1 Kings 2 — Shan

1တႃႇဝိတ်ႈ ၼၼ်ႉ၊ မိူဝ်ႈဢၼ်ၸမ်ၶိင်ႇဢၼ်တၵ်းႁွတ်ႈထိုင်ဢၼိၵ်ႈၸႃႉၼၼ်ႉၸိုင်၊ ဝႆႉပိင်းၺၢပ်ႈတီႈလုၵ်ႈၸၢႆးၸဝ်ႈ သေႃးလမုၼ်ႇ လႄႈဝႃႈၸမ်ႉ၊-

2ၵဝ်တၵ်းလႆႈၵႂႃႇၸွမ်းသဵၼ်ႈတၢင်းဢၼ် ၵူၼ်းလိၼ်မိူင်းတင်းသဵင်ႈတင်းလူင်ၸၢင်ႈၵႂႃႇၸွမ်းၼၼ်ႉဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ ဢဝ်ႁႅင်းဢွၵ်ႇလႄႈႁဵတ်းၵေႃႉၸၢႆးတႃႉ။-

3ထွမ်ႇဢဝ်ၵႂၢမ်းဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်း သင်ႇလၢတ်ႈဝႆႉႁႂ်ႈၵႂႃႇမႃးၼႂ်းသဵၼ်ႈတၢင်းမၼ်းၸဝ်ႈလႄႈ ပႂ်ႉၵမ်ပႂ်ႉၸွမ်း ထုင်းၽိင်ႈတြႃး၊ ပိင်းၺၢပ်ႈၸဝ်ႈ၊ လွင်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉ၊ လွင်ႈတၢင်းဢၼ်မၼ်းၸဝ်ႈၶၢမ်ႇသၢၵ်ႈသေႇဝႆႉတင်းလၢႆ ၸွမ်းၵႃႈၼင်ႇဢၼ်ပႃးၼႂ်းၵျၢမ်းလိၵ်ႈပိင်းၺၢပ်ႈတီႉ မူဝ်းသေႇ ၼၼ်ႉ ႁႂ်ႈမႂ်းလႆႈလီလႆႈပဵၼ်ၵႃႈၼႂ်းၵႃႈဢၼ်မႂ်းၵႂႃႇၼၼ်ႉလႄႈ၊-

4ႁႂ်ႈထႃႇဝရႃႉၽြႃး ႁႂ်ႈၵႂၢမ်းမၼ်းၸဝ်ႈ ဢၼ်မၼ်းၸဝ်ႈဢဝ်လွင်ႈၵဝ်မီးဢမိင်ႉလႄႈဝႃႈ၊ ပေႃးလုၵ်ႈလၢၼ်မႂ်းၸိူဝ်းၼၼ်ႉ ႁဵတ်းသတီႉတီႈသဵၼ်ႈတၢင်းဢၼ်ၶဝ်တၵ်းၵႂႃႇၼၼ်ႉ ႁႂ်ႈလႆႈပႃးဢဝ်တၢင်းၸႂ်သဵင်ႈသဵင်ႈ တင်းႁူဝ်ၸႂ်သဵင်ႈသဵင်ႈၵႂႃႇမႃးၼႂ်း သမ်ႇမႃႇတြႃး ၵႃႈတီႈၽၢႆႇၼႃႈၵဝ်လႄႈယူႇၸိုင်၊ ၸိူဝ်ႉၶိူဝ်းမႂ်းတၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇမိူင်း ဢီႉသရေႇလႃႉ ဢမ်ႇလႆႈထၢတ်ႇ၊ ဝႃႈၼင်ႇၼႆၼၼ်ႉလႆႈတႄႇယူႇတႃႉ။-

5ပိူဝ်ႈဢၼ်မႂ်းႁူႉလွင်ႈဢၼ် ယႂႃႇၽႃႉ လုၵ်ႈၸၢႆး ၸေႇရူႉယႃႇ ႁဵတ်းတီႈၵဝ် ဢၼ်ဝႃႈလွင်ႈဢၼ်မၼ်းႁဵတ်းတီႈ ဢႃႉပၼႃး လုၵ်ႈၸၢႆး ၼေးရႃႉ ဢိၵ်ႇတင်း ဢႃႇမသႃႉ လုၵ်ႈၸၢႆး ယေႇသႃႇ ပူဝ်ႇၶျုၵ်ႈ ဢီႉသရေႇလႃႉ သွင်ပႃး ဢၼ်မၼ်းဢဝ်တၢႆလႄႈ ယင်းဢမ်ႇတိုၵ်းသိုၵ်းတိုၵ်းသိူဝ်လႄႈ ထွၵ်ႇလိူတ်ႈပႅတ်ႈသေယဝ်ႉ၊ ႁႂ်ႈသၢႆဢႅဝ်ဢၼ်မၼ်းႁတ်ႉဢႅဝ် ဢိၵ်ႇတင်းသွၵ်းတိၼ်ဢၼ်မၼ်းတိုဝ်းၼၼ်ႉ ၵူဝ်ႈၵိူၵ်ႇဝႆႉတင်းလိူတ်ႈ ဢၼ်တိုၵ်းသိုၵ်းတိုၵ်းသိူဝ်ၼၼ်ႉယူႇလႄႈ၊-

