1 Kings 16

Shan

← Chapter 15 Jump to: Chapter 17 →

1ၼုၵ်ႈၵပၢတ်ႈထႃႇဝရႃႉၽြႃး ဢဝ်လွင်ႈ ပႃႇသႃႉ သေလႄႈ ႁွတ်ႈမႃးတီႈ ယေႇႁူႉ လုၵ်ႈၸၢႆး ႁႃႇၼၼီႉ ၼၼ်ႉၸမ်ႉ၊-

2ၵဝ်ဢဝ်မႂ်းသေၵႃႈၼႂ်းမုၼ်ႈလိၼ်လႄႈ ယုၵ်ႉယွင်ႈမႂ်းဝႆႉ ႁႂ်ႈမႂ်းလႆႈပဵၼ်ၵေႃႉဢၼ်ဢုပ်ႉၵႃႈၼိူဝ်ၵူၼ်းၵဝ်မဵဝ်း ဢီႉသရေႇလႃႉ သေၵေႃႈ၊ ၵွပ်ႈပိူဝ်ႈဢၼ်မႂ်းၸွမ်းသဵၼ်ႈတၢင်း ယေႇရူဝ်းပုမ်ႇ ၼၼ်ႉယူႇသေလႄႈ ႁဵတ်းႁႂ်ႈၵူၼ်းၵဝ်မဵဝ်း ဢီႉသရေႇလႃႉ ၽိတ်းပိူင်ႈလႄႈ တိုၵ်းယူင်းတၢင်းၸႂ်မႆႈၶႆႈၸႃႉၵဝ် ၵွပ်ႈပိူဝ်ႈဢပႅတ်ႈၶဝ်ၼၼ်ႉလႄႈ၊-

3ၵဝ်တၵ်းပႄႇၽဵဝ်ႈ ပႃႇသႃႉ ဢိၵ်ႇတင်းမဵဝ်းၸိူဝ်ႉၶိူဝ်းမၼ်းပႅတ်ႈလႄႈ တၵ်းႁႂ်ႈမဵဝ်းၸိူဝ်ႉၶိူဝ်းမႂ်းပဵၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်း ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ၼၼ်ႉဢေႃႈ။-

4ၵူၼ်းမဵဝ်းၸိူဝ်ႉၶိူဝ်း ပႃႇသႃႉ ၼၼ်ႉ ပေႃးတၢႆၵႃႈၼႂ်းဝဵင်းၸိုင်မႃတၵ်းၵိၼ်ဢေႃႈ။ ပေႃးတၢႆၵႃႈၼွၵ်ႈၵႃႈပၢင်ႇၸိုင်၊ ၼူၵ်ႉၵၢင်ႁၢဝ်တၵ်းၵိၼ်ဢေႃႈ၊ ဝႃႈၼင်ႇၼႆဢေႃႈ။-

5လွင်ႈတၢင်း ပႃႇသႃႉ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းဢၼ်မၼ်းႁဵတ်း၊ လွင်ႈတၢင်းဢၼ်တၼ်းၶူဝ်းမၼ်းယႂ်ႇၸိူဝ်းၼၼ်ႉ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

6ပႃႇသႃႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်း တီႉရၸႃႉ ဢေႃႈ။ ဢေးလႃႇ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။-

