1 Kings 11 — Shan

1ၼွၵ်ႈသေလုၵ်ႈယိင်းၶုၼ်ႁေႃၶမ်း ၽႃႇရေႃး ၼၼ်ႉ၊ ၶုၼ်လူင် သေႃးလမုၼ်ႇ ၸၢင်ႈႁၵ်ႉပႅင်းမႄႈယိင်းၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ဝႃႈ ၵူၼ်းမဵဝ်း မေႃႇၽႃႉ ၊ မဵဝ်း ဢမ်ႇမုၼ်ႇ ၊ မဵဝ်း ဢေႇတုမ်ႇ ၊ မဵဝ်း ၸီႉတုၼ်ႇ ၊ မဵဝ်း ႁိတ်ႉတီႉ ၸိူဝ်းၼၼ်ႉၼမ်ၼႃႇဢေႃႈ။-

2ပိၵ်ႉသမ်ႉထႃႇဝရႃႉၽြႃးမီးဢမိင်ႉလူၺ်ႈလွင်ႈၵူၼ်းမဵဝ်းၸိူဝ်းၼၼ်ႉ ဝႆႉတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈဝႃႈ၊ သူဢမ်ႇလႆႈၶဝ်ႈၼႂ်းၶဝ်ၼၼ်ႉ ၶဝ်ၼၼ်ႉၵေႃႈဢမ်ႇလႆႈၶဝ်ႈၼႂ်းသူ၊၊ ၶဝ်ၼၼ်ႉတၵ်းႁႂ်ႈႁူဝ်ၸႂ်သူပိူင်ႈၵႂႃႇၸွမ်းလင်ၽြႃးၶဝ်ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆသေၵေႃႈ၊ သေႃးလမုၼ်ႇ မီးၸႂ်ဢၼ်ၸပ်းဢၼ်ၸွႆးမႄႈယိင်းမဵဝ်းၸိူဝ်းၼၼ်ႉဢေႃႈ။-

3မၼ်းမီးမေးဢၼ်ပဵၼ်လုၵ်ႈယိင်းၶုၼ်ၸဵတ်းပၢၵ်ႇ၊ ၸိူင်ႉၼၢင်းသၢမ်ပၢၵ်ႇလႄႈမေးမၼ်းၸိူဝ်းၼၼ်ႉ ႁႂ်ႈႁူဝ်ၸႂ်မၼ်းပိူင်ႈၵႂႃႇဢေႃႈ။-

4မိူဝ်ႈဢၼ် သေႃးလမုၼ်ႇ ဢသၢၵ်ႈၵႄႇမႃးၼၼ်ႉၸိုင်၊ မႄႈယိင်းၸိူဝ်းၼၼ်ႉႁႂ်ႈႁူဝ်ၸႂ်မၼ်းပိူင်ႈၵႂႃႇၸွမ်းလင်ၽြႃးတၢင်ႇသူႇတၢင်ႇပႃးသေလႄႈ ႁူဝ်ၸႂ်မၼ်းဢမ်ႇမီးတၢင်းဢၼ်ၸေးၸုမ်ႇၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈမၼ်းမိူၼ်ၸိူဝ်ႉၼင်ႇ ၸဝ်ႈပေႃႈမၼ်း တႃႇဝိတ်ႈ ၼၼ်ႉ။-

5သေႃးလမုၼ်ႇ ၸွမ်းလင် ဢႃႇသတရိၵ်ႉ ၼၢင်းၽီ ၸီႉတုၼ်ႇ၊ မီႉလႃႉၵုမ်း ၽြႃး ဢမ်ႇမုၼ်ႇ ၊ ဢၼ်လီႁင်ႈဢဵတ်ႇသဵတ်ႇၼၼ်ႉလႄႈ၊-

6သေႃးလမုၼ်ႇ ႁဵတ်းတူႉၸရိူၵ်ႈ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ ဢမ်ႇၸွမ်းလင်ထႃႇဝရႃႉၽြႃးလုမ်းလုမ်းမိူၼ်ၸိူဝ်ႉၼင်ႇ ၸဝ်ႈပေႃႈမၼ်း တႃႇဝိတ်ႈ ၼၼ်ႉ။-

