉ၊ ဝႃႈၼင်ႇၼႆၼၼ်ႉလႄႈ၊ ၶုၼ် ဢႃႇႁပ်ႉ ၼၼ်ႉ မီးတၢင်းၸႂ်ဢၼ်တမ်ႇၼွႆႉမွင်ၸႂ်ႁဵဝ်ႇၸွပ်ႈယူႇသေလႄႈ ၶဝ်ႈၵႃႈၼႂ်းႁေႃၸဝ်ႈလႄႈ ၼွၼ်းၵႃႈၼိူဝ်ၵူႇတီႈၼွၼ်းၸဝ်ႈယူႇ ဝၢႆႇၼႃႈပႅတ်ႈယူႇသေလႄႈ ဢမ်ႇၵိၼ်တၢင်းၵိၼ်တၢင်းၶူပ်းလႄႈယူႇဢေႃႈ။

5မေးမၼ်း ယေႇၸပေႇလႃႉ ၼၼ်ႉမႃးတီႈမၼ်းလႄႈထၢမ်ဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸႂ်ၸဝ်ႈႁဝ်းႁဵဝ်ႇၸွပ်ႈယူႇထၼ်ႈပေႃး ဢမ်ႇၵိၼ်တၢင်းၵိၼ်တၢင်းၶူပ်းလႆႈၼင်ႇႁိုဝ်တီႈၶႃႈ၊ ဝႃႈၼင်ႇၼႆသေယဝ်ႉ၊-

6မၼ်းၶိုၼ်းလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ၵဝ်လၢတ်ႈတီႈ ၼႃႇပုတ်ႉ ၵူၼ်းဝဵင်း ယေႇၸရေႇလႃႉ ၼၼ်ႉလႄႈဝႃႈ၊ ၶၢႆသူၼ်ဢူးယဵၼ်ႇၸပိတ်ႈမႂ်းၼၼ်ႉ ပၼ်တီႈၵဝ်လႄႈ ဢဝ်ငိုၼ်းသေၵမ်း။ ဢမ်ႇၼၼ်ၵေႃႈပေႃးမႂ်းမီးဢလူဝ်ႇၸိုင် ၵဝ်တၵ်းပၼ်သူၼ်ဢူးယဵၼ်ႇတၢင်ႇတီႈတၢင်ႇဢၼ်တီႈမႂ်းဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ၶႃႈၸဝ်ႈဢမ်ႇပၼ်သူၼ်ဢူးယဵၼ်ႇၸပိတ်ႈၼၼ်ႉ တီႈၸဝ်ႈႁဝ်းတီႈၶႃႈ၊ ဝႃႈၼင်ႇၼႆၼၼ်ႉလႄႈ ၸႂ်ၵဝ်ႁဵဝ်ႇၸွပ်ႈဢေႃႈ၊ ဝႃႈၼင်ႇၼႆဢေႃႈ။-

7မေးမၼ်း ယေႇၸပေႇလႃႉ ၼၼ်ႉလၢတ်ႈလႄႈဝႃႈ၊ ၸဝ်ႈႁဝ်းလႆႈဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်း ဢီႉသရေႇလႃႉ ၼႆႉဢမ်ႇၸႂ်ႈတီႈၶႃႈႁိုဝ်။ လုၵ်ႉလႄႈ မီးတၢင်းၸႂ်ဢၼ်သႂၢင်ႇသိူဝ်းသေလႄႈၵိၼ်တၢင်းၵိၼ်တၢင်းၶူပ်းသေၵမ်းတီႈၶႃႈ။ ၶိင်းပဵၼ်ၶႃႈတၵ်းဢဝ်သူၼ်ဢူးယဵၼ်ႇၸပိတ်ႈ ၼႃႇပုတ်ႉ ၵူၼ်းဝဵင်း ယေႇၸရေႇလႃႉ ၼၼ်ႉသၢၵ်ႈပၼ်တီႈၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆလႄႈ၊-

