1 Kings 15

Shan

← Chapter 14 Jump to: Chapter 16 →

1ၼႂ်းပီႊဢၼ် ၶုၼ်လူင် ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ၼင်ႈႁၢင်ႈၼင်ႈႁေႃသိပ်းပၢႆပႅတ်ႇပီႊၼၼ်ႉ ဢၽီႉယႃႉ ၸႃႉဢုပ်ႉပိူင်ႇၸၢမ်ႇၸႃး မိူင်း ယူႉတႃႉ လႄႈ

2ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရူႉသလႅမ်ႇ သၢမ်ပီႊဢေႃႈ။ ၸိုဝ်ႈသဵင်မႄႈမၼ်းၸမ်ႉ၊ ပဵၼ် မႃႇၶႃႇ လုၵ်ႈယိင်း ဢပႃႉသလုမ်ႇ ဢေႃႈ။-

3မၼ်းၼၼ်ႉႁဵတ်းတူႉၸရိူၵ်ႈၵႃႈဢၼ်ၸဝ်ႈပေႃႈမၼ်းႁဵတ်းၵႂႃႇယဝ်ႉၼၼ်ႉလႄႈ ႁူဝ်ၸႂ်မၼ်းဢမ်ႇၸေးၸုမ်ႇၵႃႈတီႈၽၢႆႇၼႃႈ ထႃႇဝရႃႉၽြႃး ၽြႃးပဵၼ်ၸဝ်ႈမၼ်း မိူၼ်ၸိူဝ်ႉၼင်ႇႁူဝ်ၸႂ်မွၼ်ႇမၼ်း တႃႇဝိတ်ႈ ၼၼ်ႉ။-

4ၼႂ်းဝႃႈၼၼ်သေၵေႃႈ ထႃႇဝရႃႉၽြႃးၽြႃးပဵၼ်ၸဝ်ႈမၼ်း ထွၵ်ႈလူၺ်ႈၼႃႈ တႃႇဝိတ်ႈ လႄႈ ယုၵ်ႉယွင်ႈလုၵ်ႈလၢင်းမၼ်းဝၢႆးလိုၼ်းမၼ်းလႄႈ ႁႂ်ႈဝဵင်း ယေႇရူႉသလႅမ်ႇ တႄႇယူႇသေယဝ်ႉ၊ ႁႂ်ႈဝၢၼ်ႇၽႆးတဵၼ်းမၼ်းလႆႈႁိူဝ်ႈလႅင်းယူႇ ၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉဢေႃႈ။-

5လွင်ႈမၼ်းၸမ်ႉ ၼွၵ်ႈသေဢမူႉ ဢူႉရီႉယႃႉ ၵူၼ်းမဵဝ်း ႁိတ်ႉတီႉ ၼၼ်ႉ တႃႇဝိတ်ႈ ၼၼ်ႉႁဵတ်းဢၼ်လီဢၼ်ငၢမ်း သိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ဢမ်ႇဝႄႈပိူင်ႈသေလွင်ႈတၢင်းဢၼ်မၼ်းၸဝ်ႈသင်ႇလၢတ်ႈဝႆႉတီႈမၼ်းၼၼ်ႉသေၸိူဝ်ႉသေပိူင်လႄႈယူႇဢေႃႈ။

6ဢၽီႉယႃႉ လုၵ်ႈၸၢႆး ရူဝ်းပုမ်ႇ ၼၼ်ႉ ပဵၼ်သိုၵ်းပဵၼ်သိူဝ်ၵၼ်တင်း ယေႇရူဝ်းပုမ်ႇ ယူႇၼႂ်းၸူဝ်ႈပၢၼ်မၼ်းၼၼ်ႉဢေႃႈ။-