7မိူဝ်ႈၼၼ်ႉ သေႃးလမုၼ်ႇ တႄႇႁဵတ်းထႃႇၼႃႉတီႈသုင်ၵႃႈၼိူဝ်လွႆ ဢၼ်မီးၵႃႈတီႈၽၢႆႇၼႃႈဝဵင်း ယေႇရူႉသလႅမ်ႇ ၼၼ်ႉ ပုၼ်ႈ ၶႄးမူႉသႃႉ ၽြႃး မေႃႇၽႃႉ ဢၼ်ပဵၼ်တီႈဢၼ်လီႁင်ႈဢဵတ်ႇသဵတ်ႇၼၼ်ႉ ဢိၵ်ႇတင်းပုၼ်ႈ မူးလွၵ်ႉ ၽြႃး ဢမ်ႇမုၼ်ႇ ဢၼ်ပဵၼ်တီႈဢၼ်လီႁင်ႈဢဵတ်ႇသဵတ်ႇၼၼ်ႉဢေႃႈ။-

8ၼင်ႇၼၼ်လႄႈမၼ်းတႄႇႁဵတ်းပုၼ်ႈမေးမၼ်း ဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ဢဝ်ၼၢမ်ႇသႃႇတုတ်ႇၽႆး ဢၼ်ဢဝ်ယိတ်ႈပုၵ်ႈၸေႃႇ တီႈၽြႃးၶဝ်တင်းသဵင်ႈတင်းလူင်ၼၼ်ႉၼၼ်ႉဢေႃႈ။

9ထႃႇဝရႃႉၽြႃးၸႂ်မႆႈၶႆႈၸႃႉတီႈ သေႃးလမုၼ်ႇ ၵွပ်ႈပိူဝ်ႈဢၼ် ႁူဝ်ၸႂ်မၼ်းပိူင်ႈသေၵႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢၼ်ပေႃႇမႃးတီႈမၼ်းသွင်ပွၵ်ႈလႄႈ

10ပိင်းၺၢပ်ႈဝႆႉ လူၺ်ႈလွင်ႈဢၼ်မၼ်းတၵ်းဢမ်ႇလႆႈၸွမ်းလင်ၽြႃးတၢင်ႇသူႇတၢင်ႇပႃးလႄႈ မၼ်းဢမ်ႇထွမ်ႇဢမ်ႇဢဝ်ၵႂၢမ်းဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉလႄႈ၊-

11ထႃႇဝရႃႉၽြႃးမီးဢမိင်ႉလႄႈဝႃႈ၊ ၵွပ်ႈပိူဝ်ႈဢၼ်မႂ်းႁဵတ်းၸိူဝ်ႉၼင်ႇၼႆလႄႈ ဢမ်ႇပႂ်ႉၸွမ်းပတီႉၺိၺ်ႇၵဝ်ဢိၵ်ႇတင်းထုင်းၽိင်ႈတြႃး ဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉလႄႈ ၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈသေၵႃႈတီႈမႂ်းလႄႈ ပၼ်တီႈၶႃႈမႂ်းဢမၢၼ်ႇၶၼ်ပဵၼ်ဢေႃႈ။-

12ၵူၺ်းၵႃႈ ၵဝ်ထွၵ်ႈလူၺ်ႈပေႃႈမႂ်း တႃႇဝိတ်ႈ ၼၼ်ႉလႄႈ တၵ်းဢမ်ႇႁဵတ်းၼႂ်းၸူဝ်ႈပၢၼ်မႂ်းၼႆႉ။ ၵဝ်တၵ်းၼုၵ်ႈဢဝ်သေၵႃႈၼႂ်းမိုဝ်းလုၵ်ႈၸၢႆးမႂ်းဢေႃႈ။-