7ပဵၼ်မႅၼ်ႈၸွမ်းၵႃႈၼင်ႇၼုၵ်ႈၵပၢတ်ႈထႃႇဝရႃႉၽြႃးဢၼ် ဢဝ်လွင်ႈ ပႃႇသႃႉ ဢိၵ်ႇတင်းမဵဝ်းၸိူဝ်ႉၶိူဝ်းမၼ်းသေလႄႈ ႁွတ်ႈမႃးတီႈ ယေႇႁူႉ လုၵ်ႈၸၢႆး ႁႃႇၼၼီႉ ၵွပ်ႈပိူဝ်ႈဢပႅတ်ႈ ၵႃႈဢၼ်မၼ်းၽိတ်းပိူင်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ဢဝ်လွင်ႈတၢင်းဢၼ်မၼ်းႁဵတ်းၸိူဝ်းၼၼ်ႉ တိုၵ်းယူင်းတၢင်းၸႂ်မႆႈၶႆႈၸႃႉၸဝ်ႈ ဢၼ်ဝႃႈဢပႅတ်ႈဢၼ်မၼ်းႁဵတ်းမိူၼ်ၵၼ်တင်း မဵဝ်းၸိူဝ်ႉၶိူဝ်း ယေႇရူဝ်းပုမ်ႇ ဢိၵ်ႇတင်းၵွပ်ႈပိူဝ်ႈဢပႅတ်ႈ ဢၼ်မၼ်းယႃႉၽဵဝ်ႈမဵဝ်းၸိူဝ်ႉၶိူဝ်းၸဝ်ႈၼၼ်ႉပႅတ်ႈၼၼ်ႉဢေႃႈ။

8ၼႂ်းပီႊဢၼ် ဢႃႇသႃႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသၢဝ်းပၢႆႁူၵ်းပီႊၼၼ်ႉ၊ ဢေးလႃႇ လုၵ်ႈၸၢႆး ပႃႇသႃႉ ၼၼ်ႉ ယူႇၵႃႈတီႈဝဵင်း တီႉရၸႃႉ လႄႈ လႆႈဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ သၢမ်ပီႊသေယဝ်ႉ၊-

9ၶႃႈမၼ်း ၸီႉမရီႉ ၊ ၵေႃႉဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်း ၶီႇလေႃႉရထႃးမၼ်းတင်းလၢႆၶိုင်ႈၼိုင်ႈၼၼ်ႉ လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်းလႄႈ ၼႂ်းမိူဝ်ႈဢၼ်မၼ်းယင်းတိုၵ်ႉၵိၼ်လဝ်ႈထၼ်ႈပေႃးမဝ်းလဝ်ႈမဝ်းၵမ် ယူႇၵႃႈၼႂ်းႁိူၼ်း ဢႃႇၸႃႉ ၵူၼ်းဢုပ်ႉႁေႃၸဝ်ႈ ၼႂ်းဝဵင်း တီႉရၸႃႉ ယူႇၼၼ်ႉၸိုင်၊-

10ၼႂ်းပီႊဢၼ် ဢႃႇသႃႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသၢဝ်းပၢႆၸဵတ်းပီႊၼၼ်ႉ၊ ၸီႉမရီႉ ၼၼ်ႉၶဝ်ႈၸူးသေလႄႈႁဵတ်းတီႈမၼ်းလႄႈ ဢဝ်မၼ်းတၢႆသေယဝ်ႉ၊ ၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။-

11မိူဝ်ႈဢၼ်မၼ်းၸႃႉၸၢမ်ႇႁၢင်ႈၸၢမ်ႇႁေႃလႄႈ ၼင်ႈၵႃႈၼိူဝ်ရႃႇၸႃႉပလၢင်ႇၼၼ်ႉၸိုင် မၼ်းဢဝ်မဵဝ်းၸိူဝ်ႉၶိူဝ်း ပႃႇသႃႉ ၵႃႈမီးတင်းသဵင်ႈတင်းလူင်တၢႆဢေႃႈ၊မၼ်းဢမ်ႇဝႆႉၵိုတ်းဝႆႉၵျၢၼ်ႇ ၵူၼ်းၸၢႆးဢၼ်ပဵၼ်ပီႈပဵၼ်ၼွင်ႉၵၼ်တင်း ပႃႇသႃႉ ၊ ၵူၼ်းၸၢႆးဢၼ်ႁဵတ်းၵေႃႉႁဵတ်းသေႈလူၺ်ႈၵၼ်တင်းမၼ်းၼၼ်ႉသေၵေႃႉသေၵူၼ်း။-