6ၸီႇယၢင်ႇၸွမ်းၵႃႈၼင်ႇဢၼ် ပိင်ႇၺႃႇမႂ်းမီးၼၼ်ႉသေလႄႈ ယႃႇပေႁႂ်ႈၵွၵ်းႁူဝ်မၼ်းဢၼ်ႁွၵ်ႇဢၼ်ၶၢဝ်ၼၼ်ႉလႆႈလူင်းၵႂႃႇ ၵႃႈတီႈမိူင်းမရၼႃႉၼိမ်ၼိမ်လီလီ။-

7တီႈလုၵ်ႈၸၢႆး ပႃႇၸီႉလေး ၵူၼ်းမိူင်း ၵီႉလတ်ႉ ၸိူဝ်းၼၼ်ႉၸမ်ႉ၊ ႁဵတ်းၵျေးၸူးလႄႈ ႁႂ်ႈၶဝ်လႆႈၶဝ်ႈပႃးၵႃႈၼႂ်းမုၵ်ႉၼႂ်းၸိူဝ်း ၶဝ်ၸိူဝ်းဢၼ်ၵိၼ်တီႈၶူင်ႇတီႈၵိၼ်ၸဝ်ႈတႃႉ။ မိူဝ်ႈဢၼ်ၵဝ်လႆႈဢွၵ်ႇပၢႆႈသေၵႃႈတီႈပီႈၸၢႆးမႂ်း ဢပႃႉသလုမ်ႇ ၼၼ်ႉၸိုင်၊ ၶဝ်ၼၼ်ႉႁဵတ်းၵျေးၸူးၸိူဝ်ႉၼင်ႇၼၼ်လႄႈ မႃးၸူးၵႃႈတီႈၵဝ်ဢေႃႈ။-

8သီႉမီႉ လုၵ်ႈၸၢႆး ၵေးရႃႉ ၵူၼ်းဝၢၼ်ႈ ပႃႇႁူႉရိမ်း မဵဝ်း ပိၼ်ႇယႃႇမိၼ်ႇ ၊ ၵေႃႉဢၼ်ႁဵတ်းတၢင်းဢၼ်ၵိၼ်ႇလႃႇ ဢၼ်ၵျၢမ်းထၢမ်းၼႃႇလူင်လၢင် ၵိၼ်ႇလႃႇၵဝ်ၼႂ်းမိုဝ်ႉဝၼ်းဢၼ်ၵဝ်ၵႂႃႇၵႃႈတီႈဝဵင်း မႁႃႇၼိမ်ႇ ၼၼ်ႉၼၼ်ႉ၊ မီးယူႇၵႃႈတီႈမႂ်းဢေႃႈ။ မိူဝ်ႈဢၼ်မၼ်းၼၼ်ႉ မႃးႁႂ်ႈလႆႈႁပ်ႉႁူဝ်တၢင်းၵဝ်ၵႃႈတီႈၼမ်ႉႁွင်ႈ ယေႃးတၢၼ်ႇ ၼၼ်ႉၸိုင်၊ ပိၵ်ႉသမ်ႉၵဝ်ဢဝ်ထႃႇဝရႃႉၽြႃးတိူင်ႇဝႃႈၵိၼ်ႇဝႃႈတီႈမၼ်းလႄႈဝႃႈ၊ ၵဝ်ဢမ်ႇဢဝ်မႂ်းတၢႆလူၺ်ႈလၢပ်ႇလူၺ်ႈလႅဝ်းၵူၺ်ႉ၊ ဝႃႈၼင်ႇၼႆဝႆႉသေၵေႃႈ၊-

9ၵေႃႉၼၼ်ႉၸိုင် မႂ်းယင်းဢမ်ႇလႆႈမၢတ်ႈပဵၼ်ၸိူဝ်ႉၼင်ႇ ၵေႃႉဢၼ်ဢမ်ႇမီးဢပႅတ်ႈ ၵွပ်ႈပိူဝ်ႈဢၼ်မႂ်းပဵၼ်ၵေႃႉဢၼ်လၵ်းလႅမ်ၼၼ်ႉလႄႈ ၵႃႈၼင်ႇဢၼ်မႂ်းႁူႉလွင်ႈဢၼ် ထုၵ်ႇလီၸီႇယၢင်ႇႁဵတ်းတီႈမၼ်းၸိူဝ်ႉၼင်ႇႁိုဝ်ၼၼ်ႉ၊ မႂ်းႁႂ်ႈၵွၵ်းႁူဝ်မၼ်းဢၼ်ႁွၵ်ႇ ဢၼ်ၶၢဝ်ၼၼ်ႉ လူင်းၵႂႃႇၵႃႈတီႈမိူင်းမရၼႃႉလူၺ်ႈလိူတ်ႈလူၺ်ႈယၢင်တႃႉ၊ ဝႃႈၼင်ႇၼႆသေယဝ်ႉ၊

