1 Kings 18 — Shan

1မိုဝ်ႉဝၼ်းပူၼ်ႉၵႂႃႇၼမ်ၼႃႇသေယဝ်ႉ၊ ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈ ဢေးလီႉယႃႉ ၼႂ်းပီႊဢၼ်ထူၼ်ႈထိုင်သၢမ်ပီႊၼၼ်ႉလႄႈဝႃႈ၊ မႂ်းၵႂႃႇလႄႈ ၼႄပျႃးတူဝ်မႂ်းတီႈ ဢႃႇႁပ်ႉ တႃႉ။ ၵဝ်တၵ်းႁႂ်ႈၽူၼ်တူၵ်းၵႃႈၼိူဝ်လိၼ်မိူင်းဢေႃႈ၊ ဝႃႈၼင်ႇၼႆလႄႈ၊-

2ဢေးလီႉယႃႉ ၵႂႃႇႁႂ်ႈလႆႈၼႄပျႃးတူဝ်မၼ်းတီႈ ဢႃႇႁပ်ႉ ဢေႃႈ။ ၵွပ်ႈပိူဝ်ႈဢၼ်မီးၽေးတၢင်းဢၼ်ၶဝ်ႈၵႃႈမၢၵ်ႇပႅင်း ဢိုပ်းယၢၵ်ႈတၢင်းၵိၼ်တၢင်းၶူပ်းၼႃႇလူင်လၢင်ၵႃႈတီႈဝဵင်း သမႃႇရီႉ ၼၼ်ႉလႄႈ၊-

3ဢႃႇႁပ်ႉ ၼၼ်ႉႁွင်ႉဢဝ် ဢေႃးပတီႉ ၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈၼၼ်ႉဢေႃႈ။ ဢေႃးပတီႉ ၼၼ်ႉ ပဵၼ်ၵေႃႉဢၼ်ရူဝ်ႇသေႇၵူဝ်ယမ်ထႃႇဝရႃႉၽြႃးၼႃႇလူင်လၢင်ဢေႃႈ။-

4လွင်ႈမၼ်းၸမ်ႉ မိူဝ်ႈဢၼ် ယေႇၸပေႇလႃႉ ပႄႇၽဵဝ်ႈပရေႃးၽႅတ်ႈထႃႇဝရႃႉၽြႃးတင်းလၢႆပႅတ်ႈၼၼ်ႉၸိုင်၊ ဢေႃးပတီႉ ၼၼ်ႉ ဢဝ်ပရေႃးၽႅတ်ႈပၢၵ်ႇၼိုင်ႈသိူင်ႇဝႆႉၵႃႈၼႂ်းႁူးထမ်ႈယေႈႁႃႈသိပ်းသေယဝ်ႉ၊ ဢဝ်ၶဝ်ႈမုၼ်းတင်းၼမ်ႉပၼ်လႄႈလဵင်ႉလူဢေႃႈ။-

5ဢႃႇႁပ်ႉ ၵေႃႈ လၢတ်ႈတီႈ ဢေႃးပတီႉ ၼၼ်ႉလႄႈဝႃႈ၊ လႄႇလဵပ်ႈၵႃႈၼႂ်းမိူင်းတင်းမိူင်းလႄႈ ၵႂႃႇၵႃႈတီႈဢၼ်မီးၼမ်ႉဢွၵ်ႇႁူးၵႃႈမီး ဢိၵ်ႇတင်းၼမ်ႉႁွင်ႈၵႃႈမီးၼၼ်ႉတႃႉ၊ ၸၢင်ႈၶႄးတၵ်းထူပ်းတူၼ်ႈယိူဝ်ႈတူၼ်ႈယႃႈလႄႈ ဢသၢၵ်ႈမႃႉလႂ်တင်းလီႈလႂ် တၵ်းၶျၢမ်းသႃႇသေလႄႈ၊ ႁဝ်းဢမ်ႇလႆႈသုမ်းလႆႈၸွမ်းတရိၵ်ႈသၢၼ်ႇၵႃႈမီးၼၼ်ႉဢေႃႈ၊ ဝႃႈၼင်ႇၼႆသေလႄႈ၊-

6ၶဝ်ၼၼ်ႉတူၵ်းတႃႇၽႄမႅင်ႇပၼ်ၵၼ်ၵႃႈၼႂ်းမိူင်းၸဝ်ႈၼၼ်ႉ ႁႂ်ႈပေႃးၵႂႃႇၸွတ်ႇတူဝ်ႈမိူင်းတင်းမိူင်းလႄႈ ဢႃႇႁပ်ႉ ၸွမ်းသဵၼ်ႈတၢင်းသဵၼ်ႈၼိုင်ႈ၊ ဢေႃးပတီႉ ၸွမ်းသဵၼ်ႈတၢင်းသဵၼ်ႈၼိုင်ႈ ၵႂႃႇႁင်းၽႂ်ႁင်းမၼ်းဢေႃႈ။

