1 Kings 13 — Shan

1မိူဝ်ႈၼၼ်ႉ ၼႂ်းမိူဝ်ႈဢၼ် ယေႇရူဝ်းပုမ်ႇ ယင်းတိုၵ်ႉၸုၵ်းယူႇၵႃႈတီႈႁိမ်းယိတ်ႈပလၢင်ႇၼၼ်ႉ ႁႂ်ႈလႆႈဢဝ်ၼၢမ်ႇသႃႇတုတ်ႇၽႆးယူႇၼၼ်ႉၸိုင်၊ ၵူၼ်းၽြႃးပဵၼ်ၸဝ်ႈၵေႃႉၼိုင်ႈ ၸွမ်းၵႃႈၼင်ႇဢၼ်ၼုၵ်ႈၵပၢတ်ႈထႃႇဝရႃႉၽြႃးမီးၼၼ်ႉသေလႄႈ လုၵ်ႉသေၵႃႈတီႈမိူင်း ယူႉတႃႉ ႁွတ်ႈမႃးၵႃႈတီႈဝဵင်း ပေႇသလႃႉ လႄႈ၊-

2ႁွင်ႉပၢဝ်ႇႁွင်ႉလၢတ်ႈယူႇၽၢႆႇၼိုင်ႈတင်းယိတ်ႈပလၢင်ႇၼၼ်ႉ ၸွမ်းၵႃႈၼင်ႇဢၼ်ၼုၵ်ႈၵပၢတ်ႈထႃႇဝရႃႉၽြႃးမီးၼၼ်ႉသေလႄႈဝႃႈ၊ ယိတ်ႈပလၢင်ႇဢိူၺ်း၊ ယိတ်ႈပလၢင်ႇဢိူၺ်း၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ တူၺ်းလူး၊ လုၵ်ႈဢွၼ်ႇၵေႃႉၼိုင်ႈတၵ်းၵိူတ်ႇလဵင်ႉမႃးတီႈၸိူဝ်ႉၶိူဝ်း တႃႇဝိတ်ႈ လႄႈ ၵေႃႉၼၼ်ႉတၵ်းလႆႈၸိုဝ်ႈ ယူဝ်းသီႉယႃႉ ဢေႃႈ။ ၵေႃႉၼၼ်ႉတၵ်းဢဝ်ၶဝ်ၸိူဝ်းဢၼ်ႁဵတ်းယိတ်ႈပရေႃးႁဵၵ်ႈ ၵႃႈၼိူဝ်ထႃႇၼႃႉတီႈသုင်တင်းလၢႆလႄႈ ဢဝ်ၼၢမ်ႇသႃႇတုတ်ႇၽႆးၵႃႈၼိူဝ်မႂ်းၸိူဝ်းၼၼ်ႉ ပုၵ်ႈၸေႃႇၵႃႈၼိူဝ်မႂ်းလႄႈ ဢဝ်လုပ်ႇၵူၼ်းတၢႆတင်းလၢႆတုတ်ႇၽႆးဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

3ၼႂ်းဝၼ်းၼၼ်ႉၵမ်းလဵဝ်မၼ်းၼၼ်ႉ ပၼ်ပုၵ်ႉပႃႉၼီႉမိၵ်ႈလႄႈဝႃႈ၊ ပုၵ်ႉပႃႉၼီႉမိၵ်ႈထႃႇဝရႃႉဢၼ်ၽြႃးမီးဢမိင်ႉၸမ်ႉ၊ တူၺ်းလူး၊ ယိတ်ႈပလၢင်ႇၼႆႉတၵ်းတႅၵ်ႇလႄႈ တဝ်ႈဢၼ်မီးၵႃႈၼိူဝ်မၼ်းတၵ်းႁူဝ်ႈတူၵ်းဢေႃႈ၊ ဝႃႈၼင်ႇၼႆဢေႃႈ။-