7လွင်ႈတၢင်း ဢၽီႉယႃႉ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉ ဢိၵ်ႇတင်းၵႃႈဢၼ်မၼ်းႁဵတ်းၼၼ်ႉ တႅမ်ႈဝႆႉမီးယူႇၵႃႈတီႈရႃႇၸဝၢင်ႇ ယူႉတႃႉ ဢေႃႈ။ ဢၽီႉယႃႉ တင်း ယေႇရူဝ်းပုမ်ႇ ၼၼ်ႉ ပဵၼ်သိုၵ်းပဵၼ်သိူဝ်ၵၼ်ယူႇဢေႃႈ။-

8ဢၽီႉယႃႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉလႄႈ ၶဝ်ဢွၼ်ၵၼ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်း တႃႇဝိတ်ႈ ဢေႃႈ။ ဢႃႇသႃႉ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

9ၼႂ်းပီႊဢၼ် ယေႇရူဝ်းပုမ်ႇ ၶုၼ်ႁေႃၶမ်း ဢီႉသရေႇလႃႉ ၼင်ႈႁၢင်ႈၼင်ႈႁေႃသၢဝ်းပီႊၼၼ်ႉ၊ ဢႃႇသႃႉ ၸႃႉဢုပ်ႉပိူင်ႇၸၢမ်ႇၸႃး မိူင်း ယူႉတႃႉ လႄႈ၊-

10ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရူႉသလႅမ်ႇ သီႇသိပ်းပၢႆဢဵတ်းပီႊဢေႃႈ။ ၸိုဝ်ႈသဵင်ၼၢႆးၸဝ်ႈၸမ်ႉ၊ ပဵၼ် မႃႇၶႃႇ ဢၼ်ပဵၼ် လုၵ်ႈယိင်း ဢပႃႉသလုမ်ႇ ၼၼ်ႉဢေႃႈ။-

11ဢႃႇသႃႉ ၼၼ်ႉ ႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃး မိူၼ်ၸိူဝ်ႉၼင်ႇမွၼ်ႇၸဝ်ႈ တႃႇဝိတ်ႈ ၼၼ်ႉဢေႃႈ။-

12မၼ်းပႄႇၽဵဝ်ႈၵူၼ်းဢၼ်ၸၢင်ႈၸွမ်းဢလူဝ်ႇၵူၼ်းၸၢႆးၼင်ႇၵၼ်ၼၼ်ႉပႅတ်ႈသေၵႃႈၼႂ်းမိူင်းၸဝ်ႈလႄႈ ယႃႉရုၵ်ႈထူႉဢၼ်ပူႇၸဝ်ႈမွၼ်ႇၸဝ်ႈႁဵတ်းၵႃႈမီးၼၼ်ႉပႅတ်ႈဢေႃႈ။-

13မၼ်းၼုၵ်ႈဢဝ် မႃႇၶႃႇ ဢၼ်ပဵၼ်ၼၢႆးၸဝ်ႈၼၼ်ႉ ဢွၵ်ႇပႅတ်ႈသေၵႃႈၼႂ်းဢရႃႇၼၢင်းႁေႃၶမ်း ၵွပ်ႈပိူဝ်ႈဢၼ်မၼ်းၼၼ်ႉႁဵတ်းရုၵ်ႈထူႉဢၼ်လီႁင်ႈဢဵတ်ႇသဵတ်ႇ ပုၼ်ႈတူၼ်ႈ ဢႃႇသရႃႉ ၼၼ်ႉလႄႈ ဢႃႇသႃႉ ပမ်ႈရုၵ်ႈထူႉမၼ်းလူမ်ႉလႄႈ ဢဝ်တုတ်ႇၽႆးပႅတ်ႈၵႃႈတီႈႁိမ်းၼမ်ႉႁွင်ႈ ၵီႉတြုၼ်ႇ ဢေႃႈ။-