7ၼႂ်းမိူဝ်ႈဢၼ် ဢေႃးပတီႉ ယင်းတိုၵ်ႉၸွမ်းတၢင်းယူႇၼၼ်ႉၸိုင်၊ ဢေးလီႉယႃႉ ႁူပ်ႉထူပ်းမၼ်းဢေႃႈ။ မၼ်းႁူႉလွင်ႈဢၼ်ပဵၼ်မၼ်းၼၼ်ႉလႄႈ ၶုပ်ႉမူပ်ႇဝၢင်းႁူဝ်မၼ်းသေလႄႈထၢမ်လႄႈဝႃႈ၊ ၸဝ်ႈႁဝ်းပဵၼ်ၸဝ်ႈၵဝ်ၶႃႈ ဢေးလီႉယႃႉ ႁိုဝ်။ ဝႃႈၼင်ႇၼႆသေယဝ်ႉ၊-

8မၼ်းၼၼ်ႉၶိုၼ်းလၢတ်ႈတီႈမၼ်းလႄႈဝႃႈ၊ ပဵၼ်ၵဝ်ၼႆႉယဝ်ႉ။ ၵႂႃႇလဝ်ႊလၢတ်ႈလွင်ႈဢၼ် ဢေးလီႉယႃႉ မီးၵႃႈတီႈၼႆႈၼၼ်ႉတီႈၸဝ်ႈမႂ်းတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

9မၼ်းလၢတ်ႈလႄႈဝႃႈ၊ ၶႃႈၸဝ်ႈႁဝ်းၼႆႉမီးတၢင်းၽိတ်းၸိူဝ်ႉၼင်ႇႁိုဝ်လႄႈ တၵ်းဢဝ်ၶႃႈၸဝ်ႈႁဝ်းဢၢပ်ႈပၼ်ၵႃႈၼႂ်းမိုဝ်း ဢႃႇႁပ်ႉ ႁႂ်ႈၶႃႈၸဝ်ႈႁဝ်းလႆႈတၢႆၶႃႈ။-

10ၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈႁဝ်းဢသၢၵ်ႈလိပ်းယူႇၼၼ်ႉ၊ သိုင်ႇၸိုင်ႈဝၢၼ်ႈမိူင်းဢၼ်ၸဝ်ႈၵဝ်ၶႃႈ ဢမ်ႇပွႆႇၸႂ်ႉၵႂႃႇႁႂ်ႈလႆႈႁႃၸဝ်ႈႁဝ်းၼၼ်ႉ ဢမ်ႇမီးသေသိုင်ႇသေမိူင်းၶႃႈ။ မိူဝ်ႈဢၼ်ၶဝ်ၼၼ်ႉလဝ်ႊလၢတ်ႈလႄႈဝႃႈ၊ မၼ်းၼၼ်ႉဢမ်ႇမီးၵႃႈတီႈၼႆႈၶႃႈ၊ ဝႃႈၼင်ႇၼႆၸိုင်၊ မၼ်းပၼ်တၢင်းဢၼ်ၵိၼ်ႇဢၼ်ဝႃႈတီႈသိုင်ႇၸိုင်ႈဝၢၼ်ႈမိူင်းၸိူဝ်းၼၼ်ႉလူၺ်ႈလွင်ႈ ဢၼ်ၶဝ်ဢမ်ႇထူပ်းဢမ်ႇႁၼ်ၸဝ်ႈႁဝ်းၼၼ်ႉၶႃႈဢေႃႈ။-

11မိူဝ်ႈလဵဝ်ၼႆႉၸမ်ႉ၊ ၸဝ်ႈႁဝ်းမီးဢမိင်ႉလႄႈဝႃႈ၊ ၵႂႃႇလဝ်ႊလၢတ်ႈတီႈၸဝ်ႈမႂ်းလႄႈဝႃႈ၊ ဢေးလီႉယႃႉ မီးယူႇၵႃႈတီႈၼႆႈတီႈၶႃႈဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလူင်ပႄႇ။-

12မိူဝ်ႈဢၼ်ၵဝ်ၶႃႈဢွၵ်ႇသေၵႃႈတီႈၸဝ်ႈႁဝ်းၵႂႃႇၼၼ်ႉၸိုင်၊ ဝီႉၺိၺ်ႇထႃႇဝရႃႉၽြႃး တၵ်းဢဝ်ၸဝ်ႈႁဝ်းၵႂႃႇၵႃႈတီႈဢၼ်ၵဝ်ၶႃႈဢမ်ႇႁူႉၼၼ်ႉသေလႄႈ၊ ၶုၼ် ဢႃႇႁပ်ႉ ၼၼ်ႉ မိူဝ်ႈဢၼ်ၵဝ်ၶႃႈႁွတ်ႈထိုင်လႄႈ လဝ်ႊလၢတ်ႈတီႈ ဢႃႇႁပ်ႉ လႄႈ မၼ်းဢမ်ႇထူပ်းဢမ်ႇႁၼ်ၸဝ်ႈႁဝ်းလႆႈၼၼ်ႉၸိုင်၊ မၼ်းတၵ်းဢဝ်ၵဝ်ၶႃႈတၢႆၶႃႈဢေႃႈ။ ၵဝ်ၶႃႈရူဝ်ႇသေႇၵူဝ်ယမ်ထႃႇဝရႃႉၽြႃးၸဵမ်မိူဝ်ႈဢၼ်ဢသၢၵ်ႈယင်းလဵၵ်ႉယင်းဢွၼ်ႇၼၼ်ႉယူႇၶႃႈဢေႃႈ။-