4ၶုၼ်ႁေႃၶမ်းငိၼ်းၵႂၢမ်းဢၼ်ၵူၼ်းၽြႃးပဵၼ်ၸဝ်ႈ ႁွင်ႉပၢဝ်ႇႁွင်ႉလၢတ်ႈယူႇၽၢႆႇၼိုင်ႈတင်းယိတ်ႈပလၢင်ႇ ၵႃႈတီႈဝဵင်း ပေႇသလႃႉ ၼၼ်ႉ ၸိူဝ်ႉၼင်ႇၼၼ်ၼၼ်ႉသေယဝ်ႉ၊ ယေႇရူဝ်းပုမ်ႇ ယဵတ်ႇမိုဝ်းမၼ်းသေၵႃႈၼိူဝ်ယိတ်ႈပလၢင်ႇၼၼ်ႉလႄႈဝႃႈ၊ ဢွၼ်ၵၼ်တီႉၵမ်ဢဝ်မၼ်းတႃႉ၊ ဝႃႈၼင်ႇၼႆသေလႄႈ မိုဝ်းမၼ်းဢၼ်ယဵတ်ႇယူႇၽၢႆႇၼိုင်ႈတင်းၵေႃႉၼၼ်ႉၼၼ်ႉ ယူတ်းႁႅင်ႈၵႂႃႇထၼ်ႈပေႃးမၼ်းဢမ်ႇယိုတ်ႈဢဝ်ၶိုၼ်းလႆႈလႄႈ၊-

5ယိတ်ႈပလၢင်ႇၵေႃႈတႅၵ်ႇလႄႈ တဝ်ႈႁူဝ်ႈတူၵ်းသေၵႃႈၼိူဝ်ယိတ်ႈပလၢင်ႇၼၼ်ႉ မႅၼ်ႈၸွမ်းၵႃႈၼင်ႇပုၵ်ႉပႃႉၼီႉမိၵ်ႈဢၼ်ၵူၼ်းၽြႃးပဵၼ်ၸဝ်ႈ ၸွမ်းၵႃႈၼင်ႇဢၼ်ၼုၵ်ႈၵပၢတ်ႈထႃႇဝရႃႉၽြႃးမီးၼၼ်ႉသေလႄႈပၼ်ၼၼ်ႉဢေႃႈ။-

6ၶုၼ်ႁေႃၶမ်းၵေႃႈၶိုၼ်းလၢတ်ႈတီႈၵူၼ်းၽြႃးပဵၼ်ၸဝ်ႈလႄႈဝႃႈ၊ တွင်းပၢၼ်ႇၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈမႂ်းလႄႈ ႁဵတ်းပထၼႃႇပုၼ်ႈၵဝ် ႁႂ်ႈမိုဝ်းၵဝ်ၶိုၼ်းလီမႃးသေၵမ်း၊ ဝႃႈၼင်ႇၼႆဢေႃႈ။ ၵူၼ်းၽြႃးပဵၼ်ၸဝ်ႈၼၼ်ႉတွင်းပၢၼ်ႇထႃႇဝရႃႉၽြႃးလႄႈ မိုဝ်းၶုၼ်ႁေႃၶမ်းၼၼ်ႉၶိုၼ်းလီမႃးလႄႈ ပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇဢေႃႈ။-

7ၶုၼ်ႁေႃၶမ်းၵေႃႈလၢတ်ႈတီႈၵူၼ်းၽြႃးပဵၼ်ၸဝ်ႈလႄႈဝႃႈ၊ ၸွမ်းလူၺ်ႈၵၼ်တင်းၵဝ်လႄႈႁွမ်ႁႅင်းထႅင်ႈႁႅင်းတႃႉ။ ၵဝ်တၵ်းပၼ်လၢၵ်ႈသွင်ႇတီႈမႂ်းဢေႃႈ၊ ဝႃႈၼင်ႇၼႆသေယဝ်ႉ၊-

8ၵူၼ်းၽြႃးပဵၼ်ၸဝ်ႈၼၼ်ႉလၢတ်ႈတီႈၶုၼ်ႁေႃၶမ်းလႄႈဝႃႈ၊ ပိၵ်ႉသမ်ႉၸဝ်ႈႁဝ်းပၼ်ႁေႃၸဝ်ႈၶိုင်ႈၼိုင်ႈသေၵေႃႈ ၶႃႈၸဝ်ႈဢမ်ႇၸွမ်းလူၺ်ႈၵၼ်တင်းၸဝ်ႈႁဝ်း။ ၶႃႈၸဝ်ႈတၵ်းဢမ်ႇၵိၼ်ၶဝ်ႈမုၼ်းၵႃႈတီႈၼႆႈ၊ ၼမ်ႉၵေႃႈၶႃႈၸဝ်ႈတၵ်းဢမ်ႇၵိၼ်။-