12ၼင်ႇၼႆလႄႈ ၸီႉမရီႉ ယႃႉၽဵဝ်ႈမဵဝ်းၸိူဝ်ႉၶိူဝ်း ပႃႇသႃႉ ၵႃႈမီးတင်းသဵင်ႈတင်းလူင်ပႅတ်ႈ မႅၼ်ႈၸွမ်းၵႃႈၼင်ႇၵႂၢမ်းဢၼ်ထႃႇဝရႃႉၽြႃး ဢဝ်လွင်ႈ ပႃႇသႃႉ သေလႄႈ ဢဝ်ပရေႃးၽႅတ်ႈ ယေႇႁူႉ မီးဢမိင်ႉၸဝ်ႈဝႆႉၼၼ်ႉ။-

13ၵွပ်ႈပိူဝ်ႈဢပႅတ်ႈ ပႃႇသႃႉ ၵႃႈမီးဢိၵ်ႇတင်းဢပႅတ်ႈလုၵ်ႈၸၢႆးမၼ်း ဢေးလႃႇ ဢၼ်ၶဝ်ၽိတ်းပိူင်ႈသေလႄႈ ႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈ ႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ လူၺ်ႈလွင်ႈမိၵ်ႉသႃႇတိၵ်ႉထီႉၶဝ်ၼၼ်ႉဢေႃႈ။-

14လွင်ႈတၢင်း ဢေးလႃႇ ဢၼ်ယင်းၵိုတ်းယင်းၵျၢၼ်ႇ ဢိၵ်ႇတင်းလွင်ႈတၢင်းၵႃႈဢၼ်မၼ်းႁဵတ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။

15ၼႂ်းပီႊဢၼ် ဢႃႇသႃႉ ၶုၼ်ႁေႃၶမ်း ယူႉတႃႉ ၼင်ႈႁၢင်ႈၼင်ႈႁေႃသၢဝ်းပၢႆၸဵတ်းပီႊၼၼ်ႉ၊ ၸီႉမရီႉ ဢုပ်ႉပိူင်ႇၸၢမ်ႇၸႃး ၵႃႈၼႂ်းဝဵင်း တီႉရၸႃႉ ၸဵတ်းဝၼ်းဢေႃႈ၊ ၼႂ်းၶိင်ႇမိူဝ်ႈၼၼ်ႉၵူၼ်းတင်းလၢႆလႆႈၶျႃးတပ်ႉၶဝ်ယူႇၽၢႆႇၼိုင်ႈ တင်းဝဵင်း ၵီႉပေႉသုၼ်ႇ ဢၼ်ၵူၼ်း ၽီႉလိတ်ႉတီႉ ပိူင်ႇၼၼ်ႉယူႇဢေႃႈ။-

16ၶဝ်ၸိူဝ်းဢၼ်ၶျႃးတပ်ႉၶဝ်ယူႇၸိူဝ်းၼၼ်ႉ ငိၼ်းလွင်ႈဢၼ် ၸီႉမရီႉ ႁဵတ်းမုၵ်ႉႁဵတ်းၸိူဝ်းသေလႄႈ ဢဝ်ၶုၼ်ႁေႃၶမ်းတၢႆ ၸိူဝ်ႉၼင်ႇၼၼ်ၼၼ်ႉသေယဝ်ႉ၊ ၼႂ်းဝၼ်းၼၼ်ႉၵမ်းလဵဝ် ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ဢဝ်ၶုၼ်ပူဝ်ႇၶျုၵ်ႈ ဢေႃးမရီႉ ႁဵတ်းၶုၼ်ႁေႃၶမ်းၵႃႈၼိူဝ်မဵဝ်း ဢီႉသရေႇလႃႉ ၵႃႈၼႂ်းတပ်ႉၼၼ်ႉဢေႃႈ။-