13ပိူၼ်ႈဢမ်ႇမွၵ်ႇလၢတ်ႈလွင်ႈတၢင်းဢၼ်ၵဝ်ၶႃႈႁဵတ်းၼႂ်းမိူဝ်ႈဢၼ် ယေႇၸပေႇလႃႉ ဢဝ်ပရေႃးၽႅတ်ႈထႃႇဝရႃႉၽြႃးတင်းလၢႆတၢႆၼၼ်ႉ ဢၼ်ဝႃႈလွင်ႈတၢင်းဢၼ်ၵဝ်ၶႃႈဢဝ်ပရေႃးၽႅတ်ႈထႃႇဝရႃႉၽြႃး ပၢၵ်ႇၼိုင်ႈ သိူင်ႇဝႆႉယေႈႁႃႈသိပ်းၵႃႈၼႂ်းႁူးထမ်ႈသေလႄႈ ဢဝ်ၶဝ်ႈမုၼ်းတင်းၼမ်ႉလဵင်ႉလူၶဝ်ၼၼ်ႉတီႈၸဝ်ႈႁဝ်းၶႃႈႁိုဝ်။-

14မိူဝ်ႈလဵဝ်ၼႆႉၸမ်ႉ၊ ၸဝ်ႈႁဝ်းမီးဢမိင်ႉလႄႈဝႃႈ၊ ၵႂႃႇလဝ်ႊလၢတ်ႈတီႈၸဝ်ႈမႂ်းလႄႈဝႃႈ။ ဢေးလီႉယႃႉ မီးယူႇၵႃႈတီႈၼႆႈတီႈၶႃႈဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလူင်ပႄႇ။ ပိူဝ်ႈၼႆလႄႈ မၼ်းတၵ်းဢဝ်ၵဝ်ၶႃႈတၢႆတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

15ဢေးလီႉယႃႉ ၵေႃႈၶိုၼ်းလၢတ်ႈလႄႈဝႃႈ၊ ၵႃႈၼင်ႇဢၼ်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ဢၼ်ၵဝ်ၵူဝ်းၵႂၢႆႇယူႇၼၼ်ႉ ဢသၢၵ်ႈယင်းလိပ်းယူႇၼၼ်ႉ၊ ၵဝ်တၵ်းၼႄပျႃးတူဝ်ၵဝ်တီႈမၼ်းဝၼ်းမိူဝ်ႈၼႆႉဢမၢၼ်ႇၶၼ်ပဵၼ်ဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

16ဢေႃးပတီႉ ၼၼ်ႉၵႂႃႇႁႂ်ႈလႆႈႁူပ်ႉထူပ်း ဢႃႇႁပ်ႉ လႄႈ လဝ်ႊလၢတ်ႈသေယဝ်ႉ၊ ဢႃႇႁပ်ႉ ၵႂႃႇႁႂ်ႈလႆႈႁူပ်ႉထူပ်း ဢေးလီႉယႃႉ ဢေႃႈ။

17မိူဝ်ႈဢၼ် ဢႃႇႁပ်ႉ ထူပ်းႁၼ် ဢေးလီႉယႃႉ ၼၼ်ႉၸိုင်၊ ဢႃႇႁပ်ႉ ထၢမ်လႄႈဝႃႈ၊ ပဵၼ်မႂ်းၼႆႉႁိုဝ်ၵေႃႉဢၼ်ယႃႉယူၵ်ႉမဵဝ်း ဢီႉသရေႇလႃႉ ၼၼ်ႉ၊ ဝႃႈၼင်ႇၼႆသေယဝ်ႉ၊-

18မၼ်းၶိုၼ်းလၢတ်ႈလႄႈဝႃႈ၊ ၶႃႈၸဝ်ႈဢမ်ႇယႃႉယူၵ်ႉမဵဝ်း ဢီႉသရေႇလႃႉ တီႈၶႃႈ။ ၸဝ်ႈႁဝ်းတင်းမဵဝ်းၸိူဝ်ႉၶိူဝ်းၸဝ်ႈႁဝ်းၸုၼ်ႉပႅတ်ႈ ပိင်းၺၢပ်ႈထႃႇဝရႃႉၽြႃးသေလႄႈ ၸွမ်းလင်ၽြႃး ပႃႇလႃႉ လႄႈ ယႃႉယူၵ်ႉမဵဝ်း ဢီႉသရေႇလႃႉ တီႈၶႃႈယဝ်ႉ။-