9ၼုၵ်ႈၵပၢတ်ႈထႃႇဝရႃႉၽြႃးသင်ႇလၢတ်ႈတီႈၶႃႈၸဝ်ႈလႄႈဝႃႈ၊ ယႃႇပေၵိၼ်ၶဝ်ႈမုၼ်း၊ ယႃႇပေၵိၼ်ၼမ်ႉ၊ ယႃႇပေၶိုၼ်းမိူဝ်းၸွမ်းသဵၼ်ႈတၢင်းဢၼ်မႃးၼၼ်ႉ၊ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

10လိုၼ်းၼၼ်ႉ မၼ်းၸွမ်းတၢင်းတၢင်ႇသဵၼ်ႈလႄႈ ယင်းဢမ်ႇၶိုၼ်းၸွမ်းသဵၼ်ႈတၢင်းဢၼ်မၼ်းမႃးၸူးၵႃႈတီႈ ဝဵင်း ပေႇသလႃႉ ၼၼ်ႉ လႄႈမိူဝ်းၵႂႃႇဢေႃႈ။

11မိူဝ်ႈၼၼ်ႉမီးပရေႃးၽႅတ်ႈဢၼ်ဢသၢၵ်ႈယႂ်ႇၵေႃႉၼိုင်ႈ ၵႃႈၼႂ်းဝဵင်း ပေႇသလႃႉ ၼၼ်ႉဢေႃႈ။ လုၵ်ႈၸၢႆးမၼ်းၵေႃႉၼိုင်ႈမႃးလႄႈမွၵ်ႇလၢတ်ႈလွင်ႈတၢင်းၵႃႈဢၼ်ၵူၼ်းၽြႃးပဵၼ်ၸဝ်ႈႁဵတ်း ၵႃႈၼႂ်းဝဵင်း ပေႇသလႃႉ ၼႂ်းဝၼ်းၼၼ်ႉၸိူဝ်းၼၼ်ႉတီႈပေႃႈမၼ်းဢေႃႈ။ ၵႂၢမ်းဢၼ်ၵေႃႉၼၼ်ႉလၢတ်ႈတီႈၶုၼ်ႁေႃၶမ်းၸိူဝ်းၼၼ်ႉၵေႃႈ မၼ်းၼၼ်ႉမွၵ်ႇလၢတ်ႈတီႈပေႃႈမၼ်းဢေႃႈ။-

12ၵွပ်ႈပိူဝ်ႈဢၼ်လုၵ်ႈၸၢႆးမၼ်းၸိူဝ်းၼၼ်ႉ ဢွၼ်ၵၼ်ႁူႉႁၼ်လွင်ႈဢၼ် ၵူၼ်းၽြႃးပဵၼ်ၸဝ်ႈဢၼ်လုၵ်ႉသေၵႃႈတီႈမိူင်း ယူႉတႃႉ မႃးၼၼ်ႉ ၶိုၼ်းမိူဝ်းၵႂႃႇသဵၼ်ႈတၢင်းဢၼ်လႂ်ၼၼ်ႉလႄႈ ပေႃႈၶဝ်ထၢမ်လႄႈဝႃႈ၊ ၵေႃႉၼၼ်ႉၶိုၼ်းမိူဝ်းၵႂႃႇသဵၼ်ႈတၢင်းဢၼ်လႂ်၊ ဝႃႈၼင်ႇၼႆသေယဝ်ႉ၊-

13သမ်ႉလၢတ်ႈတီႈလုၵ်ႈၸၢႆးမၼ်းတင်းလၢႆလႄႈဝႃႈ၊ ႁၢင်ႈၵွပ်းလီႈတႃႉ၊ ဝႃႈၼင်ႇၼႆလႄႈ ၶဝ်ႁၢင်ႈၵွပ်ႈလီႈလႄႈ ပေႃႈၶဝ်ၶီႇၵႂႃႇသေလႄႈ၊-