8ဢဝ်တင်းၼႃႇမႃႉၸိုဝ်ႈသဵင် ဢႃႇႁပ်ႉ တႅမ်ႈလိၵ်ႈလႄႈ ဢဝ်တၼ်းသိၵ်ႈၸဝ်ႈတဵၵ်းသေယဝ်ႉ၊ ပၼ်ၵႂႃႇၵႃႈတီႈၶဝ်ၸိူဝ်းဢၼ် ပဵၼ်ၵႄႇပဵၼ်ႁူဝ် ဢိၵ်ႇတင်းမူးမၢတ်ႈၽွင်းမိူင်း ဢၼ်မီးၵႃႈၼႂ်းဝဵင်းဢၼ်မၼ်းယူႇၼၼ်ႉလႄႈယူႇလူၺ်ႈၵၼ်တင်းမၼ်းၸိူဝ်းၼၼ်ႉဢေႃႈ။-

9ၵႂၢမ်းလိၵ်ႈၼၼ်ႉဝႃႈၸမ်ႉ၊ ႁွင်ႉပၢဝ်ႇႁွင်ႉသေႃႇၶိင်ႇဢၼ်တၵ်းလႆႈၵမ်တၢင်းၵိၼ်ၼၼ်ႉလႄႈ ယုၵ်ႉယွင်ႈ ၼႃႇပုတ်ႉ ဝႆႉၵႃႈၼိူဝ်ၵူၼ်းတင်းလၢႆသေယဝ်ႉ၊-

10ဢဝ်ၵူၼ်းဢႃႉထမ်ႇမႃႉ သွင်ၵေႃႉဝႆႉၵႃႈတီႈၽၢႆႇၼႃႈမၼ်းသေလႄႈ ႁႂ်ႈသွင်ၶႃၼၼ်ႉၶၢမ်ႇသၢၵ်ႈသေႇလႄႈဝႃႈ၊ မႂ်းၼႆႉလႆႈၵိၼ်ႇလႃႇ ၽြႃးပဵၼ်ၸဝ်ႈ ဢိၵ်ႇတင်းၶုၼ်ႁေႃၶမ်းယဝ်ႉ၊ ဝႃႈၼင်ႇၼႆလႄႈ၊ ႁဵတ်းၸိူဝ်ႉၼင်ႇၼၼ်ယဝ်ႉၸင်ႇ ဢွၼ်ၵၼ်ဢဝ်မၼ်းဢွၵ်ႇလႄႈ ဢဝ်မၢၵ်ႇႁိၼ်ထိမ်ႈႁႂ်ႈမၼ်းတၢႆတႃႉ၊ ဝႃႈၼင်ႇၼႆဢေႃႈ။-

11ၵူၼ်းဝဵင်းဢၼ်မၼ်းယူႇၸိူဝ်းၼၼ်ႉဢၼ်ဝႃႈ ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ် ဢိၵ်ႇတင်းမူးမၢတ်ႈၽွင်းမိူင်း ဢၼ်ယူႇၵႃႈတီႈဝဵင်းဢၼ်မၼ်းယူႇၼၼ်ႉၸိူဝ်းၼၼ်ႉ ႁဵတ်းၵႃႈဢၼ် ယေႇၸပေႇလႃႉ ပွႆႇၸႂ်ႉၼၼ်ႉၸွမ်းၵႃႈၼင်ႇဢၼ်တႅမ်ႈပႃးၵႃႈၼႂ်းလိၵ်ႈ ဢၼ်မၼ်းပွႆႇၸႂ်ႉတီႈၶဝ်ၼၼ်ႉသေလႄႈ၊-

12ဢွၼ်ၵၼ်ပၢဝ်ႇသေႃႇၶိင်ႇဢၼ်တၵ်းလႆႈၵမ်တၢင်းၵိၼ်ၼၼ်ႉလႄႈယုၵ်ႉယွင်ႈ ၼႃႇပုတ်ႉ ဝႆႉၵႃႈၼိူဝ်ၵူၼ်းတင်းလၢႆဢေႃႈ။-