19ပိူဝ်ႈၼႆလႄႈ မိူဝ်ႈလဵဝ်ၼႆႉ ပွႆႇၸႂ်ႉလႄႈႁႂ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢိၵ်ႇတင်းပရေႃးၽႅတ်ႈ ပႃႇလႃႉ သီႇပၢၵ်ႇပၢႆႁႃႈသိပ်း တင်းပရေႃးၽႅတ်ႈ ဢႃႇသရႃႉ သီႇပၢၵ်ႇဢၼ်ၵိၼ်ၵႃႈတီႈၶူင်ႇတီႈၵိၼ် ယေႇၸပေႇလႃႉ ၼၼ်ႉၸိူဝ်းၼၼ်ႉ မႃးၸူႉၵၼ်တုမ်ၵၼ် ၵႃႈတီႈၶႃႈၸဝ်ႈ ၵႃႈၼိူဝ်လွႆ ၵရမေႇလႃႉ ၼၼ်ႉ သေၵမ်းတီႈၶႃႈ၊ ဝႃႈၼင်ႇၼႆလႄႈ၊-

20ဢႃႇႁပ်ႉ ပွႆႇၸႂ်ႉတီႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်လႄႈ ႁႂ်ႈပရေႃးၽႅတ်ႈၸိူဝ်းၼၼ်ႉၸူႉၵၼ်တုမ်ၵၼ် ၵႃႈၼိူဝ်လွႆ ၵရမေႇလႃႉ ဢေႃႈ။

21ဢေးလီႉယႃႉ ၼၼ်ႉမႃးၸူးတီႈဢၼ်ၵူၼ်းတင်းသဵင်ႈတင်းလူင်မီးၼၼ်ႉသေလႄႈလၢတ်ႈလႄႈဝႃႈ၊ သူတၵ်းမီးတၢင်းၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈလႄႈ ယူႇၵႃႈၼႂ်းၵႄႈဝူင်ႈၵၢင်ၽႃႇသႃႇသွင်ပႃးၼႆႉယူႇၶိင်ႇၵႃႇလႃႉႁိုင်ၵႃႈႁိုဝ်။ ပေႃးထႃႇဝရႃႉၽြႃးၸႂ်ႈၽြႃးပဵၼ်ၸဝ်ႈၸိုင်၊ ဢွၼ်ၵၼ်ပိုင်ႈဢိင်ၵူဝ်းၵႂၢႆႇမၼ်းၸဝ်ႈတႃႉ။ ပေႃးၽြႃး ပႃႇလႃႉ ၸႂ်ႈၽြႃးပဵၼ်ၸဝ်ႈၸိုင်၊ ဢွၼ်ၵၼ်ဢိင်ပိုင်ႈၵူဝ်းၵႂၢႆႇၽြႃးၼၼ်ႉတႃႉ၊ ဝႃႈၼင်ႇၼႆသေယဝ်ႉ၊ ၵူၼ်းၸိူဝ်းၼၼ်ႉ ယင်းဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်းလႄႈယူႇဢေႃႈ။-

22မိူဝ်ႈၼၼ်ႉ ဢေးလီႉယႃႉ လၢတ်ႈတီႈၵူၼ်းၸိူဝ်းၼၼ်ႉထႅင်ႈလႄႈဝႃႈ၊ ပရေႃးၽႅတ်ႈထႃႇဝရႃႉၽြႃးၸမ်ႉ၊ ၵိုတ်းၵျၢၼ်ႇဝႆႉၵဝ်ၵေႃႉလဵဝ်ၵူၺ်းဢေႃႈ။ ပရေႃးၽႅတ်ႈ ပႃႇလႃႉ ၸမ်ႉ၊ မီးသီႇပၢၵ်ႇပၢႆႁႃႈသိပ်းဢေႃႈ။-

23ဢွၼ်ၵၼ်ပၼ်ဝူဝ်းသွင်တူဝ်တီႈႁဝ်းတႃႉ။ ႁႂ်ႈၶဝ်လိူၵ်ႈၵဵပ်းဢဝ်ဝူဝ်းတူဝ်ၼိုင်ႈပုၼ်ႈၶဝ်လႄႈ တႅပ်းႁဵတ်းပွတ်းႁဵတ်းတွၼ်ႈသေယဝ်ႉ၊ ဢဝ်တၢင်ႇသႂ်ႇၵႃႈၼိူဝ်ၽိုၼ်းတႃႉ။ ယႃႇပေဢဝ်ၽႆးသႂ်ႇၽႆးၸပ်း။ ၵဝ်ၵေႃႈတၵ်းမႄးႁဵတ်းဝူဝ်းတူဝ်ၼိုင်ႈလႄႈ ဢဝ်တၢင်ႇၵႃႈၼိူဝ်ၽိုၼ်းဢေႃႈ။ ဢမ်ႇဢဝ်ၽႆးသႂ်ႇၽႆးၸပ်း။-

24သူဢွၼ်ၵၼ်သႅၼ်ႇႁွင်ႉႁႃၼႃႇမႃႉၸိုဝ်ႈသဵင်ၽြႃးသူၸိူဝ်းၼၼ်ႉတႃႉ။ ၵဝ်ၵေႃႈတၵ်းသႅၼ်ႇႁွင်ႉႁႃၼႃႇမႃႉၸိုဝ်ႈသဵင်ထႃႇဝရႃႉၽြႃးဢေႃႈ။ ႁႂ်ႈၽြႃးဢၼ်ဢဝ်ၽႆးဢိူဝ်ၼၼ်ႉၸႂ်ႈၽြႃးပဵၼ်ၸဝ်ႈသေၵမ်းလူၺ်ႈ။ မိူဝ်ႈဢၼ်ဝႃႈၼင်ႇၼႆၸိုင်၊ ၵူၼ်းတင်းသဵင်ႈတင်းလူင်ၼၼ်ႉဢွၼ်ၵၼ်လၢတ်ႈလႄႈဝႃႈ၊ ၵႂၢမ်းၼႆႉသေႇၶျႃႇလီငၢမ်းဢေႃႈ၊ ဝႃႈၼင်ႇၼႆဢေႃႈ။-