14ပိၵ်ႉသမ်ႉမၼ်းဢမ်ႇပႄႇပႅတ်ႈထႃႇၼႃႉတီႈသုင်တင်းလၢႆသေၵေႃႈ၊ ႁူဝ်ၸႂ် ဢႃႇသႃႉ ၼၼ်ႉ မီးတၢင်းဢၼ်ၸေးၸုမ်ႇယူႇ ၵႃႈတီႈၽၢႆႇၼႃႈထႃႇဝရႃႉၽြႃးယူႇၼႂ်းၸူဝ်ႈၼႂ်းပၢၼ်မၼ်းၼၼ်ႉတဵမ်တဵမ်ဢေႃႈ။-

15မၼ်းဢဝ်ဢုၵ်ႉၸႃႇဢၼ်ၸဝ်ႈပေႃႈမၼ်းလူႇတၢၼ်း၊ ဢုၵ်ႉၸႃႇဢၼ်လူႇတၢၼ်း၊ ငိုၼ်း၊ ၶမ်း၊ ၶိူင်ႈပိူင်ၸိူဝ်းၼၼ်ႉသႂၢင်းသႂ်ႇဝႆႉၵႃႈၼႂ်းႁိူၼ်းထႃႇဝရႃႉၽြႃးဢေႃႈ။

16ဢႃႇသႃႉ တင်း ပႃႇသႃႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉ ပဵၼ်သိုၵ်းပဵၼ်သိူဝ်ၵၼ်ယူႇ ၼႂ်းၸူဝ်ႈပၢၼ်ၶဝ်ၼၼ်ႉတဵမ်တဵမ်ဢေႃႈ။-

17ၽဝ်ႇၼိုင်ႈ ပႃႇသႃႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉ ၶီႇသိုၵ်းၸူးၵႃႈတီႈမိူင်း ယူႉတႃႉ လႄႈ တႄႇႁဵတ်းဝဵင်း ရႃႇမႃႉ ႁႂ်ႈၽူႈလႂ်သေၵေႃႉသေၵူၼ်းဢမ်ႇဢွၵ်ႇဢမ်ႇၶဝ်ႈတီႈ ဢႃႇသႃႉ ၶုၼ်ႁေႃၶမ်း ယူႉတႃႉ လႆႈဢေႃႈ။-

18မိူဝ်ႈၼၼ်ႉ ဢႃႇသႃႉ ဢဝ်ငိုၼ်းၶမ်းၵႃႈဢၼ်ယင်းၵိုတ်းယင်းၵျၢၼ်ႇဝႆႉၵႃႈၼႂ်းၽၼ်ႇတႃႇႁိူၼ်းထႃႇဝရႃႉၽြႃး ဢိၵ်ႇတင်းၽၼ်ႇတႃႇႁေႃၸဝ်ႈၸိူဝ်းၼၼ်ႉ ဢၢပ်ႈၵႃႈၼႂ်းမိုဝ်းၶႃႈမၼ်းၵူၼ်းမၼ်းတင်းလၢႆသေလႄႈ ပၼ်ၵႂႃႇၵႃႈတီႈ ပိၼ်ႇႁႃႇတတ်ႉ လုၵ်ႈၸၢႆး တႃႇပရီႉမုၼ်ႇ လုၵ်ႈၸၢႆး ႁေႇၸုၼ်ႇ ၶုၼ်ႁေႃၶမ်း သူႉရီႉ ဢၼ်ယူႇၵႃႈတီႈဝဵင်း ထမ်ႇမသႅတ်ႉ ၼၼ်ႉလႄႈ၊-