13ၵူၼ်းဢႃႉထမ်ႇမႃႉသွင်ၵေႃႉမႃးလႄႈၼင်ႈၵႃႈတီႈၽၢႆႇၼႃႈမၼ်းသေလႄႈ ၵူၼ်းဢႃႉထမ်ႇမႃႉၸိူဝ်းၼၼ်ႉ ၶၢမ်ႇသၢၵ်ႈသေႇယူႇၽၢႆႇၼိုင်ႈ တင်း ၼႃႇပုတ်ႉ ၵႃႈတီႈၽၢႆႇၼႃႈၵူၼ်းတင်းလၢႆလႄႈဝႃႈ၊ ၼႃႇပုတ်ႉ ၼႆႉလႆႈၵိၼ်ႇလႃႇၽြႃးပဵၼ်ၸဝ်ႈ ဢိၵ်ႇတင်းၶုၼ်ႁေႃၶမ်းယဝ်ႉ၊ ဝႃႈၼင်ႇၼႆသေယဝ်ႉ၊ ဢွၼ်ၵၼ်ဢဝ်မၼ်းဢွၵ်ႇၵႂႃႇၵႃႈတီႈၼွၵ်ႈဝဵင်းလႄႈ ဢဝ်မၢၵ်ႇႁိၼ်ထိမ်ႈႁႂ်ႈထၼ်ႈပေႃးတၢႆဢေႃႈ။-

14မိူဝ်ႈၼၼ်ႉၶဝ်ဢွၼ်ၵၼ်ပွႆႇၸႂ်ႉၸူးၵႃႈတီႈ ယေႇၸပေႇလႃႉ လႄႈလဝ်ႊလၢတ်ႈလႄႈဝႃႈ၊ ၼႃႇပုတ်ႉ လႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်ထိမ်ႈလႄႈတၢႆယဝ်ႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။

15ယေႇၸပေႇလႃႉ ငိၼ်းလွင်ႈဢၼ် ၼႃႇပုတ်ႉ လႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်ထိမ်ႈလႄႈတၢႆၼၼ်ႉသေယဝ်ႉ၊ ယေႇၸပေႇလႃႉ လၢတ်ႈတီႈ ဢႃႇႁပ်ႉ လႄႈဝႃႈ၊ လုၵ်ႉလႄႈသိမ်းဢဝ်သူၼ်ဢူးယဵၼ်ႇၸပိတ်ႈ ဢၼ် ၼႃႇပုတ်ႉ ၵူၼ်းဝဵင်း ယေႇၸရေႇလႃႉ ပိူင်ႇလႄႈ ဢမ်ႇၶႂ်ႈၶၢႆပၼ်တီႈၸဝ်ႈႁဝ်းလႄႈဢဝ်ငိုၼ်းၼၼ်ႉသေၵမ်းတီႈၶႃႈ။ ၼႃႇပုတ်ႉ ဢမ်ႇမီးဢသၢၵ်ႈတီႈၶႃႈယဝ်ႉ။ တၢႆယဝ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

16ဢႃႇႁပ်ႉ ၼၼ်ႉ ငိၼ်းလွင်ႈဢၼ် ၼႃႇပုတ်ႉ တၢႆယဝ်ႉၼၼ်ႉသေယဝ်ႉ၊ ဢႃႇႁပ်ႉ လုၵ်ႉလႄႈ လူင်းၸူးၵႃႈတီႈသူၼ်ဢူးယဵၼ်ႇၸပိတ်ႈ ၼႃႇပုတ်ႉ ၵူၼ်းဝဵင်း ယေႇၸရေႇလႃႉ ၼၼ်ႉ ႁႂ်ႈလႆႈသိမ်းဢဝ်ဢေႃႈ။

17မိူဝ်ႈၼၼ်ႉၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ဢေးလီႉယႃႉ ၵူၼ်းဝဵင်း တီႉသၽီႉ ၼၼ်ႉလႄႈဝႃႈ၊-

18မႂ်းလုၵ်ႉလႄႈလူင်းၵႂႃႇႁႂ်ႈလႆႈႁူပ်ႉထူပ်း ဢႃႇႁပ်ႉ ၶုၼ်ႁေႃၶမ်း ဢီႉသရေႇလႃႉ ဢၼ်ယူႇၵႃႈၼႂ်းဝဵင်း သမႃႇရီႉ ၼၼ်ႉတႃႉ။ မၼ်းၼၼ်ႉ မီးယူႇၵႃႈၼႂ်းသူၼ်ဢူးယဵၼ်ႇၸပိတ်ႈ ၼႃႇပုတ်ႉ တီႈဢၼ်မၼ်းလူင်းၸူးႁႂ်ႈလႆႈသိမ်းဢဝ်ၼၼ်ႉဢေႃႈ။-