10တႃႇဝိတ်ႈ ၼွၼ်းလပ်းလူၺ်ႈၵၼ်တင်းပူႇၸဝ်ႈမွၼ်ႇၸဝ်ႈသေလႄႈ ၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်း တႃႇဝိတ်ႈ ၼၼ်ႉဢေႃႈ။-

11တႃႇဝိတ်ႈ ၼၼ်ႉ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ သီႇသိပ်းပီႊတဵမ်တဵမ် ဢၼ်ဝႃႈဢုပ်ႉပိူင်ႇၸၢမ်ႇၸႃးၵႃႈတီႈဝဵင်း ႁေႇပြုၼ်ႇ ၸဵတ်းပီႊ၊ ဢုပ်ႉပိူင်ႇၸၢမ်ႇၸႃးၵႃႈတီႈဝဵင်း ယေႇရူႉသလႅမ်ႇ သၢမ်သိပ်းပၢႆသၢမ်ပီႊဢေႃႈ။-

12သေႃးလမုၼ်ႇ ၼင်ႈၵႃႈၼိူဝ်ရႃႇၸႃႉပလၢင်ႇ ၸဝ်ႈပေႃႈမၼ်း တႃႇဝိတ်ႈ ၼၼ်ႉလႄႈ ဢႃႇၼႃႇၸဝ်ႈတႄႇယူႇမၼ်ႈမၼ်ႈၶိူင်ႇၶိူင်ႇဢေႃႈ။

13လိုၼ်းၼၼ်ႉ ဢတေႃးၼီႉယႃႉ လုၵ်ႈၸၢႆး ႁၵ်ႉၵိတ်ႉ ၼၼ်ႉ မႃးၸူးၵႃႈတီႈ ပႃႇသသေးၽႃႉ ၸဝ်ႈမႄႈ သေႃးလမုၼ်ႇ လႄႈ မၼ်းထၢမ်တီႈမၼ်းၼၼ်ႉလႄႈဝႃႈ၊ မႂ်းမႃးလီလီငၢမ်းငၢမ်းႁိုဝ်။ ဝႃႈၼင်ႇၼႆသေယဝ်ႉ၊ မၼ်းၼၼ်ႉၶိုၼ်းလၢတ်ႈလႄႈဝႃႈ၊ မႃးလီလီငၢမ်းငၢမ်းၶႃႈဢေႃႈ၊ ဝႃႈၼင်ႇၼႆလႄႈသမ်ႉလၢတ်ႈလႄႈဝႃႈ၊-

14ၵဝ်ၶႃႈမီးတီႈလၢတ်ႈၸိူဝ်ႉၼိုင်ႈပိူင်ၼိုင်ႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၶိုၼ်းလၢတ်ႈလႄႈဝႃႈ၊ လၢတ်ႈသေၵမ်း၊ ဝႃႈၼင်ႇၼႆဢေႃႈ။-

15မၼ်းၼၼ်ႉလၢတ်ႈလႄႈဝႃႈ၊ ၸဝ်ႈမႄႈႁူႉလွင်ႈဢၼ်သိုင်ႇၸိုင်ႈဝၢၼ်ႈမိူင်းႁွတ်ႈထိုင် ၵႃႈၼႂ်းမိုဝ်းၵဝ်ၶႃႈလႄႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၽွမ်ႉၵၼ်ဝၢႆႇၼႃႈၸူးၵဝ်ၶႃႈ ႁႂ်ႈၵဝ်ၶႃႈလႆႈဢုပ်ႉပိူင်ႇၸၢမ်ႇၸႃးၼၼ်ႉယူႇၶႃႈဢေႃႈ၊ ၵူၺ်းၵႃႈ သိုင်ႇၸိုင်ႈဝၢၼ်ႈမိူင်း ငႅၵ်းပိူင်ႈၵႂႃႇလႄႈႁွတ်ႈထိုင်ၵႃႈၼႂ်းမိုဝ်းၸဝ်ႈၼွင်ႉၶႃႈယဝ်ႉ။ လွင်ႈမၼ်းၸမ်ႉ ထႃႇဝရႃႉၽြႃးမီးဢလူဝ်ႇၸိူဝ်ႉၼင်ႇၼၼ်ၶႃႈဢေႃႈ။-

16မိူဝ်ႈလဵဝ်ၼႆႉၸိုင်၊ ၵဝ်ၶႃႈၶႂ်ႈယွၼ်းဢဝ်သူးသေၸိူဝ်ႉသေပိူင်တီႈၸဝ်ႈမႄႈၶႃႈဢေႃႈ။ ယႃႇပေထဵင်ပႅတ်ႈသေၵမ်း၊ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ လၢတ်ႈသေၵမ်း၊ ဝႃႈၼင်ႇၼႆဢေႃႈ။-

17မၼ်းၼၼ်ႉၵေႃႈလၢတ်ႈလႄႈဝႃႈ၊ ၶႅၼ်းတေႃႈလဝ်ႊလၢတ်ႈႁႂ်ႈၶုၼ်လူင် သေႃးလမုၼ်ႇ ဢဝ် ဢၽီႉသၵ်ႉ ၵူၼ်းယိင်းဝဵင်း သူႉၼိမ်ႇ ၼၼ်ႉ ပၼ်ၵၼ်တင်းၵဝ်ၶႃႈသေၵမ်း။ ၶုၼ်လူင်ၼၼ်ႉတၵ်းဢမ်ႇထဵင်ပႅတ်ႈၸဝ်ႈမႄႈလႆႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