13ၼႂ်းဝႃႈၼၼ်သေၵေႃႈ ၵဝ်တၵ်းဢမ်ႇၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းတင်းသဵင်ႈတင်းမူတ်း၊ ၵဝ်တၵ်းထွၵ်ႈလူၺ်ႈၶႃႈၵဝ် တႃႇဝိတ်ႈ တင်းဝဵင်း ယေႇရူႉသလႅမ်ႇ ဢၼ်ၵဝ်လိူၵ်ႈၵဵပ်းဢဝ်ၼၼ်ႉလႄႈ တၵ်းဢဝ်မဵဝ်းၼိုင်ႈပၼ်တီႈလုၵ်ႈၸၢႆးမႂ်းဢေႃႈ၊ ဝႃႈၼင်ႇၼႆဢေႃႈ။

14လိုၼ်းၼၼ်ႉထႃႇဝရႃႉၽြႃးတိုၵ်းယူင်း ႁႃႇတတ်ႉ ၵူၼ်းမဵဝ်း ဢေႇတုမ်ႇ ၵေႃႉဢၼ်ဝႆႉတၢင်းၽိတ်းတီႈ သေႃးလမုၼ်ႇ ၼၼ်ႉဢေႃႈ။ မၼ်းၼၼ်ႉပဵၼ်မဵဝ်းၸိူဝ်ႉၶိူဝ်းၶုၼ်ႁေႃၶမ်း ဢေႇတုမ်ႇ ဢေႃႈ။-

15မိူဝ်ႈဢွၼ်တၢင်းၼၼ်ႉ မိူဝ်ႈဢၼ် တႃႇဝိတ်ႈ မီးယူႇၵႃႈတီႈမိူင်း ဢေႇတုမ်ႇ လႄႈ

16ပူဝ်ႇၶျုၵ်ႈ ယႂႃႇၽႃႉ တိုၵ်းတေႃးယႃႉပႅတ်ႈၵူၼ်းၸၢႆးမဵဝ်း ဢေႇတုမ်ႇ တင်းသဵင်ႈတင်းမူတ်း ၵွပ်ႈပိူဝ်ႈဢၼ် ယႂႃႇၽႃႉ ဢိၵ်ႇတင်း ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ယူႇၵႃႈတီႈမိူင်းၼၼ်ႉႁူၵ်းလိူၼ် တေႃႇထိုင်ႁွတ်ႈ မၼ်းယႃႉၽဵဝ်ႈၵူၼ်းၸၢႆး မဵဝ်း ဢေႇတုမ်ႇ တင်းသဵင်ႈတင်းလူင်ၼၼ်ႉသေယဝ်ႉ၊ ယႂႃႇၽႃႉ ၵႂႃႇႁႂ်ႈလႆႈၽင်တူဝ်တၢႆတင်းလၢႆၼၼ်ႉၸိုင်၊-

17ႁႃႇတတ်ႉ ၼၼ်ႉယင်းပဵၼ်လုၵ်ႈဢွၼ်ႇယူႇသေလႄႈ ဢွၵ်ႇပၢႆႈလူၺ်ႈၵၼ်တင်းၵူၼ်းမဵဝ်း ဢေႇတုမ်ႇ ၵမ်ႈၽွင်ႈ ဢၼ်ပဵၼ်ၶႃႈပေႃႈမၼ်းၸိူဝ်းၼၼ်ႉ ၵႂႃႇႁႂ်ႈလႆႈႁွတ်ႈထိုင်ၵႃႈၼႂ်းမိူင်း ဢေႇၵိပ်ႉတူႉ ဢေႃႈ။-

18ၶဝ်လုၵ်ႉသေၵႃႈတီႈမိူင်း မီႉတျၼ်ႇ ၵႂႃႇလႄႈ ႁွတ်ႈထိုင်ၵႃႈတီႈမိူင်း ပႃႇရၼ်ႇ ဢေႃႈ။ လႆႈသမ်ႉ ၶဝ်ႁွင်ႉဢဝ်ၵူၼ်းမိူင်း ပႃႇရၼ်ႇ ၵမ်ႈၽွင်ႈၵႂႃႇလႄႈ ႁွတ်ႈထိုင်ၵႃႈတီႈ ၽႃႇရေႃး ၶုၼ်ႁေႃၶမ်းမိူင်း ဢေႇၵိပ်ႉတူႉ သေယဝ်ႉ၊ ၶုၼ်ၼၼ်ႉပၼ်ႁိူၼ်းတီႈယူႇတီႈသဝ်းလႄႈ ၸီႇယၢင်ႇဝႆႉလွင်ႈဢၼ်လဵင်ႉဢၼ်လူ ဢိၵ်ႇတင်းၵႂၢၵ်ႈၼမ်ႉၵႂၢၵ်ႈလိၼ်တီႈမၼ်းဢေႃႈ။-