19သင်ႇလၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ မႂ်းၼႆႉဢဝ်ဢသၢၵ်ႈၵူၼ်းတၢႆသေလႄႈ၊ သိမ်းဢဝ်ဢုၵ်ႉၸႃႇမၼ်းယဝ်ႉႁိုဝ်။ ဝႃႈၼင်ႇၼႆတႃႉ။ မၼ်းၸဝ်ႈသမ်ႉမီးဢမိင်ႉလႄႈဝႃႈၸမ်ႉ၊ မႃတင်းလၢႆတၵ်းလေးၵိၼ်လိူတ်ႈမႂ်းဢၼ်ဝႃႈ မႂ်းၼႆႉ ၵႃႈၼႂ်းတီႈဢၼ်လိူတ်ႈ ၼႃႇပုတ်ႉ တူၵ်းလႄႈ မႃလေးၵိၼ်ၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

20ၼင်ႇၼၼ်လႄႈ ဢႃႇႁပ်ႉ လၢတ်ႈတီႈ ဢေးလီႉယႃႉ လႄႈဝႃႈ၊ ရၢၼ်ႇသူႇၵဝ်ဢိူၺ်း၊ မႂ်းႁူပ်ႉထူပ်းၵၼ်တင်းၵဝ်ယဝ်ႉႁိုဝ်။ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ၸဝ်ႈႁဝ်းၶၢႆတူဝ်ၸဝ်ႈႁဝ်းႁႂ်ႈလႆႈႁဵတ်းတူႉၸရိူၵ်ႈၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉလႄႈ ၶႃႈၸဝ်ႈလႆႈႁူပ်ႉထူပ်းၵၼ်တင်းၸဝ်ႈႁဝ်းယဝ်ႉ။-

21ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵဝ်တၵ်းႁႂ်ႈၽေးဢူႉပၢတ်ႈႁွတ်ႈထိုင်ၵႃႈၼိူဝ်မႂ်းလႄႈ ပဵၼ်ၵေႃႉဢၼ်ၶျုၵ်ႈဝႆႉသေဢမ်ႇဝႃႈ၊ ပဵၼ်ၵေႃႉဢၼ်လွတ်ႈ မီးယူႇၵႃႈၼႂ်းမိူင်း ဢီႉသရေႇလႃႉ သေဢမ်ႇဝႃႈ၊ ၵဝ်တၵ်းပႄႇၽဵဝ်ႈၵႃႈပဵၼ်ၵူၼ်းၸၢႆး မဵဝ်းၸိူဝ်ႉၶိူဝ်း ဢႃႇႁပ်ႉ ၼၼ်ႉ ပႅတ်ႈဢေႃႈ။-

22ၵဝ်တၵ်းႁႂ်ႈမဵဝ်းၸိူဝ်ႉၶိူဝ်းမႂ်း ပဵၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်း ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢိၵ်ႇတင်းမဵဝ်းၸိူဝ်ႉၶိူဝ်း ပႃႇသႃႉ လုၵ်ႈၸၢႆး ဢႁီႉယႃႉ ၼၼ်ႉ ၵွပ်ႈပိူဝ်ႈဢပႅတ်ႈဢၼ်မႂ်းတိုၵ်းယူင်းတၢင်းၸႂ်မႆႈၶႆႈၸႃႉၵဝ်လႄႈ ႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉဢေႃႈ။-

23ထႃႇဝရႃႉၽြႃး သမ်ႉမီးဢမိင်ႉလူၺ်ႈလွင်ႈ ယေႇၸပေႇလႃႉ ၸမ်ႉ၊ မႃတင်းလၢႆတၵ်းဢွၼ်ၵၼ်ၵိၼ် ယေႇၸပေႇလႃႉ ၵႃႈတီႈႁိမ်းလမ်းဝဵင်း ယေႇၸရေႇလႃႉ ၼၼ်ႉဢေႃႈ။-