18ပႃႇသသေးၽႃႉ ၶိုၼ်းလၢတ်ႈလႄႈဝႃႈ၊ လီယဝ်ႉ။ တၵ်းလဝ်ႊလၢတ်ႈထိုင်ႁူၶုၼ်ႁေႃၶမ်းပုၼ်ႈမႂ်းဢေႃႈ၊ ဝႃႈၼင်ႇၼႆသေယဝ်ႉ၊-

19ပႃႇသသေးၽႃႉ ၵႂႃႇၸူးၵႃႈတီႈၶုၼ်လူင် သေႃးလမုၼ်ႇ ႁႂ်ႈလႆႈလဝ်ႊလၢတ်ႈထိုင်ႁူ ၶုၼ်ႁေႃၶမ်းပုၼ်ႈ ဢတေႃးၼီႉယႃႉ ၼၼ်ႉဢေႃႈ။ ၶုၼ်ႁေႃၶမ်းလုၵ်ႉႁႂ်ႈလႆႈႁႄႉႁပ်ႉႁူဝ်တၢင်းလႄႈ ၵူမ်ႈၵွမ်းႁူဝ်သေယဝ်ႉ၊ ၼင်ႈယူႇၵႃႈၼိူဝ်ရႃႇၸႃႉပလၢင်ႇၸဝ်ႈသေလႄႈ၊ ၸီႇယၢင်ႇႁႂ်ႈဢဝ်ပလၢင်ႇဝႆႉပုၼ်ႈဢၼ်မႄႈၸဝ်ႈတၵ်းၼင်ႈလႄႈ မၼ်းၼၼ်ႉၼင်ႈယူႇၵႃႈတီႈၽၢႆႇၶႂႃၸဝ်ႈဢေႃႈ။-

20မိူဝ်ႈၼၼ်ႉမၼ်းလဝ်ႊလၢတ်ႈလႄႈဝႃႈ၊ ၶႂ်ႈယွၼ်းဢဝ်သူးဢၼ်လဵၵ်ႉဢၼ်ဢွၼ်ႇၸိူဝ်ႉၼိုင်ႈပိူင်ၼိုင်ႈလႄႈ ယႃႇပေထဵင်ပႅတ်ႈသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်းမီးဢမိင်ႉလႄႈဝႃႈ၊ ၸဝ်ႈမႄႈ။ ယွၼ်းသေၵမ်း။ ၵဝ်ၶႃႈတၵ်းဢမ်ႇထဵင်ပႅတ်ႈၶႃႈၵူၺ်ႉ၊ ဝႃႈၼင်ႇၼႆဢေႃႈ။-

21မၼ်းၵေႃႈလဝ်ႊယွၼ်းလႄႈဝႃႈ၊ ၶႅၼ်းတေႃႈဢဝ် ဢၽီႉသၵ်ႉ ၵူၼ်းယိင်းဝဵင်း သူႉၼိမ်ႇ ၼၼ်ႉပၼ်ၵၼ်တင်းပီႈဢၢႆႈၸဝ်ႈ ဢတေႃးၼီႉယႃႉ သေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

22ၶုၼ်လူင် သေႃးလမုၼ်ႇ ၶိုၼ်းလၢတ်ႈတီႈမႄႈၸဝ်ႈလႄႈဝႃႈ၊ ႁဵတ်းသင်လႄႈယွၼ်းဢဝ် ဢၽီႉသၵ်ႉ ၵူၼ်းယိင်းဝဵင်း သူႉၼိမ်ႇ ၼၼ်ႉၵူၺ်းပုၼ်ႈ ဢတေႃးၼီႉယႃႉ ၼင်ႇႁိုဝ်။ သိုင်ႇၸိုင်ႈဝၢၼ်ႈမိူင်းၵေႃႈယွၼ်းဢဝ်ပုၼ်ႈမၼ်းသေၵမ်း။ မၼ်းၼၼ်ႉပဵၼ်ၸဝ်ႈပီႈၵဝ်ၶႃႈဢေႃႈ။ ယွၼ်းဢဝ်ပုၼ်ႈမၼ်းဢိၵ်ႇတင်း ယိတ်ႈပရေႃးႁဵၵ်ႈ ဢႃႇပျႃႇထႃႇ တင်း ယႂႃႇၽႃႉ လုၵ်ႈၸၢႆး ၸေႇရူႉယႃႇ ၸိူဝ်းၼၼ်ႉသေၵမ်း၊ ဝႃႈၼင်ႇၼႆသေယဝ်ႉ၊-