19ႁႃႇတတ်ႉ လႆႈထူပ်းၵျေးၸူးသိုဝ်ႈၼႃႈတႂ်ႈတႃၶုၼ်လူင် ၽႃႇရေႃး ယႂ်ႇၼႃႇလူင်လၢင်ထၼ်ႈပေႃးမၼ်းၼၼ်ႉ ဢဝ်ၼွင်ႉယိင်းၼၢင်းႁေႃၶမ်း တႃႇပၼိတ်ႉ ဢၼ်ပဵၼ်မေးမၼ်းၼၼ်ႉ ပၼ်ၵၼ်တင်းမၼ်းဢေႃႈ။-

20ၼွင်ႉယိင်း တႃႇပၼိတ်ႉ ၼၼ်ႉ ၵိူတ်ႇလဵင်ႉလုၵ်ႈၸၢႆး ၵေႇၼူႉပတ်ႇ မႃးလႄႈ၊ တႃႇပၼိတ်ႉ ၼၼ်ႉဢဝ်ၽၢတ်ႇၼူမ်းၵႃႈၼႂ်းႁေႃၸဝ်ႈ ၽႃႇရေႃး လႄႈ ၵေႇၼူႉပတ်ႇ ၼၼ်ႉယူႇလူၺ်ႈၵၼ်တင်းလုၵ်ႈၸၢႆး ၽႃႇရေႃး တင်းလၢႆၵႃႈၼႂ်းႁေႃၸဝ်ႈ ၽႃႇရေႃး ၼၼ်ႉဢေႃႈ။-

21ႁႃႇတတ်ႉ ၼၼ်ႉယူႇၵႃႈၼႂ်းမိူင်း ဢေႇၵိပ်ႉတူႉ သေလႄႈ လႆႈငိၼ်းလွင်ႈဢၼ် တႃႇဝိတ်ႈ ၼွၼ်းလပ်းလူၺ်ႈၵၼ်တင်းပူႇမၼ်းမွၼ်ႇမၼ်း ဢိၵ်ႇတင်းလွင်ႈဢၼ်ၶုၼ်ပူဝ်ႇၶျုၵ်ႈ ယႂႃႇၽႃႉ တၢႆယဝ်ႉၼၼ်ႉသေယဝ်ႉ၊ ႁႃႇတတ်ႉ တွင်းပၢၼ်ႇတီႈၶုၼ်ႁေႃၶမ်း ၽႃႇရေႃး လႄႈဝႃႈ၊ ပၼ်ဢၶႂၢင်ႉႁႂ်ႈၶႃႈၸဝ်ႈလႆႈဢွၵ်ႇလႄႈၶိုၼ်းမိူဝ်းၵႂႃႇ ၵႃႈတီႈမိူင်းတူဝ်ၸဝ်ႈၵဝ်ႇပုၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

22ၽႃႇရေႃး ၵေႃႈထၢမ်လႄႈဝႃႈ၊ တီႈၵဝ်ၼႆႉမႂ်းယင်းလူဝ်ႇထႅင်ႈၵႃႈသင်လူးၵွၼ်ႇလႄႈ မႂ်းၶႂ်ႈၶိုၼ်းမိူဝ်းၵႂႃႇၵႃႈတီႈမိူင်းတူဝ်ၸဝ်ႈၵဝ်ႇပုၼ်ႉ၊ ဝႃႈၼင်ႇၼႆသေယဝ်ႉ၊ မၼ်းၶိုၼ်းလဝ်ႊလၢတ်ႈလႄႈဝႃႈ၊ ဢမ်ႇလူဝ်ႇထႅင်ႈၵႃႈသင်သေၸိူဝ်ႉသေပိူင်တီႈၶႃႈ၊ ၼႂ်းဝႃႈၼၼ်သေၵေႃႈ ၶႅၼ်းတေႃႈပၼ်ဢၶႂၢင်ႉႁႂ်ႈလႆႈၵႂႃႇသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