14လိုပ်ႈလမ်းၸွမ်းၵူၼ်းၽြႃးပဵၼ်ၸဝ်ႈၼၼ်ႉဢေႃႈ။ မၼ်းထူပ်းႁၼ်ၵေႃႉၼၼ်ႉၼင်ႈယူႇၵႃႈတႂ်ႈတူၼ်ႈမႆႉၼိမ်သေယဝ်ႉ၊ ထၢမ်လႄႈဝႃႈ၊ မႂ်းၼႆႉပဵၼ်ၵူၼ်းၽြႃးပဵၼ်ၸဝ်ႈဢၼ်လုၵ်ႉသေၵႃႈတီႈ မိူင်း ယူႉတႃႉ မႃးၼၼ်ႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၵေႃႉၼၼ်ႉၶိုၼ်းလၢတ်ႈလႄႈဝႃႈ၊ ပဵၼ်ၵဝ်ၼႆႉယဝ်ႉ၊ ဝႃႈၼင်ႇၼႆဢေႃႈ။-

15မၼ်းၵေႃႈႁွင်ႉပၢင်းဢဝ်ၵေႃႉၼၼ်ႉလႄႈဝႃႈ၊ ၸွမ်းၵဝ်မိူဝ်းၵႃႈတီႈႁိူၼ်းၵဝ်လႄႈ ၵိၼ်ၶဝ်ႈမုၼ်းလူၺ်ႈၵၼ်တင်းၵဝ်သေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

16ၵေႃႉၼၼ်ႉလၢတ်ႈလႄႈဝႃႈ၊ ၵဝ်ဢမ်ႇလႆႈၸွမ်းလူၺ်ႈၵၼ်တင်းမႂ်း၊ ၵဝ်ဢမ်ႇလႆႈၶဝ်ႈၵႃႈၼႂ်းႁိူၼ်းမႂ်း၊ ၵဝ်ဢမ်ႇလႆႈၵိၼ်ၶဝ်ႈမုၼ်းၵႃႈတီႈၼႆႈ၊ ၼမ်ႉၵေႃႈဢမ်ႇလႆႈၵိၼ်။-

17ထႃႇဝရႃႉၽြႃးမီးဢမိင်ႉဝႆႉတီႈၵဝ်လႄႈဝႃႈ၊ မႂ်းဢမ်ႇလႆႈၵိၼ်ၶဝ်ႈမုၼ်းၵႃႈတီႈၼၼ်ႈ၊ ၼမ်ႉၵေႃႈဢမ်ႇလႆႈၵိၼ်၊ မႂ်းဢမ်ႇလႆႈဝၢႆႇၶိုၼ်းၸွမ်းသဵၼ်ႈတၢင်းဢၼ်မႂ်းမႃးၼၼ်ႉလႄႈမိူဝ်း၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

18မၼ်းၵေႃႈလၢတ်ႈတီႈၵေႃႉၼၼ်ႉလႄႈဝႃႈ၊ ၵဝ်ပဵၼ်ပရေႃးၽႅတ်ႈမိူၼ်ၸိူဝ်ႉၼင်ႇမႂ်းဢေႃႈ။ တမၢၼ်ႇၵၢင်ႁၢဝ်ဢဝ်တင်းၼုၵ်ႈၵပၢတ်ႈထႃႇဝရႃႉၽြႃးသင်ႇလၢတ်ႈဝႆႉတီႈၵဝ်လႄႈဝႃႈ၊ မႂ်းႁွင်ႉဢဝ်မၼ်းမႃးၵႃႈတီႈႁိူၼ်းမႂ်းလႄႈ ႁႂ်ႈမၼ်းၵိၼ်ၶဝ်ႈမုၼ်းလႄႈၵိၼ်ၼမ်ႉတႃႉ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆလႄႈသုင်းမူႉသႃႇဢေႃႈ။-

19ပိူဝ်ႈၼႆလႄႈ ၵေႃႉၼၼ်ႉၶိုၼ်းၸွမ်းလူၺ်ႈၵၼ်တင်းမၼ်းလႄႈ ၵိၼ်ၶဝ်ႈမုၼ်းၵႃႈတီႈႁိူၼ်းမၼ်းဢေႃႈ ၼမ်ႉၵေႃႈၵိၼ်ဢေႃႈ။