25လႆႈသမ်ႉ ဢေးလီႉယႃႉ လၢတ်ႈတီႈပရေႃးၽႅတ်ႈ ပႃႇလႃႉ ၸိူဝ်းၼၼ်ႉလႄႈဝႃႈ၊ ၵွပ်ႈပိူဝ်ႈဢၼ်သူၼမ်လႄႈလိူၵ်ႈၵဵပ်းဢဝ်ဝူဝ်းတူဝ်ၼိုင်ႈပုၼ်ႈသူလႄႈ မႄးႁႅၼ်းဢွၼ်တၢင်းတႃႉ။ ယင်းဢမ်ႇဢဝ်ၽႆးသႂ်ႇၽႆးၸပ်းလႄႈ သႅၼ်ႇႁွင်ႉႁႃၽြႃးသူၸိူဝ်းၼၼ်ႉတႃႉ၊ ဝႃႈၼင်ႇၼႆလႄႈ၊-

26ၶဝ်ၼၼ်ႉဢွၼ်ၵၼ်ဢဝ်ဝူဝ်းဢၼ်ပိူၼ်ႈပၼ်ၼၼ်ႉလႄႈ မႄးႁႅၼ်းသေယဝ်ႉ၊ သႅၼ်ႇႁွင်ႉႁႃၼႃႇမႃႉၸိုဝ်ႈသဵင်ၽြႃး ပႃႇလႃႉ ၸႃႉၸဵမ်ၶိင်ႇၵၢင်ၼႂ်တေႃႇထိုင်ႁွတ်ႈၶိင်ႇၵၢင်ဝၼ်းတဵင်ႈလႄႈဝႃႈ၊ ၽြႃးပႃႇလႃႉ တီႈၶႃႈဢိူၺ်း၊ ဢိူဝ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ၊ ဝႃႈၼင်ႇၼႆယူႇဢေႃႈ။ ၵူၺ်းၵႃႈဢမ်ႇမီးသဵင်ပျႃႇတိၵ်ႈ၊ ဢမ်ႇမီးၵေႃႉဢၼ်ဢိူဝ်။ ၶဝ်ၼၼ်ႉဢွၼ်ၵၼ်ၵႃႈဝႅၼ်ၵႃႈတီႈႁိမ်းယိတ်ႈပလၢင်ႇဢၼ်ၶဝ်တႄႇႁဵတ်းၼၼ်ႉဢေႃႈ။-

27ၶိင်ႇၵၢင်ဝၼ်းတဵင်ႈၼၼ်ႉ၊ ဢေးလီႉယႃႉ ႁဵတ်းပျၢၵ်ႈၶူဝ်ၶဝ်ၼၼ်ႉလႄႈဝႃႈ၊ ဢွၼ်ၵၼ်ႁဵတ်းသဵင်ႁႅင်းႁႅင်းသေလႄႈသႅၼ်ႇႁွင်ႉတႃႉ။ မၼ်းၸဝ်ႈပဵၼ်ၽြႃးဢေႃႈ။ မၼ်းၸဝ်ႈၶႆႈၸႂ်ဝူၼ်ႉၸႂ်ယူႇ။ ဢမ်ႇၼၼ်ၵေႃႈ မၼ်းၸဝ်ႈၸွမ်းႁႃသေၸိူဝ်ႉသေပိူင်ယူႇ။ ဢမ်ႇၼၼ်ၵေႃႈမၼ်းၸဝ်ႈၵႂႃႇတၢင်းပႆတၢင်းယူႇ။ ဢမ်ႇၼၼ်ၵေႃႈၵွပ်ႈပိူဝ်ႈဢၼ်မၼ်းၸဝ်ႈၵိင်းၼွၼ်းယူႇလႄႈ သေၵေႃႉသေၵူၼ်းတၵ်းလႆႈပူၵ်းဢဝ်ဢေႃႈ၊ ဝႃႈၼင်ႇၼႆဢေႃႈ။-

28ၶဝ်ၵေႃႈဢွၼ်ၵၼ်ႁဵတ်းသဵင်ဢၼ်ႁႅင်းၼႃႇသႅၼ်ႇႁွင်ႉလႄႈဢဝ်မိတ်ႈလႂ်၊ လဵၵ်းလႅမ်လႂ် တိူဝ်ႉမၢတ်ႇသႂ်ႇတူဝ်ၶဝ်ၸွမ်းၵႃႈၼင်ႇဢၼ်ထုင်းၸၢမ်ႇၶဝ်မီးၼၼ်ႉ ထၼ်ႈပေႃးႁႂ်ႈလိူတ်ႈၶဝ်ယွႆႉယွတ်ႇသႂ်ႇၵႃႈၼိူဝ်တူဝ်ၶဝ်ဢေႃႈ။-