23ၽြႃးပဵၼ်ၸဝ်ႈတိုၵ်းယူင်းတင်းၵေႃႉဢၼ်ႁဵတ်းရၢၼ်ႇသူႇတီႈ သေႃးလမုၼ်ႇ ဢၼ်ဝႃႈ ရေႇၸုၼ်ႇ လုၵ်ႈၸၢႆး ဢေးလျႃႇတႃႉ ဢၼ်ဢွၵ်ႇပၢႆႈသေၵႃႈတီႈ ၸဝ်ႈမၼ်း ႁႃႇတႃႉတေႇၸႃႇ ၶုၼ်လူင် ၸေႃႇၽႃႉ ၼၼ်ႉဢေႃႈ။-

24မၼ်းၼၼ်ႉႁႂ်ႈၵူၼ်းၸူႉၵၼ်တုမ်ၵၼ်တီႈမၼ်းသေလႄႈ ႁဵတ်းပူဝ်ႇၶျုၵ်ႈၵႃႈၼိူဝ်မုၵ်ႉၼိုင်ႈၸိူဝ်းၼိုင်ႈ မိူဝ်ႈဢၼ် တႃႇဝိတ်ႈ တိုၵ်းတေႃးယႃႉပႅတ်ႈၵူၼ်း ၸေႃႇၽႃႉ ၸိူဝ်းၼၼ်ႉဢေႃႈ။ လႆႈသမ်ႉမၼ်းၵႂႃႇၵႃႈတီႈဝဵင်း ထမ်ႇမသႅတ်ႉ လႄႈ ယူႇၵႃႈတီႈၼၼ်ႈသေလႄႈႁဵတ်းၶုၼ်လူင်ၵႃႈတီႈဝဵင်း ထမ်ႇမသႅတ်ႉ ၼၼ်ႉဢေႃႈ။-

25ၼွၵ်ႈသေဢမူႉဢၼ် ႁႃႇတတ်ႉ ယႃႉယူၵ်ႉၼၼ်ႉ၊ မၼ်းၼၼ်ႉႁဵတ်းရၢၼ်ႇသူႇ တီႈမဵဝ်း ဢီႉသရေႇလႃႉ ၼႂ်းၸူဝ်ႈပၢၼ် သေႃးလမုၼ်ႇ ၼၼ်ႉတဵမ်တဵမ်ဢေႃႈ။ မၼ်းလီႁင်ႈဢဵတ်ႇသဵတ်ႇမဵဝ်း ဢီႉသရေႇလႃႉ ယူႇသေလႄႈ ဢုပ်ႉပိူင်ႇၸၢမ်ႇၸႃးမိူင်း သူႉရီႉ ယူႇဢေႃႈ။

26ၼွၵ်ႈသေၼၼ်ႉ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ မဵဝ်း ဢေႇၽရိမ်ႇ ၊ ၵူၼ်းဝၢၼ်ႈ ၸေႇရတႃႉ ၊ ၶႃႈ သေႃးလမုၼ်ႇ ဢၼ်မႄႈမၼ်းမီးၸိုဝ်ႈမီးသဵင် ၸေႇရႂႃႇ လႄႈ ပဵၼ်မႄႈမူၵ်းမႄႈမၢႆႈၼၼ်ႉၵေႃႈ ပုင်ႇၵၢၼ်ႇၶုၼ်ႁေႃၶမ်းဢေႃႈ။-

27လွင်ႈဢၼ် မၼ်းပုင်ႇၵၢၼ်ႇၶုၼ်ႁေႃၶမ်းၼၼ်ႉၸမ်ႉ၊ မိူဝ်ႈဢၼ် သေႃးလမုၼ်ႇ ပွင်ႁဵတ်းပွင်မႄးတီႈ မီႉလေႃး လႄႈ မႄးၵုမ်းမႄးႁဵတ်းလမ်းဝဵင်းဢၼ် ၸဝ်ႈပေႃႈမၼ်း တႃႇဝိတ်ႈ တႄႇႁဵတ်းလႄႈလူႉၼၼ်ႉယူႇၼၼ်ႉၸိုင်၊-