20ၼႂ်းမိူဝ်ႈဢၼ်သွင်ၶႃယင်းတိုၵ်ႉၼင်ႈယူႇၵႃႈတီႈၶူင်ႇတီႈၵိၼ်ယူႇၼၼ်ႉၸိုင်၊ ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈ ပရေႃးၽႅတ်ႈၵေႃႉဢၼ်ႁွင်ႉဢဝ်ၶိုၼ်းမႃးၼၼ်ႉလႄႈ၊-

21မၼ်းသႅၼ်ႇႁွင်ႉတီႈၵူၼ်းၽြႃးပဵၼ်ၸဝ်ႈဢၼ်လုၵ်ႉသေၵႃႈတီႈမိူင်း ယူႉတႃႉ မႃးၼၼ်ႉလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵွပ်ႈပိူဝ်ႈဢၼ်မႂ်းယင်းဢမ်ႇထွမ်ႇဢမ်ႇဢဝ်ၼုၵ်ႈၵပၢတ်ႈဢၼ်ဢွၵ်ႇသေၵႃႈတီႈသူပ်းထႃႇဝရႃႉၽြႃးၼၼ်ႉ၊ ယင်းဢမ်ႇပႂ်ႉပိင်းၺၢပ်ႈၸဝ်ႈ ဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်းဝႆႉၼၼ်ႉလႄႈ၊-

22ၶိုၼ်းမႃးလႄႈၵိၼ်ၶဝ်ႈမုၼ်းတင်းၼမ်ႉ ၵႃႈၼႂ်းတီႈဢၼ်မၼ်းၸဝ်ႈပိင်းၺၢပ်ႈဝႆႉလႄႈဝႃႈ၊ ယႃႇပေၵိၼ်ၶဝ်ႈမုၼ်း၊ ယႃႇပေၵိၼ်ၼမ်ႉ၊ ဝႃႈၼင်ႇၼႆၼၼ်ႉလႄႈ တူဝ်တၢႆမႂ်းဢမ်ႇလႆႈႁွတ်ႈထိုင်ၵႃႈတီႈပႃႇႁဵဝ်ႈပူႇမွၼ်ႇမႂ်းၸိူဝ်းၼၼ်ႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

23ၵေႃႉၼၼ်ႉၵိၼ်ၶဝ်ႈမုၼ်းတင်းၼမ်ႉသေယဝ်ႉ၊ မၼ်းႁၢင်ႈၵွပ်းလီႈမၼ်းပၼ်တီႈၵေႃႉၼၼ်ႉ ဢၼ်ဝႃႈပရေႃးၽႅတ်ႈဢၼ်မၼ်းႁွင်ႉဢဝ်ၶိုၼ်းမႃးၼၼ်ႉဢေႃႈ။-

24မိူဝ်ႈဢၼ်ၵေႃႉၼၼ်ႉၵႂႃႇၼၼ်ႉၸိုင်၊ သၢင်ႇသီႈႁူပ်ႉထူပ်းမၼ်းၵႃႈတီႈၵၢင်တၢင်းလႄႈ ဢဝ်မၼ်းတၢႆဢေႃႈ။ တူဝ်တၢႆမၼ်းၼၼ်ႉ လူမ်ႉတူၵ်းယူႇၵႃႈတီႈသဵၼ်ႈတၢင်းလႄႈ လီႈၼၼ်ႉၸုၵ်းယူႇၵႃႈတီႈႁိမ်းမၼ်းယူႇသေလႄႈ သၢင်ႇသီႈၵေႃႈၸုၵ်းယူႇၵႃႈတီႈႁိမ်းတူဝ်တၢႆၼၼ်ႉဢေႃႈ။-