17ဢေႃးမရီႉ ၼၼ်ႉ ဢိၵ်ႇလူၺ်ႈၵၼ်တင်းၵူၼ်းမဵဝ်း ဢီႉသရေႇလႃႉ ၵႃႈဢၼ်မီးၵႃႈတီႈမၼ်းၸိူဝ်းၼၼ်ႉ ဢွၼ်ၵၼ်လုၵ်ႉသေၵႃႈတီႈဝဵင်း ၵီႉပေႉသုၼ်ႇ ၶိုၼ်ႈၸူးလႄႈ လွမ်ႉဝဵင်း တီႉရၸႃႉ ဝႆႉဢေႃႈ။-

18မိူဝ်ႈဢၼ် ၸီႉမရီႉ ႁူႉႁၼ်လွင်ႈဢၼ်တိုၵ်းဢဝ်ဝဵင်းလႄႈလႆႈယဝ်ႉၼၼ်ႉၸိုင်၊ မၼ်းၶဝ်ႈၵႃႈၼႂ်းတပ်ႉဢၼ်မီးၵႃႈၼႂ်းႁေႃၸဝ်ႈလႄႈ ဢဝ်ၽႆးတုတ်ႇႁေႃၸဝ်ႈၼၼ်ႉ ၵႃႈၼိူဝ်တူဝ်မၼ်းလႄႈတူဝ်မၼ်းလႆႈတၢႆ၊-

19ၵွပ်ႈပိူဝ်ႈဢပႅတ်ႈဢၼ်မၼ်းၽိတ်းပိူင်ႈ ၼႂ်းလွင်ႈဢၼ်မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ၸွမ်းသဵၼ်ႈတၢင်းဢၼ် ယေႇရူဝ်းပုမ်ႇ ၸွမ်းၼၼ်ႉ ဢိၵ်ႇတင်းဢပႅတ်ႈဢၼ်မၼ်းၼၼ်ႉႁဵတ်းလႄႈ ႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉဢေႃႈ။-

20လွင်ႈတၢင်း ၸီႉမရီႉ ဢၼ်ယင်းၵိုတ်းယင်းၵျၢၼ်ႇ ဢိၵ်ႇတင်းလွင်ႈတၢင်းဢၼ်မၼ်းပုင်ႇၵၢၼ်ႇၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။

21မိူဝ်ႈၼၼ်ႉၵူၼ်းမိူင်း ဢီႉသရေႇလႃႉ တင်းလၢႆ ပဵၼ်သွင်ၽၢၵ်ႇသွင်လူင်ၵႂႃႇလႄႈၶိုင်ႈၼိုင်ႈ ၸွမ်းလင် တီႉပၼီႉ လုၵ်ႈၸၢႆး ၵီႉၼတ်ႉ ႁႂ်ႈလႆႈဢဝ်မၼ်းႁဵတ်းၶုၼ်ႁေႃၶမ်းဢေႃႈ။ ၶိုင်ႈၼိုင်ႈၸမ်ႉ၊ ၸွမ်းလင် ဢေႃးမရီႉ ဢေႃႈ။-

22ၶဝ်ၸိူဝ်းဢၼ်ၸွမ်းလင် ဢေႃးမရီႉ ၼၼ်ႉ ပႄႉၼႅင်ႇၶဝ်ၸိူဝ်းဢၼ် ၸွမ်းလင် တီႉပၼီႉ လုၵ်ႈၸၢႆး ၵီႉၼတ်ႉ ၼၼ်ႉသေယဝ်ႉ၊ တီႉပၼီႉ တၢႆလႄႈ ဢေႃးမရီႉ ၼၼ်ႉၼင်ႈႁၢင်ႈၼင်ႈႁေႃဢေႃႈ။

23ၼႂ်းပီႊဢၼ် ဢႃႇသႃႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသၢမ်သိပ်းပၢႆဢဵတ်းပီႊၼၼ်ႉ၊ ဢေႃးမရီႉ ၸႃႉၼင်ႈႁၢင်ႈၼင်ႈႁေႃ မိူင်း ဢီႉသရေႇလႃႉ လႄႈ ဢုပ်ႉပိူင်ႇၸၢမ်ႇၸႃးသိပ်းပၢႆသွင်ပီႊဢေႃႈ။ မၼ်းဢုပ်ႉပိူင်ႇၸၢမ်ႇၸႃး ၵႃႈၼႂ်းဝဵင်း တီႉရၸႃႉ ႁူၵ်းပီႊသေယဝ်ႉ၊-