28ယေႇရူဝ်းပုမ်ႇ ၼၼ်ႉပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇဢေႃႈ။ သေႃးလမုၼ်ႇ ႁၼ်လွင်ႈဢၼ်မၼ်းပဵၼ်ၵူၼ်းဢွၼ်ႇဢၼ်ဢဝ်ႁႅင်းၵျူဝ်းၸႃးႁဵတ်းၼၼ်ႉလႄႈ ၶၢၼ်းမၼ်းဝႆႉႁႂ်ႈမၼ်းလႆႈဢုပ်ႉၵႃႈၼိူဝ်ဢမူႉ ၵႃႈဢၼ်မဵဝ်း ယူဝ်းသႅပ်ႈ လႆႈပွင်လႆႈႁဵတ်းၼၼ်ႉဢေႃႈ။-

29ၽဝ်ႇၼိုင်ႈ ယေႇရူဝ်းပုမ်ႇ ၼၼ်ႉ ဢွၵ်ႇသေၵႃႈၼႂ်းဝဵင်း ယေႇရူႉသလႅမ်ႇ ၵႂႃႇသေယဝ်ႉ၊ ဢႁီႉယႃႉ ၵူၼ်းဝဵင်း သီႉလေႃႇ ၼၼ်ႉ ႁႄႉႁပ်ႉႁူဝ်တၢင်းမၼ်းဢေႃႈ။ ဢႁီႉယႃႉ ၼၼ်ႉ ဢဝ်သိူဝ်ႈယၢဝ်းဢၼ်မႂ်ႇႁူမ်ႇသုမ်ႇတူဝ်မၼ်းယူႇသေလႄႈ ၼႂ်းမိူဝ်ႈဢၼ်သွင်ၶႃၵူၺ်းယင်းတိုၵ်ႉမီးယူႇၵႃႈၼႂ်းပၢင်ႇတူင်ႈၼႃးယူႇၼၼ်ႉၸိုင်၊-

30ဢႁီႉယႃႉ ၼၼ်ႉ ယိပ်းၵမ်သိူဝ်ႈယၢဝ်းဢၼ်မၼ်းၼုင်ႈၼၼ်ႉသေလႄႈ သိၵ်ႇၶၢတ်ႇႁဵတ်းသိပ်းသွင်ပွတ်းသေယဝ်ႉ၊-

31လၢတ်ႈတီႈ ယေႇရူဝ်းပုမ်ႇ လႄႈဝႃႈ၊ ဢဝ်သိပ်းပွတ်းၼႆႉတႃႉ။ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ ၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈသေၵႃႈတီႈၼႂ်းမိုဝ်း သေႃးလမုၼ်ႇ လႄႈ ဢဝ်မဵဝ်းသိပ်းမဵဝ်းပၼ်တီႈမႂ်းဢေႃႈ။-

32ၵွပ်ႈပိူဝ်ႈဢၼ်ၵဝ်ထွၵ်ႈလူၺ်ႈၶႃႈၵဝ် တႃႇဝိတ်ႈ ဢိၵ်ႇတင်းၵွပ်ႈပိူဝ်ႈဢၼ်ထွၵ်ႈလူၺ်ႈဝဵင်း ယေႇရူႉသလႅမ်ႇ ဢၼ်ၵဝ်လိူၵ်ႈၵဵပ်းဢဝ် ၵႃႈၼႂ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉလႄႈ မၼ်းတၵ်းလႆႈမဵဝ်းၼိုင်ႈဢေႃႈ။-