23ၶုၼ်လူင် သေႃးလမုၼ်ႇ ဢဝ်ထႃႇဝရႃႉၽြႃးတိူင်ႇဝႃႈၵိၼ်ႇဝႃႈလႄႈဝႃႈ၊ ပေႃးတၢင်းဢၼ် ဢတေႃးၼီႉယႃႉ ယွၼ်းၸိူဝ်ႉၼင်ႇၼၼ်မႅၼ်ႈၼၼ်ႉ ဢမ်ႇပဵၼ်တၢင်းဢၼ်ႁႂ်ႈဢသၢၵ်ႈမၼ်းတၢႆၸိုင်၊ ယင်းဢမ်ႇၵႃးဢၼ်ၼၼ်ႉလႄႈ ႁႂ်ႈၽြႃးပဵၼ်ၸဝ်ႈႁဵတ်းလိူဝ်တွၼ်းၼႃႇသေၼၼ်ႉတီႈၵဝ်သေၵမ်းလူၺ်ႈ။-

24ပိူဝ်ႈၼႆလႄႈ မိူဝ်ႈလဵဝ်ၼႆႉၸိုင်၊ ၵႃႈၼင်ႇဢၼ်ထႃႇဝရႃႉၽြႃးဢၼ်ႁႂ်ႈၵဝ်မၼ်ႈၶိူင်ႇလႄႈ ဢဝ်ၵဝ်တၢင်ႇဝႆႉၵႃႈၼိူဝ်ရႃႇၸႃႉပလၢင်ႇၸဝ်ႈပေႃႈၵဝ် တႃႇဝိတ်ႈ သေလႄႈ ပၼ်ႁေႃတီႈယူႇၵဝ်မႅၼ်ႈၸွမ်းၼင်ႇၵတီႉၸဝ်ႈၼၼ်ႉ ယင်းဢသၢၵ်ႈလိပ်းယူႇၼၼ်ႉ ဢတေႃးၼီႉယႃႉ တၵ်းလႆႈၶၢမ်ႇတၢႆဝၼ်းမိူဝ်ႈၼႆႉဢေႃႈ၊ ဝႃႈၼင်ႇၼႆသေယဝ်ႉ၊-

25ၶုၼ်လူင် သေႃးလမုၼ်ႇ ပွႆႇၸႂ်ႉ ပေႇၼႃႇယႃႉ လုၵ်ႈၸၢႆး ယေႃးယတႃႉ ၵႂႃႇလႄႈ ႁဵတ်းတီႈမၼ်းၼၼ်ႉႁႂ်ႈထၼ်ႈပေႃးတၢႆဢေႃႈ။

26တီႈယိတ်ႈပရေႃးႁဵၵ်ႈ ဢႃႇပျႃႇထႃႇ ၵေႃႈ၊ ၶုၼ်ႁေႃၶမ်းမီးဢမိင်ႉလႄႈဝႃႈ၊ မႂ်းၵႂႃႇၸူးၵႃႈတီႈဝဵင်း ဢႃႇၼသုတ်ႉ တီႈတူင်ႈၼႃး ဢၼ်မႂ်းပိူင်ႇပုၼ်ႉသေတႃႉ။ ပိၵ်ႉသမ်ႉမႂ်းထိူၵ်ႈၶၢမ်ႇတၢႆသေၵေႃႈ၊ ပွၵ်ႈၼႆႉၵဝ်ဢမ်ႇၸီႇယၢင်ႇႁႂ်ႈလႆႈတၢႆ။ လွင်ႈမၼ်းၸမ်ႉ မႂ်းလႆႈႁၢပ်ႇတိူၵ်ႈတႃႇထႃႇဝရႃႉၽြႃး ၽြႃးပဵၼ်ၸဝ်ႈ ဢွၼ်ၼႃႈဢွၼ်ႁူဝ်ၸဝ်ႈပေႃႈၵဝ် တႃႇဝိတ်ႈ ၼၼ်ႉမႃးယဝ်ႉ။ မႂ်းလႆႈၶၢမ်ႇတုၵ်ႉၶႃႉတၢင်းၽၢၼ် ၵႃႈၼႂ်းလွင်ႈတၢင်းၵႃႈဢၼ်ၸဝ်ႈပေႃႈၵဝ်ၶၢမ်ႇတုၵ်ႉၶႃႉတၢင်းၽၢၼ်ၵူႈၸိူဝ်ႉၵူႈပိူင်ၼၼ်ႉမႃးယဝ်ႉ၊ ဝႃႈၼင်ႇၼႆဢေႃႈ။-

27သေႃးလမုၼ်ႇ ႁေႃႈ ဢႃႇပျႃႇထႃႇ ဢွၵ်ႇသေၵႃႈၼႂ်းဢရႃႇ ဢၼ်လႆႈပဵၼ်ယိတ်ႈပရေႃးႁဵၵ်ႈတီႈထႃႇဝရႃႉၽြႃး ႁႂ်ႈၵႂၢမ်းဢၼ်ထႃႇဝရႃႉၽြႃး ဢဝ်လွင်ႈၸိူဝ်ႉၶိူဝ်း ဢေးလီႉ လႄႈ မီးဢမိင်ႉဝႆႉၵႃႈတီႈဝဵင်း သီႉလေႃႇ ၼၼ်ႉ လႆႈပျေႉၸုမ်ႇဢေႃႈ။