24ဢဝ်ငိုၼ်းသွင် တလၢၼ်ႇတၢၼ်ႇ သိုဝ်ႉဢဝ်လွႆ သမႃႇရီႉ ၼႂ်းမိုဝ်း သမေႇရႃႉ လႄႈ တႄႇႁဵတ်းဝဵင်းၵႃႈၼိူဝ်လွႆၼၼ်ႉသေလႄႈ ႁွင်ႉႁဵၵ်ႈၸိုဝ်ႈဝဵင်းၼၼ်ႉ သမႃႇရီႉ ၸွမ်းလူၺ်ႈ ၸိုဝ်ႈသဵင် သမေႇရႃႉ ဢၼ်ပဵၼ်ၸဝ်ႈလွႆၼၼ်ႉဢေႃႈ။-

25ဢေႃးမရီႉ ၼၼ်ႉ ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ယဵင်ႈၶႅၼ်းႁဵတ်းႁၢႆႉႁဵတ်းမိူၵ်ႈၼႃႇသေၶဝ်ၸိူဝ်းဢၼ် ပဵၼ်မိူဝ်ႈဢွၼ်တၢင်းမၼ်းၸိူဝ်းၼၼ်ႉဢေႃႈ။-

26မၼ်းၸွမ်းသဵၼ်ႈတၢင်းဢၼ် ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ၸွမ်း၊ ဢိၵ်ႇတင်းဢပႅတ်ႈတၢင်းဢၼ်မၼ်းၼၼ်ႉ ႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈ ႁႂ်ႈလႆႈတိုၵ်းယူင်း တၢင်းၸႂ်မႆႈၶႆႈၸႃႉထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ လူၺ်ႈလွင်ႈ မိၵ်ႉသႃႇတိၵ်ႉထီႉၶဝ်ၼၼ်ႉဢေႃႈ။-

27လွင်ႈတၢင်းဢၼ် ဢေႃးမရီႉ ႁဵတ်းဢၼ်ယင်းၵိုတ်းယင်းၵျၢၼ်ႇ ဢိၵ်ႇတင်းလွင်ႈတၢင်းဢၼ် တၼ်းၶူဝ်းမၼ်းယႂ်ႇၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

28ဢေႃးမရီႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇ ၵႃႈၼႂ်းဝဵင်း သမႃႇရီႉ ဢေႃႈ။ ဢႃႇႁပ်ႉ လုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

29ၼႂ်းပီႊဢၼ် ဢႃႇသႃႉ ၶုၼ်ႁေႃၶမ်း ယူႉတႃႉ ၼင်ႈႁၢင်ႈၼင်ႈႁေႃ သၢမ်သိပ်းပၢႆပႅတ်ႇပီႊၼၼ်ႉ၊ ဢႃႇႁပ်ႉ လုၵ်ႈၸၢႆးၸဝ်ႈ ဢေႃးမရီႉ ၊ ၼၼ်ႉၸႃႉၼင်ႈႁၢင်ႈၼင်ႈႁေႃမိူင်း ဢီႉသရေႇလႃႉ လႄႈ ဢႃႇႁပ်ႉ လုၵ်ႈၸၢႆး ဢေႃးမရီႉ ၼၼ်ႉ၊ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ ၵႃႈၼႂ်းဝဵင်း သမႃႇရီႉ သၢဝ်းပၢႆသွင်ပီႊဢေႃႈ။-

30ဢႃႇႁပ်ႉ လုၵ်ႈၸၢႆးၸဝ်ႈ ဢေႃးမရီႉ ၼၼ်ႉ ယဵင်ႈၶႅၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလိူဝ်တွၼ်းၼႃႇသေ ၶဝ်ၸိူဝ်းဢၼ်ပဵၼ်မိူဝ်ႈဢွၼ်တၢင်းမၼ်းၸိူဝ်းၼၼ်ႉဢေႃႈ။-