33လွင်ႈဢၼ်ၼုၵ်ႈဢဝ်သိပ်းမဵဝ်းၼၼ်ႉၸမ်ႉ၊ ၶဝ်ၼၼ်ႉၸုၼ်ႉပႅတ်ႈၵဝ်သေလႄႈ ၵူဝ်းၵႂၢႆႇ ဢႃႇသတရိၵ်ႉ ၼၢင်းၽီ ၸီႉတုၼ်ႇ၊ ၶႄးမူႉသႃႉ ၽြႃး မေႃႇၽႃႉ၊ မီႉလႃႉၵုမ်း ၽြႃး ဢမ်ႇမုၼ်ႇ ၸိူဝ်းၼၼ်ႉလႄႈ ဢမ်ႇၵႂႃႇမႃးၼႂ်းသဵၼ်ႈတၢင်းၵဝ်တင်းလၢႆ ႁႂ်ႈလႆႈႁဵတ်းဢၼ်ၸိုဝ်ႈၸႂ်ႈလီငၢမ်းသိုဝ်ႈၼႃႈတႂ်ႈတႃၵဝ်လႄႈ ပႂ်ႉၵမ်ပႂ်ႉၸွမ်းထုင်းၽိင်ႈတြႃးၵဝ် ဢိၵ်ႇတင်းလွင်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉ မိူၼ်ၸိူဝ်ႉၼင်ႇပေႃႈမၼ်း တႃႇဝိတ်ႈ ၼၼ်ႉ။-

34ၵူၺ်းၵႃႈ ၵဝ်တၵ်းဢမ်ႇပႆႇၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈ သေၵႃႈၼႂ်းမိုဝ်းမၼ်း၊ ၵွပ်ႈပိူဝ်ႈဢၼ်ၵဝ်ထွၵ်ႈလူၺ်ႈၶႃႈၵဝ် တႃႇဝိတ်ႈ ဢၼ်ၵဝ်လိူၵ်ႈၵဵပ်းဢဝ် ၵွပ်ႈပိူဝ်ႈဢၼ်မၼ်းပႂ်ႉၸွမ်းပိင်းၺၢပ်ႈၵဝ် ဢိၵ်ႇတင်းထုင်းၽိင်ႈတြႃးၵဝ်ၼၼ်ႉလႄႈ ၵဝ်တၵ်းပၼ်ဢၶႂၢင်ႉႁႂ်ႈမၼ်းလႆႈပဵၼ်ၶုၼ်လူင်ယူႇၸူဝ်ႈဢသၢၵ်ႈမၼ်းဢေႃႈ။-

35ၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈသေ ၵႃႈၼႂ်းမိုဝ်းလုၵ်ႈၸၢႆးမၼ်းလႄႈ ဢဝ်သိပ်းမဵဝ်းပၼ်တီႈမႂ်းဢေႃႈ။-

36လွင်ႈၼင်ႇႁိုဝ်ၶႃႈၵဝ် တႃႇဝိတ်ႈ ၼၼ်ႉ တၵ်းမီးဝၢၼ်ႇၽႆးတဵၼ်းဢၼ်ႁိူဝ်ႈလႅင်းယူႇၵႃႈတီႈၽၢႆႇၼႃႈၵဝ်တႃႇသေႇ ၵႃႈၼႂ်းဝဵင်း ယေႇရူႉသလႅမ်ႇ ဢၼ်ၵဝ်လိူၵ်ႈၵဵပ်းဢဝ် ပုၼ်ႈတီႈဢၼ်ၼႃႇမႃႉၸိုဝ်ႈသဵင်ၵဝ်တၵ်းတႄႇယူႇၼၼ်ႉၸိုင်၊ ၵဝ်တၵ်းဢဝ်မဵဝ်းၼိုင်ႈပၼ်တီႈလုၵ်ႈၸၢႆးမၼ်းဢေႃႈ။-

37ၵဝ်လိူၵ်ႈၵဵပ်းဢဝ်မႂ်းလႄႈမႂ်းတၵ်းလႆႈဢုပ်ႉပိူင်ႇၸၢမ်ႇၸႃး ၸွမ်းၵႃႈၼင်ႇဢၼ်ဢလူဝ်ႇသၼ်ႇတႃႉမႂ်းမီးၼၼ်ႉယူႇသေလႄႈ ႁဵတ်းၶုၼ်ၵႃႈၼိူဝ်မဵဝ်း ဢီႉသရေႇလႃႉ ဢေႃႈ။-