28ယႂႃႇၽႃႉ လႆႈငိၼ်းသတၢင်းသဵင်ၶၢဝ်ႇၼၼ်ႉသေယဝ်ႉ၊ ပိၵ်ႉသမ်ႉမၼ်းဢမ်ႇၸွမ်းလင် ဢပႃႉသလုမ်ႇ သေၵေႃႈ ၵွပ်ႈပိူဝ်ႈဢၼ်မၼ်းလႆႈ ၸွမ်းလင် ဢတေႃးၼီႉယႃႉ ယဝ်ႉလႄႈ ယႂႃႇၽႃႉ ၼၼ်ႉပၢႆႈၵႂႃႇၸူး ၵႃႈတီႈမူဝ်းၵႃႇထႃႇဝရႃႉၽြႃးလႄႈ ယိပ်းၵမ်ၶဝ်လႅမ်ယိတ်ႈပလၢင်ႇယူႇဢေႃႈ။-

29ပိူၼ်ႈလဝ်ႊလၢတ်ႈလွင်ႈဢၼ် ယႂႃႇၽႃႉ ပၢႆႈၵႂႃႇၸူးၵႃႈတီႈမူဝ်းၵႃႇထႃႇဝရႃႉၽြႃးလႄႈ မီးယူႇၵႃႈတီႈယိတ်ႈပလၢင်ႇၼၼ်ႉ တီႈၶုၼ်လူင် သေႃးလမုၼ်ႇ ၼၼ်ႉလႄႈ သေႃးလမုၼ်ႇ ပွႆႇၸႂ်ႉ ပေႇၼႃႇယႃႉ လုၵ်ႈၸၢႆး ယေႃးယတႃႉ ၵႂႃႇလႄႈ မီးဢမိင်ႉဝႃႈ၊ ၵႂႃႇလႄႈႁဵတ်းတီႈမၼ်းတႃႉ၊ ဝႃႈၼင်ႇၼႆဢေႃႈ။-

30ပေႇၼႃႇယႃႉ ၼၼ်ႉ ႁွတ်ႈထိုင်ၵႃႈတီႈမူဝ်းၵႃႇထႃႇဝရႃႉၽြႃးလႄႈလၢတ်ႈဝႃႈ၊ ၶုၼ်ႁေႃၶမ်းမီးဢမိင်ႉလႄႈဝႃႈ၊ ဢွၵ်ႇမႃးတႃႉ၊ ဝႃႈၼင်ႇၼႆယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလၢတ်ႈလႄႈဝႃႈ၊ ၵဝ်ဢမ်ႇဢွၵ်ႇ၊ ၵဝ်တၵ်းၶၢမ်ႇတၢႆၵႃႈတီႈၼႆႈဢေႃႈ၊ ဝႃႈၼင်ႇၼႆဢေႃႈ။ ပေႇၼႃႇယႃႉ ၵေႃႈၶိုၼ်းလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ယႂႃႇၽႃႉ ၶိုၼ်းလၢတ်ႈၸိူဝ်ႉၼင်ႇၼႆၸိူဝ်ႉၼင်ႇၼၼ်တီႈၶႃႈ၊ ဝႃႈၼင်ႇၼႆသေယဝ်ႉ၊-

31ၶုၼ်ႁေႃၶမ်းလၢတ်ႈလႄႈဝႃႈ၊ ႁဵတ်းၸွမ်းၵႃႈၼင်ႇဢၼ်မၼ်းဝႃႈၼၼ်ႉသေလႄႈ ႁဵတ်းတီႈမၼ်းလႄႈ ဢဝ်မၼ်းသၢင်းၵျူဝ်ႇႁႂ်ႈမႂ်းလႆႈပႄႇပႅတ်ႈလိူတ်ႈ ဢၼ်ယင်းဢမ်ႇမီးလွင်ႈမၼ်းလႄႈ ယႂႃႇၽႃႉ ထွၵ်ႇပႅတ်ႈၼၼ်ႉသေၵႃႈၼိူဝ်ၵဝ် ဢိၵ်ႇတင်းပီႈၼွင်ႉၸိူဝ်ႉၶိူဝ်းၵဝ်တႃႉ။-

32ထႃႇဝရႃႉၽြႃးတၵ်းႁႂ်ႈလိူတ်ႈမၼ်းႁွတ်ႈထိုင်ၵႃႈၼိူဝ်ႁူဝ်မၼ်း ၵွပ်ႈပိူဝ်ႈဢၼ်ၸဝ်ႈပေႃႈၵဝ် တႃႇဝိတ်ႈ ယင်းဢမ်ႇႁူႉလႄႈ မၼ်းဢဝ်သွင်ၵေႃႉဢၼ်ယဵင်ႈၶႅၼ်းသိုဝ်ႈတေႃႇမျၢတ်ႈလီၼႃႇသေမၼ်း ဢၼ်ဝႃႈ ဢႃႉပၼႃး လုၵ်ႈၸၢႆး ၼေးရႃႉ ပူဝ်ႇၶျုၵ်ႈ ဢီႉသရေႇလႃႉ တင်း ဢႃႇမသႃႉ လုၵ်ႈၸၢႆး ယေႇသႃႇ ပူဝ်ႇၶျုၵ်ႈ ယူႉတႃႉ ၸိူဝ်းၼၼ်ႉတၢႆၼၼ်ႉဢေႃႈ။-