19သင်ႇလၢတ်ႈၵႂႃႇလႄႈဝႃႈ၊ ၵွပ်ႈပိူဝ်ႈဢၼ်ၵဝ်ၶႃႈ ဢိၵ်ႇတင်းၸဝ်ႈ မီးတၢင်းဢၼ်ႁဵတ်းမိၵ်ႉသႃႇႁႃယႃႉ ၵေႃႉသေႈၵၼ်မိူၼ်ၸိူဝ်ႉၼင်ႇဢၼ်လႆႈပဵၼ်မႃးယဝ်ႉတီႈၸဝ်ႈပေႃႈၵဝ်ၶႃႈ ဢိၵ်ႇတင်းၸဝ်ႈပေႃႈၸဝ်ႈၼၼ်ႉလႄႈ ၵဝ်ၶႃႈဢဝ်ငိုၼ်းၶမ်းႁဵတ်းလၢၵ်ႈသွင်ႇပၼ်မႃးတီႈၸဝ်ႈဢေႃႈ။ ၶႅၼ်းတေႃႈၵႂႃႇလႄႈယႃႉမိၵ်ႉသႃႇႁႃယႃႉဢၼ်ႁဵတ်းလူၺ်ႈၵၼ်တင်း ပႃႇသႃႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉပႅတ်ႈ ႁႂ်ႈမၼ်းလႆႈဢွၵ်ႇသေၵႃႈတီႈၵဝ်ၶႃႈၼႆႉၵႂႃႇသေၵမ်း၊ ဝႃႈၼင်ႇၼႆဢေႃႈ။-

20ပိၼ်ႇႁႃႇတတ်ႉ ၼၼ်ႉ ထွမ်ႇဢဝ်ၵႂၢမ်းၶုၼ်လူင် ဢႃႇသႃႉ လႄႈ ပွႆႇၸႂ်ႉပူဝ်ႇမၼ်းတင်းလၢႆ ႁႂ်ႈၶီႇသိုၵ်းၵႂႃႇၵႃႈတီႈဝၢၼ်ႈဝဵင်း ဢီႉသရေႇလႃႉ လႄႈ ၶဝ်ၼၼ်ႉယႃႉၽဵဝ်ႈဝဵင်း ဢီႉယုၼ်ႇ ၊ ဝဵင်း တၢၼ်ႇ ၊ ဝဵင်း ဢႃႇပေႇလႃႉပႅတ်ႉမႃႇၶႃႉ ဢိၵ်ႇတင်းမိူင်း ၵိၼ်ႇၼီႇသရႅတ်ႉ တင်းမိူင်း ဢိၵ်ႇတင်းမိူင်း ၼပ်ႉထလီႉ တင်းမိူင်းဢေႃႈ။-

21ပႃႇသႃႉ ငိၼ်းလွင်ႈၼၼ်ႉသေယဝ်ႉ၊ ယင်းဢမ်ႇႁဵတ်းႁႂ်ႈဝဵင်း ရႃႇမႃႉ ယဝ်ႉတူဝ်ႈလႄႈ လႆႈယူႇၵႃႈတီႈဝဵင်း တီႉရၸႃႉ ဢေႃႈ။-

22မိူဝ်ႈၼၼ်ႉ ၶုၼ်လူင် ဢႃႇသႃႉ ၼၼ်ႉ ႁႂ်ႈဢဝ်ဢမိင်ႉၸဝ်ႈႁွင်ႉပၢဝ်ႇႁွင်ႉသေႃႇၵႃႈၼႂ်းမိူင်း ယူႉတႃႉ တင်းသဵင်ႈတင်းမူတ်းလႄႈ ဢမ်ႇလွတ်ႈသေၵေႃႉသေၵူၼ်း။ ၶဝ်ဢွၼ်ၵၼ်ဢဝ်မၢၵ်ႇႁိၼ်ၵႃႈတီႈဝဵင်း ရႃႇမႃႉ ဢိၵ်ႇတင်းမႆႉမၼ်းဢၼ် ပႃႇသႃႉ ဢဝ်တႄႇႁဵတ်းၸိူဝ်းၼၼ်ႉၵႂႃႇလႄႈ၊ ၶုၼ်လူင် ဢႃႇသႃႉ ၼၼ်ႉ ဢဝ်တႄႇႁဵတ်းဝဵင်း ၵေႇပႃႉ ၵႃႈၼႂ်းလိၼ် ပိၼ်ႇယႃႇမိၼ်ႇ ဢိၵ်ႇတင်းဝဵင်း မီႉၸပႃႇ ဢေႃႈ။-