24ၵူၼ်းမဵဝ်းၸိူဝ်ႉၶိူဝ်း ဢႃႇႁပ်ႉ ဢၼ်တၢႆၵႃႈၼႂ်းဝဵင်းၼၼ်ႉၸိုင်၊ မႃတၵ်းၵိၼ်ဢေႃႈ။ ၵေႃႉဢၼ်တၢႆၵႃႈတီႈၼွၵ်ႈတီႈပၢင်ႇၸိုင် ၼူၵ်ႉၵၢင်ႁၢဝ်တၵ်းၵိၼ်ဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။

25ၵေႃႉဢၼ်မိူၼ်ၵၼ်တင်း ဢႃႇႁပ်ႉ ဢၼ်ၶၢႆတူဝ်ၸဝ်ႈၵဝ်ႇ ႁႂ်ႈလႆႈႁဵတ်းတူႉၸရိူၵ်ႈၵႃႈတီႈၽၢႆႇၼႃႈထႃႇဝရႃႉၽြႃး ဢၼ်မေးမၼ်း ယေႇၸပေႇလႃႉ တိုၵ်းယူင်းၼၼ်ႉ ဢမ်ႇမီးသေၵေႃႉသေၵူၼ်း။-

26မၼ်းၼၼ်ႉဢိင်ပိုင်ႈရုၵ်ႈထူႉသၢင်းထူႉသေလႄႈ ႁဵတ်းၸွမ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇ ၵႃႈဢၼ်ၵူၼ်းမဵဝ်း ဢႃႇမေႃးရီႉ ဢၼ်ထႃႇဝရႃႉၽြႃးႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆ ၸိူဝ်းၼၼ်ႉႁဵတ်းၼၼ်ႉဢေႃႈ။-

27ၵူၺ်းၵႃႈ ဢႃႇႁပ်ႉ ၼၼ်ႉငိၼ်းၵႂၢမ်းၼၼ်ႉသေယဝ်ႉ၊ သိၵ်ႇၶူဝ်းၼုင်ႈမၼ်းပႅတ်ႈလႄႈ ဢဝ်ၶူဝ်းၼုင်ႈၼင်ပေႃၼုင်ႈသေယဝ်ႉ ၵမ်တၢင်းၵိၼ်ယူႇ၊ ၼွၼ်းၵႃႈၼႂ်းၶူဝ်းၼုင်ႈၼင်ပေႃၼၼ်ႉယူႇသေလႄႈ ၵွႆႈတႅင်ႇၵႂႃႇ၊ ၵွႆႈတႅင်ႇပႆဢေႃႈ။-

28ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ဢေးလီႉယႃႉ ၵူၼ်းဝဵင်း တီႉသၽီႉ လႄႈဝႃႈၸမ်ႉ၊-

29မႂ်းႁၼ်လွင်ႈဢၼ် ဢႃႇႁပ်ႉ ၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇယူႇၵႃႈတီႈၽၢႆႇၼႃႈၵဝ်ၼၼ်ႉယဝ်ႉႁိုဝ်။ ၵွပ်ႈပိူဝ်ႈဢၼ်မၼ်းၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၵႃႈတီႈၽၢႆႇၼႃႈၵဝ်ၸိူဝ်ႉၼင်ႇၼၼ်လႄႈ ၵဝ်တၵ်းဢမ်ႇႁႂ်ႈၽေးဢူႉပၢတ်ႈၼၼ်ႉ ႁွတ်ႈထိုင်ၼႂ်းၸူဝ်ႈပၢၼ်မၼ်းၼႆႉ။ ၵဝ်တၵ်းႁႂ်ႈႁွတ်ႈထိုင်ၵႃႈၼိူဝ် မဵဝ်းၸိူဝ်ႉၶိူဝ်းမၼ်း ၼႂ်းၸူဝ်ႈပၢၼ်လုၵ်ႈၸၢႆးမၼ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

← Chapter 20 Jump to: Chapter 22 →