38ပေႃးမႂ်းထွမ်ႇဢဝ်ၵႃႈဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉလႄႈ ၸွမ်းသဵၼ်ႈတၢင်းၵဝ်တင်းလၢႆယူႇ၊ ႁဵတ်းဢၼ်ၸိုဝ်ႈၸႂ်ႈလီငၢမ်းသိုဝ်ႈၼႃႈတႂ်ႈတႃၵဝ်ယူႇသေလႄႈ ပႂ်ႉၵမ်ပႂ်ႉၵျၢင်ႉထုင်းၽိင်ႈတြႃးၵဝ် ဢိၵ်ႇတင်းပိင်းၺၢပ်ႈၵဝ်တင်းလၢႆယူႇ မိူၼ်ၸိူဝ်ႉၼင်ႇဢၼ်ၶႃႈၵဝ် တႃႇဝိတ်ႈ ႁဵတ်းၼၼ်ႉၸိုင်၊ ၵဝ်တၵ်းမီးယူႇလူၺ်ႈၵၼ်တင်းမႂ်းလႄႈ ႁဵတ်းႁိူၼ်းဢၼ်မၼ်ႈၶိူင်ႇပုၼ်ႈမႂ်း မိူၼ်ၸိူဝ်ႉၼင်ႇဢၼ်ၵဝ်ႁဵတ်း ပုၼ်ႈ တႃႇဝိတ်ႈ ၼၼ်ႉလႄႈ ဢဝ်မိူင်း ဢီႉသရေႇလႃႉ ပၼ်တီႈမႂ်းဢေႃႈ။-

39ၵွပ်ႈပိူဝ်ႈလွင်ႈၼႆႉလႄႈ ၵဝ်တၵ်းယႃႉယူၵ်ႉၸိူဝ်ႉၶိူဝ်းၶုၼ် တႃႇဝိတ်ႈ ဢေႃႈ။ ၼႂ်းၼၼ်ႉတၵ်းယႃႉယူၵ်ႉယူႇတႃႇသေႇဢမ်ႇၸႂ်ႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

40ပိူဝ်ႈၼႆလႄႈ သေႃးလမုၼ်ႇ ႁႃႁႂ်ႈလႆႈဢဝ် ယေႇရူဝ်းပုမ်ႇ တၢႆလႄႈ၊ ယေႇရူဝ်းပုမ်ႇ ၼၼ်ႉလုၵ်ႉလႄႈဢွၵ်ႇပၢႆႈၵႂႃႇၵႃႈတီႈမိူင်း ဢေႇၵိပ်ႉတူႉ ၸူးၵႃႈတီႈ သီႉသၵ်ႉ ၶုၼ်ႁေႃၶမ်း ဢေႇၵိပ်ႉတူႉ သေယဝ်ႉ၊ ယူႇၵႃႈၼႂ်းမိူင်း ဢေႇၵိပ်ႉတူႉ ၼၼ်ႉ တေႃႇထိုင်ႁွတ်ႈ သေႃးလမုၼ်ႇ ထၼ်ႈပေႃးတၢႆဢေႃႈ။

41လွင်ႈတၢင်း သေႃးလမုၼ်ႇ ဢၼ်ယင်းၵိုတ်းယင်းၵျၢၼ်ႇတင်းလၢႆ ဢိၵ်ႇတင်းၵႃႈဢၼ်မၼ်းႁဵတ်းၼၼ်ႉ တင်းၵႂၢမ်းပိင်ႇၺႃႇမၼ်းၸိူဝ်းၼၼ်ႉၸိုင်၊ တႅမ်ႈဝႆႉမီးယူႇၵႃႈၼႂ်းဝုတ်ႉထူႉ သေႃးလမုၼ်ႇ ၼၼ်ႉယူႇဢေႃႈ။-

42သေႃးလမုၼ်ႇ ၼၼ်ႉယူႇၵႃႈၼႂ်းဝဵင်း ယေႇရူႉသလႅမ်ႇ လႄႈ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ တင်းသဵင်ႈတင်းမူတ်း သီႇသိပ်းပီႊတဵမ်တဵမ်သေယဝ်ႉ၊-

43သေႃးလမုၼ်ႇ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်း တႃႇဝိတ်ႈ ၸဝ်ႈပေႃႈမၼ်းၼၼ်ႉဢေႃႈ။ ရူဝ်းပုမ်ႇ လုၵ်ႈၸၢႆးမၼ်းၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။