23လွင်ႈတၢင်း ဢႃႇသႃႉ ၵႃႈဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းဢၼ်တၼ်းၶူဝ်းမၼ်းယႂ်ႇ၊ လွင်ႈတၢင်းၵႃႈဢၼ်မၼ်းႁဵတ်း၊ လွင်ႈတၢင်းဢၼ်တႄႇႁဵတ်းဝဵင်းတင်းလၢႆၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။ ၼႂ်းၼၼ်ႉ၊ မိူဝ်ႈဢၼ်မၼ်းဢသၢၵ်ႈယႂ်ႇၼၼ်ႉၸိုင် တၢင်းၶႆႈတၢင်းပဵၼ်ၸပ်းတီႈတိၼ်ၸဝ်ႈဢေႃႈ။-

24ဢႃႇသႃႉ ၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉ ၵႃႈၼႂ်းဝဵင်းၸဝ်ႈပေႃႈမၼ်း တႃႇဝိတ်ႈ ၼၼ်ႉဢေႃႈ။ ယူဝ်းသၽတ်ႉ လုၵ်ႈၸၢႆးမၼ်းၼၼ်ႉ ၼင်ႈႁၢင်ႈၼင်ႈႁေႃတၢင်တူဝ် ၸဝ်ႈပေႃႈမၼ်းဢေႃႈ။

25ၼႂ်းပီႊဢၼ် ဢႃႇသႃႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသွင်ပီႊၼၼ်ႉ၊ ၼႃႇတပ်ႉ လုၵ်ႈၸၢႆးၸဝ်ႈ ယေႇရူဝ်းပုမ်ႇ ၼၼ်ႉ ၸႃႉၼင်ႈႁၢင်ႈၼင်ႈႁေႃ ၵႃႈၼႂ်းမိူင်း ဢီႉသရေႇလႃႉ လႄႈဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ သွင်ပီႊဢေႃႈ။-

26မၼ်းၼၼ်ႉႁဵတ်းတူႉၸရိူၵ်ႈ သိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ၸွမ်းသဵၼ်ႈတၢင်းဢၼ်ၸဝ်ႈပေႃႈမၼ်းၸွမ်းၼၼ်ႉ ဢိၵ်ႇတင်းဢပႅတ်ႈတၢင်းဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉဢေႃႈ။

27ပႃႇသႃႉ လုၵ်ႈၸၢႆး ဢႁီႉယႃႉ မဵဝ်း ဢီႉသၶႃႇ ၼၼ်ႉ လွမ်ႁဵတ်းမုၵ်ႉႁဵတ်းၸိူဝ်းလႄႈ၊ ၼႂ်းမိူဝ်ႈဢၼ် ၼႃႇတပ်ႉ ဢိၵ်ႇတင်းမဵဝ်း ဢီႉသရေႇလႃႉ တင်းသဵင်ႈတင်းလူင် ယင်းတိုၵ်ႉလွမ်ႉဝဵင်း ၵီႉပေႉသုၼ်ႇ မိူင်း ၽီႉလိတ်ႉတီႉ ယူႇၼၼ်ႉၸိုင်၊ ပႃႇသႃႉ ၼၼ်ႉ ယႃႉမၼ်းပႅတ်ႈၵႃႈတီႈဝဵင်း ၵီႉပေႉသုၼ်ႇ ၼၼ်ႉဢေႃႈ။-

28ၼႂ်းပီႊဢၼ် ဢႃႇသႃႉ ၶုၼ်ႁေႃၶမ်း ယူႉတႃႉ ၼင်ႈႁၢင်ႈၼင်ႈႁေႃသၢမ်ပီႊၼၼ်ႉ၊ ပႃႇသႃႉ ယႃႉမၼ်းပႅတ်ႈသေလႄႈၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။-