33ၼင်ႇၼၼ်လႄႈ လိူတ်ႈသွင်ၶႃၼၼ်ႉတၵ်းႁွတ်ႈထိုင်ၵႃႈၼိူဝ်ႁူဝ် ယႂႃႇၽႃႉ ၊ ႁူဝ်လုၵ်ႈႁူဝ်လၢၼ်မၼ်းတင်းလၢႆယူႇတႃႇသေႇဢမ်ႇထၢတ်ႇဢေႃႈ။ တၢင်းဢၼ်ၼိမ်ဢၼ်လီဢၼ်ထႃႇဝရႃႉၽြႃးပၼ်ၼၼ်ႉ တၵ်းႁွတ်ႈထိုင်ၵႃႈၼိူဝ် တႃႇဝိတ်ႈ ဢိၵ်ႇတင်းလုၵ်ႈၸဝ်ႈလၢၼ်ၸဝ်ႈတင်းႁၢင်ႈႁေႃၸဝ်ႈ၊ ရႃႇၸႃႉပလၢင်ႇၸဝ်ႈယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆလႄႈ၊-

34ပေႇၼႃႇယႃႉ လုၵ်ႈၸၢႆး ယေႃးယတႃႉ ၼၼ်ႉ ၶိုၼ်ႈၸူးလႄႈႁဵတ်းတီႈမၼ်းၼၼ်ႉထၼ်ႈပေႃးတၢႆလႄႈ မၼ်းၼၼ်ႉလႆႈၶၢမ်ႇတၢင်းဢၼ်သၢင်းၵျူဝ်ႇၵႃႈတီႈႁိူၼ်းမၼ်းၵႃႈၼႂ်းထိူၼ်ႇၼၼ်ႉဢေႃႈ။-

35ၶုၼ်ႁေႃၶမ်းၶၢၼ်း ပေႇၼႃႇယႃႉ လုၵ်ႈၸၢႆး ယေႃးယတႃႉ ဝႆႉတၢင်တူဝ်မၼ်း ၼႂ်းဢရႃႇပူဝ်ႇၶျုၵ်ႈလႄႈ ယိတ်ႈပရေႃးႁဵၵ်ႈ ၸႃႇတုၵ်ႉ ၵေႃႈ ၶုၼ်ႁေႃၶမ်းဢဝ်ၶၢၼ်းဝႆႉတၢင်တူဝ် ဢႃႇပျႃႇထႃႇ ၼၼ်ႉဢေႃႈ။

36လႆႈသမ်ႉ ၶုၼ်ႁေႃၶမ်းပွႆႇၸႂ်ႉလႄႈႁွင်ႉဢဝ် သီႉမီႉ သေယဝ်ႉ မီးဢမိင်ႉတီႈမၼ်းလႄႈဝႃႈ၊ မႂ်းတၵ်းလႆႈႁဵတ်းႁိူၼ်းၵႃႈၼႂ်းဝဵင်း ယေႇရူႉသလႅမ်ႇ လႄႈယူႇၵႃႈတီႈၼၼ်ႈဢေႃႈ။ ယႃႇပေဢွၵ်ႇၵႃႈၼွၵ်ႈလႄႈၵႂႃႇၵႃႈတီႈလႂ်။-

37ႁဵတ်းသတီႉလႄႈမၢတ်ႈတွင်းလွင်ႈဢၼ်မႂ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ၼႂ်းဝၼ်းဢၼ် မႂ်းဢွၵ်ႇၵႃႈၼွၵ်ႈလႄႈ ၶၢမ်ႈၼမ်ႉႁွင်ႈ ၵီႉတြုၼ်ႇ ၼၼ်ႉဝႆႉတႃႉ။ လိူတ်ႈမႂ်းတၵ်းႁွတ်ႈထိုင်ၵႃႈၼိူဝ်ႁူဝ်မႂ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

38သီႉမီႉ ၶိုၼ်းလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ဢမိင်ႉၸဝ်ႈလီတီႈၶႃႈဢေႃႈ။ ၵႃႈၼင်ႇဢၼ်ၸဝ်ႈၵဝ်ၶႃႈၸဝ်ႈၶုၼ်လူင်မီးဢမိင်ႉၼၼ်ႉ၊ ၶႃႈၸဝ်ႈႁဝ်းတၵ်းႁဵတ်းၸွမ်းတီႈၶႃႈဢေႃႈ၊ ဝႃႈၼင်ႇၼႆလႄႈ သီႉမီႉ ယူႇၵႃႈၼႂ်းဝဵင်း ယေႇရူႉသလႅမ်ႇ မိုဝ်ႉဝၼ်းႁိုင်ၼႃႇဢေႃႈ။-