29ၵၢင်ဝၼ်းတဵင်ႈသေယဝ်ႉ၊ ၶဝ်သမ်ႉဢွၼ်ၵၼ်ႁဵတ်းပရေႃးၽႅတ်ႈ တေႃႇထိုင်ႁွတ်ႈၶိင်ႇဢၼ်ပုၵ်ႈၸေႃႇယိတ်ႈမိူဝ်ႈႁူဝ်ၶမ်ႈသေၵေႃႈ၊ ဢမ်ႇမီးသဵင်ပျႃႇတိၵ်ႈ၊ ဢမ်ႇမီးၵေႃႉဢၼ်ဢိူဝ်၊ ဢမ်ႇမီးၵေႃႉဢၼ်ဝႆႉဢမူႉတီႈၶဝ်၊-

30မိူဝ်ႈၼၼ်ႉ ဢေးလီႉယႃႉ လၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊ ဢွၼ်ၵၼ်မႃးၵႃႈတီႈႁိမ်းၵဝ်ၼႆႉၸမ်ၸမ်တႃႉ၊ ဝႃႈၼင်ႇၼႆလႄႈ ၵူၼ်းတင်းသဵင်ႈတင်းလူင်မႃးၸူးၵႃႈတီႈႁိမ်းမၼ်းၸမ်ၸမ်ဢေႃႈ။ မိူဝ်ႈၼၼ်ႉမၼ်းမႄးၵုမ်းမႄးႁဵတ်းယိတ်ႈပလၢင်ႇထႃႇဝရႃႉၽြႃးဢၼ်ၵိူၼ်ႇလူႉၼၼ်ႉလႄႈ၊-

31ဢေးလီႉယႃႉ ဢဝ်မၢၵ်ႇႁိၼ်သိပ်းသွင်လုၵ်ႈ ၸွမ်းၵႃႈၼင်ႇဢၼ်ၼပ်ႉဢၼ်ဢၢၼ်ႇမဵဝ်းၸိူဝ်ႉၶိူဝ်း ယႃႇၵုပ်ႈ ဢၼ်လႆႈၶၢမ်ႇဢဝ်ပျႃႇတိၵ်ႈၸဝ်ႈလႄႈဝႃႈ၊ ၸိုဝ်ႈသဵင်မႂ်းၸမ်ႉ၊ တၵ်းလႆႈပဵၼ် ဢီႉသရေႇလႃႉ ဢေႃႈ၊ ဝႃႈၼင်ႇၼႆၼၼ်ႉလႄႈ၊-

32ဢဝ်မၢၵ်ႇႁိၼ်ၸိူဝ်းၼၼ်ႉတႄႇႁဵတ်းယိတ်ႈပလၢင်ႇပုၼ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃးသေယဝ်ႉ၊ ၶုတ်းၶူးဢၼ်ၸိူဝ်ႉၽၼ်းၶဝ်ႈလႆႈသေသွင်တၢင်ၼိုင်ႈၼၼ်ႉ လဵပ်ႈႁွပ်ႈယိတ်ႈပလၢင်ႇၼၼ်ႉဢေႃႈ။-

33မၼ်းဢဝ်ၽိုၼ်းၶပ်ႉလႄႈ ဢဝ်ဝူဝ်းတႅပ်းႁဵတ်းပွတ်းႁဵတ်းတွၼ်ႈသေယဝ်ႉ တၢင်ႇသႂ်ႇၵႃႈၼိူဝ်ၽိုၼ်းၼၼ်ႉလႄႈလၢတ်ႈလႄႈဝႃႈ၊ ဢွၼ်ၵၼ်ဢဝ်မေႃႈသီႇလုၵ်ႈသႂ်ႇၼမ်ႉ ႁႂ်ႈတဵမ်သေလႄႈ ဢဝ်ထွၵ်ႈသႂ်ႇၵႃႈၼိူဝ်ယိတ်ႈဢၼ်တုတ်ႇၽႆးဢိၵ်ႇတင်းၽိုၼ်းၼၼ်ႉတႃႉ၊ ဝႃႈၼင်ႇၼႆလႄႈ၊-

34သမ်ႉလၢတ်ႈထႅင်ႈလႄႈဝႃႈ၊ ဢွၼ်ၵၼ်ဢဝ်ထွၵ်ႇသႂ်ႇထႅင်ႈပွၵ်ႈတူႉတီႉယႃႉလူးၵွၼ်ႇတႃႉ၊ ဝႃႈၼင်ႇၼႆလႄႈ၊ ၶဝ်ဢွၼ်ၵၼ်ဢဝ်ထွၵ်ႇသႂ်ႇပွၵ်ႈတူႉတီႉယႃႉသေယဝ်ႉ၊ မၼ်းသမ်ႉလၢတ်ႈထႅင်ႈလႄႈဝႃႈ၊ ဢွၼ်ၵၼ်ဢဝ်ထွၵ်ႇသႂ်ႇပွၵ်ႈတႃႉတီႉယႃႉထႅင်ႈလူးၵွၼ်ႇတႃႉ၊ ဝႃႈၼင်ႇၼႆလႄႈ ၶဝ်ဢွၼ်ၵၼ်ဢဝ်ထွၵ်ႇသႂ်ႇထႅင်ႈပွၵ်ႈတႃႉတီႉယႃႉဢေႃႈ။-