31မၼ်းမၢတ်ႈတၢင်းဢၼ်ၸွမ်းသဵၼ်ႈတၢင်းဢပႅတ်ႈတူႉၸရိူၵ်ႈဢၼ် ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ႁဵတ်းၼၼ်ႉ၊ ပဵၼ်လွင်ႈတၢင်းဢၼ်မဝ်မၢင် ဢမ်ႇပွင်ႇလွင်ႈၵႃႈသင်ၼၼ်ႉၵူၺ်းဢမ်ႇၵႃး၊ မၼ်းသမ်ႉပဵၼ်ၵူပ်ႉပဵၼ်ၵူႈလူၺ်ႈၵၼ်တင်း ယေႇၸပေႇလႃႉ လုၵ်ႈယိင်း ဢေႇသပေႇလႃႉ ၶုၼ်လူင် ၸီႉတုၼ်ႇ ၼၼ်ႉသေလႄႈ ၵႂႃႇႁဵတ်းဝၢတ်ႈတီႈၽြႃး ပႃႇလႃႉ လႄႈၵူဝ်းၵႂၢႆႇမၼ်းဢေႃႈ။-

32မၼ်းတႄႇႁဵတ်းယိတ်ႈပလၢင်ႇပုၼ်ႈၽြႃး ပႃႇလႃႉ ၵႃႈၼႂ်းပိၵ်ႈမၢၼ်ႇၽြႃး ပႃႇလႃႉ ဢၼ်မၼ်းႁဵတ်းၵႃႈၼႂ်းဝဵင်း သမႃႇရီႉ ၼၼ်ႉဢေႃႈ။-

33ဢႃႇႁပ်ႉ ၼၼ်ႉ ႁဵတ်းတူၼ်ႈ ဢႃႇသရႃႉ သေလႄႈ ယဵင်ႈၶႅၼ်းႁဵတ်းႁႂ်ႈလႆႈ တိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးၽြႃးပဵၼ်ၸဝ်ႈ မဵဝ်း ဢီႉသရေႇလႃႉ လိူဝ်တွၼ်းၼႃႇသေၶုၼ်ႁေႃၶမ်း ဢီႉသရေႇလႃႉ ၵႃႈဢၼ်ပဵၼ်မိူဝ်ႈဢွၼ်တၢင်းမၼ်းၸိူဝ်းၼၼ်ႉဢေႃႈ။

34ၼႂ်းၸူဝ်ႈပၢၼ်မၼ်းၼၼ်ႉ ႁီႉဢေးလႃႉ ၵူၼ်းဝဵင်း ပေႇသလႃႉ တႄႇႁဵတ်းဝဵင်း ယေႇရီႉၶူဝ်း ဢေႃႈ။ မၼ်းသုမ်းၸွမ်း ဢၽီႉရမ်ႇ လုၵ်ႈၸၢႆးတူၼ်ႈမၼ်းသေလႄႈ တႄႇႁဵတ်းငဝ်ႈႁၢၵ်ႈလမ်းဝဵင်းလႄႈ သုမ်းၸွမ်း ၸေးၵုပ်ႉ လုၵ်ႈၸၢႆးလိုၼ်းမၼ်းသေလႄႈ၊ ပူၵ်းတင်ႈၽၵ်းတူဝဵင်းမႅၼ်ႈၸွမ်းၵႃႈၼင်ႇၵႂၢမ်းဢၼ် ထႃႇဝရႃႉၽြႃးဢဝ် ယေႃးသူႉ လုၵ်ႈၸၢႆး ၼုၼ်ႇ မီးဢမိင်ႉၸဝ်ႈဝႆႉၼၼ်ႉဢေႃႈ။

← Chapter 15 Jump to: Chapter 17 →