29မိူဝ်ႈဢၼ်မၼ်းၼင်ႈႁၢင်ႈၼင်ႈႁေႃၼၼ်ႉ၊ မၼ်းယႃႉမဵဝ်း ယေႇရူဝ်းပုမ်ႇ ၵႃႈမီးပႅတ်ႈဢေႃႈ။ မၼ်းဢမ်ႇဝႆႉၵိုတ်းဝႆႉၵျၢၼ်ႇၵေႃႉဢၼ်လႆႈထူၺ်ႈၸႂ်ယူႇ ၼႂ်းမဵဝ်း ယေႇရူဝ်းပုမ်ႇ ၼၼ်ႉ သေၵေႃႉသေၵူၼ်းတေႃႇထိုင်ႁွတ်ႈႁႂ်ႈထၼ်ႈပေႃးလူႉလဵဝ်ပႅတ်ႈ ၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉဝႆႉ တီႈ ဢႁီႉယႃႉ ၵူၼ်းဝဵင်း သီႉလေႃႇ ၼၼ်ႉဢေႃႈ။-

30လွင်ႈမၼ်းၸမ်ႉ ပဵၼ်ၵွပ်ႈပိူဝ်ႈဢပႅတ်ႈဢၼ်တူဝ် ယေႇရူဝ်းပုမ်ႇ ၽိတ်းပိူင်ႈ ဢိၵ်ႇတင်းမၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈဢၼ်ဝႃႈ တၢင်းဢၼ်တိုၵ်းယူင်းဢၼ်မၼ်းတိုၵ်းယူင်း တၢင်းၸႂ်မႆႈၶႆႈၸႃႉထႃႇဝရႃႉၽြႃး ၽြႃးပဵၼ်ၸဝ်ႈ ဢီႉသရေႇလႃႉ ၼၼ်ႉဢေႃႈ။

31လွင်ႈတၢင်း ၼႃႇတပ်ႉ ၵႃႈဢၼ်ယင်းၵိုတ်းယင်းၵျၢၼ်ႇ လွင်ႈတၢင်းၵႃႈဢၼ်မၼ်းႁဵတ်းၼၼ်ႉ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

32ဢႃႇသႃႉ တင်း ပႃႇသႃႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉ ပဵၼ်သိုၵ်းပဵၼ်သိူဝ်ၵၼ်ယူႇၼႂ်းၸူဝ်ႈပၢၼ်သွင်ၶႃၼၼ်ႉတဵမ်တဵမ် ဢေႃႈ။

33ၼႂ်းပီႊဢၼ် ဢႃႇသႃႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသၢမ်ပီႊၼၼ်ႉ၊ ပႃႇသႃႉ လုၵ်ႈၸၢႆး ဢႁီႉယႃႉ ၼၼ်ႉ ၸႃႉၼင်ႈႁၢင်ႈၼင်ႈႁေႃ မိူင်း ဢီႉသရေႇလႃႉ ၵႃႈတီႈဝဵင်း တီႉရၸႃႉ လႄႈ ဢုပ်ႉပိူင်ႇၸၢမ်ႇၸႃးသၢဝ်းပၢႆသီႇပီႊဢေႃႈ။-

34မၼ်းၼၼ်ႉ ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ၸွမ်းသဵၼ်ႈတၢင်းဢၼ် ယေႇရူဝ်းပုမ်ႇ ၸွမ်း ဢိၵ်ႇတင်းဢပႅတ်ႈ တၢင်းဢၼ်မၼ်းႁႂ်ႈမဵဝ်းၵူၼ်း ဢီႉသရေႇလႃႉ ၽိတ်းပိူင်ႈၼၼ်ႉဢေႃႈ။

← Chapter 14 Jump to: Chapter 16 →