35ၼမ်ႉလႆယူႇၵႃႈတီႈလဵပ်ႈႁွပ်ႈယိတ်ႈပလၢင်ႇလႄႈ မၼ်းႁႂ်ႈၶူးၼၼ်ႉတဵမ်ဝႆႉတင်းၼမ်ႉဢေႃႈ။-

36မိူဝ်ႈဢၼ်ႁွတ်ႈထိုင်ၶိင်ႇဢၼ်ပုၵ်ႈၸေႃႇယိတ်ႈမိူဝ်ႈႁူဝ်ၶမ်ႈၼၼ်ႉၸိုင်၊ ပရေႃးၽႅတ်ႈ ဢေးလီႉယႃႉ သုတ်ႉၸပ်းသုတ်ႉၸူးလႄႈ သူးတွင်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈ ဢႃႇပြႃႇႁၢမ်ႇ၊ ဢီႉၸၢၵ်ႈ၊ ဢီႉသရေႇလႃႉ တီႈၶႃႈ၊ ႁႂ်ႈၶဝ်လႆႈႁူႉလွင်ႈဢၼ်ၸဝ်ႈႁဝ်းပဵၼ်ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢိၵ်ႇတင်းလွင်ႈဢၼ်ၶႃႈၸဝ်ႈႁဝ်းၼႆႉပဵၼ်ၶႃႈၸဝ်ႈႁဝ်းလႄႈ ဢဝ်ဢမိင်ႉၸဝ်ႈႁဝ်းႁဵတ်း လွင်ႈတၢင်းၼႆႉၵူႈၸိူဝ်ႉၵူႈပိူင်ၼၼ်ႉဝၼ်းမိူဝ်ႈၼႆႉသေၵမ်းတီႈၶႃႈ၊-

37ထႃႇဝရႃႉၽြႃးတီႈၶႃႈ၊ ၶႅၼ်းတေႃႈထွမ်ႇဢဝ်ၵႂၢမ်းၶႃႈၸဝ်ႈသေၵမ်းတီႈၶႃႈ။ ထွမ်ႇဢဝ်ၵႂၢမ်းၶႃႈၸဝ်ႈႁႂ်ႈၵူၼ်းၸိူဝ်းၼႆႉလႆႈႁူႉလွင်ႈဢၼ်ၸဝ်ႈႁဝ်း ပဵၼ်ၸဝ်ႈထႃႇဝရႃႉၽြႃးပဵၼ်ၸဝ်ႈ ဢိၵ်ႇတင်းလွင်ႈဢၼ်ၸဝ်ႈႁဝ်း ႁႂ်ႈၸႂ်သၽေႃးၶဝ်ၶၢႆႉပုတ်ႈၼၼ်ႉ သေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

38မိူဝ်ႈၼၼ်ႉ ၽႆးထႃႇဝရႃႉၽြႃးတူၵ်းလႄႈမႆႈယိတ်ႈဢၼ်တုတ်ႇၽႆး၊ ၽိုၼ်း၊ မၢၵ်ႇႁိၼ်၊ မုၼ်ႈလိၼ်ၸိူဝ်းၼၼ်ႉလႄႈ ႁုပ်ႇမႆႈၼမ်ႉဢၼ်မီးၵႃႈၼႂ်းၶူးၼၼ်ႉယူတ်းႁႅင်ႈၵႂႃႇဢေႃႈ။-

39ၵူၼ်းတင်းသဵင်ႈတင်းလူင်ႁၼ်သေယဝ်ႉ၊ ဢွၼ်ၵၼ်ၶုပ်ႉမူပ်ႇဝၢင်းႁူဝ်ယူႇသေလႄႈ လၢတ်ႈလႄႈဝႃႈ၊ ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈဢေႃႈ၊ ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။-

40ဢေးလီႉယႃႉ ၵေႃႈလၢတ်ႈတီႈၶဝ်လႄႈဝႃႈ၊ ဢွၼ်ၵၼ်တီႉၵမ်ဢဝ်ပရေႃးၽႅတ်ႈ ပႃႇလႃႉ ၸိူဝ်းၼၼ်ႉတႃႉ။ ယႃႇပေႁႂ်ႈလွတ်ႈသေၵေႃႉသေၵူၼ်း၊ ဝႃႈၼင်ႇၼႆလႄႈ ၶဝ်ဢွၼ်ၵၼ်တီႉၵမ်ဢဝ်ၶဝ်သေလႄႈ ဢေးလီႉယႃႉ ဢဝ်ၶဝ်လူင်းၸူး ၵႃႈတီႈၼမ်ႉႁွင်ႈ ၵီႉသုၼ်ႇ သေယဝ်ႉ၊ ဢဝ်ၶဝ်တၢႆပႅတ်ႈၵႃႈတီႈၼၼ်ႈဢေႃႈ။