39ၵူၺ်းၵႃႈ မိူဝ်ႈဢၼ်ပူၼ်ႉသေသၢမ်ပီႊယဝ်ႉၼၼ်ႉၸိုင်၊ ၶႃႈ သီႉမီႉ ၼၼ်ႉသွင်ၵေႃႉဢွၵ်ႇပၢႆႈၵႂႃႇၸူးၵႃႈတီႈ ဢႃႇၶိတ်ႉ လုၵ်ႈၸၢႆး မႃႇၶႃႇ ၶုၼ်လူင် ၵႃႇသႃႉ လႄႈ ပိူၼ်ႈမွၵ်ႇလၢတ်ႈတီႈ သီႉမီႉ ၼၼ်ႉလႄႈဝႃႈ၊ တူၺ်းၶႃႈလူး၊ ၶႃႈၸဝ်ႈႁဝ်းၸိူဝ်းၼၼ်ႉ မီးယူႇၵႃႈတီႈဝဵင်း ၵႃႇသႃႉ ၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

40သီႉမီႉ လုၵ်ႉလႄႈႁၢင်ႈၵွပ်းလီႈမၼ်းသေလႄႈ ၵႂႃႇၵႃႈတီႈဝဵင်း ၵႃႇသႃႉ ၸူးၵႃႈတီႈ ဢႃႇၶိတ်ႉ ႁႂ်ႈလႆႈႁႃၶႃႈမၼ်းၸိူဝ်းၼၼ်ႉလႄႈ ႁွင်ႉဢဝ်ၶႃႈမၼ်းၸိူဝ်းၼၼ်ႉသေၵႃႈတီႈ ဝဵင်း ၵႃႇသႃႉ ၼၼ်ႉ ၶိုၼ်းမႃးဢေႃႈ။-

41မိူဝ်ႈဢၼ် သေႃးလမုၼ်ႇ ငိၼ်းလွင်ႈဢၼ် သီႉမီႉ ဢွၵ်ႇသေၵႃႈၼႂ်းဝဵင်း ယေႇရူႉသလႅမ်ႇ ၵႂႃႇၵႃႈတီႈဝဵင်း ၵႃႇသႃႉ လႄႈ ၶိုၼ်းမႃးၼၼ်ႉၸိုင်၊-

42ၶုၼ်လူင်ၼၼ်ႉပွႆႇၸႂ်ႉလႄႈ ႁွင်ႉဢဝ် သီႉမီႉ သေလႄႈ မီးဢမိင်ႉလႄႈဝႃႈ၊ ၵဝ်ႁႂ်ႈမႂ်းဢဝ်ထႃႇဝရႃႉၽြႃးတိူင်ႇဝႃႈၵိၼ်ႇဝႃႈလႄႈ ပၼ်သတီႉဝႆႉတီႈမႂ်းလႄႈဝႃႈ၊ ႁဵတ်းသတီႉလႄႈမၢတ်ႈတွင်းလွင်ႈဢၼ်မႂ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ် ၼႂ်းဝၼ်းဢၼ်မႂ်းဢွၵ်ႇၵႃႈၼွၵ်ႈလႄႈ ၵႂႃႇတၢင်ႇတီႈတၢင်ႇလႅၼ်ၼၼ်ႉဝႆႉတႃႉ၊ ဝႃႈၼင်ႇၼႆဝႆႉယဝ်ႉဢမ်ႇၸႂ်ႈႁိုဝ်။ မႂ်းၵေႃႈႁပ်ႉတုင်းဢဝ်လႄႈဝႃႈ၊ ဢမိင်ႉၸဝ်ႈဢၼ်ၶႃႈၸဝ်ႈလႆႈငိၼ်းၼၼ်ႉလီတီႈၶႃႈဢေႃႈ၊ ဝႃႈၼင်ႇၼႆဝႆႉယဝ်ႉဢမ်ႇၸႂ်ႈႁိုဝ်။-

43ပိူဝ်ႈဢၼ်ပဵၼ်ၼင်ႇၼႆလႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢမ်ႇပႂ်ႉသဵတ်ႈၸႃႇထႃႇဝရႃႉၽြႃး ဢိၵ်ႇတင်းပိင်းၺၢပ်ႈဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉၼင်ႇႁိုဝ်။ ဝႃႈၼင်ႇၼႆသေယဝ်ႉ၊-

44ၶုၼ်ႁေႃၶမ်းသမ်ႉမီးဢမိင်ႉတီႈ သီႉမီႉ ထႅင်ႈလႄႈဝႃႈ၊ မႂ်းႁူႉတူႉၸရိူၵ်ႈၵႃႈမီးဢၼ်မႂ်းယၢမ်ႈလႆႈႁဵတ်းတီႈၸဝ်ႈပေႃႈၵဝ် တႃႇဝိတ်ႈ ၸွမ်းၵႃႈၼင်ႇဢၼ်ထုၵ်ႇၸႂ်ၵျိူၵ်ႈၸႂ်မႂ်းၼၼ်ႉယူႇဢေႃႈ။ ပိူဝ်ႈၼႆလႄႈ ထႃႇဝရႃႉၽြႃးတၵ်းႁႂ်ႈတူႉၸရိူၵ်ႈဢပႅတ်ႈမႂ်း ႁွတ်ႈထိုင်ၵႃႈၼိူဝ်ႁူဝ်မႂ်းဢေႃႈ။-