25ၵူၼ်းၵႂႃႇတၢင်းပႆတၢင်းလႄႈ ႁၼ်တူဝ်တၢႆၼၼ်ႉ လူမ်ႉတူၵ်းယူႇၵႃႈတီႈသဵၼ်ႈတၢင်းလႄႈ သၢင်ႇသီႈၸုၵ်းယူႇၵႃႈတီႈႁိမ်းတူဝ်တၢႆၼၼ်ႉသေယဝ်ႉ၊ ဢွၼ်ၵၼ်မႃးလႄႈမွၵ်ႇလၢတ်ႈလွင်ႈမၼ်းၵႃႈၼႂ်းဝဵင်း ဢၼ်ပရေႃးၽႅတ်ႈဢၼ်ဢသၢၵ်ႈယႂ်ႇၼၼ်ႉယူႇၼၼ်ႉဢေႃႈ။

26ပရေႃးၽႅတ်ႈဢၼ်ႁွင်ႉဢဝ်မၼ်းၶိုၼ်းမႃးၼၼ်ႉငိၼ်းလွင်ႈၼၼ်ႉသေယဝ်ႉ၊ လၢတ်ႈလႄႈဝႃႈ၊ တၵ်းပဵၼ်ၵူၼ်းၽြႃးပဵၼ်ၸဝ်ႈ ဢၼ်ဢမ်ႇထွမ်ႇဢမ်ႇဢဝ်ၼုၵ်ႈၵပၢတ်ႈဢၼ်ဢွၵ်ႇသေၵႃႈတီႈသူပ်းထႃႇဝရႃႉၽြႃးၼၼ်ႉဢေႃႈ။ ပိူဝ်ႈၼႆလႄႈ ထႃႇဝရႃႉၽြႃးဢဝ်မၼ်းဢၢပ်ႈပၼ်တီႈသၢင်ႇသီႈဢၼ်ၶူပ်းမၼ်းတၢႆၼၼ်ႉ ၸွမ်းၵႃႈၼင်ႇဢၼ်ၵႂၢမ်းဢၼ်ထႃႇဝရႃႉၽြႃး မီးဢမိင်ႉဝႆႉၼၼ်ႉယဝ်ႉလူင်ပႄႇ၊ ဝႃႈၼင်ႇၼႆသေလႄႈ၊-

27လၢတ်ႈတီႈလုၵ်ႈၸၢႆးမၼ်းတင်းလၢႆလႄႈဝႃႈ၊ ႁၢင်ႈၵွပ်းလီႈတႃႉ၊ ဝႃႈၼင်ႇၼႆလႄႈ၊ ၶဝ်ႁၢင်ႈၵွပ်းလီႈဢေႃႈ။-

28မၼ်းၵႂႃႇလႄႈထူပ်းႁၼ်တူဝ်တၢႆၵေႃႉၼၼ်ႉ လူမ်ႉတူၵ်းၵႃႈတီႈသဵၼ်ႈတၢင်းယူႇ၊ လီႈတင်းသၢင်ႇသီႈၼၼ်ႉၸုၵ်းၵႃႈတီႈႁိမ်းတူဝ်တၢႆၼၼ်ႉယူႇၼၼ်ႉဢေႃႈ။ သၢင်ႇသီႈၼၼ်ႉဢမ်ႇၵိၼ်တူဝ်တၢႆ၊ လီႈၵေႃႈမၼ်းဢမ်ႇၶူပ်း။-

29ပရေႃးၽႅတ်ႈၼၼ်ႉဢုမ်ႈဢဝ်တူဝ်တၢႆၵူၼ်းၽြႃးပဵၼ်ၸဝ်ႈၼၼ်ႉလႄႈ တၢင်ႇၵႃႈၼိူဝ်လီႈသေယဝ်ႉ၊ လွင်ႈၼင်ႇႁိုဝ်တၵ်းလႆႈႁႆႈႁွင်ႉပွင်ႉၶၢင်းပုၼ်ႈမၼ်းလႄႈ ဢဝ်မၼ်းသၢင်းၵျူဝ်ႇၸိုင်၊ ဢဝ်မၼ်းၶိုၼ်းမိူဝ်းလႄႈ ႁွတ်ႈထိုင်ၵႃႈတီႈဝဵင်းပရေႃးၽႅတ်ႈ ဢၼ်ဢသၢၵ်ႈယႂ်ႇၼၼ်ႉဢေႃႈ၊-