41လိုၼ်းၼၼ်ႉ ဢေးလီႉယႃႉ လၢတ်ႈတီႈ ဢႃႇႁပ်ႉ လႄႈဝႃႈ၊ ၶုၼ်လူင်ၶိုၼ်ႈၵႂႃႇႁႂ်ႈလႆႈၵိၼ်လႆႈၶူပ်းတႃႉ။ မီးသဵင်ဢၼ်ၽူၼ်တၵ်းတူၵ်းၼမ်ၼႃႇဢေႃႈ၊ ဝႃႈၼင်ႇၼႆသေယဝ်ႉ၊-

42ဢႃႇႁပ်ႉ ၶိုၼ်ႈၵႂႃႇႁႂ်ႈလႆႈၵိၼ်လႆႈၶူပ်းဢေႃႈ။ ဢေးလီႉယႃႉ ၵေႃႈၶိုၼ်ႈၵႃႈၼိူဝ်လွႆ ၵရမေႇလႃႉ သေလႄႈ ၶုပ်ႉမူပ်ႇဝၢင်းႁူဝ်ၵႃႈၼိူဝ်လိၼ်ယူႇ၊ ဢဝ်ၼႃႈမၼ်းဝႆႉၵႃႈတီႈၵႄႈႁူဝ်ၶဝ်ႇမၼ်းယူႇသေလႄႈ၊-

43လၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊ မႂ်းၶိုၼ်ႈလႄႈလူတူၺ်းၸူးၵႃႈတီႈပၢင်ႇလၢႆႇပုၼ်ႉလူး၊ ဝႃႈၼင်ႇၼႆလႄႈ၊ မၼ်းၼၼ်ႉၶိုၼ်ႈလႄႈ လူတူၺ်းသေယဝ်ႉ၊ လၢတ်ႈလႄႈဝႃႈ၊ ဢမ်ႇမီးၵႃႈသင်သေၸိူဝ်ႉသေပိူင်ၶႃႈ၊ ဝႃႈၼင်ႇၼႆဢေႃႈ၊ မၼ်းသမ်ႉလၢတ်ႈထႅင်ႈလႄႈဝႃႈ၊ ၵႂႃႇတူၺ်းႁႂ်ႈတေႃႇထိုင်ႁွတ်ႈၸဵတ်းပွၵ်ႈလူးၵွၼ်ႇတႃႉ၊ ဝႃႈၼင်ႇၼႆဢေႃႈ။-

44မိူဝ်ႈဢၼ်ထူၼ်ႈထိုင်ၸဵတ်းပွၵ်ႈၼၼ်ႉၸိုင်၊ မၼ်းၼၼ်ႉလၢတ်ႈလႄႈဝႃႈ၊ တူၺ်းၶႃႈလူး၊ ၽႃႈၽူၼ်ဢွၼ်ႇ ဢၼ်လဵၵ်ႉပဵင်းထၼ်ႈၽႃႇမိုဝ်းၵူၼ်းၼၼ်ႉဢၼ်ၼိုင်ႈ ၶိုၼ်ႈသေၵႃႈၼႂ်းပၢင်ႇလၢႆႇမႃးၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းသင်ႇလၢတ်ႈလႄႈဝႃႈ၊ မႂ်းၶိုၼ်ႈၸူးလႄႈလဝ်ႊလၢတ်ႈတီႈ ဢႃႇႁပ်ႉ လႄႈဝႃႈ၊ ၶုၼ်လူင်မႄးႁႅၼ်းလေႃႉရထႃးၸဝ်ႈသေလႄႈလူင်းမိူဝ်းၵႂႃႇႁႂ်ႈၽူၼ်ဢမ်ႇတၼ်းလႆႈတူၵ်းလႄႈ ႁၢမ်ႈတၢပ်ႈႁႄႉၶႅၼ်ၶုၼ်လူင်သေၵမ်းတီႈၶႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

45ၼင်ႇၼၼ်လႄႈၵမ်းဢွၼ်ႇၼိုင်ႈၵူၺ်း၊ ၽႃႉၵၢင်ႁၢဝ်လမ်ဝႆႉတင်းၽႃႈၽူၼ် ဢိၵ်ႇတင်းလူမ်းလူင်လႄႈ ၽူၼ်တူၵ်းႁႅင်းယႂ်ႇၼႃႇလူင်လၢင်ဢေႃႈ။ ဢႃႇႁပ်ႉ ၼၼ်ႉ ၶီႇလေႃႉရထႃးလႄႈ ၵႂႃႇၸူးၵႃႈတီႈဝဵင်း ယေႇၸရေႇလႃႉ ဢေႃႈ။-

46ၶႅၼ်မိုဝ်းထႃႇဝရႃႉၽြႃး မီးၵႃႈၼိူဝ် ဢေးလီႉယႃႉ လႄႈ မၼ်းႁတ်ႉသၢႆဢႅဝ်မၼ်းသေလႄႈ ၶုၼ်ႇလႅၼ်ႈဢွၼ်တၢင်း ဢႃႇႁပ်ႉ ၵႂႃႇၸူးၵႃႈတီႈႁူးၽၵ်းတူဝဵင်း ယေႇၸရေႇလႃႉ ဢေႃႈ။