30မၼ်းဢဝ်တူဝ်တၢႆၵေႃႉၼၼ်ႉဝႆႉၵႃႈၼႂ်းၶုမ်သၢင်းၶႅင်းမၼ်းသေလႄႈ ႁႆႈႁွင်ႉပွင်ႉၶၢင်းလႄႈဝႃႈ၊ ဢလူဝ်းၼွင်ႉၸၢႆးၵဝ်ဢိူၺ်း၊ ဝႃႈၼင်ႇၼႆဢေႃႈ။-

31မၼ်းသၢင်းၵျူဝ်ႇၵေႃႉၼၼ်ႉသေယဝ်ႉ၊ သင်ႇလၢတ်ႈဝႆႉတီႈလုၵ်ႈၸၢႆးမၼ်းတင်းလၢႆလႄႈဝႃႈ၊ မိူဝ်ႈဢၼ်ၵဝ်တၢႆၼၼ်ႉၸိုင်၊ သူဢွၼ်ၵၼ်ဢဝ်ၵဝ်သၢင်းၵျူဝ်ႇၵႃႈၼႂ်းၶုမ်သၢင်းၶႅင်းတီႈဢၼ်ၵူၼ်းၽြႃးပဵၼ်ၸဝ်ႈ လႆႈၶၢမ်ႇတၢင်းဢၼ်သၢင်းၵျူဝ်ႇၼၼ်ႉတႃႉ။ ဢဝ်လုပ်ႇၵဝ်ဝႆႉၵႃႈတီႈႁိမ်းလုပ်ႇမၼ်းတႃႉ။-

32ၵႂၢမ်းဢၼ်ၵေႃႉၼၼ်ႉၸွမ်းၵႃႈၼင်ႇဢၼ် ၼုၵ်ႈၵပၢတ်ႈထႃႇဝရႃႉၽြႃးမီးၼၼ်ႉသေလႄႈ ႁွင်ႉပၢဝ်ႇႁွင်ႉလၢတ်ႈယူႇၽၢႆႇၼိုင်ႈ တင်းယိတ်ႈပလၢင်ႇ ဝဵင်း ပေႇသလႃႉ ဢိၵ်ႇတင်းၽၢႆႇၼိုင်ႈတၢင်းႁိူၼ်းၸဝ်ႈၵႃႈဢၼ်ႁဵတ်းၵႃႈၼိူဝ် ထႃႇၼႃႉတီႈသုင်တင်းလၢႆၵႃႈၼႂ်းဝၢၼ်ႈၼႂ်းဝဵင်း သမႃႇရီႉ ၸိူဝ်းၼၼ်ႉၼၼ်ႉ တၵ်းပျေႉၸုမ်ႇဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။

33လိုၼ်းၼၼ်ႉ ယေႇရူဝ်းပုမ်ႇ ၼၼ်ႉ ယင်းဢမ်ႇဝႄႈသဵၼ်ႈတၢင်းဢႃႉထမ်ႇမႃႉမၼ်းၼၼ်ႉလႄႈ ဢဝ်ၵူၼ်းၵႃႈၼႂ်းၵူၼ်းတင်းလၢႆထၢပ်ႈၶၢၼ်းဝႆႉၵႃႈၼႂ်းဢရႃႇယိတ်ႈပရေႃးႁဵၵ်ႈထႅင်ႈဢေႃႈ။ ၶဝ်ၸိူဝ်းဢၼ်မီးဢလူဝ်ႇၵႃႈမီးၼၼ်ႉၸိုင် မၼ်းယုၵ်ႉယွင်ႈႁႂ်ႈပဵၼ်ယိတ်ႈပရေႃးႁဵၵ်ႈ ၵႃႈတီႈထႃႇၼႃႉတီႈသုင်တင်းလၢႆဢေႃႈ။-

34ၵွပ်ႈပိူဝ်ႈလွင်ႈတၢင်းၼၼ်ႉလႄႈ ဢပႅတ်ႈႁွတ်ႈထိုင်ၵႃႈတီႈၸိူဝ်ႉၶိူဝ်း ယေႇရူဝ်းပုမ်ႇ ႁႂ်ႈလႆႈပႄႇတႅပ်းပႅတ်ႈလႄႈ ၽဵဝ်ႈပႅတ်ႈသေၵႃႈၼိူဝ်ၼႃႈလိၼ်မိူင်းဢေႃႈ။